1, 2. ¿Jesusca Jehová Diospaj shutita difindingapajca imallatataj rurarca?

 JESUSPAJCA Jehová Diospaj shutita difindinami tucuimanta yalli valishca can. Chaimantami Jehová Diospaj shuti jucha illaj cashcata tucuicunaman rijsichirca. Yachai 22-pi ricushca shinaca Jehovapaj shuti jucha illaj cashcata ricuchingapaj, Diablo llulla cashcata ricuchingapajmi Jesusca paipaj causaita curca (Marcos 14:36; Hebreos 10:​7-9). Shinallataj paica mil huatacunata mandashca qꞌuipaca paipaj Yayamanmi mandana derechota tigrachinga. Chashnami huiñai huiñaipaj Jehovapaj shuti jucha illaj cashcata ricuchinga (1 Corintios 15:​26-28). Jesusca tucui shunguhuan Yayitu Diosta cꞌuyashcamantami chaitaca ruranga.

² Jesusca Jehovapaj shutipi cai Allpaman shamushpami achca milagrocunata rurarca (Juan 5:43; 10:25; 12:13). Shinallataj paipaj discipulocunamanca Jehovapaj shutitami rijsichirca. Pai ima shina cashcatapishmi yachachirca (Juan 17:​6, 26). Shuj cutinca Jesusca paipaj discipulocunamantami: “Cambaj shutimanta paicunataca cuidahuai” nishpa Jehová Diosta mañarca (Juan 17:11). Caipi ricushca shinaca Jesuspajca Jehová Diospaj shutita difindinaca tucuimanta yalli valishcami carca. Shinapish achcacunaca Jesustami catinchij nishpapish Jehovapaj shutita mana rijsincunachu.

3. ¿Cai yachaipica imatataj ricushun?

³ Cunan punllacunapish Jesusta catijcunapajca Jehová Diospaj shutita difindinami tucuimanta yalli valishca can (1 Pedro 2:21). Cai yachaipica Diosmanta huillajcuna imamanta paipaj shutita charishcatami ricushun (Mateo 24:14). Shinallataj Jehová Diospaj shutita difindingapaj cada uno imata rurana cashcatami yachashun.

 “PAICUNAMI ÑUCA SHUTITACA CHARINGACUNA”

4. a) ¿Jesusca jahua pachaman manaraj rishpaca paipaj discipulocunamanca imatataj nirca? b) ¿Hechos 15-pica imatataj yachagrinchij?

⁴ Jesusca jahua pachaman manaraj rishpami paipaj discipulocunamanca: “Espíritu santo cancunapaj jahuaman shamujpimi poderta chasquinguichij. Chashna cashpami Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” nirca (Hechos 1:8). Jesús nishca shinaca tucui muyundij llajtacunamanta gentecunami Jesusta catina oportunidadta charigrircacuna (Mateo 28:​19, 20). ¿Chai mushuj discipulocunaca Jesusllamantachu huillana carcacuna? Mana, Hechos 15-pi nishca shinaca Jehová Diospaj shutitapishmi rijsina carcacuna. Chaimanta ashtahuan yachashpa catishun.

5. ¿Mushuj discipulocunaca imata rurashcamantataj rijsishca cana carcacuna? (Fotomantapish parlapai).

⁵ Jerusalenpica huata 49-pimi apostolcunapish, pushaj ancianocunapish tandanacurcacuna. Paicunaca mana judiocuna, Jesusta catijcuna tucungapaj imata rurana cashcatami parlanacurcacuna. Chai tandanacui ña tucurigricujpimi Jesuspaj lahuauqui Santiagoca: “Symeón parlashca shinaca cunanca shujtaj llajtamanta gentecunatami Diosca chasquicun. Paicunapuramantami paipaj shutita charichun shuj llajtata agllai callarishca” nirca. ¿“Paipaj shutitami charingacuna” nishpaca pipaj shutimantataj parlacurca? Santiagoca profeta Amós nishcacunata nishpami intindichirca. Profeta Amosca: “Cai llajtapi saquirishca runacunapish, shujtaj llajtamanta gentecunapish tucui shunguhuanmi Jehová Diosta mashcangacuna. Paicunami ñuca shutitaca charingacuna. Caicunata pajtachij Jehová Diosmi ñaupa tiempomanta chashna rurasha nishca carca” nircami (Hechos 15:​14-18). Santiago nishca shinaca mushuj discipulocunaca Jehovapaj shutitami charina carcacuna. ¿Chaica imatataj nisha nin? Tucui gentecunaca “paicunami Jehová Diosmanta huillajcuna can” nishpami rijsina carcacuna. Chaimantami chai mushuj discipulocunaca Jehovamanta alli yachana carcacuna. Paipaj shutitapishmi shujtajcunaman rijsichina carcacuna.

