1, 2. ¿Jehová Dios ñucanchij adorashcata chasquichunca imatataj rurana canchij?

 ¿JEHOVÁ DIOSTACA ima shinallataj adorai tucunchij? Por ejemplo, shuj huauquica Jehová Diostaca cungurishpa shungumantachari paita mañan. Mana cashpaca shuj familiachari tandalla Bibliamanta yachancuna.

² Cai ishqui ejemplopi ricushca shinaca ishquindijmi Jehová Diosta adorancuna. Shinapish Jehová Dios ñucanchij adorashcata chasquichunca pai munashca shina cꞌuyaihuan, respetohuanmi adorana canchij. Jehová Diosta achcata cꞌuyashcamantami shungumanta adorangapaj tucui pudishcata rurasha ninchij.

3. ¿Cai yachaipica imatataj yachashun?

³ Cai yachaipica ñaupa punllacunapi Diosta sirvijcuna ima shina Jehová Diosta adorashcata, cunan punllacunapish ima shina adorana cashcatami ricushun. Shinallataj caita yachashpa imapi mejorana cashcatami yachashun. Jehová Diosta adorashpa cushilla causai tucushcatapishmi yachashun.

4. ¿Ñaupa tiempopica ima shinataj Diosta sirvijcunaca Diosta cꞌuyashcata, paita respetashcata ricuchircacuna?

⁴ Jesús manaraj cai Allpaman shamujpica Abel, Noé, Abrahán, Jobca Jehová Diostaca respetohuan, cꞌuyaihuanmi adorarcacuna. Paicunaca Diosta cazushpami sinchi feta charishcata ricuchircacuna. Shinallataj huaquin sacrificiocunatapishmi rurarcacuna. Bibliapica paicuna ima shinalla Jehová  Diosta adorashcataca mana tucuita huillanchu. Pero Jehová Diosta alli adorangapajca tucui pudishcatami rurarcacuna. Chaimantami paicuna adorashcataca Jehová Diosca chasquirca. Tiempo qꞌuipacarin Jehová Diosca israelitacunamanmi paita alli adorachun huaquin leycunata curca.

5. ¿Jesús causarishca qꞌuipaca Jehová Diosca paita sirvijcunataca ima shina adorachuntaj mandarca?

⁵ Jesús causarishca qꞌuipaca Jehová Diosca paita sirvijcunamanca Moisesman cushca leycunata ña mana cazuchunmi mandarca (Romanos 10:4). Ashtahuanpish paicunataca ‘Cristopaj mandashcata’ cazuchunmi mandarca (Gálatas 6:2, NWT). Chaipajca paicunaca achca leycunata de memoria yachanata, achca leycunata cazunataca ña mana minishtircacunachu. Ashtahuanpish paicunaca Jesuspaj ejemplota catishpami Jesuspaj yachachishcacunata cazuna carcacuna. Cunan punllacunapish chashnallatajmi Diosta sirvijcunaca Jesuspaj ejemplota catishpa Jehová Diosta cushilla sirvinchij (Mateo 11:29).

6. ¿Cai yachaita estudiashpaca ima shinataj beneficiarishun?

⁶ Cai yachaipi Jehová Diosta ima shinalla adoranamanta yachacushpaca cashna nishpa tapuri: “¿Jehová Diostaca allichu adoracuni? ¿Jehová Diosta alli adorangapajca imapitaj mejorana cani?”. Ima shina adoracushcamantachari cushilla sintiringui. Pero Diosta alli adorangapaj imapi mejorana cashcata yachangapajmi paita ayudachun mañana cangui.

7. ¿Jehová Diosca ñucanchij shungumanta mañajpica ima shinataj sintirin?

