1. ¿Jesusca paipaj discipulocunaman ima shina huillashpa catichuntaj animarca? (Página 1-pi tiyaj fotota ricui).

JESUSCA cai Allpapi cashpaca cushicushpami huillashpa catirca. Paita catijcunapish cushilla huillashpa catichunmi munan (Juan 4:35, 36). Jesús cai Allpapi paipaj discipulocunahuan huillajpica paicunaca cushillami huillashpa catircacuna (Lucas 10:1, 5-11, 17). Pero Jesusta huañuchingapaj japijpica paipaj discipulocunaca desanimarircacunami (Juan 16:32). Cutinmi Jesusca pai causarishca qꞌuipaca paita catijcuna cushicuihuan huillashpa catichun animarca. Jesuspaj discipulocuna cushilla huillashpa catijpimi contracunaca: ‘Tucui Jerusalén pueblopimari cancuna yachachishcataca yachachishcanguichij’ nircacuna (Hechos 5:28).

2. ¿Jesusta catijcuna huillashcamantaca Diosca ima shinataj bendiciarca?

² Apostolcunataca Jesusmi predicashpa catichunca ayudarca. Jehová Dios bendiciashcamantami achca gentecunaca Diosmanta yachai callarircacuna. Por ejemplo, huata 33 Pentecostés punllapica 3.000 gentecunami bautizarircacuna (Hechos 2:41). Chai qꞌuipaca ashtahuan gentecunami Jesusta cati callarircacuna (Hechos 6:7). Jesusca: ‘Tucuri punllacunapipish achcacunami ñucata catingacuna’ nircami (Juan 14:12; Hechos 1:8).

3, 4. a) ¿Huaquin lugarcunapica imamantataj predicanaca sinchi can? b) ¿Cai yachaipica imatataj yachashun?

³ Tucuicuna cushilla huillangapajmi esforzarinchij. Huaquin  lugarcunapica cushilla huillanaca jahuallami can. Achca gentecunami Bibliamantaca yachasha nincuna. Chaimantami maijan huauqui panicunaca tucuicunaman yachachinataca mana alcanzancuna. Cutin shujtaj lugarcunapica huillanaca mana facilchu can. ¿Imamanta? Huasin huasin huillacujpica maipica gentecunaca huasipi mana pasancunachu. Paicunahuan parlajpipish huaquincunallami Bibliamanta yachasha nincuna.

⁴ Cai yachaipimi ñucanchij causan lugarpi predicana sinchi cajpi, gentecuna mana uyasha nijpipish cushilla predicashpa catingapaj imata ruranata yachashun. Shinallataj huaquin huauqui panicuna gentecunaman predicashpa catingapaj imata rurashcatami ricushun.

5. ¿Achca huauqui panicunapajca imamantataj huillanaca mana fácil can?

⁵ Achca huauqui panicunapajca huasin huasin predicanaca sinchimi can. Huaquin huasicunapica timbrecunami tiyan. Cutin shujtaj jatun huasicunapica guardiacunami pungupi cuidancuna. Chaimantami huasiyujcuna mana pasachun nijpica mana huillai tucunchij. Maijan huauqui panicunaca caru lugarpi, ashalla gentecuna tiyan lugarpimi huillanaman rincuna. Pero chaiman chayajpica maipica gentecunaca huasipi mana canchu. ¿Cashna jarcaicuna tiyajpipish gentecunaman predicangapajca imatataj rurana canchij?

6. ¿Huillanaca imamantataj pescana laya can?

⁶ Jesusca predicanataca pescanahuanmi chꞌimbapurarca (Marcos 1:17). Shuj pescaj runaca tucui punlla pescashpapish maipica imata mana japinchu. Pero paica desanimarinapaj randica mai lugarpi pescanata, ima horas pescanatami ricun. Ñucanchijpish huillacushpaca chashnallatajmi rurai tucunchij. Cunanca huaquin yuyaicunahuan ricushun.

7. ¿Imamantataj gentecuna huasipi cai horas predicangapaj esforzarina canchij?

