1, 2. a) ¿Armagedón macanacui chayamugrijpica imamantataj cushilla sintirinchij? b) ¿Cai yachaipica ima tapuicunamantataj yachashun?

GENTECUNACA Armagedón shimita uyashpaca bombacunahuan tugyachishpami tucuita tucuchinga. Mana cashpaca jatun llaquicuna ricurishpami tucuita tucuchinga nishpami yuyancuna. Shinapish Bibliapica Armagedonmanta parlashpaca alli huillaicunatami parlacun. Chaita yachashpami cushilla sintirinchij (Apocalipsis 1:3). Armagedón macanacuica mana tucui gentecunatachu tucuchinga. Ashtahuanpish quishpichingami. ¿Chaitaca ima shinataj ruranga?

² Bibliapi nishca shinaca Armagedón jatun macanacuipica Jehová Diosca Allpata mandajcunata, millai gentecunatami tucuchinga. Pero allita rurajcunallatami quishpichinga. Shinallataj cai Allpata tucuchichunpish mana saquingachu (Apocalipsis 11:18). Caicunata alli intindingapajca cai tapuicunamantami yachashun. ¿Armagedonca imataj can? ¿Armagedón manaraj chayamujpica imataj tucunga? ¿Chai punllacunapi quishpiringapaj, ñucanchij feta sinchiyachingapajca imatataj rurana canchij?

3. a) ¿Armagedón shimica imatataj nisha nin? b) Apocalipsis 16:14, 16-pi nishca shinaca ¿imamantataj Armagedonca mana shuj llajta o shuj lugar cashcata yachanchij?

³ (Apocalipsis 16:14, 16-ta liyipai). Armagedón shimica Bibliapica shuj cutinllami ricurin. Cai shimica hebreo rimaipica Meguido urcu nisha ninmi (Apocalipsis 16:16). Meguidoca Israel llajtapi saquirij shuj ciudadmi carca (Josué 17:11). Armagedonmanta parlashpaca mana shuj lugarmantachu parlacun. ¿Imamantataj chaita ninchij? Puntapica, Meguido urcuca mana tiyanchu. Ishquipica, Meguido llajta ladocunaca uchillami  can. Tucui Allpa pachapi mandajcuna, paicunapaj soldadocuna, paicunapaj armacunapish chaipica mana cabinmanchu. Quimsapica, mandajcunaca Armagedonpica tucui llajtacunapimi Diosta sirvijcunata llaquichisha ningacuna. Cai yuyaicunata ricushpami Armagedonca mana shuj llajta o shuj lugar cashcata intindinchij. ¿Shinashpaca Armagedonca imataj can? Armagedonpica tucui mandajcunami Diosta sirvijcunahuan macanacungapaj tandanacungacuna (Apocalipsis 16:14). Chaimantami Jehová Diosca chai mandajcunahuan macanacunga. Chaitami Armagedón macanacui ninchij.

4. ¿Jehová Diosca paipaj jatun macanacuitaca imamantataj Meguido urcu nishpa shutichirca?

⁴ ¿Jehová Diosca paipaj jatun macanacuitaca imamantataj Meguido urcu nishpa shutichirca? Meguido llajtapipish, Jezreel pambapipish achca macanacuicunami tiyarca. Maipica Jehová Diosmi paita sirvijcuna macanacushpa mishachun ayudaj carca. Por ejemplo, Barac juezpish israelitacunapish Canaán llajtamanta Sisarahuan, paipaj soldadocunahuanmi Meguido yacu cꞌuchullapi macanacucurcacuna. Barac juez mishachunca Jehová Diosmi ayudarca. Chaimantami Baracpish Débora huarmipish Jehová Diosta agradicircacuna. Shuj cantopica paicunaca: ‘Jahua pachamanta luzerocunapish Sisarahuanmi macanacurca. Cisón jatun yacuca pꞌiñajcunataca tucuitami aparcangui’ nircacunami (Jueces 5:19-21).

5. ¿Armagedonpica Barac shinachu macanacushun?