⁷ Jehová Diosta shungumanta mañashpaca paitami adoranchij. Ñaupa punllapica israelitacunaca Jehová Diosmanca inciensotaca alli allichishpami paipaj templopi cujcuna carca. Chashna rurajpica paica cushillami chasquirca. Chashnallatajmi mishquita ashnacuj inciensota cucuj shina ñucanchij shungumanta Jehová Diosta mañajpica paica cushilla chasquinga (Salmo 141:2; Proverbios 15:8; Deuteronomio 33:10). Diosca paita mañacushpa ñucanchij paiman cꞌuyaita, agradicishcata ricuchichunmi munan. Shinallataj ñucanchij ima munashcata, ima shina sintirishcata, imata shuyacushcatapish parlachunmi munan. Chaimanta paita mañagrishpaca shuj mishquijlla inciensota allichicuj shina imata ninata alli yuyashunchij.

8. ¿Jehová Diostaca ima shinallataj alabai tucunchij?

⁸ Jehová Diosta alabashpaca paitami adoranchij (Salmo 34:1). ¿Paitaca ima shinallataj alabanchij? Jehová Diosta alabangapajca paipaj cualidadcunamanta, pai imallata rurashcamantami shujtajcunaman shungumanta parlana canchij. Jehová Dios ñucanchijta cuidashcata, ayudashcata yuyarishpaca shungumantami paita alabashun. Gentecunaman Jehová Diosmanta huillashpacarin paitami alabacunchij (Hebreos 13:15). Ima shinami Jehová Diosta mañangapajca alli yuyanchij, chashnallatajmi gentecunamanpish manaraj predicashpaca alli preparanaraj canchij. Gentecunaman shungumanta huillajpica ñucanchij “alabana sacrificioca” Jehová Diospajca sumajmi canga.

9. a) ¿Tandanacuicunaman rishpaca ima shinataj israelitacuna shina beneficiarishun? b) ¿Canca tandanacuicunaman rishpaca ima shinataj beneficiarishcangui?

⁹ Tandanacuicunaman rishpaca Jehová Diostami adoranchij. Ñaupa punllapica israelitacunaca cada huatapaj quimsa cutinmi Dios agllashca pueblopica tandanacuna carcacuna (Deuteronomio 16:16). Paicunaca chaiman ringapajca huasicunata,  allpacunatami saquina carcacuna. Pero Jehová Diosca paicunamanca: ‘Chaiman rijpica cancunapaj allpataca pi mana quichusha ningacunachu’ nircami (Éxodo 34:24). Israelitacunaca chaiman ringapajca sinchi fetami charina carcacuna. Chashna rurashpaca achca bendicioncunatami chasquircacuna. Paicunaca chai fiestacunaman rishpaca Jehová Diospaj mandashcacunatami alli intindircacuna. Shinallataj shujtajcunahuan tandalla cashcamantami animarishca sintirircacuna (Deuteronomio 16:15). Ñucanchijpish tandanacuicunaman ringapajca huaquin sacrificiocunatami ruranchij. Tandanacuicunapaj comentariocunata alli allichijpicarin Jehová Diosca cushillami sintirin.

10. ¿Jehová Diosta cantanaca imamantataj valishca can?

¹⁰ Huauqui panicunahuan Jehová Diosta cantashpaca paitami adoranchij (Salmo 28:7). Ñaupa punllacunapica israelitacunapajca Jehová Diosta cantanami valishca carca. Por ejemplo, rey Davidca 288 levitacunatami Diospaj templopi cantachun churarca (1 Crónicas 25:1, 6-8). Cunan punllacunapish ñucanchijca Jehová Diosta cꞌuyashcamantami paita cantana oportunidadta charinchij. Mana alli cantashpapish cantanallami canchij. Caipi yuyashun. Maipica imata parlacushpaca pandarinchijmi. Pero rimaihuan pandarishpapish huauqui panicunahuan parlashpa, gentecunaman huillashpami catinchij (Santiago 3:2). Chashnallataj mana alli vozta charishpapish Jehová Diostami cantashpa catina canchij.

