CAI PACHAPICA tucui laya problemacunahuanmi causanchij. Chaimantami sumaj causaita charinaca sinchi can. Huaquinllapimi tranquilo causaita charinchij. ¿Sumajta causangapajca Bibliapica imatataj rurachun nin? ¿Gentecuna sumajta causachunpish imatataj rurana canchij?

Sumajta causangapajca Jehová Dios cuidacushcatami shungumanta crina canchij. Alli amigocunatapish charinami canchij. Pero ashtahuantajca Diospajman cꞌuchuyanatami mashcana canchij. ¿Diospajman cꞌuchuyangapajca imatataj rurana canchij?

Dios mandashcacunata, Bibliapi tiyaj yuyaicunata cazushpaca Diospi confiashcatami ricuchishun. Shinallataj paihuan alli casha nishcatami ricuchishun (Jeremías 17:7, 8; Santiago 2:22, 23). Chashna rurajpimi Diosca ñucanchijpajman cꞌuchuyanga. Isaías 32:17-pi nishca shinaca cashcata rurashpallami sumaj causaita charishun. Ashtahuancarin Jehová Diosta tucui shunguhuan cazushpaca tranquilomi sintirishun (Isaías 48:18, 19).

Sumaj causaita charingapajca Diosca espíritu santotami shuj regalota shina cushca (Hechos 9:31).

Apóstol Pabloca sumaj causaica ‘espiritupaj granomi’ can nircami (Gálatas 5:22, 23). Diospaj espirituta charishpallami sumaj causaita chari tucushun. Cunanca Diospaj espíritu ayudachun imata rurana cashcata ricushun.

1) Bibliatami siempre leyina canchij (Salmo 1:2, 3). Imata leyishcatapishmi yuyarina canchij. Chaita rurajpimi Diospaj espirituca pai imata millashcata, imata munashcata yachachun ayudan.  Por ejemplo, Bibliata yachashpami Yaya Dios sumaj causaita charinapaj imata ruraj cashcata yachanchij. Chaita rurana Diospajca imamanta importante cashcatapishmi yachanchij. Shinallataj Bibliapi yachashcacunata pajtachishpami sumaj causaita charishun (Proverbios 3:1, 2).

2) Jehová Dios paipaj espirituta cuchunmi mañana canchij (Lucas 11:13). Paipaj ayudata mashcajpica Diosca “cancunamanca sumaj causaitami cunga. Chai sumaj causaitaca pipish mana yachai tucunchu. Chai sumaj causaimi cancunapaj shungutapish, cancunapaj yuyaitapish Cristo Jesusmanta huaquichinga” (Filipenses 4:6, 7). Diospaj amigocuna espíritu santota cuchun mañarajpica Diosca sumaj causaitami cunga (Romanos 15:13).

Bibliata yachashpami achca gentecunaca causaita cambiashcacuna. Chashnami tranquilo sintirishcacuna. Dioshuanpish shujtajcunahuanpish allimi apanacuncuna. Cunanca huaquin ejemplocunata ricushun.

Huaquin huauqui panicunaca ñaupaca imamantapish rato colerajllami carcacuna. Pero cunanca alli shungu canatami yachashcacuna. Shinallataj pacienciahuanmi shujtajcunata alli tratancuna * (urapi tiyaj notata ricui) (Proverbios 29:22). Ishqui testigocuna paicunapaj causaita cambiangapaj imata rurashcata ricushun.

Davidca manaraj testigo cashpaca shujtajcunamanta mana allicunatami rimaj carca. Paipaj familiatapish mana respetajchu carca. Pero qꞌuipaca cambiana cashcatami cuentata curca. Sumaj causaita charingapajca ¿imatataj rurarca? Paica: “Bibliapi imata yachashcatami pajtachi callarircani. Chaimantami ñuca familiahuanca respetanacurcanchij” ninmi.

 Raquelca: “Ñuca familiaca pꞌiñanacushpallami causajcuna carca. Chaimantami cunancama imamantapish ama rato pꞌiñaringapaj esforzarini” ninmi. Paica sumajta causangapajca ¿imatataj rurashca? “Jehová Dios ayudachunmi mañani” ninmi.

