1, 2. ¿Imamantataj Sansonpaj causaimantaca yachana canchij?

 ¿SANSONMANTACA imatataj yuyaringui? Seguramente fuerzasapa cashcatami yuyaringui. Chaica ciertomi. Pero Sansonca fuerzasapa cashpapish pandarishcamantami llaquicunata aparca. Sansón pandarishca cajpipish Jehová Diosca tucui causaipi sinchi feta charishcatami yuyarirca. Chaimantami paimanta yachachun Sansonpaj causaita Bibliapi quillcachirca.

² Jehová Dios poderta cujpimi Sansonca israelitacunata ayudai tucurca. Pai huañushca achca huatacuna pasashca qꞌuipaca Jehová Diosca paimanta quillcachunmi Pabloman yuyaita curca. Pabloca Sansonmanta, shujtaj Jehová Diosta alli sirvijcunamantapishmi quillcarca (Hebreos 11:​32-34). Sansonca llaquicunata charishpapish Jehová Diospimi shunguta churarca. Chaimantami cai yachaipica Sansonmanta imata yachai tucushcata ricushun.

3. ¿Jehová Diosca Sansonmanca imatataj rurachun mingarca?

³ Sansón huacharijpica filisteocunami israelitacunata mandacurca (Jueces 13:1). Paicunaca israelitacunataca achcatami llaquichircacuna. Chaimantami Sansón huacharijpica Jehová Diosca filisteocunapaj maquimanta paicunata quishpichichun agllarca (Jueces 13:5). Chaita ruranaca Sansonpajca sinchimi cagrirca. Chaimantami paica Jehová Diospi confiana carca.

4. ¿Jehová Diosca Sansontaca ima shinataj ayudarca? (Jueces 15:​14-16).

⁴ Sansón Jehová Diospi confiashcata ima shina ricuchishcata ricushun. Filisteo soldadocunaca Sansonta japingapajmi Lehí pushtuman rishcacuna carca. Chaica Judá llajtapimi saquirishcanga. Judapi causajcunaca filisteocunata ricushpaca achcatami mancharircacuna. Chaimantami ishqui mushuj huascacunahuan huatashpa Sansontaca filisteocunaman entregarcacuna  (Jueces 15:​9-13). Pero Diospaj espíritu poderta cujpimi Sansonca cacharirirca. Chai qꞌuipaca ‘manaraj alli chaquishca burro quijadosta japishpami huaranga filisteocunata huañuchirca’ (Jueces 15:​14-16-ta liyipai).

5. ¿Sansonca Jehová Diospi confiashcataca ima shinataj ricuchirca?

⁵ ¿Sansonca shujtaj armacunahuan macanacunapaj randica imamantataj shuj burro quijadoshuan macanacurca? Chaita rurashpami paica Jehová Diospi tucui shunguhuan confiashcata ricuchirca. Paica ima armahuan macanacushpapish Jehová Dios paipaj munaita pajtachichun tucuipi ayudanatami seguro carca. Sansonca Jehová Diospi confiashcamantami filisteocunataca mishai tucurca.

6. ¿Sansonmantaca imatataj yachanchij?

⁶ Diospaj pueblopi shuj asignacionta chasquishpaca “chaitaca mana pajtachi tucushachu” nishpachari yuyashun. Pero Sansonta ayudashca shina Jehová Dios ñucanchijta ayudanatami seguros cana canchij. Jehová Diosca ñucanchij mana yuyashca shinami ayudai tucun. Chaimanta Jehová Diospi confiashunchij. Paimi paipaj munaita pajtachichun fuerzasta cushpa ayudanga. Chaitaca tucui shunguhuanmi crina canchij (Proverbios 16:3).

7. ¿Diospaj pueblopica ima cambiotaj tiyashca?

