1. ¿Achcacunaca Jehová Diosta cꞌuyashcataca ima shinataj ricuchishcacuna?

 ¿JEHOVÁ DIOSTACA mashnataj cꞌuyangui? ¡Seguramente paitaca achcatami cꞌuyangui! Ñaupa punllacunamantapachami achca gentecunaca Jehová Diostaca achcata cꞌuyashcacuna (Salmo 104:​33, 34). Paicunaca Jehová Diosta ashtahuan sirvingapajca huaquin cosascunatami ladoman saquircacuna. Chashnami paita cꞌuyashcata ricuchircacuna. Israelpi causaj nazareocunami chaitaca rurarcacuna. ¿Paicunaca picunataj carca? ¿Paicunamantaca imatataj yachai tucunchij?

2. a) ¿Nazareocunaca picunataj carca? (Números 6:​1, 2). b) ¿Imamantataj huaquin israelitacunaca nazareo tucunata agllarcacuna?

² Hebreo rimaipica nazareo shimica “agllashca”, “chꞌicanyachishca” nisha ninmi. Huaquin israelitacunaca Jehová Diosta ashtahuan sirvingapajmi huaquin sacrificiocunata rurarcacuna. Paicunataca nazareocuna nishpami rijsijcuna carca. Moisesman cushca leypica cꞌari cashpa, huarmi cashpapish Jehová Diosta ashtahuan sirvingapaj shuj ari ninacuita rurai tucushcatami nirca. Paicuna ari ninacushca tucuringacamami nazareocuna shina causana carcacuna (Números 6:​1, 2-ta liyipai). a Nazareocunaca israelitacuna mana pajtachina cashca mandashcacunatami pajtachina carcacuna. ¿Pero paicunaca imamantataj nazareo tucunata agllajcuna carca? Jehová Diosta cꞌuyashcamanta, pai cushcacunamanta pagui ningapajmi chashna rurajcuna carca (Deuteronomio 6:5; 16:17).

3. ¿Ñucanchijca imamantataj nazareocuna shina canchij?

³ ‘Cristopaj ley’ tiyai callarijpica Diosta sirvijcunaca Moisesman  cushca leytaca ña mana cazunachu carca. Chaimantami paicunaca nazareo tucunataca ña mana agllai tucurcacuna (Gálatas 6:2; Romanos 10:4). Pero ñucanchijpish nazareocuna shinami Jehová Diostaca tucui shunguhuan, tucui almahuan, tucui yuyaihuan, tucui fuerzahuan sirvina canchij (Marcos 12:30). Jehová Diosman mingarishpaca paita chashna sirvingapajmi ari nircanchij. Chai ari nishcata pajtachingapajca Jehová Diospaj munaitami rurana canchij, huaquin sacrificiocunatapishmi rurana canchij. Cunanca nazareocuna paicuna ari nishcata ima shina pajtachijcuna cashcata ñucanchijpish paicunamanta imata yachai tucushcatami yachashun (Mateo 16:24). b

SACRIFICIOCUNATA CUSHICUSHPA RURASHUNCHIJ

4. Números 6:​3, 4-pi nishca shinaca ¿nazareocunaca ima sacrificiotataj rurarcacuna?

⁴ (Números 6:​3, 4-ta liyipai). Nazareocunaca uvacunata, pasacunata, tragota, uvamanta imalla rurashcacunatapish mana micui tucurcacunachu. Shujtaj israelitacunaca chai micunataca micui tucurcacunami. Chaicunata micunaca mana juchachu carca. Bibliapi nishca shinaca vinoca Jehová Dios cushca regalomi can. Ashtahuanpish vinoca ‘shungutami cushichin’ (Salmo 104:​14, 15). Shinapish nazareocunaca chaicunata mana micunatami agllarcacuna. c

5. ¿Shuj cusa huarmica Jehová Diosta ashtahuan sirvingapajca ima cambiocunatataj rurarcacuna?