⁵ Baracpish Débora huarmipish: “Mandaj Dioslla, canta pꞌiñajcunaca tucuicuna chingarishca cachun. Canta cꞌuyajcunaca achijlla inti llujshicuj shina ashtahuan achijyachicuj cachun” nishpami cantashpa tucuchircacuna (Jueces 5:31). Armagedón macanacuipipish Jehová Diospaj contracunaca huañungacunami. Diosta cꞌuyajcunallami quishpiringacuna. Shinapish Armagedonpica Barac macanacushca shinaca Diosta sirvijcunaca mana macanacushunchu. Armacunallatapish mana apashunchu. Quishpiringapajca tranquilomi cana canchij. Jehová Diospi, paipaj angelcunapipish tucui shunguhuanmi confiana canchij (Isaías 30:15; Apocalipsis 19:11-15).

6. ¿Jehová Diosca paipaj contracunata tucuchingapajca imatataj rurai tucun?

⁶ Jehová Diosca Armagedonpica tal vez terremotocunahuan, runducunahuan, rayocunahuanmi paipaj contracunata tucuchinga (Job 38:22, 23; Ezequiel 38:19-22). Mana cashpaca contracunapura macanacuchunchari saquinga (2 Crónicas 20:17, 22, 23). Sino angelcunata cachashpachari contracunata tucuchinga (Isaías 37:36). Jehová Diosca ima layapish paipaj tucui contracunatami tucuchinga. Pero allita rurajcunallatami quishpichinga (Proverbios 3:25, 26).

7, 8. a) 1 Tesalonicenses 5:3-pi nishca shinaca ¿gobiernocunaca imata nishpataj caparingacuna? b) ¿Gobiernocuna caparishcaca imamantataj llulla canga?

⁷ Jehovapaj punlla manaraj chayamujpica “allitaj, sumajtami causacunchij” ningacunami (1 Tesalonicenses 5:3-ta liyipai). 1 Tesalonicenses 5:2-pica * Jehovapaj punlla nishpaca jatun llaqui punllamantami parlacun (Apocalipsis 7:14). ¿Jatun llaqui punlla ñalla callarigrishcataca ima shinataj yachashun? Bibliapi nishca shinaca gobiernocunaca “allitaj, sumajtami causacunchij” nishpami caparingacuna. Chashna huillajpica jatun llaqui punlla ña callarishcatami yachashun.

⁸ ¿Imamantataj gobiernocunaca chashna ningacuna? Mana yachanchijchu. ¿Religionta pushajcunapish chashnachu ningacuna? Tal vez paicunapish chashnami ningacuna.  Shinapish chai huillaica demoniocunapaj llullami canga. Gentecunaca chai llullata crishpami allimi causacunchij nishpa yuyangacuna. Chashna yuyacujpica “chichu huarmita nanai japij shinami paicunapajmanca, jatunta llaquichinaca ñapish shamunga”. Pero ¿Diosta alli sirvijcunahuanca imashi tucunga? Jatun llaqui punlla ñapish callarijpica listosmi cashun.

9. ¿Jehová Diosca Diablopaj ruraicunataca ima shinataj tucuchinga?

⁹ Jehová Diosca Diablopaj ruraicunataca mana Noepaj punllacunapi shinachu de una tucuchinga. Puntaca, muyundij Allpapi tiyaj tucui panda religioncunatami tucuchinga. Bibliapica tucui panda religioncunataca Babilonia jatun pueblo nishpami shutichin. Chai qꞌuipaca Armagedón macanacuipica politicocunata, soldadocunata, negociocunatami tucuchinga. Cai ishqui yuyaicunamanta ashtahuan yachashunchij.

10. Apocalipsis 17:1, 6 y 18:24-pi nishca shinaca ¿Jehová Diosca Babilonia jatun pueblotaca imamantataj tucuchinga?

¹⁰ ‘Huainayaj huarmica llaquichishcami canga’ (Apocalipsis 17:1, 6; 18:24-ta liyipai). Babilonia jatun pueblo o tucui panda religioncunaca Diosmantami llullacunata yachachishcacuna. Shinallataj huainayaj huarmi shinami Jehová Diosmanta caruyashpa gobiernocunapaj ruraicunapi chagrurishcacuna. Ashtahuancarin religionta pushajcunaca paicunapaj iglesiaman rijcunatami mana alli tratashcacuna. Cullquitapishmi shuhuashcacuna. Shinallataj achca gentecunata, Diosta sirvijcunatapishmi huañuchishcacuna. Chashnami Diospaj shutita yangapi churashcacuna (Apocalipsis 19:2). ¿Babilonia jatun pueblotaca Diosca ima shinataj tucuchinga?

