1. ¿Tucui gentecunaca ima importante decisiontataj agllana can?

 CUNAN punllacunapica gentecunaca Jehová Diospaj lado tucunata o millai Diablopaj lado tucunatami agllana can. Ishquindijpaj ladoca mana cai tucunchijchu. Diospaj lado tucushpaca huiñai causaitami charishun (Mateo 25:31-33, 46). Jatun llaqui punllacunapica Diosca paipaj lado cajcunata quishpichingapajmi shuj señalta churanga. Cutin paipaj contracunata tucuchingapajca shujtaj señaltami churanga (Apocalipsis 7:14; 14:9-11; Ezequiel 9:4, 6).

2. a) ¿Hebreos 10:35 al 39-pica imata rurachuntaj animan? b) ¿Imamantataj Apocalipsis libromanta yachana canchij?

² (Hebreos 10:35-39-ta liyipai). Jehová Diospaj Gobiernota apoyashpaca shuj alli decisiontami agllashcangui. Cunanca shujtajcunapish chaita agllachunmi ayudai tucungui. Chaipajca Apocalipsis libromantami ñucanchijraj yachana canchij. Chaipica Diospaj contracuna ima tucuna cashcata, shinallataj Diospaj Gobiernota apoyajcuna ima bendicioncunata charina cashcatami huillan. Cai librota yachacushpami Jehová Diosta tucui shunguhuan sirvishpa catishun. Shinallataj shujtajcunapish Jehová Diosta sirvichun, Diosta ama saquichunmi ayudashun.

3. ¿Cai yachaipica ima tapuicunatataj yachashun?

³ Cai yachaipica cai catij tapuicunatami yachashun. ¿Diospaj Gobiernota apoyajcunaca imataj tucunga? ¿Apocalipsispi parlashca puca jatun animalta apoyajcunaca imataj tucunga?

4. ¿Apóstol Juanca picunatataj Jesushuanca ricurca?

⁴ Shuj muscuipica apóstol Juanca Jehová Diospaj Gobiernota apoyaj ishqui grupocunatami ricurca. Cai grupocunaca huiñai causana bendiciontami chasquirca. Punta grupopica 144.000 ungidocunami can (Apocalipsis 7:4). Paicunaca Jesushuan jahua pachapi mandangapajmi cai Allpamanta agllashcacuna can. Paicunaca Jesushuanmi cai Allpata mandangacuna (Apocalipsis 5:9, 10; 14:3, 4). Apóstol Juanca shuj muscuipimi jahua pachapi 144.000-cunataca Jesucristohuan Sión urcupi shayacujta ricurca (Apocalipsis 14:1).

5. ¿Cai Allpapi saquirij ungidocunahuanca imataj tucunga?

⁵ Apostolcuna causashca punllacunamanta cunancamami Jehová Diosca Jesushuan mandachun huaranga huaranga gentecunata agllashca (Lucas 12:32; Romanos 8:17). Paicunamantaca ña achcacunami huañushpa jahua pachapi causarishcacuna. Cai tiempopica 144.000 agllashcacunapuramantaca cai Allpapica ashacunallami tiyan. Cai Allpapi saquirij ungidocunaca manaraj jatun llaqui punllacuna callarijpimi Diospaj ñaupajpi alli ricurishpa shuj “sellota” chasquingacuna (Apocalipsis 7:2, 3; 12:17). Chaimi jatun llaqui punllacunapica paicunaca jahua pachaman pushashca canga. Chaipimi caishuj agllashcacunahuan tandachishca canga. Cai ungidocunaca Diospaj Gobiernopimi Jesushuan mandangacuna (Mateo 24:31; Apocalipsis 5:9, 10).

6, 7. a) ¿Apóstol Juanca ima shujtaj grupotataj ricurca? b) ¿Jahua pachaman ringapaj agllashcacunapish, Paraíso Allpapi causagrijcunapish Apocalipsis capítulo 7-mantaca imamantataj yachana can?