⁵ Ñucanchijpish nazareocuna shinami Jehová Diosta ashtahuan sirvingapaj esforzarina canchij. Por ejemplo, Madián y paipaj huarmi Marcelaca d achca cullquitami ganajcuna carca. Chaimi shuj alaja huasipi causajcuna carca. Pero Jehová Diosta ashtahuan sirvingapajmi paicunapaj causaipica huaquin cambiocunata rurarcacuna. Paicunaca: “Minishtirishcallahuan causanatami decidircanchij. Chaimi shuj uchilla huasipi causanaman rircanchij. Ñucanchij carrotapishmi cꞌaturcanchij” nircacunami. Chai cambiocunata rurachunca cai cusa huarmitaca pi mana obligarcachu. Paicunaca predicacionpi ashtahuan ocuparingapajmi chai cambiocunata rurarcacuna. Chai decisionta japishcamantami paicunaca cushilla sintirincuna.

6. ¿Imamantataj huaquin sacrificiocunata ruranchij? (Fotomantapish parlapai).

 ⁶ Ñucanchijca Jehová Diosta ashtahuan sirvingapajmi huaquin cosascunata ladoman saquishcanchij (1 Corintios 9:​3-6). Jehová Diosca chai sacrificiocunata rurachunca mana obliganchu. Shinallataj chai ruraicunata ruranaca mana juchachu can. Pero Jehová Diosta tucui fuerzahuan, tucui shunguhuan sirvingapajmi chaicunataca ladoman saquishcanchij. Por ejemplo, maijan huauqui panicunaca Jehová Diosta ashtahuan sirvingapajmi paicunapaj huasita, alli trabajota saquishcacuna. Huaquincunacarin animalitocunatapish mana charincunachu. Shujtajcunaca mana utca cazaranata o cazarashca qꞌuipalla huahuacunata mana charinatami decidishcacuna. Cutin shujtajcunaca paicunapaj familiacunata, amigocunata saquishpami shujtaj ladocunapi sirvinaman rishcacuna. Ñucanchijcuna chashna shina sacrificiocunata rurashcamantami Jehová Diosca cushilla sintirin (Hebreos 6:10).

SHUJTAJCUNA DESANIMACHICHUNCA AMA SAQUISHUNCHIJ

7. ¿Nazareocunapajca paicuna ari nishcata pajtachinaca imamantataj huaquinpica sinchi carca? (Números 6:5; fotomantapish parlapai).

⁷ (Números 6:​5-ta liyipai). Nazareocunaca paicunapaj ari nishcata pajtachingapajca uma ajchataca mana rutuchinachu carca. Chashnami paicunaca Jehová Diosta respetashcata ricuchircacuna. Shuj israelita achca tiempota nazareo tucunata agllashca cajpica paipaj uma ajchaca achcatami huiñaj carca. Paipaj ajcha huiñashcata ricushpaca caishuj israelitacunaca chai israelita nazareo tucushcatami cuentata cui tucurcacuna. Chaimi maijancunaca paitaca apoyai tucurcacuna. Shinapish huaquin israelitacunaca nazareocunataca mana respetajcunachu carca. Por ejemplo, profeta Amós causashca punllacunapica Diosmanta caruyashca israelitacunaca ‘nazareocunamanca vinotami ubyachijcuna’ carca. Nazareocuna paicuna ari nishcata ama pajtachichunmi chaita rurajcuna carca (Amós 2:12). Chaimantami chai punllacunapi nazareo canaca sinchi cashcanga.

8. ¿Benjaminmantaca imatataj yachanchij?

⁸ Maijancunaca shujtajcunapaj ñaupajpi parlanatami achcata manchanchij. Pero Jehová Diosmi ama manchachun ayudai tucun. Noruega llajtapi causaj Benjamin huahuahuan paipaj escuelapi ima tucushcata ricushun. Paica 10 huatacunallatami charin. Ucrania llajtapi guerra tiyashcamanta chai llajtata apoyangapajmi tucui huahuacunaca shuj cancionta cantana carcacuna. Chai cancionta cantangapajca paicunaca Ucrania banderapaj colorcunahuanmi churarina carcacuna. Benjamin chaipi ama participangapaj carumantalla shayacujta ricushpaca paipaj profesoraca:  “¡Shamui! ¡Cantami shuyacunchij!” nircami. Benjaminca profesorapajman cꞌuchuyashpaca: “Ñucaca politicapica mana chagrurinichu. Achca testigo de Jehovacunaca guerraman mana rishcamantami carcelpi can” nircami. Chaita uyashpaca profesoraca chaipi participachunca Benjamintaca ña mana obligarcachu. Pero paipaj compañerocunaca paipish imamanta mana cantashcatami tapui callarircacuna. Chaimi Benjaminca achca manchaita charishcamanta huacasha nirca. Pero manchaita ladoman saquishpami imamanta mana cantasha nishcata intindichirca. Qꞌuipaca Benjaminca Jehová Dios ama manchashpa parlachun paita ima shina ayudashcatami paipaj yaya mamaman huillarca.

