Bibliapi yachashcacuna ñucanchij shunguman chayachunmi munanchij. Chaipajca Esdraspaj ejemplotami catina canchij. Paica ‘Jehová Diospaj Leyta yachangapajmi paipaj shunguta allichirca’ (Esdras 7:10). Caita rurai:

Diosta mañai. Manaraj estudiai callarishpaca imallata yachagrishcata alli intindingapaj, chaicunata pajtachingapajpishmi Yaya Diosta ayudachun mañana canchij (Salmo 119:​18, 34).

Humilde cai. Jehová Diosca jatun tucushcacunata, paipaj ayudata mana mashcajcunatapish Bibliata intindichunca mana ayudanchu (Lucas 10:21). Ñucanchijcuna achcata yachashcata shujtajcuna ricuchunllaca mana estudianachu canchij. Chaipaj randica Bibliata estudiacushpa ima cambiocunata rurana cashcata cuentata cushpaca humilde shunguhuanmi chai cambiocunata rurangapaj esforzarina canchij.

Ñucanchij cantocunamanta shuj cantota uyai. Manaraj estudiai callarishpaca shuj cantotami uyai tucunchij. Shinami Jehová Diosmanta ashtahuan yachana munaita charishun. Imalla yachashcacunapish ñucanchij shungumanmi chayanga.