1. ¿Jehová Diosca paipaj munaita pajtachingapajca imallatataj rurai tucun?

HUAQUIN yachajcunaca Diospaj shutica imatapish rurai tucuj cashcatami ricuchin nincunami. Chaica ciertomi can. Jehová Diosca paipaj munaita pajtachingapajmi imatapish rurai tucun. Por ejemplo, alli yachachij, alli huillaita huillaj, cushichij yaya tucushpami paipaj munaita pajtachishca (Isaías 48:17; 2 Corintios 7:6; Gálatas 3:8). Shinallataj paita sirvijcunata ima ruraicunapi ayudashpami paipaj munaita pajtachishca (Mateo 24:14; 28:19, 20; 2 Corintios 1:3, 4). Diosca paipaj munaita pajtachingapajca pimanpish yachaita, espíritu santotami cui tucun.

2. a) ¿Maipica imamantataj Diospaj munaita mana pajtachi tucushachu nishpa yuyai tucunchij? b) ¿Cai yachaipica imatataj yachashun?

² Tucuicunami Diospaj munaita pajtachisha ninchij. Pero maipica ñami Diospajca achcata ruracuni. Ña mana ashtahuan ruranata minishtinichu nishpami yuyai tucunchij. Mana cashpaca mayorlla cashcamanta, causaipi ima jarcaita charishcamantami Dios mingashcata mana pajtachi pudisha nishpa yuyai tucunchij. Cai yachaipimi Yaya Dios paipaj munaita pajtachichun ñucanchijta ayudaj cashcata ricushun. Shinallataj Diosca ñaupa tiempopi paita sirvijcunata ima shina ayudashcatami yachashun. Ñucanchijpish Diospaj munaita pajtachingapaj imata rurana cashcatami yachashun.

3. ¿Jehová Diosca ima shinataj ashtahuan sirvina munaita cun?

³ (Filipenses 2:13-ta liyipai). Jehová Diosmi paita ashtahuan  sirvina munaita charichun ayudan. Por ejemplo, congregacionpichari maijan huauqui o pani paicunata ayudachun minishtincuna. Mana cashpaca ancianocunachari sucursalmanta cachashca shuj cartata liyincuna. Chai cartapichari maipi ayudachun minishtishcata huillancuna. Caicunata yachaj chayashpaca ¿ima shinataj ayudasha? nishpachari tapurinchij. Shinallataj Diosca ñucanchijman shuj trabajota mingajpica, ¿cai mingashcataca pajtachinata pudishachu? nishpachari yuyanchij. Chashnallataj Bibliapi valishca yuyaicunata tarishpaca shujtajcunata ayudangapajca ¿cai yuyaicunataca ima shinataj pajtachi tucuni? nishpachari yuyanchij. Jehová Diosca mana imata obliganchu. Pero paita ashtahuan sirvina munaita charichunmi ayudan. *

4. ¿Jehová Diosca pai mingashcata pajtachichunca ima shinallataj ayudan?

⁴ Jehová Diosca pai mingashcata pajtachichunpishmi ayudan (Isaías 40:29). Por ejemplo, imata alli rurachunmi Diosca paipaj espíritu santota cushpa ayudan (Éxodo 35:30-35). Shinallataj paipaj organizacionhuanmi alli trabajadorcuna cachun yachachin. Dios mingashcata mana pajtachi tucushpaca huauqui panicunata ayudachun mañashunchij. Yayitu Diostapish ayudachun mañashunchij (2 Corintios 4:7; Lucas 11:13). Cunanca Yaya Dios ñaupa punllacunapi huaquin cꞌaricunata, huarmicunata paita sirvichun ayudashcatami yachashun. Chashnallataj cai cꞌaricunamanta, huarmicunamanta imata yachai tucushcatami ricushun.

5. ¿Moisesmantaca imatataj yachai tucunchij?

