¿Can munashca versoca maijantaj can? Can munashca versocunaca canta animaj, cushichij versocunachari can. Mana cashpaca mana alli yuyaicunata mishangapajmi shujtaj versocunata charingui. O shujtajcunata animangapajmi caishuj versocunata charingui (Salmo 119:​11, 111). Shinapish huaquinpica tucui chai verso ima nishcata, ima verso cashcataca manachari yuyarinchij. Chai versocuna ima nishcata ama cungaringapaj imata rurana cashcata ricushun.

• JW Library^® aplicacionpimi etiquetacunata churana cangui. Chai aplicacionpi Bibliata liyicushpaca shuj versotachari munangui. Chai versota ama cungaringapaj shuj etiquetatami churana cangui. Chai etiquetataca “Cushichij versocuna” nishpami churana cangui.

• Ricunalla lugarpi churai. Maijan huauqui panicunaca chai versocunata ama cungaringapajmi shuj papelpi escribincuna. Chai papeltaca espejopi, refrigeradorapaj pungupimi churancuna. Cutin shujtajcunaca fotota llujchishpami paicunapaj telefonopi o computadorapi fondo de pantallata shina churancuna.

• Yuyaringapajca tarjetitacunata rurai. Can munashca versota ama cungaringapajca shuj tarjetitapimi escribina cangui. Chai tarjetapaj ñaupaj ladopica chai verso ima nishcatami escribina cangui. Cutin huasha ladomanca chai verso maijan cashcatami escribina cangui. Qꞌuipaca shuj ladollata ricushpami caishuj ladopi ima nishcata yuyarina cangui.