⁶ Apóstol Juanca 144.000 agllashcacunata ricushca qꞌuipaca “achca gentecunatami” ricurca. 144.000-cunaca yupanallami carca. Pero cai achca gentecunaca mana yupaipajmi carca. Paicunaca Juan ricushca ishqui grupomi can (Apocalipsis 7:9, 10). Chai achcacunamanta parlashpaca Juanca: “Paicunaca jatun llaquimanta quishpirijcunami. Paicunapaj suni churanacunata tajshashpami Malta Ovejapaj yahuarpi yurajyachishcacuna” nircami (Apocalipsis 7:14). Juan ricushca jatun llaquimanta quishpirij achca gentecunaca Paraíso Allpapimi causangacuna, sumaj bendicioncunatapishmi chasquingacuna (Salmo 37:9-11, 27-29; Proverbios 2:21, 22; Apocalipsis 7:16, 17).

⁷ Jahua pachaman ringapaj agllashcacuna cashpapish o Paraíso Allpapi causagrijcuna cashpapish, Apocalipsis capítulo 7-pi parlaj profecía pajtarinatami tucui shunguhuan crina canchij. Chai profecía pajtarijpica Diospaj Gobiernota apoyajcunaca cushillami causashun. Cunanca Apocalipsis libropi jatun llaqui punllacunamanta imata yachachishcata ricushun (Mateo 24:21).

8. a) ¿Jatun llaqui punllacunaca ima shinataj callaringa? b) ¿Chai jatun llaqui punllacunapica gentecunaca imatataj rurangacuna?

⁸ Pasaj yachaipi ricushca shinaca gobiernocunaca muyundij Allpapi tiyaj tucui panda religioncunatami llaquichi callaringa (Apocalipsis 17:16, 17). Chashna llaquichi callarijpimi jatun llaqui punllacunaca chayanga. ¿Chai tucujpica achca gentecunachu Jehová Diosta adoranata munangacuna? Mana. Ashtahuanpish Apocalipsis capítulo 6-pi nishca shinaca, Diosta mana sirvijcunaca gobiernocunapi, negociocunapimi shunguta churangacuna. Gobiernocunata, negociocunataca sinchi urcucunata shinami ricungacuna. Jehová Diosca chai millai gentecunataca paipaj contracuna cashcatami ricunga (Lucas 11:23; Apocalipsis 6:15-17).

9. a) ¿Jatun llaqui punllacunapica Diosta sirvijcunaca imatataj rurangacuna? b) ¿Diospaj contracunaca imatataj rurasha ningacuna?

 ⁹ Jehová Diosta sirvijcunaca chai jatun llaqui punllacunapica shujtaj gentecuna shinaca mana cangachu. Paicunallami cai Allpapica Jehová Diosta tucui shunguhuan sirvishpa catingacuna. Puca jatun animalpaj ladopish mana cangacunachu (Apocalipsis 13:14-17). Jehová Diosta sirvishpa catijpimi Jehovapaj contracunaca pꞌiñaringacuna. Chaimantami tucui allpa pachapi mandajcunaca Diosta sirvijcunata llaquichisha ningacuna. Bibliapica cai tandanacushca mandajcunataca Magog llajtata Mandaj Gog nishpami shutichin (Ezequiel 38:14-16).

10. Apocalipsis 19:19 al 21-pi nishca shinaca ¿Diosca paita sirvijcunata llaquichisha nijpica imatataj ruranga?

¹⁰ Diosta sirvijcunata contracuna llaquichisha nijpica Jehová Diosca achcatami pꞌiñaringa (Ezequiel 38:18, 21-23). Apocalipsis capítulo 19-pica qꞌuipa ima tucuna cashcatami huillan. Jehová Diosca paita sirvijcunata difindingapaj, contracunatapish tucuchingapajca paipaj Churitami cachanga. Jahua pachapica Jesushuanmi achca soldadocuna tandanacunga. Chai soldadocunaca angelcunapish, 144.000 agllashcacunapishmi can (Apocalipsis 17:14; 19:11-15). ¿Cai macanacuipica imataj tucunga? Millai gentecunapish, Diospaj contra organizacioncunapishmi tucuchishca canga (Apocalipsis 19:19-21-ta liyipai).

11. ¿Apocalipsis libropica ima valishca profeciamantataj huillan?

