¿SHAMUJ PUNLLACUNAPI IMA TUCUNATA AGLLAI TUCUNGUICHU? Achca gentecunaca destinopimi crincuna. Cutin shujtajcunaca paicunapaj causaita Dios controlaj cashcatami crincuna. Chaimantami paicunapaj ima munashca mana pajtarijpica “chashna destinashcami canchij” nincuna.

Gentecunaca cai mundopi achca problemacunata charishpami llaquilla sintirincuna. Paicunaca alli causaita charingapajca achcatami esforzarincuna. Achcata esforzarishpapish guerracuna, ungüicuna, shuhuacuna, terremotocuna tiyashcamantami imata mana rurai tucuncuna. Chaimantami, “alli causaita charinaca sinchimi can” nishpa yuyancuna.

Caya punlla imata ruranatachari ña alli yuyarcanchij. Pero rato menos pensado ima llaqui japijpichari ñucanchij yuyashcata mana pajtachi tucunchij (Eclesiastés 9:12). Bibliapi yachachishca shinaca cada unomi ñucanchij causaipi imata ruranata agllai tucunchij. ¿Imamantataj chashna ninchij?

Israelitacuna Dios cusha nishca Allpaman yaicugricujpimi, Diosca Moisesman cashna nirca: “Cancunapish cancunapaj huahua huahuacunapish causaita charinata, huañuita japinata, allita chasquinata, llaquita chasquinataca ñami ricuchini. Chai causaita agllashpaca cancunapish, cancunapaj huahua huahuacunapish, Mandaj Dios cancunapaj Taita Diosta cꞌuyashpa, paita cazushpa paita catishpa causachunmi mandani” nircami (Deuteronomio 30:15, 19, 20).

‘Cancunapish cancunapaj huahuacunapish causaita charinata, huañuita japinata, allita chasquinata, llaquita chasquinataca ñami ricuchini. Cancunaca causaitami agllana canguichij’. (Deuteronomio 30:19).

Diosca israelitacunataca Egipto llajtamanta llujshishpa pai cusha nishca Allpapi cushilla causachunmi munarca. Pero chai bendicionta chasquingapajca israelitacunaca ‘causaitami agllana carca’. Chaipajca Diostami cꞌuyana, tucuipi cazuna, paita catinapish carcacuna.

Canpish israelitacuna shinallatajmi agllana cangui. Alli decidishpaca shamuj punllacunapica paraíso Allpapimi huiñaita causai tuncungui. Chaipajca Diostami cꞌuyana, cazuna, paita catinapish cangui. ¿Chaita pajtachingapajca imatataj rurana cangui?

Apóstol Juanca: “Diosca cꞌuyajmari” nircami (1 Juan 4:8). Jesuspish chaitaca allimi yacharca. Chaimantami shuj fariseo, ‘¿mandashcacunamantaca maijantaj ashtahuan importante can?’ nishpa tapujpica cashna contestarca: “Cambaj Mandaj Taita Diosta tucui shunguhuan, tucui almahuan, tucui yuyaihuan cꞌuyangui” nircami (Mateo 22:37). Shinaca mana manchaimanta o shujtajcuna nishcallamanta Diosta cazunachu canchij. Ashtahuanpish paipaj alli amigo cangapajca shungumantami paita cꞌuyana canchij.

Yuyashun, yaya mamacunaca huahuacuna cushilla causachunmi munan. Chaimantami cꞌuyaihuan yachachingapaj, alli huiñachingapaj esforzarincuna. Chashna rurashcamantaca yaya mamacunaca huahuacuna cazuchun, cꞌuyachunmi munancuna. Jehová Diospish chai yaya mamacuna shinallatajmi ñucanchijta achcata cꞌuyashpa tucuita  cushca. Chaimantami ñucanchijcuna paita agradicichun, cꞌuyachun munan.

Diosta cazungapajca tucui paipaj mandashcacunatami yachana canchij. Diostaca mana gentecunata laya uyai tucunchijchu. Paita rijsingapajca punllantami Bibliata leyishpa ima yachashcatapish pajtachina canchij (1 Juan 5:3).

Diosta tucuipi cazuna importante cashcatami Jesusca yachachirca. Paica: “Runaca mana tandallahuan causangachu. Ashtahuanpish Taita Diospaj shimimanta llujshishca shimicunahuanmi causanga” nircami (Mateo 4:4). Yuyashun, causangapajca micunaca importantemi can. Pero Diospaj yachaita yuyaipi charinami ashtahuan importante can. Rey Salomonca: “Yachaica escudo shina huaquichijmi, cullquipish escudollatajmi. Shina cashpapish yachaica yachaj runamanca causaita cuj cashcamantaca, cullquita yallimari” nircami (Eclesiastés 7:12). Diosmanta yachashpallami cunan punllacunapica alli causai tucunchij, alli decisioncunatapish agllai tucunchij. Chashnami huiñai causaita charishun.

Jesusca: “Causaiman pushajca pungupish quichquimi, ñanpish quichquimi. Chaitaca ashacunallami chasquincuna” nircami (Mateo 7:13, 14). Chai ñanta puringapaj, huiñai causaita charingapajca Diosmi ayudai tucun. Chaimantami Diosta catina canchij (Salmo 16:8). Pero ¿Diosta catingapajca imatataj rurana canchij?

Punllantami achca ocupados canchij. Chaimantami huaquinpica Diospaj mandashcacunapi yuyangapajca tiempota casi mana charinchij. Pero Bibliaca: ‘Ima shina puricushcata alli yuyarichij. Ama chꞌahuancuna shina, ashtahuanpish yachajcuna shina caichij. Mana alli punllacunapi cashcamanta, allita rurana tiyajpica, allitaraj ruraichij’ ninmi (Efesios 5:15, 16). Shinaca, Diosta catingapajca pai mandashcacunatarajmi puntapi churana canchij (Mateo 6:33).

Ñaupa punllacunapi ima tucushcataca manachari cambiai tucungui. Pero shamuj punllacunapica cambaj familiahuanmi cushilla, alli causai tucungui. Bibliaca Diosca ñucanchijta cꞌuyashcata, imata rurachun nishcatapishmi huillan. Profeta Miqueas nishcacunata yuyarishun. Paica:

“Huañujlla aichayuj runalla, paica canmanca imalla alli cana cashcataca ñamari huillarca. Mandaj Diosca cantaca caillatamari rurachun mañan: “Imatapish cashcata ruraj cachun, cꞌuyaj cachun, llaquij cachun, cambaj Taita Diospaj ñaupajpi llaquirishpa cazuj cachunmi munan” nircami (Miqueas 6:8).

¿Quiquinca Diosta cazushpa causasha ninguichu? Diosta cazushpa, alli decisioncunata agllashpaca sumaj bendicioncunatami chasquingui.