1, 2. ¿Ishqui discipulocuna Emaús puebloman ricujpica imataj tucurca?

 HUATA 33-pi 16 de nisantaca Jesusta catijcunaca manchaihuanmi llaquilla carca. Ishqui discipulocunaca Jerusalenmanta llujshishpami Emaús puebloman chayangapaj 11 kilometrocunata purircacuna. Paicunaca Jesús judiocunata ayudanatami yuyarcacuna. Chaimantami Jesús huañujpica achcata llaquirircacuna. Pero ¿chai huashaca imataj tucurca?

² Mana rijsishca runaca discipulocunapajman cꞌuchuyashpami paicunahuan igual puri callarirca. Paicunaca Jesús huañushcamanta llaquilla cashcatami paiman parlarcacuna. Chai qꞌuipaca chai runaca discipulocunamanca ‘Moisés quillcashcamanta callarishpami tucui Profetacuna Mesiasmanta imata quillcashcata intindichirca’. Chai profetacuna nishca shinaca Jesusca achcata sufrishpami huañuna carca. Emausman chayashpaca chai mana rijsishca runaca Jesús cashcatami huillarca. Chaimi discipulocunaca Jesús causarishcata ricushpaca achcata cushicurcacuna (Lucas 24:​13-35).

3, 4. a) ¿Discipulocuna Jesusta cutin ricushpaca ima shinataj sintirircacuna? (Hechos 1:3). b) ¿Cai yachaipica imatataj yachashun?

³ Jesusca causarishca qꞌuipaca cai Allpapica 40 punllacunatami saquirirca. Chai punllacunapica Jesusca huaquin cutincunami paipaj discipulocunaman ricurirca (Hechos 1:​3-ta liyipai). Discipulocuna Jesusta ricushcamanta llaquilla, manchaihuan canapaj randica Diospaj Gobiernomanta mana manchashpa  huillangapajmi fuerzasta japircacuna. a

⁴ Jesús jahua pachaman manaraj rishpa imallata rurashcata yachanaca allimi can. Chaimantami cai yachaipica Jesús jahua pachaman manaraj rishpa paita catijcunata ima shina animashcata, Diospaj Shimipi nishcacunata ima shina intindichishcata, Diospaj pueblopi ashtahuan ayudachun ima shina yachachishcata yachashun. Cai yuyaicunata yachacushpaca ñucanchijpish imata yachai tucushcatami yachashun.

SHUJTAJCUNATA ANIMASHUNCHIJ

5. ¿Jesuspaj discipulocunaca imamantataj animota minishtircacuna?

⁵ Jesuspaj discipulocunaca animotami minishtircacuna. ¿Imamanta? Maijancunaca Jesusta catingapajca paicunapaj huasita, familiacunata, negociocunatami saquishcacuna carca (Mateo 19:27). Shujtajcunataca Jesusta catij tucushcamantami maltratajcuna carca (Juan 9:22). Discipulocunaca Jesús Mesías cashcata tucui shunguhuan crishcamantami tucuita saquircacuna (Mateo 16:16). Chaimi Jesús huañujpica Jesús paicunata ña mana ayudai tucushcata yuyashpa llaquilla sintirircacuna.

6. ¿Jesusca causarishca qꞌuipaca imatataj rurarca?

⁶ Pi huañujpica llaquilla sintirinaca normalmi can. Chaimantami discipulocunaca Jesús huañushcamanta llaquilla carcacuna. Chaita ricushpaca Jesusca paicunaca mana sinchi feta charinchu nishpaca mana yuyarcachu. Ashtahuanpish pai cutin causarishca punllallatajmi discipulocunataca animai callarirca. Por ejemplo, Jesús pambana jutcupi María Magdalena huacacujpimi Jesusca paiman ricurirca (Juan 20:​11, 16). Shinallataj punta parrafocunapi nishca shinaca Jesusca ishqui discipulocunamanmi ricurirca. Apóstol Pedromanpishmi ricurirca (Lucas 24:34). ¿Caimantaca imatataj yachai tucunchij? Chaita yachangapajca Jesús María Magdalenaman ricurijpi ima tucushcata ricushun.

7. a) ¿16 de nisán tutamantaca María Magdalenaca imatataj rurarca? b) ¿Jesusca Mariataca ima shinataj animarca? (Fotomantapish parlapai).