11. Salmo 48:13-pi nishca shinaca ¿imamantataj familiahuan Bibliata estudiangapaj tiempota surcuna canchij?

¹¹ Bibliata estudiashpa, ñucanchij huahuacunaman yachachishpami Jehová Diosta adoranchij. Ñaupa punllapica israelitacunaca sábado punllapimi imalla ruranacunata ladoman saquishpa Jehovamanta yachana oportunidadta charircacuna. Chaita rurashpaca paicunaca Dioshuanmi alli apanacurcacuna (Éxodo 31:16, 17). Shinallataj paicunaca huahuacunamanpishmi Jehová Diosmanta yachachircacuna. Ñucanchijpish chashnallatajmi Bibliata liyingapaj, estudiangapaj tiempota surcuna canchij. Chaita rurashpaca Jehová Diospajmanmi ashtahuan cꞌuchuyashun (Salmo 73:28). Shinallataj familiahuan Bibliamanta estudiacushpaca huahuacunatapish Jehová Diosta cꞌuyachunmi ayudashun (Salmo 48:13-ta liyipai).

12. ¿Tandanacuna Huasita shayachishpa ayudanaca imamantataj Jehová Diospajca valishca can?

¹² Tandanacuna Huasicunata shayachishpa, allichishpami Jehová Diosta adoranchij. Ñaupa punllacunapica israelitacunaca Diospaj carpa huasita shayachishpami Jehová Diosta adorarcacuna (Éxodo 36:1, 4). Cunan punllacunapish Tandanacuna Huasicunata shayachishpami Jehová Diosta adoranchij. Huaquin huauqui panicunaca achca tiempotami chashna ayudancuna. Paicuna Diospaj obra ñaupajman catichun chashna ayudashcamantami agradicishca sintirinchij. Cai huauqui panicunaca chashna ayudashpapish predicangapajmi tiempota surcuncuna. Huaquincunacarin precursorescunami casha nincuna. Ancianocunaca construccionpi trabajaj huauqui panicunata precursor cachun animashpaca Jehová Diospaj obratami apoyancuna. Construccionpi ayudangapaj experienciata charishpapish o mana charishpapish tucuicunami Diospaj Tandanacuna Huasicunata pꞌichashpa, allichishpa ayudai tucunchij.

13. ¿Imamantataj Diospaj obra ñaupajman catichunca ñucanchij contribucionhuan apoyana canchij?

¹³ Diospaj obra ñaupajman catichunca cullquita cushpami Jehová Diosta adoranchij.  Israelitacunaca Jerusalenpi tiyaj Diospaj temploman rishpaca paicuna cui tucushcacunatami Jehová Diospajca apajcuna carca (Deuteronomio 16:16). Chashnami paicunaca Jehová cuidashcamanta agradicishcata ricuchircacuna. Ñucanchijpish muyundij Allpapi Diospaj obra ñaupajman catichunmi contribucionta cushpa ayudai tucunchij. Apóstol Pabloca: “Maijanpish tucui shunguhuan ima charishcata cujpica, Diosca chasquinllami. Diosca imata mana charishcataca mana mañanchu” nircami (2 Corintios 8:4, 12). Jehová Diosca paiman shungumanta cullquita cujpica ashalla cajpipish achcatami valoran (Marcos 12:42-44; 2 Corintios 9:7).

14. Proverbios 19:17-pi nishca shinaca ¿huauqui panicunata ayudajpica Jehová Diosca ima shinataj sintirin?

¹⁴ Ayudata minishtij huauqui panicunata ayudashpaca Jehová Diostami adoranchij. Jehová Diosca israelitacuna pobrecunata ayudajpica paicunatami bendiciarca (Deuteronomio 15:7, 10). Ñucanchijpish huauqui panicunata ayudashpaca shuj valishca regalota Jehová Diosman cucuj shinami can (Proverbios 19:17-ta liyipai). Por ejemplo, apóstol Pablo prezupi cajpica Filipos llajtamanta huauqui panicunaca paimanmi shuj regalota curcacuna. Chaimi Pabloca: ‘Ñucata chashna ayudashpaca Jehová Diosman shuj valishca ofrendata cucuj shinami can’ nirca (Filipenses 4:18). Chaimantami ñucanchijpish “¿ñuca congregacionpica pitataj ayudai tucuni?” nishpa tapurina canchij. Huauqui panicunata ñucanchij tiempohuan, fuerzashuan, ima rurai tucushcahuan o cullquihuan ayudajpica Jehová Diosca achcatami valoran. Chashna huauqui panicunata ayudashpaca Jehová Diosta adorashcatami ricuchinchij (Santiago 1:27).