6, 7. a) ¿Jehová Diosca gentecunata quishpichingapajca imatataj rurarca? b) ¿Jesusca tucuimanta yallica imata rurangapajtaj cai Allpamanca shamurca?

⁶ Jehová Diosca gentecunata quishpichingapajca paipaj Churitami tucuicunamanta huañuchun cai Allpaman cacharca (Mateo 20:28).  Jesús huañushcamantami tucui laya gentecunaca perdonashca cangapajpish, huiñai causaita charingapajpish shuj oportunidadta charincuna (Juan 3:16). Chaimantami Jesuspaj shutica “Quishpichijca Jehovami can” nisha nin.

⁷ ¿Gentecunaca imamantataj Jehová Dios quishpichichun minishtircacuna? Pasaj yachaipi ricushca shinaca Adán, Evaca Diosta mana cazushcamantami huiñaita causana oportunidadta pirdircacuna. Chaimantami gentecunaca Jehová quishpichichun minishtircacuna (Génesis 3:​6, 24). Shinapish Jesusca tucuimanta yallica Jehovapaj shuti jucha illaj cashcata ricuchingapajmi shamurca. Diabloca llullacunata nishpami Jehovapaj shutita yangapi churashca carca (Génesis 3:​4, 5). Chaimantami gentecunaca Jehovapaj shuti jucha illaj cashcata, Jehová Dios cꞌuyaj Yaya cashcatapishmi yachana carcacuna. Jehová Dios cazunalla, cꞌuyanalla Dios cashcata ricuchingapajmi Jesusca Diosta tucuipi cazurca. Paica tucuicunamanta yalli Jehová Diosta alli rijsishcamantami pailla chaitaca alli ricuchi tucurca.

8. ¿Jesusta catijcunaca imatataj alli intindina carcacuna?

⁸ Judiocunapish, mana judiocunapish Jesusta catijcuna tucungapajca Jehová Dioslla quishpichij cashcatami alli intindina carcacuna (Juan 17:3). Shinallataj paicunaca Jehová Diosmanta huillashcamantami rijsishcacuna cana carca. Jehovapaj shuti jucha illaj cashcatapishmi ricuchina carcacuna. Chai tucuita pajtachishpami paicunaca quishpiri tucurcacuna (Hechos 2:​21, 22). Chaimantami Jesusta catijcunaca Jehová Diosmantapish, Jesusmantapish alli yachana carcacuna. Chaita intindishpami Jesusca Juan 17:​26-pica Diosta mañacushpaca cashna nirca: “Paicunamanmi cambaj shutitaca rijsichishcani, rijsichishpa catisharajmi. Chashnami ñucata can cꞌuyashca shinallataj paicunapish shujtajcunata cꞌuyangacuna. Ñucapish paicunahuanca shuj shinallami casha” nircami.

“CANCUNAMI ÑUCA TESTIGOCUNA CANGUICHIJ”

9. ¿Jesusta catijcunapaj imata ruranataj ashtahuan importante can?

⁹ Ñucanchijpajca Jehová Diospaj shuti jucha illaj cashcata ricuchinami tucuimanta yalli valishca can (Mateo 6:​9, 10). Ñucanchijpajca Jehová Diosllami Dios verdadero can. Chaimantami ñucanchij ruraicunahuan paipaj shutita difindina canchij. ¿Jehová Diospaj shuti jucha illaj cashcata ricuchingapaj, Diablo llulla cashcata ricuchingapajpish imatataj rurana canchij?

10. ¿Jehová Diosca paita mana sirvijcunataca imata ricuchichuntaj mañan? (Isaías 43:9; 44:​7-9), (fotomantapish parlapai).

¹⁰ Isaías 42-44-pica Jehová Diospaj shuti jucha illaj cashcata ricuchingapaj imata rurana cashcatami yachachin. Cai capitulocunapica Jehová Diosca paita mana adoraj gentecunataca, paicuna adorashca yanga dioscuna imata rurai tucushcata ricuchichunmi mañan. Shinapish chai yanga dioscuna imata rurai tucushcataca ni pi mana ricuchi tucushcacunachu (Isaías 43:9; 44:​7-9-ta liyipai).

