1, 2. a) ¿Jesús huañushcata yuyaringapaj achcacuna tandanacujpipish Yaya Diosca imatataj ricun? (Página 1-pi tiyaj dibujota ricui). b) ¿Cai yachaipica imatataj ricushun?

JESÚS huañushcata yuyaringapajmi muyundij Allpapi achca gentecuna tandanacun. Huaquincunaca cada huatami cai tandanacuiman shamuncuna. Paicunamantaca maijancunaca sinchi jarcaicunatami charincuna. Shujtajcunaca cada semanapi tiyaj tandanacuicunaman mana purishpapish Jesús huañushcata yuyarina tandanacuimanca mana faltancunachu. Cutin shujtajcunaca ima cashcata yachashun nishpallami punta cutin cai tandanacuiman shamushcacuna. Chai tucuicunatami Yaya Diosca ricucun.

² Jesús huañushcata yuyarina tandanacuiman achca gentecuna rijpica Jehová Diosca achcatami cushicunga (Lucas 22:19). Pero, achca gentecuna tandanacujpipish Yaya Diosca imamanta chai tandanacuiman rishcatami ricun. Cai yachaipica Jesús huañushcata yuyarina tandanacuimanpish, cada semana tandanacuicunamanpish rina importante cashcatami yachashun.

3, 4. a) ¿Imamantataj tandanacuicunaman rina canchij? b) ¿Tandanacuicunaman rishpaca imatataj ricuchinchij? c) ¿1 Corintios 11:23-26 versocunata yuyarishpaca imamantataj Jesús huañushcata yuyarina tandanacuimanca mana faltana canchij?

³ Tandanacuicunaman rishpami Yayitu Diostaca alabai tucunchij. Paica tandanacuicunapimi ñucanchijmanca yachachin. Jatun tucushca gentecunaca, shujtajcuna yachachichunca  mana munancunachu (3 Juan 9). Pero ñucanchijca Jehová Dios yachachichunmi munanchij (Isaías 48:17, 18; Juan 6:45).

⁴ Tandanacuicunaman rishpaca humilde cashcata, Jehová Dios ñucanchijta yachachichun munashcatami ricuchinchij. Jesús huañushcata yuyarina tandanacuimanca mana rina cashcallamanta rinchijchu. Ashtahuanpish, “ñucata yuyarishpa, caitaca ruracunguichijlla” nishpa Jesús mandashcata pajtachingapajmi rinchij (1 Corintios 11:23-26-ta liyipai). Cai tandanacuica ñucanchij crishcacunata sinchiyachichun, Yaya Dios achcata cꞌuyashcata yuyarichunmi ayudan. Jehová Diosca huatapi shuj cutinlla animota chasquichunca mana munanchu. Chaimantami cada semana tandanacuicunaman richun mandan. Cai mandashcata cazungapajca humildesmi cana canchij. Tandanacuicunaman ringapaj, chaipi participangapajpish achca horascunatami prepararina canchij.

5. ¿Humilde gentecunataca Jehová Diosca imapajtaj invitashca?

⁵ Jehová Diosca humilde gentecunataca paimanta yachachunmi invitashca. Chai invitaciontaca cada huatami achca gentecuna chasquin (Isaías 50:4). Maijancunaca Jesús huañushcata yuyarina tandanacuimanmi punta cutin rincuna. Chai huashami tucui tandanacuicunaman ri callarincuna (Zacarías 8:20-23). Diosta tucui sirvijcunami pai ñucanchijta yachachishcamantaca cushilla sintirinchij. Paimi ñucanchijta ayudaj, ñucanchijta quishpichij Dios can (Salmo 40:17). Jehová Diospish Jesucristopish ñucanchijtaca tandanacuicunamanmi invitashca. Paicuna invitashcata chasquinami ashtahuan importante can (Mateo 17:5; 18:20; 28:20).

