1. ¿Llaquijcunaca ima shinataj can?

¿LLAQUIJ gentecunaca ima shinataj can? Paicunaca cꞌuyaj, generososcunami can. Por ejemplo, Jesús parlashca samaritanopi yuyashun. Shuj cutinca shuj judío runatami shuhuacunaca macashpa, shuhuashpa rircacuna. Chaimi samaritano runaca llaquishpa ayudarca. Shinallataj imalla minishtishca cosascunahuanpishmi ayudarca (Lucas 10:29-37). Cai chꞌimbapuraita yachashpami Jehová Diosca cꞌuyaj, generoso cashcata yachanchij.

2. ¿Ñucanchijpish ima shinataj llaquij cashcataca ricuchina canchij?

² ¿Ima shinataj ñucanchijpish llaquij cashcata ricuchina canchij? Maijan ñucanchijta llaquichijpica mana ñucanchijpish chashnallataj llaquichinachu canchij. Jehová Diosca llaquijmi can. Rey Davidca: ‘Ñucanchij millaita rurashcamantaca, llaquichina shinatajca Jehová Diosca mana llaquichircachu’ nircami (Salmo 103:10). Pero maipica Jehová Diosca juchata rurajcunataca pai cashcata ruraj, llaquij cashcamantami corregin.

3. ¿Cai yachaipica ima tapuicunatataj yachashun?

³ Cai yachaipica Bibliamantami quimsa yuyaicunata yachashun. ¿Jehová Diosca imamantataj llaquij Dios can? ¿Shujtajcunata corregishpaca llaquij cashcatachu ricuchinchij? ¿Ñucanchijpish ima shinataj llaquij cai tucunchij?

4. ¿Jehová Diosca imamantataj llaquij cashcata ricuchin?

⁴ Jehová Diosca llaquij cashcamantami cꞌuyaita ricuchin. Apóstol Pabloca Jehová Diosca cꞌuyaimantami jahua pachapi causana esperanzata charijcunamanca jahua pachapi huiñaita causachun saquishca ninmi (Efesios 2:4-7). Pero Jehová Diosca  mana jahua pachaman rigrijcunallamanchu cꞌuyaita ricuchin. Paica tucuicunamanmi cꞌuyaita ricuchin. Davidca: “Mandaj Diosca tucuicunahuan allimari. Pai llaquij canaca tucui rurashcacunapaj jahuapimari” nircami (Salmo 145:9). Pero Jehová Diosca huaquinpica mana siempre llaquij cashcata ricuchinchu.

5. ¿Jesusca ima shinataj Jehová Dios cꞌuyaj cashcataca yacharca?

⁵ Jesusca achca huatacunatami manaraj cai Allpaman shamushpaca jahua pachapi paipaj Yayahuan causarca. Chaimi Jehová llaquij cashcataca alli yacharca (Proverbios 8:30, 31). Jesusca paipaj Yaya juchayuj runacunata ima shina llaquij cashcataca allimi ricurca (Salmo 78:37-42). Chaimantami Jesús cai Allpapi cashpaca Jehová Dios shinallataj gentecunamanca llaquishpa, cꞌuyaihuan yachachirca.

6. ¿Jesusca ima shinataj paipaj Yaya llaquij cashcataca yachachirca?

⁶ Pasaj yachaipica Jesusca chingarishca jovenmanta parlashpami Jehová Dios llaquij cashcata yachachirca. Cai chingarishca jovenca paiman cushca herenciatapish gastashpami tucuita tucuchirca (Lucas 15:13). Cai jovenca tiempo qꞌuipaca pai mana allita ruracushcamanta arrepintirishpami huasiman tigrarca. ¿Paipaj yayaca imatataj rurarca? Jesusca: “Pai caruta shamucujpirajmi paipaj yaya ricushpaca achcata llaquirishpa, callpashpa, rishcahuan ugllarishpa mucharca” nircami. Cai joven huasiman tigrajpica yayaca mana rimarcachu. Chaipaj randica cꞌuyaitami ricuchirca. Shinallataj familia parte cachunpishmi saquirca. Cai joven achca juchacunata rurashcamanta shungumanta arrepintirishcata yachashpaca paipaj yayaca perdonarcami. Jesús parlashca llaquij yayaca Jehová Diostami ricuchin. Jesusca cai ejemplohuanmi gentecuna shungumanta arrepintirijpica Yayitu Dios paicunata perdonaj cashcata yachachirca (Lucas 15:17-24).

7. ¿Jehová Diosca ima shinataj llaquij cashcata, yachaj cashcataca ricuchin?