⁷ (Juan 20:​11-16-ta liyipai). 16 de nisán  tutamanta ladotaca huaquin huarmicunami Jesusta churashca jutcuman rircacuna (Lucas 24:​1, 10). Jesuspaj cuerpo chai jutcupi mana cashcata ricushpaca María Magdalenaca Pedroman, Juanmanmi rato huillanaman rirca. Chai huashaca paicuna chai jutcuman ricujpimi Mariaca paicunata catishpa rirca. Paicunapish Jesús chai jutcupi mana cashcata ricushpaca huasimanmi tigrarcacuna. Pero Mariaca chai jutcupimi huacashpa saquirirca. María huacacujta ricushpaca Jesusca llaquillami sintirirca. Chaimi Mariata animangapajca paihuan parlanacurca. Chai huashaca pai causarishcata caishuj discipulocunaman huillagrichunmi privilegiota curca. Chaita rurashpami Mariaca achcata animarishcanga (Juan 20:​17, 18).

8. ¿Jesusmantaca imatataj yachanchij?

⁸ ¿Jesusmantaca imatataj yachanchij? Jesús shinami llaquipi caj huauqui panicunataca alaja shimicunahuan parlashpa, paicuna ima shina sintirishcata intindishpa ayudana canchij. Chashna rurajpimi paicunaca Jehová Diosta sirvishpa catingacuna. Por ejemplo, pani Jocelynpaj ñañaca shuj accidentepimi huañurca. Chaimi pani Jocelynca achca quillacunata llaquilla pasarca. Shinapish shuj cusa huarmimi paicunapaj huasiman invitashpa pai ima shina sintirishcata atencionhuan uyarcacuna. Shinallataj pani Jocelynmanca Jehová Diospaj achca valishca cashcatami yuyachircacuna. Chaimi pani Jocelynca: “Chai llaquita apacushcamantaca mama cuchapi ahogaricushca shinami sintirircani. Shinapish Yayitu Diosca chai turita, chai ñañata utilizashpami mama cuchamanta llujshichij shina ñucata ayudarca. Chashnami Jehová Diosta sirvishpa catingapaj fuerzasta japircani” nircami. Huauqui panicuna ima shina sintirishcata parlacujpica ñucanchijpish atencionhuanmi uyana canchij. Chaita rurajpimi paicunaca Jehová Diosta sirvishpa catingapaj animaringacuna (Romanos 12:15).

BIBLIAPI NISHCACUNATA INTINDICHUN AYUDASHUNCHIJ

9. a) ¿Discipulocunaca imamantataj dudai callarircacuna? b) ¿Jesusca discipulocunataca ima shinataj ayudarca?

⁹ Jesusta catijcunaca Diospaj Shimita yachashpaca chaicunata paicunapaj causaipi pajtachingapajmi esforzarircacuna (Juan 17:6). Shinapish shuhuata shina Jesusta huañuchijta ricushpaca paicunaca dudacunatami chari callarircacuna. Chaita ricushpaca Jesusca discipulocuna millai shunguta charishcataca mana yuyarcachu. Ashtahuanpish Bibliapi nishcacunata mana tucuita intindishcamanta dudacunata charishcatami yacharca (Lucas 9:​44, 45; Juan 20:9). Chaimi Jesusca Bibliapi nishcacunata alli intindichun paicunataca ayudarca. Ishqui discipulocunahuan Emausman ricushpa paicunata ima shina ayudashcata ricushun.

10. ¿Jesusca pai Mesías cashcata discipulocuna seguro cachunca imatataj rurarca? (Lucas 24:​18-27).

¹⁰ (Lucas 24:​18-27-ta liyipai). Jesusca mana chai ishqui discipulocunahuan tupanacushcahuanchu pai pi cashcata huillarca. Chaipaj randica paicuna imata yuyashcata yachangapajmi tapuicunata rurarca. Chai ishqui discipulocunaca romanocunapaj randi Jesús Israel llajtata mandagrishcatami yuyarcacuna. Jesusca paicuna imata yuyashcata uyashca qꞌuipaca Diospaj Shimita utilizashpami achca profeciacuna ima shina pajtarishcata intindichirca. b Ña tutayajpimi Jesusca caishuj discipulocunamanpish Diospaj Shimipi nishcacunata intindichirca (Lucas 24:​33-48). ¿Jesusmantaca imatataj yachai tucunchij?

11, 12. a) ¿Jesús alli yachachij cashcamantaca ñucanchijpish imatataj yachai tucunchij? (Fotocunamantapish parlapai). b) ¿Norteyta yachachij huauquica paitaca ima shinataj ayudarca?