¹¹ Diospaj contracuna tucurijpi, cutin Diosta sirvijcuna quishpirishpaca achcatami cushiyarishun. Babilonia Jatun llajta tucurijpipish jahua pachapica achca cushicuimi tiyanga (Apocalipsis 19:1-3). Pero Malta Ovejapaj boda tiyajpicarin jahua pachapica ashtahuan cushillami cangacuna. Apocalipsis libropica cai valishca profeciamantami huillan (Apocalipsis 19:6-9).

12. Apocalipsis 21:1, 2-pi nishca shinaca ¿Ovejapaj bodaca ima horataj callaringa?

¹² ¿Ovejapaj bodaca ima horataj callaringa? Armagedón macanacui manaraj callarijpimi tucui 144.000 agllashcacunaca jahua pachapi cangacuna. Shinapish chai tiempopica Malta Ovejapaj bodaca manaraj callaringachu (Apocalipsis 21:1, 2-ta liyipai). Ashtahuanpish Armagedón macanacui tucurishca qꞌuipa, Diospaj tucui contracunata tucuchishca huashami cai bodaca callaringa (Salmo 45:3, 4, 13-17).

13. ¿Ovejapaj bodapica imataj tucunga?

¹³ ¿Malta Ovejapaj bodapica imataj tucunga? Ima shinami shuj bodapica shuj cꞌaripish, shuj huarmipish shuj shinalla tucun. Chashnallatajmi Ovejapaj bodapica Jesuspish, 144.000 ungidocunapish shuj shinalla tucushpa shuj mushuj gobierno tucungacuna. Chai gobiernoca 1.000 huatacunatami jahua pachamanta cai Allpata mandanga (Apocalipsis 20:6).

14, 15. ¿Apocalipsis capítulo 21-pica 144.000-cunataca imahuantaj chꞌimbapuran? (Página 1-pi tiyaj fotota ricui).

¹⁴ Apocalipsis capítulo 21-pica 144.000 agllashca ungidocunataca cielopi caj shuj sumaj llajtahuanmi chꞌimbapuran. Cai llajtaca mushuj Jerusalenmi can (Apocalipsis 21:2, 9). Chai llajtaca “12 callari rumicuna jahuapimi shayachishca carca. Chai rumicunapica Malta Ovejapaj 12 apostolcunapaj 12 shuticunami quillcashca carca”. Juanca paipaj shuti shuj rumipi quillcashca cashcatami ricushcanga. Chaica shuj jatun bendicionmi can (Apocalipsis 21:10-14; Efesios 2:20).

¹⁵ Cai llajtaca mana shujtaj llajtacuna shinachu can. Cai llajtapaj ñanca orollahuanmi  rurashca can. Llajtapaj 12 pungucunapish 12 perlacunami can. Muyundij pircaca sumaj rumicunahuan rurashcami can. Tucuimi alli alli medishca can (Apocalipsis 21:15-21). Chashna jahuapish Juanca ima illashcatami cuentata curca. Juanca: ‘Chai llajtapica Diospaj templotaca maipi mana ricurcanichu. Ashtahuanpish Tucui poderta charij Jehová Dios, Malta Ovejapishmi chai llajtapaj temploca. Chai llajtaca intipish, lunapish achijyachichunca mana minishtinchu. Diospaj sumaj achijnicujmi llajtataca achijyachin. Llajtapaj lamparapish Malta Ovejami can’ nircami (Apocalipsis 21:22, 23). Caipi nishca shinaca cielopi caj mushuj Jerusalenpica Jehová Diospish, Jesuspishmi chai llajtapaj templo cangacuna. Chaica 144.000 agllashca ungidocuna Jehová Diosllahuantaj canatami nisha nin (Hebreos 7:27; Apocalipsis 22:3, 4).

16. ¿Diospaj Gobierno 1.000 huatacunata mandacujpica gentecunaca ima shinataj causanga?