David, Raquelpish Biblia ima nishcatami pajtachircacuna. Dios paipaj espirituhuan ayudachunpishmi mañarcacuna. Chaimantami sumajta causancuna. Ñucanchijpish millai gentecunapaj chaupipi causacushpapish tranquilomi sintiri tucunchij. Familiahuan, huauqui panicunahuanpish sumajtami causai pudinchij. Diosca: “Tucuicunahuan sumajta causaichij” ninmi (Romanos 12:18). ¿Ima shinataj shujtajcunahuan sumajta causashun? Chaita rurangapaj esforzarishpaca ¿ima bendicioncunatataj charishun?

Dios churashca Mandanamanta gentecuna yachachunmi huillanchij (Isaías 9:6, 7; Mateo 24:14). Bibliata yachashpami gentecunaca sumaj causaita charincuna. Ima problemacuna ricurijpipish ña mana llaquirincunachu, imamantapish ña mana rato colirancunachu. Shamuj punllacunapipish sumaj causaitami shuyacuncuna. Chaimantami ‘sumajta causanata mashcancuna’ (Salmo 34:14).

Diospaj Shimita huillajpica mana tucui gentecunachu uyasha nin (Juan 3:19). Mana uyasha nijpipish Dios paipaj espirituhuan ayudajpimi respetohuan huillanchij. Jesusca: “Huasiman yaicugrishpaca, sumaj causai cancunahuan cachun nishpa yaicunguichij. Sumaj causai cancunahuan cachun nishcata chasquinalla cashpa huasiyuj alli chasquijpica, chashna nishcaca paicunahuanmi saquiringa. Ashtahuanpish chasquinapaj mana cashpa mana chasquijpica cancunapajllamantajmi tigranga” nircami (Mateo 10:11-13). Jesús nishcata pajtachishpami chai huasimanta tranquilo rishun. Qꞌuipataca paicunaman Diosmanta yachachi tucushunchari.

Diosta sirvijcunaca gobiernopaj trabajajcunata respetashpami sumaj causaita mashcacushcata ricuchinchij. Diospajta rurachun mana saquijpipish respetanchijmi. Por ejemplo, Africamanta shuj llajtata mandajca Tandanacuna Huasicunata rurangapaj permisota mana cusha nircachu. Chai problemata allichichun munashpami shuj huauquita Inglaterrapi caj embajadorhuan parlachun cacharca. Chai huauquica ñaupaca Tandanacuna Huasicunata rurachun jarcashca llajtallapitajmi misionero shina sirvij carca. Embajadorpish chai llajtamantami carca. Chai huauquica Diospajta rurashpami sumajta causanchij nishpami huillana carca.

Cai huauquica: “Embajadorpaj oficinaman chayashpaca chaipi atindij huarmi ima shina churarishca cashcatami ricurcani. Paica ñuca yachashca shimita parlajta ricushpami paipaj shimipi saludarcani. Chai huarmica mancharishpami imapi ayudai tucunichu nirca. Chaimi embajadorhuan parlai tucunichu nishpa respetohuan tapurcani. Paica ari nishpami embajadorta cayarca. Embajador llujshimushpaca paipaj shimipimi ñucata saludarca. Qꞌuipaca testigocunapaj ruraicuna ima shina cajta huillajpica paica atentomi uyarca” ninmi.

Chai huauqui respetohuan huillashcamantami embajadorca testigo de Jehovacunamanta mana allita yuyanata saquirca. Asha tiempo qꞌuipami Tandanacuna Huasicunata rurachun jarcan llajtata mandajca permisota curca. Chaimi chai llajtapi causaj huauqui panicunapish achcata cushicurcacuna. Caipi ricushca shinaca shujtajcunata respetohuan tratashpaca sumajtami causashun.

Jehová Diosta sirvishpami huauqui panicunahuan sumajta causanchij. Shujtajcunahuan sumajta causangapajca cada unomi espiritupaj granota pꞌucuchina canchij. Chaimi Diosca bendicianga. Shamuj punllacunapish cai Allpapica huiñai huiñaitami sumajta causashun (2 Pedro 3:13, 14).