¿Shamuj punllacunapica ñuca familiahuanca ima shinashi causasha? ¿Llaquicunata charishachu? ¿Achca huatacunatachu causasha o utcachu huañusha? nishpa tapurishcanguichu. Ñaupa punllacunamantami gentecunaca chashna tapurishcacuna.

Yachaj gentecunaca cai pachapi imalla tucucushcata ricushpami shamuj punllacunapi ima tucunata nincuna. Maijancuna pajtarishpapish shujtajcunaca mana pajtarishcachu. Por ejemplo, Guglielmo Marconi runaca carupi cajcunahuan parlanacungapajmi shuj aparatota rurarca. 1912-pica paica: “Chai aparatocuna shina tiyajpica macanacuicunaca mana tiyangachu” nircami. Shinallataj Inglaterra llajtapica musicata cantaj Beatles shuti grupomi tiyarca. 1962-pica musicata grabaj shuj runaca ‘mana famoso tucungacunachu’ nircami. Pero chai grupotaca cunancamami gentecunaca yuyarincuna.

Shinallataj maijancunaca causaipi ima tucunata yachangapajmi horóscopo nishcacunata periodicopi, revistacunapi ricuncuna. Cutin shujtajcunaca yumbucunapajman rishpami maquicunata, adivinana cartacunatapish leyichincuna.

Ñaupa punllacunapipish gentecunaca ima tucunatami yachanata munajcuna carca. Chaimantami yanga dioscunata tapuj curacunapajman rijcuna carca. Por ejemplo, Lidia llajtata mandaj Creso shuti runaca Persia llajtata mandaj Cirohuan macanacushpa mishanata o mana mishanatami yachasha nirca. Chaimantami Grecia llajtapi causaj shuj curaman regalocunata cacharca. Chai curaca shuj “jatun llajtami” tucuchishca cagrin nircami. Cresoca gananata yuyashpami, Cirohuan macanacungapaj rirca. Pero chai “jatun llajtaca” Creso mandacushca llajtallatajmi carca.

Grecia llajtamanta curaca pi gananataca mana achijta huillarcachu. Chaimantami Cresoca pandata crishpa llaqui tucurca. Cunan punllacunapica ¿gentecunaca ima tucunata alli huillai tucuncunachu?