¹⁶ Cielopi caj mushuj Jerusalenmanta yachanaca ungidocunapajca sumajmi can. Cai Allpapi causana esperanzata charijcunapishmi caimanta yachana can. Diospaj Gobierno 1.000 huatacunata cai Allpata mandacujpica cielopi caj mushuj Jerusalenmantami achca bendicioncunaca cai Allpaman shamunga. Juanca cai bendicioncunataca causaita cuj shuj jatun yacu llujshicuj shinatami ricurca. Yacu uri ishquindij ladomanca causaita cuj yuracunami tiyanga. Chai yuracunapaj pꞌangacunaca gentecunata alliyachij jambimi canga (Apocalipsis 22:1, 2). Chai tiempopi causaj gentecunami cai bendicioncunata chasquina oportunidadta charingacuna. Asha ashami Diosta cazuj gentecunaca jucha illaj tucunga. Huacaipish, llaquipish, nanaipish ña mana ashtahuan tiyangachu (Apocalipsis 21:3-5).

17. Apocalipsis 20:11 al 13-pi nishca shinaca ¿Diospaj Gobierno 1.000 huatacunata mandacujpica picunataj bendicioncunata chasquingacuna?

¹⁷ ¿Cai bendicioncunataca picunataj chasquingacuna? Apóstol Juan ricushca shinaca Armagedonmanta quishpirij achca gentecunami cai bendicioncunata chasquingacuna. Paraíso Allpapi huacharishca huahuacunapish, causarishcacunapishmi cai bendicioncunata chasquingacuna (Apocalipsis 20:11-13-ta liyipai). ¿Picunallataj cai Allpapica causaringacuna? Ñaupa punllacunapi Diosta sirvij gentecunami causaringacuna. Diosta sirvina oportunidadta mana charishca gentecunapishmi causaringacuna (Hechos 24:15; Juan 5: 28, 29). ¿Caica nisha ninchu tucuicuna causarinata? Mana, achca gentecunami manaraj huañushpa Jehová Diosta sirvina oportunidadta charircacuna. Pero chaita mana rurashcamantami mana causaringacuna (Mateo 25:46; 2 Tesalonicenses 1:9; Apocalipsis 17:8; 20:15).

18. ¿1.000 huatacuna tucurijpica imataj tucunga?

¹⁸ 1.000 huatacuna tucurijpica Adanmanta charishca juchataca ña mana charishunchu. Juchamantaca ña mana ashtahuan sufrishunchu (Romanos 5:12). Cai Allpapi causajcunaca jucha illajcunami cashun. Apocalipsis 20:5-pica jucha illaj tucunataca cutin causarinahuanmi comparan.

19. ¿Tucuri pruebapica imatataj ricuchina tucunga?

¹⁹ Satanasca Diosmanta tucui laya trampacunahuan caruyachisha nijpipish Jesusca mana caruyarcachu. ¿Jucha illaj gentecunata millai Diablo pruebacunata churajpica paicunaca Jesús shinallatajchu Jehová Diosmanta mana caruyangacuna? 1.000 huatacuna tucurijpica Satanasca jutcumantami llujchishca canga. Chaipimi Jehová Diosta sirvishpa catinata o mana catinata ricuchina tucunga (Apocalipsis 20:7). Cai tucuri pruebapi Diosta tucui shunguhuan sirvishpa catijcunaca huiñai causaitami chasquingacuna. Shinallataj juchamanta cacharichishca cashcamantami cushilla cangacuna (Romanos 8:21). Cutin Diablopaj lado tucujcunaca Diablondij, demoniocunandijmi huiñaipaj tucuchishca cangacuna (Apocalipsis 20:8-10).

20. ¿Apocalipsis libropi tiyaj profeciacunamanta yachacushpaca ima shinataj sintiringui?

²⁰ ¿Apocalipsis libromanta yachacushpaca ima shinataj sintiringui? ¿Cai profeciacuna ñucanchij punllacunapi pajtaricushcamantaca manachu cushicunchij? Shujtaj gentecunapish Diosta adorachunca paicunamanpishmi yachachisha ninchij ¿nachu? (Apocalipsis 22:17). Shamuj punllacunapi ima tucuna cashcata yachashcamantaca cushillami sintirinchij. Chaimantami ñucanchijpish apóstol Juan shina: “¡Chashna cachun! Shamuilla, Amito Jesús” ninchij (Apocalipsis 22:20).