⁵ Jehová Diosca israelitacunata quishpichichunca Moisestami cacharca. ¿Pero ima horataj cacharca? ¿Moisés Egipto llajtapaj tucui yachanacunata yachashca qꞌuipachu paitaca cacharca? (Hechos 7:22-25). Mana. Alli shungu canata, humilde canata yachachishca huashami cacharca (Hechos 7:30, 34-36). Moisesca israelitacunata quishpichingapajca mana manchashpami faraonhuan parlarca. Pero Jehová Diosmi paitaca ayudacurca (Éxodo 9:13-19). ¿Moisesmantaca imatataj yachai tucunchij? Yaya Diosca manso shungucunata, allita rurajcunata, paipi confiajcunatami paipaj munaita pajtachichun agllan (Filipenses 4:13, NM ).

6. ¿Barzilai runamantaca imatataj yachanchij?

⁶ Achca huatacuna qꞌuipaca Absalón huañuchisha nijpimi rey Davidpish paita sirvijcunapish miticushpa rircacuna. Paicunaca shitashca pambapimi yaricaihuan, shaicushca carcacuna. Chaimantami Yaya Diosca paicunaman carachun Barzilai runata, shujtajcunatapish cacharca. Barzilai runaca mayorlla cashpapish “Jehová Dios nishcata mana rurai pudishachu” nishpaca mana mancharcachu. Ashtahuanpish imalla charishcacunahuanmi ayudarca (2 Samuel 17:27-29). ¿Barzilai runamantaca imatataj yachanchij? Diosca ñucanchij mashna huatacunata charijpipish huauqui panicunaman ima minishtishcata cuchunmi cachai tucun (Proverbios 3:27, 28; 19:17). Mana ayudanaman ri tucushpapish tucui Allpapi caj huauqui panicunata ayudangapajmi cullquita cui tucunchij (2 Corintios 8:14, 15; 9: 11).

7. a) ¿Jehová Diosca Simeontaca imatataj rimachirca? b) ¿Simeonmanta yachashpaca imamantataj animarinchij?

 ⁷ Simeón runaca Jerusalenmanta shuj mayorlla runami carca. Paica Mesiasta ricungapajmi achca huatacunata shuyacushca carca. Shuj punllaca Jehová Diosca: “Canca manaraj huañushpami Mesiasta ricungui” nircami. Chaimantami cushilla carca. Shujtaj punllaca Simeonca espíritu santota chasquishcamantami Diospaj huasiman rirca. Simeonca huahua Jesusta ricushpami cai huahua Cristo tucuna cashcata huillarca. Chaitaca Diosmi rimachirca (Lucas 2:25-35). Simeonca Jesús tucui imallata rurashcataca mana ricushcangachu. Pero Jesusmanta pai imata nishcata yuyarishpami cushilla sintirirca. Simeonca paraíso Allpapimi ñalla causaringa. Chaipimi mandaj Jesús cai Allpapi causajcunata bendiciashcata ricunga (Génesis 22:18). Ñucanchijpish Jehová Dios paita sirvingapaj imata rurachun saquijpica cushillami sintirina canchij.

8. ¿Jehová Diosca shujtajcunata animachunca imatataj ruran?

⁸ Apostolcuna causashca punllacunapica Diosca José runatami huauqui panicunata cushichichun cacharca (Hechos 4:36, 37). Paitaca apostolcunaca Bernabé nijcunami carca. Shujtajcunata cushichij cashcamantami Bernabé shutita charishcanga. Por ejemplo, Saulo runa Jesuspaj discípulo tucujpica achca huauquicunami: “Cai runaca ñucanchijtami llaquichishca” nishpa paipajman cꞌuchuyanata mancharcacuna. Chaimi Saulo ama llaquilla sintirichun Bernabeca animarca. Chaimantami Sauloca achcata agradicirca (Hechos 9:21, 26-28). Qꞌuipaca Jerusalenpi tiyaj ancianocunami Antioquía de Siria llajtapi caj huauqui panicuna animota cuchun minishtishcata yachaj chayarcacuna. Chaimantami ancianocunaca Bernabeta cacharca. Bibliapica Bernabeca Diosta sirvishpa catichunmi huauqui panicunata sinchiyachirca ninmi (Hechos 11:22-24). Cunan punllacunapish maijan huauqui panicunami ungushca o desanimado can. Mana cashpaca paicunapaj familiami huañushca can. Paicunata celularpi cayashpa, visitashpa animachunmi Jehová Diosca ñucanchijman yuyaita cun (1 Tesalonicenses 5:14).