⁷ Gentecuna huasipi cai horasmi predicana canchij. Maipica gentecunaca huasipica mana canchu. Pero mai horaspish tigrangacunami. Chaita yachashpami maijan huauqui panicunaca chishi lado o amsayai horas predicancuna. Chai horasmi ashtahuan gentecunaca huasicunapi tiyan. Tal vez paicunaca huasipi cashcamantami parlangapajpish tiempota charingacuna. Congregacionta pushaj huauqui David shinami ñucanchijpish predicai tucunchij. Huauqui Davidca: “Ñuca compañerohuan predicacujpica huaquin huasicunapica gentecunaca mana ricurinchu. Cutin qꞌuipalla chai huasicunaman tigrajpica achca gentecunami ña chayashca. Chaimi paicunamanca cushilla predicai tucushcani” ninmi. *

8. ¿Eclesiastés 11:6-taca huillacushpaca ima shinataj pajtachina canchij?

⁸ Cai yachaipaj versoca gentecunata mashcashpa catichunmi animan (Eclesiastés 11:6-ta liyipai). Párrafo 7-pi parlashca huauqui Davidca gentecunata mashcashpa catinataca manataj saquircachu. Paica huaquin huasicunaman tigrashpaca Bibliamanta yachanata munaj shuj runahuanmi tuparca. Cai runaca: “Casi 8 huatacunatami caipi causani. Cunanmi punta cutin shuj Testigo ñuca huasiman shamujta ricuni” nircami. Huauqui Davidca: “Maipica huasin huasin predicajpica gentecunaca huasimanca manaraj chayashcacunachu. Pero, cutin gentecuna huasipi cai horas paicunata visitanaman rishpaca achca gentecuna Bibliamanta yachanata munashcatami cuentata cuni” nircami.

9. ¿Huasicunapi mana pasaj gentecunaman predicangapajca huaquin huauqui panicunaca imatataj rurashcacuna?

 ⁹ Chꞌican chꞌican lugarcunapimi predicana canchij. Huasicunapi mana caj gentecunaman predicangapajca huaquin huauqui panicunaca chꞌican chꞌican lugarcunapimi huillanaman rincuna. Por ejemplo, jatun edificiocuna tiyan lugarcunapica callecunapi, huillana carritocunahuanmi predicancuna. Chashna predicashcamantami jatun edificiocunapi mana predicai tucushca gentecunahuanca ñahui ñahui parlai tucushcacuna. Shujtaj huauqui panicunaca parquecunapi, mercadocunapi, negociocunapimi predicancuna. Chaipi caj achca gentecunaca predicachun o publicacioncunata saquichunmi munancuna. Bolivia llajtamanta Floiran shuti shuj superintendente de circuito huauquica: “Mercadocunapi, tiendacunapica casi la 1 de la tardemanta 3 de la tardecamami cꞌatujcunataca visitaman rinchij. Paicunaca chai horaspi mana ocupados cashcamantami Bibliamanta uyancuna. Huaquincunacarin Bibliamantami yachai callarishcacuna” ninmi.

10. ¿Gentecunamanca ima layallataj predicana canchij?

¹⁰ Telefonomanta cayashpa o cartacunata quillcashpami predicana canchij. Caipi yuyashun, tal vez huasicunapimi gentecunahuan parlangapajca chꞌican chꞌican horas rishcanchij. Pero, paicunahuanca mana tupashcanchijchu. ¿Paicunaman predicangapajca imatataj rurana canchij? Pani Katarinaca: “Huasicunapi mana parlai tucushca gentecunamanca cartacunatami quilIcani. Chai cartacunapica paicunaman ñahui ñahui imata nisha nishcatami quillcani” ninmi. ¿Caimantaca  imatataj yachanchij? Ñucanchijpish cartacunata quillcashpa o telefonomanta cayashpami huillana canchij.

11. ¿Huaquin gentecunaca imamantataj ñucanchij predicajpica mana uyasha nincuna?

¹¹ Achca gentecunaca Diosmanta, Bibliamanta yachanataca mana munancunachu. Maijancunaca achca llaquicuna tiyashcamantami Diospi mana crincuna. Cutin shujtajcunaca religionta pushajcuna mana allicunata rurajpimi Bibliamantaca mana yachasha nincuna. Huaquincunacarin paicunapaj trabajopi, familiapi o ima problemacunallapimi yallitaj ocuparishca cancuna. Chaimantami Biblia paicunata ayudai tucushcataca mana cuentata cuncuna. Pero, ¿paicunaman cushilla huillashpa catingapajca imatataj rurana canchij?