¹¹ ¿Jesusmantaca imatataj yachanchij? Ñucanchijhuan  yachacujcuna shungupi imata charishcata, ima shina sintirishcata yachangapajca alli yuyashpami tapuicunata rurana canchij (Proverbios 20:5). Paicunata alli intindishca qꞌuipaca paicunapaj llaquicunata chꞌimbapurangapaj Bibliapi consejocunata ima shina mashcanatami yachachina canchij. Pero paicunataca “caita rurai, chaita rurai” nishpaca mana ninachu canchij. Chaipaj randica Bibliapi nishcacunata paicunapaj causaipi ima shina pajtachi tucushcata intindichunmi ayudana canchij. Ghana llajtapi causaj huauqui Norteymanta parlashun.

¹² Norteyca 16 huatacunata charishpami Bibliamanta estudiai callarirca. Pero paipaj familiaca ama yachashpa catichunmi jarcasha nircacuna. ¿Chai jarcaita mishangapajca Norteyca imatataj rurarca? Paita yachachij huauquica Mateo capítulo 10-pi Diosta sirvijcuna llaquichishca cana cashcatami ña intindichishca carca. Chaimi Norteyca Mateo 10-pi nishcacuna paipaj causaipi pajtarijta ricushpaca testigo de Jehovacuna verdadta yachachijcuna cashcata cuentata curca. Shinallataj Norteyta yachachij huauquica Mateo 10:​16-pi ima nishcata ricuchishpami ñucanchij crishcacunata familiaman respetohuan parlana cashcata intindichirca. Bautizarishca qꞌuipaca Norteyca precursor shinami sirvisha nirca. Pero paipaj yayaca universidadman richunmi munarca. Imata rurana cashcata ninapaj randica Norteyta yachachij huauquica tapuicunata rurashpami Bibliapi ima nishcapi yuyachun paitaca ayudarca. Chaimi Norteyca tiempo completota Jehová Diosta sirvinata agllarca. Chaita ricushpaca paipaj yayaca huasimantami llujchishpa cacharca. Chashnapish Norteyca alli decisionta japishcamantaca mana arrepintirinchu. Ñucanchijpish shujtajcunataca Bibliapi nishcacunata alli intindichunmi ayudana canchij. Chashnami paicunaca Jehová Diostaca alli sirvingacuna (Efesios 3:​16-19).

SHUJTAJ HUAUQUICUNAPISH CONGREGACIONPI AYUDACHUN YACHACHISHUNCHIJ

13. ¿Jesusca manaraj jahua pachaman rishpaca imatataj rurarca? (Efesios 4:8).

¹³ Jesusca cai Allpapi cashpaca Yaya Dios paiman mingashcata pajtachingapajmi sinchita esforzarirca (Juan 17:4). Shinapish paica “imapish alli llujshichunca ñucallatajmi rurana cani” nishpaca mana yuyarcachu. Paica quimsa huata chaupitami shujtajcunaman yachachingapaj esforzarirca. Shinallataj Jesusca paipaj  discipulocunapimi confiaj carca. Chaimantami alli huillaicunata huillachun, Diospaj ovejitacunata cuidachun paicunaman mingarca. Maijan discipulocuna manaraj 30 huatacunata charijpipish paicunamanpishmi chai trabajota mingarca (Efesios 4:​8-ta liyipai). Chai discipulocunaca Jesushuanca sinchitami trabajajcuna carca. Shinapish Jesusca manaraj jahua pachaman rishpaca paicunamanca ashtahuanmi yachachirca. Chashnami paicunaca huauqui panicunapajca valishca ‘regalocuna shina’ tucurcacuna. Jesús paicunata ima shina yachachishcata ricushun.

14. ¿Jesusca jahua pachaman manaraj rishpaca paipaj discipulocunataca ima shinataj animarca? (Fotomantapish parlapai).

¹⁴ Jesusca paipaj discipulocunamanca cꞌuyaihuanmi consejaj carca. Por ejemplo, maijan discipulocuna pai causarishcata mana crijta ricushpaca dudacunata ama charichunmi paicunataca ayudarca (Lucas 24:​25-27; Juan 20:27). Shinallataj cullqui yuyailla causanapaj randi Diosta sirvijcunata ayudanapi ocuparichunmi paicunataca animarca (Juan 21:15). Shujtajcunahuan mana compararishpa paicunaman mingashcacunata cushilla pajtachishpa catichunpishmi animarca (Juan 21:​20-22). Cutin maijancuna Diospaj Gobiernomanta mana tucuita intindijta ricushpaca cꞌuyaihuanmi paicunataca corregirca. Shinallataj predicacionpi ocuparichunmi paicunataca animarca (Hechos 1:​6-8). ¿Ancianocunaca Jesusmantaca imatataj yachai tucuncuna?