11. a) ¿Pucanicuj jatun animalca pitataj ricuchin? b) ¿Pucanicuj jatun animalca Babilonia jatun pueblotaca ima shinataj tucuchinga?

¹¹ Jehová Diosca “chunga gachuyuj pucanicuj jatun animal” huainayaj huarmita tucuchichunmi saquinga. Cai pucanicuj jatun animalca Organización de las Naciones Unidas nishcatami ricuchin. Pucanicuj jatun animalpaj chunga gachuca chai organizacionta apoyacuj gobiernocunatami ricuchin. Dios agllashca horaspimi  chai gobiernocunaca Babilonia jatun pueblotaca tucui charishcacunata quichunga. Paicuna millai cashcatapishmi ricuchingacuna (Apocalipsis 17:3, 16). Panda religioncuna: “Ñucaca jatun mandaj shinamari tiyacuni, ñucaca mana viudachu cani, ima llaquitapish mana charishachu” nishpa yuyacujpipish Diosca “shuj punllallapimi” tucuchinga. Panda religioncunata apoyajcunaca chaita ricushpaca mancharishcami saquiringacuna (Apocalipsis 18:7, 8).

12. ¿Jehová Diosca gobiernocuna imata rurachuntaj mana saquinga?

¹² Diosta sirvijcunaca Yaya Diospaj shutitami jatunyachishpa catishcacuna. Shinallataj Babilonia jatun pueblomanta llujshichij nishcatapishmi cazushcacuna (Hechos 15:16, 17; Apocalipsis 18:4). Ashtahuancarin Babilonia jatun pueblomanta gentecuna llujshichunmi ayudashcacuna. Chaimantami Diosca paita sirvijcunata gobiernocuna tucuchichunca mana saquinga. Diosta sirvijcunaca panda religioncuna shina mana llaquicunata apangacunachu. Chaita yachashpapish chai huasha ima tucugrijta ahuantangapajca sinchi feta charinami minishtiringa.

13. a) ¿Mandaj Gogca pitaj can? b) Ezequiel 38:2, 8, 9-pi nishca shinaca ¿Armagedón macanacuica ima horataj callaringa?

¹³ Mandaj Gogca Diospaj pueblotaca llaquichisha ningami (Ezequiel 38:2, 8, 9-ta liyipai). Gobiernocuna panda religioncunata tucuchishca huashami shuj religionlla saquiringa. Paicunaca Jehová Diosta sirvijcunami canga. Diabloca Diosta sirvijcunalla saquirijta ricushpami achcata coleranga. Chaimantami Diabloca gobiernocunata pandachichun demoniocunata cachanga. Chaimi tucui gobiernocunaca Diosta sirvijcunata tucuchisha ningacuna (Apocalipsis 16:13, 14). Cai gobiernocunaca “Magog llajtata mandaj Gog” nishcami can. Paicuna Diosta sirvijcunata llaquichi callarijpimi Armagedón macanacuica callaringa (Apocalipsis 16:16).

14. ¿Mandaj Gogca imatataj cuenta japinga?

¹⁴ Mandaj Gogca paipaj soldadocunapi, armacunapimi confianga (2 Crónicas 32:8). Pero ñucanchijca Jehová Diospimi confiashun.  Chaica Mandaj Gogpajca yanga shinami ricuringa. Babilonia jatun puebloca achca podertami charirca. Shinapish paipaj yanga dioscuna ‘chunga gachuyuj pucanicuj jatun animalmantaca’ mana quishpichi tucurcachu (Apocalipsis 17:16). Chaimantami Mandaj Gogca Diosta sirvijcunata mishanaca jahuallami nishpa yuyanga. Achca pꞌuyucuna shuj llajtata tapai callarij shinami Diosta sirvijcunata llaquichi callaringa (Ezequiel 38:16). Pero Mandaj Gogca shuj trampapimi urmanga. Ima shinami puca cuchapi Faraón runahuan tucurca. Chashnallatajmi Mandaj Gogca Jehová Dioshuan macanacucushcata cuenta japinga (Éxodo 14:1-4; Ezequiel 38:3, 4, 18, 21-23).

15. ¿Jesusca Armagedón macanacuipica imatataj ruranga?