12. Filipenses 2:4-pi nishca shinaca ¿huillacushpaca imatataj rurana canchij?

¹² Gentecunamantami preocuparina canchij. Achca gentecunaca callaripica Bibliamantaca mana yachasha nincunachu. Pero, paicunamanta preocuparijpi, alli tratajpica qꞌuipaca Bibliamantami yachasha nincuna (Filipenses 2:4-ta liyipai). Por ejemplo, párrafo 8-pi parlashca huauqui Davidca: “Gentecuna mana uyasha nijpica Bibliata, publicacioncunata huaquichishpami paicuna imamanta chashna yuyashcata tapuni” ninmi. Gentecunaca paicunamanta de verdadtaj preocuparishcatami cuentata cuncuna. Quizás ñucanchij ima nishcataca mana yuyaringacunachu. Pero paicunata alli, cꞌuyaihuan tratashcatami yuyaringacuna. Chaimanta gentecuna mana uyasha nijpipish paicunamanta preocuparishpa cꞌuyaihuan, respetohuan tratashunchij.

13. ¿Gentecunamanta preocuparishcata ricuchingapajca ima shinataj predicana canchij?

¹³ Gentecunapaj causaipi yuyashpa, paicuna uyasha nishca yuyaicunamantami predicana canchij. Chashnami paicunamanta preocuparishcata ricuchishun. Por ejemplo, huasiyujcuna huahuacunata charijta cuentata cushpaca huahuacunata ima shina huiñachinamanta, familiahuan cushilla causanamantami predicai tucunchij. Cutin huaquin huasi pungucunapi achca llavecunahuan cajta ricushpaca cai punllacunapi tiyaj shuhuajcunaca ña para siempremi tucuringa nishpami huasiyujcunamanca intindichi tucunchij. Gentecuna uyasha nijpica Biblia yachachishcacuna paicunata ima shina ayudai tucushcatami ricuchina canchij. Párrafo 10-pi parlashca pani Katarinaca: ‘Biblia ñucata ima shina ayudashcatami siempre  yuyarini. Chaita rurashpami gentecunamanca shungumanta, mana dudashpa predicai tucushcani’ ninmi.

14. Proverbios 27:17-pi nishca shinaca ¿huauqui panicunahuan predicashpaca ima beneficiocunatataj charishun?

¹⁴ Huillanataca huauqui panicunamanta yachashunchij. Apostolcuna causashca punllacunapica Timoteoca ima shina huillanata, ima shina yachachinataca apóstol Pablomantami yacharca (1 Corintios 4:17). Ñucanchijpish Timoteo shinallatajmi predicangapajca experienciata charij huauqui panicunamanta yachai tucunchij (Proverbios 27:17-ta liyipai). Huauqui Shonpaj ejemplopi yuyashun. Paica gentecuna paicunapaj religionhuan amañarishca lugarpimi predicarca. ¿Cai huauquica ama desanimaringapajca imatataj rurarca? Paica: “Huillanaman ringapajca siempremi shuj huauquihuan rij carcani. Huasin huasin predicacushpaca ima shina predicangapajmi allichirircanchij. Por ejemplo, shuj runaman huillashca qꞌuipaca cai runaman ima shina predicashcatami parlanacurcanchij. Qꞌuipaca caishuj gentecuna cai runa layallataj cutichijpica paicunaman ima shina parlanatami repasarcanchij” ninmi.

15. ¿Imamantataj predicanaman ringapajca siempre Jehová Diosta mañana canchij?

¹⁵ Huillangapajca Jehová Dios ayudachun mañashunchij. Jehová Dios paipaj espíritu santota cujpimi imatapish pajtachi tucushun (Salmo 127:1; Lucas 11:13). Por ejemplo, Jehová Diosta mañacushpaca alli shungu gentecunaman, Bibliamanta yachasha nij gentecunaman predicangapajmi Jehová Diosta mañana canchij. Qꞌuipaca tucui laya gentecunaman predicangapajmi esforzarina canchij.

16. ¿Cushilla predicangapajca imamantataj Bibliata estudiana canchij?