⁷ Jehová Diosca yachaj, llaquij Diosmi can. Chaimantami paica ñucanchij alli causachun alli decisioncunata agllan. Bibliapica: ‘Jahua pachamanta yachaj canaca, llaquij canaca, allita ruranami can’ ninmi (Santiago 3:17). Ima shinami shuj yayaca paicunapaj huahuata cꞌuyan, chashnallatajmi Jehová Diospish ñucanchijtaca cꞌuyan (Salmo 103:13; Isaías 49:15). Ñucanchij juchayujcuna cajpipish Jehová Diosca llaquij cashcamantami ñucanchijtaca perdonan. Pero Jehová Diosca yachaj Dios  cashcamantami maijanpish jatun juchata rurajpica paicunataca mana llaquishcata ricuchin.

8. ¿Imamantataj jatun juchata rurajcunataca congregacionmanta llujchincuna?

⁸ Caipi yuyashun. Shuj huauqui o shuj panichari juchata rurana mana alli cajta yachashpapish achca huatacunata jatun juchata rurashpa causan. ¿Jatun juchata ruracujta yachaj chayashpaca imatataj rurana canchij? Apóstol Pabloca cashna laya gentecunahuanca ‘mana tandanacunachu canguichij’ nishpami shuj cartata quillcarca (1 Corintios 5:11). Jatun juchata rurajcuna paicuna mana arrepintirijpica congregacionmantami llujchina can. Chaita rurashpaca huauqui panicunatami cuidashun. Shinallataj Jehová Diospaj shutitapish mana mapayachishunchu. Pero huaquincunaca maijan huauqui, panita congregacionmanta llujchijpica Jehová Diosca mana llaquij cashcatami ricuchin nishpami yuyancuna. ¿Chaica ciertochu can?

9, 10. a) Hebreos 12:5, 6-pi nishca shinaca ¿jatun juchata rurajta congregacionmanta llujchishpaca ima shinataj llaquij cashcata ricuchincuna? b) ¿Caitaca ima ejemplohuantaj alli intindichinguiman?

⁹ Congregacionpi shuj huauqui o panita cunanca ña mana testigo de Jehovachu can nijpica tucuicunami llaquilla sintirinchij. Chaimantachari maipica ¿paicunata congregacionmanta llujchinaca valishcachu can? nishpa tapurinchij. Pero yuyarinami canchij. Paicunata congregacionmanta llujchishpaca llaquij cashcatami ricuchincuna (Proverbios 13:24). Maijancunaca jatun juchata rurashpaca mana arrepintirishcacunachu. Chaimantami ancianocunaca paicunataca congregacionmanta llujchishcacuna. Huaquincunaca: ‘Ñucanchijta llujchishcamantami causaipi cambiashpa Jehová Diospajman cutin tigrachun ayudashcacuna’ nincunami (Hebreos 12:5, 6-ta liyipai).

¹⁰ Cai ejemplopi yuyashun. Shuj michijchari shuj oveja ungushca cashcata cuentata cun. Cai ovejapaj ungüi caishuj ovejacunaman ama pasachunmi michijca chai ovejataca chꞌicanyachin. Ovejacunaca siempremi shuj ovejata paicunamanta caruyachijpica mancharincuna. ¿Ovejata caishuj ovejacunamanta chꞌicanyachishpaca michijca pai millai cashcatachu ricuchin? Mana. Chaita rurashpaca michijca cai ungushca oveja shujtaj ovejacunata ama contagiachunmi jarcan. Chashnami michijca caishuj ovejacunata cuidan (Levítico 13:3, 4-ta ricui).

11. a) ¿Congregacionmanta llujchishcacunaca imamantataj shuj oveja ungushca shina can? b) ¿Congregacionmanta llujchishcacunaca Diospajman cutin tigrangapajca ima ayudacunatataj charincuna?

¹¹ Congregacionmanta llujchishcacunaca paicuna Jehová Diospaj amigo canata saquishcamantami cai oveja ungushca shina can (Santiago 5:14). Ima shinami shuj millai ungüica shujtajcunata contagian. Chashnallatajmi Yayitu Diospaj ñaupajpi jatun juchata rurashpaca shujtajcunata Diospaj amigo canamanta caruyachi tucuncuna. Chaimantami cashna huauqui panicunataca ancianocunaca congregacionmanta llujchina can. Chashna rurashpaca juchata rurajcunata Jehová Dios llaquishcatami ricuchincuna. Shinallataj jatun juchata rurajpish arrepintirishpa cutin Jehová Diosta sirvichunmi ayudancuna. Congregacionmanta llujchishcacunaca tandanacuicunaman rinataca manataj saquinachu can. Shinallataj paicunapaj feta sinchiyachishpami catina can. Chaipajca Jehová Dios cushca publicacioncunapi, JW Broadcasting^® programapimi yachai tucuncuna. Ancianocunaca congregacionmanta llujchishcacuna cambiocunata ruracujta ricushpaca paicunamanmi huaquin consejota  cui tucuncuna. Chashna ayudajpica paicunaca cutinmi testigo de Jehová cai tucuncuna. *

12. ¿Jatun juchata ruraj huauqui panicuna mana arrepintirijpica cꞌuyaj, llaquij ancianocunaca imatataj rurana can?