⁷ Tandanacuna Huasicunata, Betel huasicunata shayachishpa ayudaj huauqui panicunaca Jehová Diospi confiashcatami ricuchishcacuna. Ñaupaca Tandanacuna Huasicunata, shujtaj edificiocunata shayachingapajca paicunallatajmi planocunata rurajcuna carca. Chai qꞌuipaca paicunallatajmi tucuita shayachijcuna carca. Pero Diospaj pueblo miraricushcamantami pushaj huauquicunaca Jehová Diospaj ayudata mashcashpa huaquin cambiocunata rurarcacuna. Chaimantami Tandanacuna Huasicunata, shujtaj edificiocunata rurangapajca shayachishca huasicunata randishpami chaicunata allichi callarircacuna. Huauqui Robertca achca huatacunatami Tandanacuna Huasicunata rurashpa ayudashca. Paica cashnami nirca: “Achca huatacunatami ñucanchijllataj Tandanacuna Huasicunata shayachircanchij. Chaimantami pushaj huauquicuna chai cambiota imamanta rurashcata intindinaca  ñucapajca asha sinchi carca. Pero sinchi cajpipish tucuicunami chai cambiocunata apoyarcanchij. Chaita rurashcamantami Jehová Diosca ñucanchijta bendiciashpa catishca”. Cai ejemplopi ricushca shinaca Jehová Diosca paipaj pueblo paipaj munaita rurashpa catichunmi ayudacun. Chaimanta cashna nishpa tapurishunchij: “¿Cambiocuna tiyajpi apoyashpa catingapaj, Jehová Diospaj ayudata mashcashpa catingapajchu esforzaricuni?”.

8. ¿Yacunaihuan huañucushpaca Sansonca imatataj rurarca?

⁸ ¿Sansón shuj leonhuan macanacushcata yuyaringuichu? Chai leonta huañuchishca qꞌuipaca paica Asquelonpi causaj 30 cꞌaricunatapishmi huañuchirca (Jueces 14:​5, 6, 19). Sansonca Jehová Diospaj ayudallahuan chaita rurai tucushcataca allimi yacharca. ¿Imamanta shina ninchij? Por ejemplo, 1.000 filisteocunata huañuchishca qꞌuipaca paica yacunaihuanmi huañucurca. Pero paillataj yacuta mashcanapaj randica Jehová Dios paita ayudachunmi mañarca (Jueces 15:18).

9. ¿Jehová Diosca Sansón mañashcataca ima shinataj cutichirca? (Jueces 15:19).

⁹ ¿Diosca Sansón mañashcataca ima shinataj cutichirca? Paica shuj milagrota rurashpami shuj jutcuta pascashpa yacuta llujshichirca. ‘Sansonca chai yacuta ubyashpami cutinllataj fuerzata japirca’ (Jueces 15:​19-ta liyipai). Samuel Jueces librota quillcai horascamami chai jutcumantaca yacuca llujshishpa catirca. Chaimantami israelitacunaca chai yacuta ricushpaca llaqui punllacunapi Jehová Diospi confiana cashcata yuyarishcangacuna.

10. ¿Jehová Dios ñucanchijta ayudachunca imatataj rurana canchij? (Fotomantapish parlapai).

¹⁰ ¿Sansonmantaca imatataj yachanchij? Imata alli rurajcuna cashpapish, Diospaj pueblopi ima mingashcacunata chasquishca cashpapish tucuicunami Jehová Diospaj ayudata mashcana canchij. Shinallataj mana jatun tucushpami Jehová Diospaj ayudata mashcashpalla imatapish alli rurai tucushcata yuyarina canchij. Sansonca Jehová Dios cushca yacuta ubyashca qꞌuipami fuerzasta japirca. Ñucanchijpish espiritualmente sinchi cangapajca Jehová Dios cushca ayudacunatami chasquina canchij (Mateo 11:28).

11. ¿Huauqui Alekseymanta, paipaj huarmimantaca imatataj yachanchij?

¹¹ Aleksey shuti huauquica Rusia llajtapimi causan. Chai llajtapica Diosta sirvijcunataca catirashpami llaquichicuncuna. ¿Alekseyca chai llaquicunata ahuantangapajca imatataj rurashca? Paipish, paipaj huarmipish Diospajta ruranataca manataj saquishcacunachu. Alekseyca cashnami nirca: “Bibliataca punllantami liyini, estudiani. Ashtahuanpish tucui tutamantacunami ñuca huarmindij chai punllapaj textota estudianchij. Shinallataj tandallami Jehová Diostaca mañanchij” nircami. ¿Paicunamantaca imatataj yachanchij? Ñucanchijllapi confiarinapaj randica Jehová Diospimi confiana canchij. Chaipajca Bibliata estudianata, Diosta mañanata, tandanacuicunaman rinata, predicacionman llujshinataca manataj saquinachu canchij. Caicunata rurajpica Jehová Diosca achca bendicioncunatami cunga. Shinallataj ima shinami Sansonman fuerzasta curca, ñucanchijmanpishmi paita sirvishpa catichun fuerzasta cunga.