11. ¿Isaías 43:​10-12-pica Jehová Diosca paita sirvijcunataca imata rurachuntaj nin?

¹¹ (Isaías 43:​10-12-ta liyipai). Jehová Diosca paita sirvijcunataca: “Cancunami ñuca testigocuna canguichij. Ñucami Dios cani” ninmi.  Qꞌuipapish Isaías 44:​8-pica: “¿Ñucapaj randi shujtaj Diosca tiyanchu?” nishpami tapun. Ñucanchijca ñucanchij ruraicunahuan, rimaicunahuanmi Jehová Dioslla verdadero Dios cashcata ricuchina canchij. Chaita ricuchinaca tucuimanta yalli valishcami can. Jehová Diosta tucui shunguhuan cꞌuyashcamantami Diablo sinchi jarcaicunata churajpipish Jehová Diosta cazunata, paita sirvinataca manataj saquishun. Chashnami Jehovapaj shuti jucha illaj cashcata ricuchishun.

12. ¿Isaías 40:​3, 5-pi nishcacunaca ima shinataj pajtarirca?

¹² Isaías 40-3-pica: “Jehová Diospaj ñanta allichichij” nircami. ¿Isaías nishcacunaca ima shinataj pajtarirca? Bautizaj Juanca ñanta allichij shinami Jesusta chasquichun tucuicunaman huillarca (Mateo 3:3; Marcos 1:​2-4; Lucas 3:​3-6). Shinallata Isaías 40:​5-pica: “Mandaj Dios sumaj achij nicuj cashcami ricuringa” nircami. ¿Isaías nishcacunaca ima shinataj pajtarirca? Jesusca Jehovapaj shutipimi  cai Allpaman shamurca, Jehovapaj shutipimi alli huillaicunatapish huillaj carca. Paipaj Yaya Jehová cꞌuyaj, perdonaj, generoso, alli Yaya cashcatapishmi ricuchirca. Chaimantami Jesusta ricushpaca Jehová Diosta ricucushca shina carca (Juan 12:45).

13. ¿Jesús rurashca shinaca ñucanchijpish imatataj rurana canchij?

¹³ Ñucanchijpish Jesús shinami Jehová Diospaj testigocuna canchij, Jehovapaj shutita charishcamantami paipaj shutita difindina canchij. Chaipajca Jehová Dios ñucanchijta cꞌuyaj Yaya cashcata, ñucanchijmanta imallata rurashcatami shujtajcunaman huillana canchij. Shinallataj ¿Jehová imallata rurashcata alli huillangapajca pimantataj ashtahuan huillana canchij? Jesusmantami huillana canchij. Jehovapaj shutita difindingapaj Jesús imallata rurashcata, imallata ruragrishcatapishmi huillana canchij (Hechos 1:8). Jesusca tucuicunamanta yallimi Jehovapaj shutita difindingapaj esforzarishca. Chaimi ñucanchijpish Jesuspaj chaqui sarushcata catij shina paipaj ejemplota alli catina canchij (Apocalipsis 1:5). ¿Jesuspaj ejemplota catingapajca imatataj rurana canchij?

¿JEHOVAPAJ SHUTI JUCHA ILLAJ CASHCATA RICUCHINGAPAJCA IMALLATATAJ RURANA CANCHIJ?

14. ¿Salmo 105:​3-pi nishca shinaca ñucanchijca Jehová Diospaj shutita charishcamantaca ima shinataj sintirinchij?

¹⁴ Jehovapaj shutita charishcamantami jatun tucunchij (Salmo 105:​3-ta liyipai). Jehová Diosca mana pingashpami paimanta huillachun munan. Pai cꞌuyaj, llaquij, tucuimanta yalli alli Yaya cashcata ricuchichunmi munan (Jeremías 9:​23, 24; 1 Corintios 1:31; 2 Corintios 10:17). Jehová Dios ñucanchij Yaya, ñucanchij Dios cashcamantami orgullosos sintirinchij. Chaimantami Jehová Diospaj shutita difindina, jatunyachinaca ñucanchijpaca tucuimanta yalli valishca can. Trabajopi cashpa, escuelapi cashpa, comunidadpi cashpa, maipi cashpapish mana pingashpami testigo de Jehová cashcata huillanalla canchij. Diabloca Diospaj shutita ama huillashpa catichunmi jarcaicunata churan (Jeremías 11:21; Apocalipsis 12:17). Ashtahuancarin Diablopish, paita catijcunapish Jehová Diospaj shutita gentecuna cungarichunmi munan (Jeremías 23:​26, 27). Shinapish Jehová Diosta tucui shunguhuan cꞌuyashcamantami paimanta huillanataca manataj saquina canchij (Salmo 5:11; 89:16).