9. ¿Huauqui Vasilymantaca imatataj yachanchij?

⁹ Jehová Diosca huauqui Vasilytami alli michij cachun ayudarca. ¿Ima shinataj ayudarca? Huauqui Vasily 26 huatacunata charijpimi anciano cachun agllarcacuna. Paica congregacionpi problemacunata charij huauqui panicunataca mana alli ayudai tucushachu nishpami manchaita charirca. Pero achca huatacunata sirvij ancianocuna, Escuela del Ministerio del Reinomi alli michij cachun ayudarca. Shinallataj paica ima yachashcacunata alli pajtachingapajmi achcata esforzarirca. Por ejemplo, ama manchashpa huauqui panicunata ayudangapajmi shuj listata rurarca. Chai listapi anotashcacunata pajtachishpaca asha ashami manchaita saquirca. Huauqui Vasilyca: “Ñaupaca congregacionpi ayudanatami mancharcani. Pero cunanca huauqui panicunata Bibliahuan animangapaj Yaya Dios ayudajpimi cushilla sintirini” ninmi. Huauquicuna, cancunapish Diosta sirvinapi ocuparijpica paica valishca trabajocunatami congregacionpi pajtachichun minganga.

10. a) ¿Abigailca imatataj rurarca? b) ¿Abigailmantaca imatataj yachanchij?

¹⁰ Rey Saulca Davidta, paita sirvijcunatapish achca huatacunatami huañuchisha nishpa catirca. Shuj punllaca Davidpaj sirvijcunaca yaricaihuanmi carcacuna. Chaimantami paicunaca: “Achca cullquiyuj Nabalpaj ovejacunatami shitashca pambapi cuidashcanchij. Paiman micunata mañashunchij” nircacuna. Pero Nabal runaca millai cashcamantami ni imata mana cusha nirca. Chaita yachaj chayashpami Davidca achcata pꞌiñarishpa Nabalta, paipaj huasi ucupuracunatapish huañuchisha nirca (1 Samuel 25:3-13, 22). Chaimi Nabalpaj huarmi Abigailca mana manchashpa, Davidhuan tupanaman rirca. Tupashpaca Abigailca paipaj ñaupajpi cungurishpami: “Can paicunata huañuchishpaca paicunapaj yahuarmantaca juchayujmi tucungui. Diospaj maquipi saqui” nishpa respetohuan aconsejarca. Chashna sumajta rimajpimi Davidca Yayitu Dios paita ayudangapaj Abigailta cachashcata cuenta japirca (1 Samuel 25:23-28, 32-34). Abigailca humilde canata, alli yuyaiyuj canatami yachashca carca. Chaimantami Yaya Diosca paitaca Davidta ayudachun cacharca. Cunan punllacunapish Jehová Diosca alli yuyaiyuj panicunahuanmi congregacionta, familiacunata sinchiyachin (Proverbios 24:3; Tito 2:3-5).

11. a) ¿Salumpaj ushushicunaca imatataj rurarcacuna? b) ¿Picunataj Salumpaj ushushicuna shina can?

¹¹ Achca huatacuna qꞌuipaca Jehová Diosca Salumpaj ushushicunatami Jerusalén pircacunata shayachishpa ayudachun cacharca (Nehemías 2:20; 3:12). Tecoitacunata mandajcunaca jatun tucushca cashcamantami pircacunata mana shayachisha nircacuna (Nehemías 3:5). Pero Salumpaj ushushicunaca paipaj yaya mandaj cajpipish tucui shunguhuanmi sinchi trabajopi ayudarcacuna (Nehemías 4:15-18). Pircacunataca 52 punllacunallapimi shayachishpa tucuchircacuna. Chaimantami Salumpaj ushushicunaca cushilla sintirircacuna (Nehemías 6:15). Cunan punllacunapish achca panicunami Diospaj huasita shayachinapi, allichinapi ayudashpa cushilla sintirincuna. Cai panicuna ayudajpimi Dios mingashca trabajota alli pajtachi pudinchij.

12. ¿Tabitamantaca imatataj yachanchij?