12. ¿Sansonca ima shinataj pandarirca?

¹² Sansonca ñucanchij shinami juchayuj carca. Chaimantami huaquinpica mana alli decisioncunata japirca. Por ejemplo, Israelpi juez shina huaquin huatacunata sirvicushpaca Sorec llajtapi causaj Dalila huarmimantami  enamorarirca (Jueces 16:4). Dalilata manaraj rijsishpaca paica shuj filistea huarmihuanmi cazarasha nirca. Bibliapi nishca shinaca filisteocunata mishangapajmi Jehová Diosca Sansón chai huarmihuan cazarachun munarca. Chai qꞌuipaca Sansonca Gaza nishca llajtaman rishpaca shuj huainayaj huarmipaj huasipimi saquirirca. Chaita ricushpaca Jehová Diosca filisteocunata llaquichichunmi Sansonmanca poderta curca. Chaimi Sansonca chai llajtapaj pungucunata llujchishpa shujtaj ladoman aparca (Jueces 14:​1-4; 16:​1-3). Pero ¿Jehová Diosca Sansón Dalilamanta enamorarichunchu munashcanga? Mana. Dalilaca Israelmantami cashcanga. Chaimantami Sansón paihuan cazarashpapish filisteocunataca mana mishai tucunman carca.

13. ¿Dalilaca Sansontaca ima shinataj pandachirca?

¹³ Filisteocunaca Dalila Sansonta pandachichunmi munarcacuna. Chaimantami ‘Sansonta pandachijpica cullquitami cushun’ nircacuna. Pero ¿Sansonca Dalila paita pandachisha nishcataca imamantataj mana cuentata curca? Tal vez paita achcata cꞌuyashcamantami mana cuentata cushcanga. Dalilaca Sansontaca cutin cutinmi ‘¿canca imamantataj yallitaj fuerzasapa canguiyari?’ nishpa tapurca. Chaimi Sansonca imamanta fuerzasapa cashcata paiman huillarca. Chaita rurashcamantami Sansonca fuerza illaj saquirirca. Ashtahuancarin Diospaj ñaupajpimi mana alli ricurirca (Jueces 16:​16-20).

14. ¿Sansonca Dalilapi confiashcamantaca ima llaquicunallatataj charirca?

¹⁴ Sansonca Jehová Diospi confianapaj randi Dalilapi confiashcamantaca achca llaquicunatami charirca. Filisteocunaca paita japishpaca ñahuicunata surcushpa, Gazaman apashpami cadenacunahuan huatashpa carcelpi tiyaj molino rumita muyuchichun churarcacuna.  Sansonca chai llajtapaj pungucunata llujchishpami paicunataca pingaipi churashca carca. Pero cunanca paicunami paitaca pingaipi churarcacuna. Chai qꞌuipaca Dagón shuti dios Sansonta llaquichingapaj ayudashcata yuyashpami paita adorangapaj shuj fiestata rurarcacuna. Shinallataj paicunaca pugllashpa, cushicushpa asingapajmi Sansontaca chai fiestaman aparcacuna (Jueces 16:​21-25).

15. ¿Sansonca Jehová Diospi cutin confiashcataca ima shinataj ricuchirca? (Jueces 16:​28-30; página 1-pi tiyaj fototapish ricui).

¹⁵ Sansonca pandarishpapish ñaupajmanmi catirca. Chaimantami paica Jehová Dios paiman mingashcata pajtachingapaj esforzarirca (Jueces 16:​28-30-ta liyipai). Sansonca: “Filisteocuna ñuca ishqui ñahuicunata surcushcamanta cunantaj tucuicunata huañuchingapaj cutin fuerzata cuhuai” nishpami Yaya Diosta mañarca. Jehová Diosca Sansón mañashcata uyashpami cutin paimanca fuerzata curca. Chashnami Sansonca achca filisteocunata huañuchi tucurca. Paica tucui paipaj causaipi huañuchishcatapish yallitami huañuchirca.