9. ¿Jehová Diospaj shungutaca ima shinataj cushichi tucunchij?

⁹ Jehová Diosta sirvijcuna cashcata tucuicuna ricuchunca paitami tucuipi cazuna canchij. Shinapish trabajopi, escuelapi ñucanchij compañerocunaman testigo de Jehovacuna cashcata huillanaca huaquinpica sinchimi can. Shinallataj gentecunaca ashtahuan ashtahuanmi millai tucushpa catincuna. Chaita ricushpaca Jehová Dios munashca shina causanaca ñucanchijpajpish sinchimi cai tucun. Shujtajcunaman Diosmanta yachachinapish huaquinpica sinchi layami ricuringa (2 Timoteo 1:8; 3:13). Pero Diospaj shunguta cushichingapajca millai gentecunapaj ejemplotaca mana catinachu canchij (Proverbios 27:11; Malaquías 3:18).

JEHOVÁ DIOSTA PUNTA LUGARPI CHURASHUNCHIJ

10. ¿Números 6:​6, 7-pi nishcacunata pajtachinaca nazareocunapajca imamantataj sinchi cashcanga?

¹⁰ (Números 6:​6, 7-ta liyipai). Nazareocunaca huañushcacunapajmanca mana cꞌuchuyanachu carca. Chai mandashcata pajtachinaca jahuallami cashcanga nishpachari yuyanchij. Pero shuj nazareopaj familia huañujpica chai mandashcata pajtachinaca sinchimi cashcanga. ¿Imamanta? Chai punllacunapi tiyaj costumbrecunata catingapajca gentecunaca huañushcacunapajmanmi cꞌuchuyana carca (Juan 19:​39, 40; Hechos 9:​36-40). Shinapish nazareocunaca chai costumbrecunataca mana cati tucurcacunachu. Pero chai costumbrecunapi mana participashpami paicunaca sinchi feta charishcata ricuchijcuna carca. Ashtahuanpish mana paicunallachu carca. Jehová Diosmi fuerzasta, animota cushpa paicunataca ayudarca.

11. ¿Ñucanchij familiacuna Diospaj mandashcacunata ladoman saquishpa paicunapaj munashcata rurachun nijpica imatataj rurana canchij? (Fotomantapish parlapai).

¹¹ Ñucanchijcunaca Jehová Diosman mingarishpa ari nishcata pajtachingapajmi esforzarina canchij. Chaipajca alli decisioncunatami  japina canchij. Shinallataj ñucanchij familiata ayudangapajmi esforzarina canchij. Pero Diospaj mandashcacunata ladoman saquishpa paicunapaj munashcata rurachun nijpica paicunata cazunapaj randica Jehová Diostami cazuna canchij (Mateo 10:​35-37; 1 Timoteo 5:8). Paicunapaj munashcata mana rurashcamanta ñucanchij familiacuna pꞌiñarijpipish Yayitu Jehová Diostami tucuipi cazuna canchij.

12. ¿Bibliata ama yachashpa catichun paipaj huarmi obligasha nijpica huauqui Alexandruca imatataj rurarca?

¹² Huauqui Alexandru paipaj huarmi Dorinata ima shina ayudashcata ricushun. Ishquindijmi Bibliata estudiai callarircacuna. Pero shuj huata qꞌuipaca Dorinaca Bibliata estudianatami saquirca. Alexandrutapishmi Bibliata estudianata saquichun nirca. Pero paica respetohuan, alaja shimicunahuanmi: “Ñucaca Bibliatami estudiashpa catigrini” nirca. Chaita ricushpaca Dorinaca achcata pꞌiñarishpami Bibliata estudianata saquichun obligasha nirca. Dorina ima shina sintirishcata intindinaca huauqui Alexandrupajca sinchimi carca. Huaquinpica Dorinaca sinchitami rimaj carca. Chaimi Alexandruca Bibliata estudianata saquinata yuyarca. Pero Jehová Diosta sirvishpa catingapaj, paipaj huarmita cꞌuyaihuan, respetohuan tratashpa catingapajmi esforzarirca. Alexandrupaj ejemplota ricushpami Dorinaca cutin Bibliata estudiai callarirca. Qꞌuipacarin bautizarircami. JW.ORG paginapi Alexandru y Dorina Văcar: Cꞌuyaita charijca pacienciatami ricuchin nishca videota ricui.

