1, 2. a) Mateo 28:18 al 20-pi nishca shinaca ¿imatataj rurana canchij? b) ¿Cai yachaipica imallatataj yachashun?

JESÚS causarishca huashaca apostolcunataca ‘Galileapi tiyaj urcupi tupangapaj’ nircami (Mateo 28:16). Apostolcunaca paihuan tandanacushpaca cushillami sintirishcangacuna. Chai urcupica ‘500 yalli huauqui panicunamanmi’ Jesusca ricurishcanga (1 Corintios 15:⁠6). ¿Jesusca imapajtaj paipaj catijcunataca chai urcupi tandachirca? “Tucui cai pachata richij, ñuca yachacujcunata ruraichij” nishpa mandangapajmi paicunata tandachirca (Mateo 28:​18-20-ta liyipai).

² Jesús mandashcata chai urcupi uyajcunami punta congregación tucurcacuna. Paicunaca shujtaj gentecunatapish Jesusta catijcuna tucuchunmi ayudana carca. * Cunan punllacunapica muyundij Allpapimi achca huauqui panicuna tiyan. Paicunaca ñaupa punllapi causaj huauqui panicuna shinallatajmi huillacuncuna. Pero, ¿Jesusta catijcuna tucuchunca imamantataj shujtajcunata ayudana canchij? ¿Paicunata ayudangapajca imallatataj rurana canchij? ¿Tucuicunachu ayudai tucunchij? ¿Paicunahuanca imamantataj pacienciata charina canchij? Cunanca cai tapuicunatami yachashun.

3. Juan 14:6 y 17:​3-pi nishca shinaca ¿Jesusta catijcuna tucuchunca imamantataj tucuicunata ayudana canchij?

³ Jesusta catijcunallami Diospaj amigo cai tucuncuna. Shinallataj cunan punllacunapish alli causaitami chari tucuncuna. Shamuj punllacunapicarin huiñai causaitami charingacuna. Chaimantami tucuicunata Jesusta catijcuna tucuchun ayudana canchij (Juan 14:6; 17:​3-ta liyipai). Cai trabajota alli pajtachingapajca Jehová Diosllatajmi ñucanchijta ayudanga. Chaimantami apóstol Pabloca: “Ñucanchijca, Diospajta paihuan rurajcunami canchij” nirca (1 Corintios 3:⁠9). Jehová Diospish Jesuspish ñucanchijman cai trabajota mingashcamantami cushilla sintirinchij.

4. ¿Huauqui Ivanmanta, paipaj huarmimantapish imatataj yachanchij?

⁴ Colombiapi causaj Iván y Matildemanta parlashun. Paicuna Davier shuti jovenman predicajpica Davierca: “Ñuca causaipi cambianatami munani. Pero mana pudinichu” nircami. Davierca boxeador, drogata fumaj, tragotapish achcata ubyajmi carca. Shinallataj mana cazarashpami paipaj novia Erikahuan causaj carca. Huauqui Ivanca: “Paicunaca caru pueblopimi causarcacuna. Chaimi paicunata visitangapajca lodo ñancunapi bicicletapi viajana carcanchij. Davier paipaj causaipi cambiocunata rurajpimi Erikapish Bibliamanta yachai callarirca” nircami. Davierca boxeanata, drogarinata, machanatami saquirca. Paipaj novia Erikahuanpishmi cazararca. Pani Matildeca: “Davierpish Erikapish 2016 huatapimi bautizarircacuna. Paicuna bautizaricujpica, ‘ñuca causaipi cambianatami munani. Pero mana pudinichu’ Davier nishcata yuyarishpami huacarcanchij” nircami. Cai experienciapi ricushca shinaca shujtajcunata ayudashpaca cushillami sintirinchij.

5. ¿Diosmanta yachasha nijcunata ayudangapajca imatataj rurana canchij?

⁵ Diosmanta yachasha nijcunatami mashcana canchij (Mateo 10:11). Tucui gentecunaman Diosmanta huillashpami Testigo de Jehovacuna cashcata, Jesusta alli catijcuna cashcata ricuchishun.

6. ¿Alli huillajcuna cangapajca imatataj rurana canchij?

⁶ Huaquincunaca Bibliamanta yachanatami munancuna. Cutin shujtajcunaca Bibliamanta yachanata mana munaj shinami ricuringa. Paicuna Bibliamanta yachana munaita charichunmi ayudana canchij. Alli huillajcuna cangapajca, allimi prepararina canchij. Shinallataj gentecuna munashca temacunamanta ima shina parlanatami yachana canchij.

7. a) ¿Ima shinataj predicai tucunchij? b) ¿Gentecuna parlajpica imamantataj alli uyana canchij?