16. ¿Sansonmantaca imatataj yachanchij?

¹⁶ Sansonca pandarishcamantami achca llaquicunata charirca. Chashnapish Jehová Diospaj munaita pajtachishpa catingapajmi esforzarirca. Ñucanchijpish imapi pandarishpaca llaquicunatami charishun o ñucanchijman mingashcacunataca ña manachari pajtachi tucushun. Chashnapish ñaupajmanmi catina canchij. Jehová Diospajca pandarishca cajpipish valishcami canchij (Salmo 103:​8-10). Ashtahuanpish imapi pandarishca cashpapish Sansón shina Diospajta rurashpa catingapajmi esforzarina canchij.

17, 18. ¿Michaelmantaca imatataj yachanchij? (Fotomantapish parlapai).

¹⁷ Michaelca siervo ministerial, precursor regular shinami congregacionpica achcata ayudacurca. Shinapish pandarishcamantami chashnaca ña mana sirvishpa catirca. Michaelca: “Congregacionpica achcatami ayudacurcani. Chaimantami pandarishcamanta, ñaupa shina ña mana sirvi tucushcamantaca achcata llaquirircani. Jehová Dios ñucata mana saquinatami seguro carcani. Pero ¿ñaupa shina congregacionpi cutin ayudai tucushachu? ¿Jehová Diospish ñuca amigo cutin casha ningachu? nishpami sustarij carcani” nircami.

¹⁸ Michaelca pandarishpapish ñaupajmanmi catirca. Paica: “Jehová Diospajman ashtahuan  cꞌuchuyangapajmi esforzarircani. Chaita rurachunca Jehová Diosta shungumanta mañana, Bibliata estudiana, chaipi nishcacunapi yuyanami ayudarca” nircami. Tiempohuanca Michaelca cutinmi congregacionpi precursor regular shina sirvi tucurca. Ashtahuancarin paitaca anciano cachunmi nombrarcacuna. Paica: “Huauqui panicuna, anciano huauquicunapish ñucata apoyashcamantami Jehová Dios ñucata achcata cꞌuyaj cashcata cuentata curcani. Ñuca concienciapi tranquilo sintirishcamantami cunanca cushilla Jehová Diosta sirvini. Shinallataj imapi pandarishca cajpipish shungumanta arrepintirijpica Jehová Dios perdonaj cashcatami yachashcani” nircami. Ñucanchijpish imapi pandarishca cashpaca ama cutin chaillapitaj urmangapajmi esforzarina canchij. Jehová Diospi confiashpa catingapajpishmi esforzarina canchij. Chaita rurajpica Jehová Diosca paipaj pueblopi ayudachunmi saquinga. Ashtahuancarin ñucanchijmanca achca bendicioncunatami cunga (Salmo 86:5; Proverbios 28:13).

19. ¿Cai yachaipi Sansonmanta yachashcamantaca ima shinataj sintiringui?

¹⁹ Cai yachaipica Sansón imalla rurashcataca ashallatami yachashcanchij. Paica Dalila pandachichun saquishcamantami achca llaquicunata charirca. Pero pandarishpapish Jehová Diostami sirvishpa catirca. Jehová Diospish paipaj munaita pajtachingapajca paitami utilizashpa catirca. Ashtahuancarin Sansón sinchi feta charishcata ricuchishcamantami Hebreos capítulo 11-pi pai imallata rurashcata quillcachirca. Chai capitulopica Jehová Diosta alli sirvijcuna imallata rurashcatami parlan. Jehová Dios ñucanchijta cꞌuyaj cashcata, llaquicunahuan chꞌimbapuracushpa ñucanchijta ayudasha nishcata yachashpaca cushillami sintirinchij. Chaimanta Sansón shina Jehová Diostaca ‘Mandaj Jatun Dioslla fuerzasta cuhuai’ nishpa mañashpa catishunchij (Jueces 16:28).