15. ¿Jehovapaj shutipi confiashcataca ima shinataj ricuchinchij?

¹⁵ Jehová Diospaj shutipi confiashunchij. ¿Jehovapaj shutipi confiashcataca ima shinataj ricuchinchij? Puntapica paipaj shutitami rijsina canchij. Ña chai shutita rijsishpaca paipaj shutita nishpami mañana canchij (Joel 2:32; Romanos 10:​13, 14). Pai ima shina cashcatapishmi alli rijsina canchij. Ima llaquipi ayudachunpish, yachachichunpishmi mañana canchij (Salmo 20:7; 99:6; 116:4; 145:18). Shinallataj shujtajcunamanmi paipaj shutimanta huillana canchij, pai ima shina cashcatapishmi yachachina canchij. Ashtahuancarin gentecuna paicunapaj juchacunamanta arrepintirichun, Diosta cazuchunpishmi ayudana canchij (Isaías 12:4; Hechos 2:​21, 38).

16. ¿Diablo llullacushcataca ima shinataj ricuchina canchij?

¹⁶ Llaquicuna ricurijpipish Jehovapaj shutitami difindishpa catishun (Santiago 5:​10, 11). Job causashca punllacunapica llulla Diabloca: “Diosta sirvijcunaca interesllamantami Diosta sirvincuna. Paicunapaj causaita quishpichingapaj Diosta cazunata saquina cashpaca mana dudashpami Diosta sirvinata saquingacunalla” nishpami juchachirca (Job 2:4). Shinapish Jobca llaquicunahuan cashpapish Jehová  Diosta cazushpami catirca. Ñucanchijpish millai Diablo llaquicunata churajpipish Jehová Diosta cazunataca manataj saquishunchu. Shinallataj Jehová Dios paipaj shutimanta ñucanchijta tucuipi cuidana cashcatami tucui shunguhuan crinchij. Chashnami Diablo llullacushcata ricuchishun (Juan 17:11).

17. ¿1 Pedro 2:​12-pi nishca shinaca Jehová Diospaj shutita jatunyachingapajca imatataj rurana canchij?

¹⁷ Jehovapaj shutita respetashunchij (Proverbios 30:9; Jeremías 7:​8-11). Ñucanchijca Jehová Diosmanta huillajcuna, paipaj shutita charijcunami canchij. Chaimi ñucanchij ruraicunapi, rimaicunapi pandarishpaca Jehovapaj shutita yangapi churai tucunchij. Shinapish allita rurashpa, cushichij shimicunahuan parlashpami Jehovapaj shutita shujtajcunapaj ñaupajpi jatunyachishun (1 Pedro 2:​12-ta liyipai).

18. ¿Gentecuna ñucanchijmanta burlarijpi, rimajpipish imatataj rurana canchij? (Notata ricui).

¹⁸ Ñucanchijta gentecuna burlarijpi, rimajpipish Jehovapaj shutita jatunyachishpa catishunchij (Salmo 138:2). Jehová Diosta cꞌuyashcamantami pai munashca shina causanchij. Chaimi huaquin gentecunaca ñucanchijmanta burlarincuna, rimancuna. a Jesuspi yuyashun, paica Jehová Diospaj shutita jatunyachingapajmi shuj shuhua shina huañuna carca. Chaimi achca gentecuna paimanta burlarirca, mana allicunatapish nircacuna. Shinapish Jesusca chaimantaca mana preocuparircachu. Paica Jehová Diospaj munaita rurana yuyaillami causarca (Hebreos 12:​2-4; Mateo 26:39).

19. ¿Tucuimanta yallica imatataj rurashpa catina canchij?

¹⁹ Gentecuna ñucanchijta testigo de Jehovacuna nishpa rijsishcamantami achcata cushilla sintirinchij. Chaimantami gentecuna rimajpipish, burlarijpipish, Diablo sinchi llaquicunata churajpipish Jehová Diospaj shutita jatunyachishpa catinchij. Jesús shinami ñucanchijpajpish Jehová Diospaj shutita difindishpa catinaca tucuimanta yalli valishca can.