⁷ Predicacushpaca: “Cunan punllacunapica muyundij Allpapimi achca problemacunata charinchij. ¿Pitaj cai llaquicunataca tucuchi tucun? ¿Quiquinca imatataj yuyangui?” nishpami tapui tucunchij. Chai huashaca Daniel 2:​44-tami ricuchi tucunchij. Mana cashpaca “¿Huahuacunata alli huiñachingapajca imatataj rurana canchij?” nishpami tapui tucunchij. Chai qꞌuipaca, Deuteronomio 6:​6, 7-tami liyi tucunchij. Gentecunaca Bibliapi nishcacunata pajtachishpaca allimi causangacuna. Chaimantami huillangapaj shuj temata agllacushpaca paicunapi ­yuyana canchij. Ña huillacushpaca gentecuna ima nishcatami alli uyana canchij. Paicunapaj crishcacunata parlajpipish mana  ­burlarinachu canchij. Chashnami imata yuyashcata intindishun. Paicunapish ñucanchijtami uyasha ningacuna.

8. ¿Gentecunataca imamantataj cutin cutin visitana canchij?

⁸ Shuj planta alli huiñachunca cutin cutinmi yacuta regana canchij. Shinallataj gentecunaman Bibliamanta cutin cutin yachachijpica Jehová Diosta, Jesustami cꞌuyai callaringacuna. Pero yachachinaman rijpica paicunaca mana huasipichu canga. O ocupadochari canga. Ñucanchijpi confiachunpish tiempomi minishtiringa. Chaimantami Bibliamanta yachana munaita charichunca cutin cutin visitana canchij.

9, 10. ¿Alli shungu gentecunata mashcangapajca imamantataj shuj shinalla trabajana canchij?

⁹ Quimsa huatata charij huahuahuan ima tucushcata ricushun. Cai huahua chingarijpica 500 yalli gentecunami mashcangapaj ayudarcacuna. 20 horasta mashcashca huashami shuj runaca sara chagrapi huahuata japirca. Pero huahuata japishcamanta paillata agradicichunca mana munarcachu. Chaipaj randica paica, “tucuicuna shuj shinalla trabajashcamantami huahuata japircanchij” nircami. Chai huahuata mashcaj shinami ñucanchijpish shuj shinalla muyundij Allpapi alli shungu gentecunata mashcacunchij.

¹⁰ Achca gentecunami chai huahua shinallataj chingarishca shina llaquilla causancuna. Chaimantami paicunaca ayudachun minishtincuna (Efesios 2:12). 8 millón yalli Testigocunami chashna gentecunata mashcacunchij. Ñucanchij causan lugarpica Bibliamanta yachasha nijcunahuanca manachari parlai tucushun. Pero shuj huauqui o pani shujtajcunata Diosta rijsichun ayudajpica ñucanchijpish cushillami sintirinchij.

11. Bibliamanta yachajcunata mana charishpapish shujtajcunata ayudangapajca ¿imatataj rurana canchij?

¹¹ Bibliamantaca manachari shujllamanpish yachachicunchij. Chashnapish shujtajcunata ayudangapajca ¿imatataj rurana canchij? Cunanlla tandanacuicunaman shamujcunatami alli shamushca nishpa chasquina canchij. Shinallataj tandanacuipi alli sintirichunmi ayudana canchij. Paicunaman cꞌuyaita ricuchijpimi Diosta alli sirvijcuna cashcata cuenta japingacuna (Juan 13:​34, 35). Tandanacuicunapi ñucanchijcuna ima shina comentajta ricushpami paicunapish comentanata yachangacuna. Chaimantami ashalla shimicunapi, respetohuan, tucui shunguhuan comentana canchij. Mushuj publicadorcunahuanpish huillanamanmi llujshina canchij. Shinallataj Bibliamanta alli yachachij cachunmi ayudana canchij. Caita rurashpami Jesuspaj ejemplota catichun ayudashun (Lucas 10:​25-28).

12. Diospaj Shimimanta shujtajcunaman yachachingapajca ¿tucuitachu yachana canchij?

¹² Diospaj Shimita shujtajcunaman yachachingapajca tucuita yachana cashcataca mana yuyanachu canchij. Bolivia llajtapi causaj pani Faustinamanta parlashun. Paica manaraj Testigo cashpaca liyinata mana yacharcachu. Pero cunanca ñami asha asha liyinata yachan. Liyinata ashata yachashpapish 6 gentecunatami bautizarichun ayudashca (Lucas 10:21). Cunanca pani Faustinaca 5 gentecunamanmi Bibliamanta yachachicun. Casi tucuicunami paita yalli alli liyijcuna can. Chashnapish paica Bibliamantami cushilla yachachicun.

13. ¿Ocupados cashpapish imamantataj huillana canchij?