15, 16. a) ¿Ancianocunaca Jesús shinaca imatataj rurana can? b) ¿Patrickca consejota chasquishpaca ima shinataj sintirirca?

¹⁵ ¿Ancianocunaca Jesús shinaca imatataj rurana can? Shujtaj huauquicunata, jovencunatapish congregacionpi ashtahuan ayudachunmi yachachina can. c Pero ancianocunaca chai huauquicuna imapipish nunca pandarichunca mana shuyanachu can. Ashtahuanpish cꞌuyaihuanmi consejana can. Chashnami paicunaca humilde canata, confianalla canata, shujtajcunata cꞌuyaihuan tratanata yachangacuna (1 Timoteo 3:1; 2 Timoteo 2:2; 1 Pedro 5:5).

¹⁶ Patrickca ashtahuan jovenlla cashpaca shujtaj huauquicunata panicunatapishmi sinchita rimaj carca. Chaimi shuj ancianoca cꞌuyaihuan paitaca consejarca. Patrickca: “Chai huauqui ñucata consejashcamantaca achcatami agradicini. Shujtaj huauquicuna ñuca munashca asignacioncunata chasquijta ricushpaca llaquillami sintirij carcani. Pero chai anciano  ñucata consejajpica ashtahuan asignacioncunata chasquina yuyailla mana causana cashcatami cuentata curcani. Ashtahuanpish huauqui panicunata mana jatun tucushpa ayudana cashcatami intindircani” nircami. Chaita intindishcamantami Patrickca 23 huatacunallata charishpa anciano shina congregacionpi sirvi callarirca (Proverbios 27:9).

17. ¿Jesusca paipaj discipulocunapi confiashcataca ima shinataj ricuchirca?

¹⁷ Jesusca paita catijcunaman Diosmanta huillachun mingashpapish Diospaj Shimipi nishcacunata alli intindichichunmi mingarca (Mateo 28:20). Discipulocunaca “chaita ruranataca mana valishunchu” nishpami yuyashcangacuna. Pero Jesusca paicuna chai mingashcata alli pajtachinataca seguromi carca. Chaimantami paicunataca: “Ima shinami ñuca Yayaca ñucata cacharca, ñucapish cancunataca chashnallatajmi cachani” nirca (Juan 20:21).

18. ¿Ancianocunaca Jesús shinaca imatataj rurana can?

¹⁸ ¿Ancianocunaca Jesús shinaca imatataj rurana can? Alli yachaita charij ancianocunaca shujtajcunamanmi huaquin trabajocunata mingana can. Shinallataj chai trabajocunata ima shina ruranatapishmi paicunamanca yachachina can (Filipenses 2:​19-22). Por ejemplo, jovencunatami Tandanacuna Huasita pꞌichachun, allichichun mañai tucuncuna. Shinallataj shuj trabajota ima shina ruranata yachachishca qꞌuipaca chai huauqui chai trabajota alli pajtachina cashcapimi confiana can. Huauqui Matthewtaca recienllami anciano cachun nombrarcacuna. Paica experienciata charij ancianocuna congregacionpi ayudachun yachachishcamanta, paipi confiashcamantami achcata agradicin. Paica: “Ñuca imapi pandarijpica chai ancianocunaca ama cutin chaillapitaj pandarichunmi imata rurana cashcata yachachircacuna” nircami. d

19. ¿Imatataj tucuicuna rurana canchij?

¹⁹ Jesusca manaraj jahua pachaman rishpaca 40 punllacunatami paipaj discipulocunata animangapaj, Diospaj Shimipi nishcacunata alli intindichingapaj, pai mingashcacunata ima shina pajtachina cashcata yachachingapaj esforzarirca. Ñucanchijpish chaita rurangapaj esforzarishunchij (1 Pedro 2:21). Chaita rurachunca Jesusllatajmi ñucanchijtaca ayudanga. Paica: “Cai pachapaj ruraicuna tucuringacamami tucui punllacuna cancunahuan casha” nircami (Mateo 28:20).