¹² Jatun juchata ruraj huauqui panicuna mana arrepintirijllapimi paicunataca congregacionmanta llujchincuna. Ancianocunaca mana ucui jahua paicunataca juzgancunachu. Ashtahuanpish Biblia yachachishca shinami juzgancuna. Shinallataj Jehová Diosca paicunataca yachachingapaj corregishcataca allimi yachancuna (Jeremías 30:11). Ancianocunaca huauqui panicunatami cꞌuyancuna. Chaimantami cai huauqui panicuna Jehová Diosmanta caruyachunca mana munancuna. Pero paicunaca llaquij cashcamantami jatun juchata rurajcunataca congregacionmanta llujchincuna.

13. ¿Corinto llajtapica Diosta sirvij shuj runataca imamantataj congregacionmanta llujchina carca?

¹³ Punta siglopimi apóstol Pabloca Diosta sirvij runa jatun juchata rurajpi corregirca. Diosta sirvij cai runaca paipaj yayapaj huarmihuanmi huainayashpa causaj carca. Ñaupa punllacunapica Jehová Diosca israelitacunamanca: ‘Maijanpish paipaj yayapaj huarmihuan siririjca, paipaj yaya llatananatami llatanan. Chaimanta cꞌaritapish huarmitapish huañuchinguichij’ nircami (Levítico 20:11). Pero apóstol Pabloca Corinto llajtapi jatun juchata ruraj runataca mana huañuchichun mandarcachu. Pero paita congregacionmanta llujshichichunmi mandarca. ¿Imamanta? Huaquin huauqui panicunaca Diosta sirvij runa jatun juchata rurajpica ñitcarircacunami. Cutin shujtajcunacarin chaitaca normalta shinami ricui callarircacuna (1 Corintios 5:1, 2, 13).

14. 2 Corintios 2:5 al 8 y 11-pi nishca shinaca ¿jatun juchata ruraj runataca Pabloca ima shinataj llaquij cashcata ricuchirca?

¹⁴ Asha tiempo qꞌuipaca apóstol Pabloca congregacionpi jatun juchata ruraj runa paipaj causaipi arrepintirishpa cambiocunata rurashcatami yachaj chayarca. Cai runa Diospaj shutita yangapi churashca cajpipish apóstol Pabloca ancianocunataca paita ama yallitaj llaquichinguichij nircami. Pabloca: “Ashtahuanpish yallitaj llaquihuan ama tucuricuchun paitaca perdonashpa cushichinami canguichij” nircami. Apóstol Pabloca Diosta sirvij runa llaquilla sintirishcataca allimi yacharca. Jehová Diospaj ayudata, huauqui panicunapaj  ayudata mashcachunmi Pabloca ayudarca (2 Corintios 2:5-8, 11-ta liyipai).

15. ¿Jatun juchata ruraj huauqui panicunataca ancianocunaca ima shinataj corregin?

¹⁵ Jehová Diosca llaquij Diosmi can. Ancianocunapish chashnallatajmi llaquij cancuna. Maijan huauqui panicuna paicunata corregichun minishtijpica ancianocunaca cꞌuyaihuanmi paicunata corregincuna. Pero paicuna arrepintirijpica congregacionpi catichunmi saquincuna. Jatun juchata ruraj huauquita o panita congregacionmanta mana llujchijpica paicunaca juchata rurana normalta layami ricungacuna. Chashna ama tucuchunmi mana arrepintirij huauqui panicunataca congregacionmanta llujchina can. ¿Shinapish ancianocunallachu cꞌuyaita ricuchina can?

16. Proverbios 21:13-pi nishca shinaca ¿imamantataj huauqui panicunata llaquij cana canchij?

¹⁶ Jehová Diosca llaquij Diosmi can. Ñucanchij mañashcacunata Yayitu Dios uyachunca ñucanchijpishmi shujtajcunata llaquina canchij (Proverbios 21:13-ta liyipai). Yayitu Dios ñucanchij mañashcacunata uyachunca ayudata minishticuj huauqui panicunata ayudangapajmi listos cana canchij. Bibliapica: “Imamantapish maijanta mana llaquishpa llaquichijtaca, paitapish mana llaquishpallataj llaquichishcami canga” ninmi (Santiago 2:13). Ñucanchijpish shujtajcuna ñucanchijta llaquichunmi minishtinchij. Chaimanta ñucanchijpish shujtajcunatami llaquina canchij. Ashtahuancarin shuj huauqui o pani arrepintirishpa congregacionman tigrajpimi paicunamanca cꞌuyaita ricuchina canchij.