¹² Tabita huarmica shujtajcunamanta allita ruraj, viudacunaman ima minishtishcacunata cujmi carca. Diosmi chashna ayudachun paimanca yuyaita cuj carca (Hechos 9:36). Tabita huarmi chashna alli cajpimi achcacunaca pai huañujpi huacarcacuna. Pero apóstol Pedro Tabita huarmita causachijpica cushillami sintirircacuna (Hechos 9:39-41). ¿Tabitamantaca imatataj yachanchij? Jovencuna, mayorcuna, cꞌaricuna, huarmicuna cashpapish tucuicunami huauqui panicunata imapipish ayudai tucunchij (Hebreos 13:16).

13. a) ¿Pani Ruttaca Jehová Diosca ima shinataj ayudarca? b) ¿Rutca imatataj nirca?

¹³ Pani Rutca manchaita charij cashpapish misionera tucunatami munarca. Paica huambra cashpaca vulashpami huasin huasin tratadocunata cuj carca. Rutca: “Predicanataca achcatami munarcani” nircami. Shinapish manchaita charishcamantami paipajca Diospaj gobiernomanta gentecunaman huillanaca sinchi ricurirca. Chashnapish 18 huatacunata charishpaca precursora regularmi tucurca. 1946 huatapica Rutca Escuela Bíblica de Galaad  nishcamanmi rirca. Chai huashaca Hawái, Japón llajtacunapimi sirvirca. Jehová Diosca chai llajtacunapi causaj achca gentecunaman predicachunmi ayudarca. Rutca casi 80 huatacunatami predicashpa causashca. Paica: “Jehová Diosmi ñuca ama manchaj cachun fuerzata cushpa ayudashca. Diosca paipi confiajcunataca ashtahuan sirvichunmi ayudan” nircami.

14. Colosenses 1:29-pi nishca shinaca ¿Diospaj munaita pajtachingapajca imatataj rurana canchij?

¹⁴ Yaya Diosca paipaj munaita pajtachingapajmi paita sirvijcunataca tucui laya ayudashca. Ñucanchijtapish Dios ayudachunca paita ashtahuan sirvina munaitami charina canchij (Colosenses 1:29-ta liyipai). * Paita tucui shunguhuan sirvisha nijpica Diosca cushilla predicachun, alli yachachij cachun, shujtajcunata cushichichun, alli trabajadorcuna cachun, shujtajcunapajpish alli amigocuna cachunmi ayudanga.

15. 1 Timoteo 4:12, 15-pi nishca shinaca ¿jovencunaca imatataj Diosman mañana canguichij?

¹⁵ ¿Joven, canca Diosta ashtahuan sirvinata munanguichu? Tauca congregacioncunapica ancianocunaca achcami tiyan. Cutin siervo ministerialcunaca ashallami tiyan. Chaimantami joven huauquicuna congregacionpi ashtahuan sirvichun, siervo ministerial cachun minishtinchij. Shinapish maijan huauquicunaca: “Ñucaca ñami publicador cani. Congregacionpi ashtahuan sirvinata mana minishtinichu” nincunami. Canpish chashna sintirishpaca Yayitu Diosta: “Siervo ministerial cana munaita, canta ashtahuan sirvingapajpish fuerzata cuhuai” nishpami mañana cangui (Eclesiastés 12:1; 1 Timoteo 4:12, 15-ta liyipai).

16. a) ¿Jehová Diostaca imatataj mañana canchij? b) ¿Tucuicuna imatataj rurai tucunchij?

¹⁶ Jehová Diosca paipaj munaita pajtachichunmi ñucanchijtaca tucui laya ayudai tucun. Chaimantami paita ashtahuan sirvina munaita charingapaj, shungumanta paipaj munaita rurangapaj Diosta mañana canchij. Jovencuna cashpapish, mayorcuna cashpapish ñucanchij fuerzahuan, charishca cosascunahuan, imata ruranata yachashcahuanmi Diosta sirvishpa jatunyachina canchij (Eclesiastés 9:10). Yaya Dios imata rurachun mingajpica chaitaca mana pajtachi tucushachu nishpaca mana yuyanachu canchij. Chaipaj randica shungumantami chasquina canchij. Yaya Diospaj ashallata o achcata rurashpapish tucuicunami paitaca jatunyachi tucunchij.