Huahuacunata disciplinana nishpaca paicunataca uchillamanta alli yachachinatami nisha nin. Shinallataj ima mana allita rurajpipish yaya mamaca utcami ayudana can. Ashtahuancarin alli yuyaicunata yachachijpica huahuacunaca alli decisioncunatami agllangacuna.

Cunan punllacunapica yaya mamacunaca huahuacunata mana disciplinancunachu. Cutin shujtajcunaca, ‘huahuacunata mana alli sintichishunchu’ nishpami imata rurajpipish imata mana nincuna. Pero alli yaya mamacunaca huahuacuna allita rurachunmi yachachina can.

Pamela huarmica: “Shuj barco mana volanteta charishpaca maitapish rishpami llaqui tucunga. Chashnallatajmi huahuacunaca mana allita rurashpaca achca llaquicunata charingacuna. Chaimantami uchilla cajpiraj imata ruranata, imata mana ruranata yachachina canchij” ninmi.

Cambaj huahua mana cazujpica llaquicunatami charingui nishpa intindichi. Cutin tucuipi cazujpica paita felicitai.

Shuj huarmica: “Achca huahuacunaca yaya mamataca mana cazuncunachu. Chaimantami ñuca huahuacuna cazujpica paicunataca felicitanata yachani. Chashna rurajpimi paicunaca ima consejota cujpica chasquinllacuna” ninmi.

BIBLIAPICA: “Maijan imata tarpujca, chaillatatajmi tandanga” ninmi (Gálatas 6:7).

Huahuacunata disciplinagricushpaca pai mashna huatata charijta, ima shina yuyajta, imata rurashcata alli ricui. Imamanta disciplinacushcata intindichunca paicuna mana alli rurashcatami alli intindichina cangui. Por ejemplo, paicunaca manachari celularta alli utilizarcacuna, chaipimi paicunataca asha tiempota celularta ama utilizachun ni tucungui. Ashtahuancarin yaya mamacunaca imamantapish ama culirangapajmi esforzarina can.

Shuj runaca: “Mandashca jahua ñuca huahua mana cazujpica paitaca cꞌuyaihuanmi consejota cuni. Cutin mana yuyashpa pandarijpica imamanta pandarishcatami alli intindichini” ninmi.

BIBLIAPICA: “Yaya mamapish, cancunapaj huahuacunata ama pꞌiñachichijchu. Cancuna pꞌiñachijpica, ña mana imata ashtahuan uyanachingachu” ninmi (Colosenses 3:21, QC, 1989).

Yaya mamacuna cꞌuyaihuan huahuacunata disciplinajpica paicunaca tucuipimi cazungacuna. Shinallataj alli causangapajmi achcata esforzaringacuna.

Daniel runaca: “Ñuca huahua pandarijpica pai pandarishcallataca mana rimanichu. Chaipaj randica, ‘cantaca achcatami cꞌuyani, alli decisioncunata japishcamantami cushilla cani, can pandarishpapish cambiai tucunguimi, ñucapish cambaj mamitapish ayudashunmi’ nircanchijmi” ninmi.

BIBLIAPICA: “Cꞌuyaita charijca llaquita apajmi, alli shunguyujmi” ninmi (1 Corintios 13:4).