¹⁵ Jesuspish angelcunapish Diosta sirvijcunata ama llaquichichunmi Mandaj Gogta, paipaj soldadocunatapish tucuchingacuna (Apocalipsis 19:11, 14, 15). ¿Pero gobiernocunata umachij Diablohuanca imataj tucunga? Jesusca Diablota, demoniocunataca mil huatatami jatun jutcupi huichcashpa churanga (Apocalipsis 20:1-3).

16. a) ¿Diosta rijsishcata ricuchingapajca imatataj rurana canchij? b) ¿Diosca paipaj rijsishcacunataca Armagedonpica imatataj ruranga?

¹⁶ Achca huatacunata, ashalla huatacunata Diosta sirvicushpapish Armagedonpi quishpiringapajca Diostami alli rijsina canchij. Jesucristomanta alli huillaicunatapishmi cazuna canchij (2 Tesalonicenses 1:7-9). Yaya Diosta rijsishcata ricuchingapajca pai imata munashcata, paipaj mandashcacunata yachashpami cazuna canchij. Shinallataj paillatami adorana canchij (1 Juan 2:3-5; 5:3). Caicunata rurajpica Diospish ñucanchijtami rijsinga. Diosmi ñucanchijta rijsinga nishpaca paipaj ñaupajpi alli ricurinatami nicun (1 Corintios 8:3). Chaimantami ñucanchijtaca paica Armagedón macanacuipi quishpichinga.

17. ¿Jesús yachachishcacunata cazushcata ricuchingapajca imatataj rurana canchij?

¹⁷ Jesucristomanta alli huillaicunaca Bibliapi tiyaj Jesús yachachishcacunatami ricuchin. Cai yachachishcacunata cazushcata ricuchingapajca Diostami punta lugarpi churana canchij.  Shinallataj pai mandashcacunatami respetana canchij. Diospaj gobiernomantapishmi huillana canchij (Mateo 6:33; 24:14). Ungidocunaman mingashca trabajotapishmi apoyana canchij (Mateo 25:31-40).

18. ¿Ungido huauqui panicunaca shujtaj ovejacuna paicunata ayudashcamantaca ima shinataj cuidangacuna?

¹⁸ Ñallami ungido huauqui panicunaca “shujtaj ovejacuna” paicunata ayudashcamanta cuidangacuna (Juan 10:16). ¿Ima shinataj cuidangacuna? Manaraj Armagedón macanacui callarijpimi 144.000 ungidocunaca, jahua pachapi mana nunca huañuna causaita chasquingacuna. Chai qꞌuipaca ungidocunapish angelcunapish Mandaj Gogtami tucuchingacuna. Pero oveja shina alli shungu gentecunataca quishpirichunmi cuidangacuna (Apocalipsis 2:26, 27; 7:9, 10). Quishpirishcacunaca ungidocunata cai Allpapi ayudashcamantami cushilla sintiringacuna.

19, 20. ¿Llaquicunata chꞌimbapuracushpapish ñucanchij feta sinchiyachingapajca imatataj rurana canchij?

¹⁹ Cai tucuri punllacunapica achca huauqui panicunami llaquicunata chꞌimbapuracunchij. Pero chai llaquicunataca cushillami ahuantai tucunchij (Santiago 1:2-4). Ahuantangapajca Diostami mañarana canchij (Lucas 21:36). Shinallataj tucui punllacunami Bibliata liyina canchij. Liyishcapipish cutin cutinmi yuyana canchij. Bibliapi nishcacuna cunan punllacunapi ima shina pajtaricushcatapish allimi yachana canchij (Salmo 77:12). Gentecunamanpish pudirishcatami huillana canchij. Chaicunata rurashpaca ñucanchij fetami sinchiyachishun. Dios cusha nishcacunapipish tucui shunguhuanmi crishun.

²⁰ Babilonia jatun pueblo chingarijpi, Armagedón macanacui tucurijpica cushillami sintirishun. Jehová Dios paipaj shutita, paipaj mandanata jatunyachijpicarin ashtahuanmi cushilla sintirishun (Ezequiel 38:23). Chaimantami Diosta rijsijcunapaj, Jesusta cazujcunapaj, tucuringacama ahuantajcunapajca Armagedón chayamujpica alli noticia canga (Mateo 24:13).