Apóstol Pabloca Jehová * Diosca: ‘Llaquij Yayami, tucui ñucanchij llaquicunapipish cushichij Diosmi’ can nircami (2 Corintios 1:3, 4). Bibliapi cai shimicunata nishpaca Diosca tucuicunata ayudai tucushcatami yachachin. Shinallataj ima sinchi llaquicunahuan cajpipish ñucanchij Yaya Diosca cushichishpami ayudanga.

Caipi yuyashun: Ungushca cashpa hospitalman mana rijpica ¿ima shinataj doctorca cantaca ayudai tucunga? Chashnallataj Dios ñucanchijta ayudachunca ¿imatataj rurana canchij? Bibliapica ñucanchijtaca: “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8).

¿Dios ñucanchijpajman cꞌuchuyai tucushcataca ima shinataj yachanchij? 1) Diosllatajmi cutin cutin  ñucanchijta ayudasha nin (Página 4-pi tiyaj  cuadrota ricui). 2) Ñaupa punllacunapi, cunan punllacunapipish Diosca achca gentecunatami cushichishca.

Mandaj Davidca cunan punllacunapi gentecuna shinami achca llaquicunata charirca. Paica, ‘ñuca rogashpa mañashcata uyahuai’ nishpami Diospaj ayudata mashcarca. ¿Jehová Diosca paita uyarcachu? Ari uyarcami. Chaimantami Davidca: “Ñuca shunguta paipi churajpimari, quishpichihuarca, cushichihuarca” nircami (Salmo 28:2, 7).

Diosca: ‘Shungu pꞌaquirishcacunata alliyachichun’, ‘tucui llaquilla causacujcunata cushichichunpishmi Jesusta cacharca’ (Isaías 61:1, 2). Isaías huillashca shinami Jesusca llaquicunahuan “shaicushcacuna, aparishcacuna” shina cajcunataca cꞌuyaihuan ayudarca (Mateo 11:28-30).

Llaquilla caj gentecunataca Jesusca cꞌuyaitami ricuchirca, alli consejocunatami curca. Ungushcacunatapish alliyachishpami ayudarca. Shuj cutinca lepra ungüita charij runaca “ñucata alliyachisha ninguipishchari” nishpami rogarca. ‘Jesusca paita llaquishpami ari, alliyachisha nini nishpami alliyachirca’ (Marcos 1:40, 41).

Jesús cai Allpapi ña mana cajpipish, paipaj Yayaca llaquilla cajcunata ayudashpami caticun. Paica ‘tucuipi cushichij Dios’ cashcamantami gentecunata cushichishpa ayudacun (2 Corintios 1:3). Dios ima shina ñucanchijta ayudacushcata ricushun.

• Bibliahuan. ‘Ñaupaman quillcachishcacunaca ñucanchijta yachachingapaj, llaquicunata ahuantangapaj, cushilla cangapaj, shuyana yuyailla cangapajmi Diosca quillcachirca’ (Romanos 15:4, NM).

• Espíritu santohuan. Jesús huañushca qꞌuipaca paita catijcunaca cushichishpa ayudachunmi minishtircacuna. Bibliapica Diosmi paipaj espíritu santohuan cushichishpa ayudarca ninmi (Hechos 9:31). Diospaj espíritu santo o fuerzaca achca podertami charin. Diosca paipaj poderhuanmi pitapish, maipi cajpipish, ima sinchi llaquicunahuan cajpipish cushichishpa ayudai tucun.

• Ñucanchij mañaicunata uyashpa. Bibliaca: ‘Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Diosca cancunamanca sumaj causaitami cunga. Chai sumaj causaimi cancunapaj shungutapish, cancunapaj yuyaitapish huaquichinga’ ninmi (Filipenses 4:6, 7, NM).

• Diosta servijcunahuan. Diosta servijcunaca ñucanchij alli amigocunami cai tucun. Paicunami ñucanchijta ayudai tucun. Apóstol Pabloca paipaj amigocunamantaca: ‘Ima illajlla cajpi, llaquicunahuan cajpipish’ paicunaca ñucata “achcatami cushichircacuna” nircami (Colosenses 4:11; 1 Tesalonicenses 3:7).

Cai ayudacunaca ciertochu ñucata ayudai tucun nishpachari tapuringui. Chaita yachangapajca ñaupaman parlashca cꞌaricunata huarmicunata ima shina Dios paicunata ayudashcata ricushun. Jehová Diosca: Shuj “mama paipaj huahuata cushichij shinami, ñucapish cancunataca cushichisha” ninmi. Ñucanchijpish paicuna shinami llaquicunahuan cashpaca cai shimicuna pajtarijta ricushun (Isaías 66:13).