13. ¿Jehová Diostapish, ñucanchij familiatapish cꞌuyashcataca ima shinataj ricuchinchij?

¹³ Jehová Diosca tucui familiacunata ruraj cashcamantami cushilla causachun munan (Efesios 3:​14, 15). Sumaj causaita charisha nishpaca Jehová Diostami tucuipi cazuna canchij. Paica ñucanchij familiata cꞌuyaihuan, respetohuan cuidangapaj sinchita esforzarijta ricushpaca cushillami sintirin (Romanos 12:10).

NAZAREOCUNA SHINA CACHUN SHUJTAJCUNATA ANIMASHUNCHIJ

14. ¿Picunallatataj animana canchij?

¹⁴ Jehová Diosta cꞌuyashcamantami paita ashtahuan sirvingapaj huaquin cosascunataca ladoman saquina cashcanchij. Chaita ruranaca mana jahuallachu can. Pero ¿Jehová Diosta tucui shunguhuan sirvingapajca ima shinataj caishuj chaishuj animari tucunchij? Chaipajca alaja shimicunahuanmi animanacuna canchij (Job 16:5). Por ejemplo, tal vez cambaj congregacionpica maijan huauqui panicunaca Jehová Diosta ashtahuan sirvingapaj imalla minishtirishcallahuan causanatami yuyacuncuna. Mana cashpaca tal vez maijan jovencunaca escuelapi paicunapaj crishcacunata mana manchashpa difindingapajmi esforzaricuncuna.  Chaita ruranaca paicunapajca mana jahuallachu can. Shinallataj tal vez maijan huauqui panicuna o Bibliata estudiajcunaca Jehová Diosta sirvicushcamantami familia ucupica achca problemacunata charincuna. Paicunata animangapajmi tiempota surcuna canchij. Shinallataj imata mana manchashpa Jehová Diosta sirvingapaj sinchita esforzaricushcamantami felicitana canchij (Filemón 4, 5, 7).

15. ¿Tiempo completota sirvicuj huauqui panicunataca ima shinataj ayudai tucunchij? (Shuj ejemplota churashpa parlai).

¹⁵ Jehová Diosta tiempo completota sirvicuj huauqui panicunatapishmi ayudai tucunchij (Proverbios 19:17; Hebreos 13:16). Sri Lanka llajtapi causaj shuj yuyajlla panimi chaitaca rurarca. Pai jubilarishcamanta ashtahuan cullquita cujpimi ishqui joven panicunata precursoracuna shina sirvishpa catichun ayudarca. Chai ishqui precursoracunaca mana suficiente cullquita charircacunachu. Chaimi cai yuyajlla panica paicunapaj telefonocunamanta pagashpa ayudangapaj cada quilla cullquita huaquichij carca. Chaita rurashpami cai panica paicunata shungumanta cꞌuyashcata ricuchirca.

16. ¿Nazareocunamantaca imatataj yachashcanchij?

¹⁶ Nazareocunamantaca achcatami yachashcanchij Pero ¿Jehová Diosmantapish imatataj yachai tucunchij? Ñucanchijcunaca Jehová Diosman mingarishpa ari nishcata pajtachingapajmi huaquin cosascunata huashaman saquishcanchij. Shinallataj paita tucuipi cazungapajmi esforzaricunchij. Jehová Diosca ñucanchijcuna ima shina esforzaricushcataca allimi yachan. Shinallataj paica paita shungumanta cꞌuyashcata ricuchichunmi ñucanchijmanca oportunidadta cushca (Proverbios 23:​15, 16; Marcos 10:​28-30; 1 Juan 4:19). Nazareocunamanta yachashpami Jehová Dios ñucanchij esfuerzocunata achcata valorashcata yachashcanchij. Chaimanta Jehová Diosta tucui shunguhuan sirvishpa catingapaj esforzarishpa catishunchij.