17. ¿Mandaj Davidca ima shinataj shungumanta llaquij cashcataca ricuchirca?

¹⁷ Bibliapimi Diosta sirvijcuna shujtajcunata llaquishcata, paicunata alli tratashcata yachai tucunchij. Por ejemplo, mandaj Davidca mandaj Saúl paita mana alli tratajpipish paitami shungumanta llaquirca. Davidca allimi yacharca Jehová Dios rey Saulta mandaj cachun agllashcata. Chaimantami paitaca alli tratashpa ima dañotapish mana rurarca (1 Samuel 24:9-12, 18, 19).

18, 19. ¿Davidca picunamantaj mana cꞌuyaita ricuchirca?

¹⁸ Davidca maipica mana siempre llaquijchu carca. Por ejemplo, Nabal Davidta, paipaj runacunata mana alli tratajpi, pi mana carasha nijpica Davidca dimastij pꞌiñarishpami Nabalta, Nabalpaj huasi ucu familiataca huañuchisha nirca. Chaimi Nabalpaj huarmi Abigailca cꞌuyaihuan, pacienciahuan Davidtaca paipaj huasi ucupura familiata ama huañuchichun jarcarca (1 Samuel 25:9-22, 32-35).

¹⁹ Shuj cutinca profeta Natanca Davidmanca shuj charij runa shuj huajcha runapaj ovejata shuhuashcatami parlarca. Chaimi Davidca pꞌiñarishpa: “¡Mandaj Diosca causajmi, chashna ruraj runaca huañunatajmi can!” nirca (2 Samuel 12:1-6). Davidca allimi yacharca Moisesman cushca leypica shuj ovejata pi shuhuajpica chuscu ovejahuan cuna cashcata (Éxodo 22:1). Davidca cai runaca huañunatajmi can nishpaca paica mana cꞌuyaj cashcatami ricuchirca.  Pero Natanca cai ejemplota churashpami Davidca chaitapish yalli jatun juchacunata rurashcata intindichirca. Cai ejemplopimi ricunchij Davidta Jehová Dios achcata llaquishcata (2 Samuel 12:7-13).

20. ¿Davidpaj ejemplomantaca imatataj yachanchij?

²⁰ Davidca dimastij pꞌiñarishca cashpaca Nabalta, paipaj runacunatami huañuchisha nirca. Shinallataj profeta Natán, Davidman shuj charij runami huajcha runapaj ovejata shuhuashca nijpica paica charij runataca huañuchichunmi mandarca. Chaimantachari tal vez cashna nishpa tapurinchij. ¿Davidca imamantataj chashna juzgarca? Pai jatun juchata rurashcamantami paipaj concienciapica mana alli sintirirca. Ñucanchijpish shujtajcunata sinchita juzgashpaca Yayitu Dioshuan mana alli apanacucushcatami ricuchishun. Jesusca cashna nishpami advirtirca. Paica: “Ama juchachichu. Canpish ama juchachishca cangui. Ima shinami shujtajta juchachingui, chashnallatajmi juchachishca cangui” nircami (Mateo 7:1, 2). Shujtajcunata sinchita juzganapaj randica Jehová Dios shina paicunata llaquingapaj esforzarishunchij.

21, 22. ¿Ima shinallataj llaquij cashcata ricuchi tucunchij?

²¹ Llaquij cashpaca shujtajcunapajmi allita rurashun. Chaimanta tucuicunami familiapi, congregacionpi, gentecunaman Diosmanta huillashpa paicunata llaqui tucunchij. ¿Ima shinataj ayudai tucunchij? Tal vez maijan huauqui panichari animota minishtin. Paicuna minishtijpica micunata apashpa o ima cosascunahuanmi ayudai tucunchij. Cutin shuj huauquita o panita testigo de Jehová cachun saquijpica paicunata animangapaj esforzarishunchij. Gentecunamanpish Yayitu Diosmanta huillangapaj esforzarishunchij. Chashnami tucuicuna llaquij cashcata ricuchishun (Job 29:12, 13; Romanos 10:14, 15; Santiago 1:27).

²² Yayitu Diosca llaquij Diosmi can. Shujtajcunamanta preocuparishpaca paicuna ayudachun minishtishcatami yachashun. Paicunata ayudashpaca llaquij cashcatami ricuchishun. Cai cualidadta pajtachishpaca Jehová Diostami cushichishun.