¹⁶ Bibliata estudiangapaj tiempota surcushunchij. Bibliapica: “Chashnami cancunallataj Diospaj munai alli cashcata, chasquinalla cashcata, jucha illaj cashcata yachanguichij” ninmi (Romanos 12:2, NWT ). Ñucanchijllataj Bibliata alli estudiashpaca shujtajcunamanpish mana dudashpami yachachishun. Pani Katarinaca: ‘Ñuca feta sinchiyachingapajca Bibliata alli estudiana cashcatami cuentata curcani. Chaimanta Jehová Dios tucuita ruraj cashcata, Bibliapish paipaj Shimi cashcata, Jehová Dios paipaj organizacionta cunan punllapish pushacushcatami estudiarcani. Chashna ñuca feta sinchiyachishpami cushilla huillashpa catini’ ninmi.

17. ¿Jesusca imamantataj cushilla predicashpa catirca?

¹⁷ Jesusca gentecuna mana uyasha nijpipish cushillami predicashpa catirca. ¿Imamantataj chaita rurarca? Paica allimi yacharca gentecuna Jehová Diosmanta yachanata minishtishcata. Chaimi paica huillangapaj achcata esforzarirca. Shinallataj mana uyasha nij gentecuna qꞌuipaca Jehová Diosmanta yachashpa paita catijcuna tucunataca allimi yacharca. Por ejemplo, paipaj familiaca Jesús cai Allpapi quimsa huatacunata predicacujpica mana paita catijcuna tucurcachu (Juan 7:5). Ashtahuanpish Jesús ña causarishca qꞌuipami paipaj lahuauquicunaca Jesusta cati callarircacuna (Hechos 1:14).

18. ¿Imamantataj huillashpa catinchij?

¹⁸ Gentecuna mana uyasha nijpipish huillashpami catina canchij. Tal vez qꞌuipaca paicunaca Diostami sirvisha ningacuna. Huaquincunaca Diosta sirvingapajca ashtahuan tiempotami minishtincuna. Cutin shujtajcunaca mana uyasha nishpapish ñucanchij alli comportarijta ricushpa, cushilla huillajta ricushpami  Jehová Diostaca sirvi callaringacuna (1 Pedro 2:12).

19. 1 Corintios 3:6 y 7-pi nishca shinaca ¿imamantataj pacienciahuan huillashpa catina canchij?

¹⁹ Ñucanchijca gentecunaman yachachishpa, huillashpaca shuj plantitata tarpucuj shina, yaquituta churacuj shinallami canchij. Pero, Jehová Diosmi paicunataca shuj plantata huiñachij shina paita sirvichun ayudan (1 Corintios 3:6, 7-ta liyipai). Etiopía llajtamanta huauqui Getahunca: “Ñuca causan lugarpica 20 yalli huatacunatami ñucalla testigo de Jehová carcani. Chaipica huaquin cutincunallami predicaj carcanchij. Pero cunanca 14 publicadorcunami tiyan. Caicunamantaca 13 huauqui panicunami bautizarishca. Paicunapuramantaca ñuca huarmipish, ñuca quimsa huahuacunapishmi can. Tandanacuicunamanpish casi 32 gentecunami rincuna” ninmi. Huauqui Getahunca Jehová Dios gentecunata paipaj puebloman cꞌuchuyachingacamami pacienciahuan shuyarca. Paica huillanata manataj saquishcamantami cushilla sintirin (Juan 6:44).

20. ¿Huillajcunaca imamantataj pambarishcacunata mashcajcuna shina canchij?

²⁰ Jehová Diospajca gentecunapaj causaica valishcami can. Chaimantami cai tucuri punllacuna manaraj cꞌuchuyamujpi gentecunaman yachachishpa catichun mandashca (Ageo 2:7). Caipi yuyashun, minata japicujcuna allpa ucupi pambarijpica paicunata ayudangapajca achcacunami mashcancuna. Huaquincunalla pambarishcacunata japijpipish tucuicunami mashcashpa ayudarcacuna. Huillacushpapish chashnallatajmi can. Cai mundopi tiyajcunamanta mashnacuna Bibliamanta yachanataca mana yachanchijchu. Pero, Jehová Dios ñucanchijta ayudajpimi tucui ñucanchijca gentecuna Jehová Diosta sirvichun ayudai tucunchij. Boliviamanta Andreas shuti huauquica: “Gentecuna Bibliamanta yachachun, bautizarichunca tucuicunami ayudanchij” ninmi. Chaimanta cushilla huillashpa catishunchij. Chaita rurajpica Jehovami bendiciashpa catinga.