¹³ Achca huauqui panicunaca ocupados cashcamantami Bibliamanta yachachingapajca mana tanto tiempota charincuna. Pero chashnapish gentecunaman Bibliamanta yachachingapajmi tiempota surcuncuna. Chaita rurashpami cushilla sintirincuna. Pani Melaniemanta parlashun. Paica paipaj ushushita mantiningapajca achcatami trabajana carca. Shinallataj paipaj yayaca cáncer ungüitami charirca. Chaimantami paitapish cuidana carca. Pani Melanieca Alaska llajtapi saquirij shuj uchilla pueblopimi causaj carca. Chai pueblopica paillami Testigo carca. Paica, “cai chiri llajtapi gentecunaman huillangapaj ayudahuai” nishpami Diosta mañaj carca. Shuj punllaca huillanaman llujshishpaca Sara shuti huarmihuanmi parlarca. Paica Jehová Diospaj shutita yachashpaca cushillami sintirirca. Punllacuna pasajpica cai huarmica Bibliamantami estudiai callarirca. Melanieca: “Viernes chishita shaicushca cashpapish ñuca huahuahuanmi Saraman Bibliamanta yachachinaman rij carcanchij.  Sara rurashca tapuicunata cutichingapajca allimi prepararij carcanchij. Jehová Diosta pai cꞌuyai callarijpica cushillami sintirircanchij” ninmi. Sarapaj familiapish, paipaj ñaupa religionpi cajcunapish Bibliamanta yachachunca mana munarcacunachu. Chashnapish paica Bibliamanta yachashpami catirca. Qꞌuipacarin bautizarircami.

14. a) ¿Jesusca huillanataca imamantataj pescanahuan compararca? b) 2 Timoteo 4:​1, 2-pica ¿apóstol Pabloca imatataj yachachirca?

¹⁴ Diosmanta yachasha nijcunata mana japishpapish mashcashpami catina canchij. Jesusca huillanataca pescadocunata japinahuanmi compararca. Huaquinpica pescajcunaca achca horascunata mashcashpapish shuj pescadollatapish mana japincunachu. Chaimantami paicunaca pescadocunata japingapajca caru ladocunaman rincuna. Huaquinpicarin tutapi o pacarimuihuanmi pescanaman rincuna (Lucas 5:⁠5). Chai shinallatajmi maijan huauqui panicunaca Diosmanta yachasha nijcunata japingapajca tutapi o pacarimuihuan huillanaman llujshincuna. Chashna rurashcamantami Diosmanta yachasha nijcunahuan parlai tucushcacuna. Ñucanchijpish punlla cashpa, tuta cashpa, mai lugarpi cashpapish huillanami canchij (2 Timoteo 4:​1, 2-ta liyipai).

15. Bibliamanta yachachicushpaca ¿imamantataj pacienciata charina canchij?

¹⁵ Bibliamanta yachachicushpaca pacienciatami charina canchij. ¿Imamanta? Bibliamanta yachacujcunataca Diospaj Shimita  rijsichun, valorachunmi yachachina canchij. Ashtahuantajca Jehová Diosta rijsishpa paita cꞌuyachunmi ayudana canchij. Shinallataj Jesús mandashcacunata alli intindishpa paicunapaj causaipi pajtachichunmi ayudana canchij. Huaquincunaca Bibliamanta yachai callarishcahuanmi causaipi cambiocunata rurancuna. Cutin shujtajcunaca ashtahuanmi demorancuna. Ima laya cajpipish paicunatami ayudana canchij.

16. ¿Raulpaj causaimantaca imatataj yachanchij?

¹⁶ Perú llajtapi sirvij shuj misioneroca cashna nishpami parlarca: “Raúl shuti runaca ña ishqui librocunata estudiashca cashpapish mana cambiasha nircachu. Paipaj causaipipish achca problemacunatami charirca. Huarmihuanpish maipish cachunmi causaj carca. Mapa shimicunatami parlaj carca. Paipaj huahuacunapish paitaca mana respetajcunachu carca. Chashna jahuapish siempremi tandanacuicunaman purij carca. Chaimi yachachinataca mana saquircani. Bibliata quimsa huatacunata estudiashca huashami Raulca bautizarirca” nircami. Cai experienciapi ricushca shinaca Bibliamanta yachachicushpaca pacienciatami charina canchij.

17. ¿Catij yachaipica imatataj yachashun?

¹⁷ Jesusca: “Tucui cai pachata richij, ñuca yachacujcunata ruraichij” nishpami mandarca. Huaquin gentecunaca mana ñucanchij shina yuyancunachu. Ima religiontapish mana charincunachu. Dios tiyashcatapish mana crincunachu. Pero Jesús mandashcata pajtachingapajmi paicunamanpish huillana canchij. Catij yachaipimi cai gentecunaman ima shina huillanata yachashun.