15. ¿Imamantataj Diosta adoranaca mana shuj carga shina can?

¹⁵ Jehová Dios munashca shina adorangapajca tiempota, fuerzastami llujchina canchij. Pero Diosta cꞌuyashcamantami chashna adorana mana shuj carga shina can (1 Juan 5:3). Caipi yuyashun, shuj huahuaca shuj dibujota paipaj yayaman cungapajmi achca tiempota dibujashpa pasan. Pero yayata cꞌuyashcamantami achcata esforzarina cashpapish chaita ruran. Ñucanchijpish Jehová Diosta cꞌuyashcamantami ñucanchij tiempohuan, fuerzahuan paita adorangapaj esforzarinchij.

16. Hebreos 6:10-pi nishca shinaca ¿Jehová Diosta sirvingapaj esforzarijpica paica ima shinataj sintirin?

¹⁶ Cꞌuyaj yayacunaca paicunapaj huahuacuna cada uno chꞌican cashcataca allimi yachan. Chaimantami paicunaca huahuacuna ima pudishcallata cuchun mañancuna. Chashnallatajmi Yayitu Diosca ñucanchijta alli rijsin. Tal vez canca shujtajcunata yallimi Jehová Diosta sirvi tucungui. Mana cashpaca mayorlla cashcamanta, ungushca cashcamanta o familiata mantinina cashcamantami Diostaca mana tanto sirvi tucungui. Pero ama desanimarichu (Gálatas 6:4). Jehová Diosca can paita shungumanta sirvishcataca manataj cungaringachu. Ashtahuanpish paica cushillami sintiringa (Hebreos 6:10-ta liyipai). Jehová Diosca paita sirvingapaj imata can munashcatapish allimi yachan. Shinapish paica ñucanchij pudishcahuan paita sirvishpa cushilla sintirichunmi munan.

17. a) ¿Jehová Dios munashca shina adorangapajca imatataj rurana canchij? b) ¿“ Jehová Diosta cushilla adorai” nishca recuadropi tiyaj fotocunamantaca imatataj yachai tucunchij?

¹⁷ Jehová Dios munashca shina paita adoranaca  maipica mana jahuallachu can. Por ejemplo, maipica ñucanchijpajca Bibliata liyina, gentecunaman predicanaca sinchichari ricurin. Pero caicunata rurangapaj tiempota llujchishpaca ñucanchijllatajmi beneficiarishpa cushilla sintirishun. Caipi yuyashunchij, maipica ejerciciota rurana o shuj instrumentopi tocanaca mana facilchu can. Chaita alli pajtachingapajca cada punlla practicanami minishtirin. Chashna rurashpaca asha ashami mejorashpa catishun. Qꞌuipacarin chaita ruranatami munashun. Chashnallataj Bibliata liyingapaj, gentecunaman huillangapaj esforzarishpaca tiempohuanca chaita ashtahuan ruranatami munashun.

18. a) ¿Tucuimanta yallica imatataj rurana canchij? b) ¿Chaita rurashpaca ima shinataj causashun?

¹⁸ Jehová Diosta shungumanta adoranaca tucuimanta yalli valishcami can. Chaita pajtachishpaca cushillami causashun (Proverbios 10:22). Diospish ñucanchij ima problemacunahuan cajpica chaita chꞌimbapurachunmi ayudanga (Isaías 41:9, 10). Shamuj punllacunapicarin paitami para siempre adorashun. Chaimanta tucuita ruraj Jehová Diosllata adorashpa catishunchij (Apocalipsis 4:11).