6. Jesús huañushcata yuyarina tandanacuiman ringapajca ¿ima shinataj shuj runaca humilde cashcata ricuchirca?

⁶ Cada huatami Jesús huañushcata yuyarina tandanacuiman tucuicunata invitangapaj esforzarinchij. Alli shungu gentecunaca cai invitacionta chasquishpami beneficiarishcacuna. Shuj experienciamanta parlashun. Achca huatacuna huashamanmi shuj huauquica shuj runaman invitacionta saquishca carca. Pero chai runaca, “rinata mana pudishachu” nishcami carca. Shinapish, Jesús huañushcata yuyarina chishica chai runaca tandanacuipimi carca. Chaita ricushpami huauquica mancharishca saquirirca. Chai runaca tucuicuna paita alli chasquishcamantami tucui tandanacuicunaman ri callarirca. Huatapica quimsa cutinllami tandanacuimanca mana ri pudirca. ¿Chai runaca imamantataj tandanacuiman rinata animashcanga? Asha tiempo qꞌuipa huauqui parlashpaca: “Paica humildemi can” nircami. Yaya Diosmi chai runapaj shunguta ricushpa paipajman pushamushcanga. Cunanca ñami testigo de Jehová shina bautizarishca (2 Samuel 22:28; Juan 6:44).

7. ¿Tandanacuicunaman rishpa, Bibliata liyishpaca imatataj yachacunchij?

⁷ Tandanacuicunaman rishpa, Bibliata liyishpaca humilde canatami yachacunchij. Jesús huañushcata yuyarina asha semanacuna faltajpirajmi tandanacuicunapica Jesuspaj ejemplomanta, paipaj causaita cushcamanta yachai tucunchij. Shinallataj Jesús manaraj huañujpi ima tucushcata, pai causarishcatami Bibliapi yachai tucunchij. Chaicunata yachashpami Jesús paipaj causaita cushcataca achcata valorashun. Shinallataj Jesuspaj ejemplota catishpami humilde cashcata ricuchishun, sinchi laya ricurijpipish Diospaj munaitami rurashun (Lucas 22:41, 42).

8. ¿Jesusca ima shinataj mana manchaj cashcata ricuchirca?

⁸ Jesusca mana manchajmi carca. Ñucanchijpish pai shina canatami munanchij. Jesusca paita pꞌiñajcuna chanzata rurana cashcata, macana cashcata, huañuchina cashcataca allimi yacharca (Mateo 20:17-19). Shinapish huañunataca manataj mancharcachu. Paita huañuchina punlla chayajpi ima pasashcata ricushun. Jesusca paita catijcunandijmi Getsemaní huertapi carca. Chaipi cashpami paita catijcunataca: “¡Jatarichij, jacuchij! Riquichigari, ñucata huañuchichun entregajca ñami cꞌuchuyamucun” nirca (Mateo 26:36, 46). Jesusca, gentecuna paita japinaman ña cꞌuchuyacujpimi pairaj cꞌuchuyashpaca, “ñucami cani” nirca. Soldadocunatapish, “ñucahuan cajcunataca richun saquichij” nircami (Juan 18:3-8). Chashnami Jesusca mana manchaj cashcata ricuchirca. Cunan punllacunapica Diosta tucui sirvijcunami Jesús shina mana manchaj cangapaj esforzarinchij.

9. a) ¿Tandanacuicunaman ringapajca imamantataj maipica mana manchaj cana minishtirin? b) ¿Diosta sirvicushcamanta prezupi caj huauqui panicunataca ima shinataj ayudai tucunchij?

⁹ Maipica jarcaicuna tiyashcamantami tandanacuicunaman rinaca sinchi can. Shina cajpica mana manchaj canami minishtirin. Huaquincunaca ungushca cashcamanta, llaquilla o desanimado cashcamantami tandanacuiman mana rincuna. Shujtajcunataca familiacuna, autoridadcunami Diosta ama sirvichun jarcasha nincuna. Cunanca Diosta sirvicushcamanta prezupi caj huauqui panicunata ima shina ayudai tucushcapi yuyashun (Hebreos 13:3). Paicunaca, llaquicuna, jarcaicuna tiyajpipish ñucanchijcuna Diosta alli sirvishpa caticujta yachashpami ashtahuan animarincuna. Paicunapaj crishcacunapish ashtahuan sinchiyajpimi Diosmantaca manataj caruyancuna. Apóstol Pablopi yuyashun. Paica Roma llajtapimi prezu carca. Shinapish huauqui panicuna Diosta alli sirvishpa caticujta yachashpaca mai cushimi sintirirca (Filipenses 1:3-5, 12-14). Paita prezumanta llujchi punllacunaca Judeapi causaj huauqui panicunamanmi shuj cartata escribirca. Chai cartapica, quiquin huauquindij shina caishuj chaishuj cꞌuyanacunata, tandanacuicunaman rinataca amataj saquinguichijchu nircami (Hebreos 10:24, 25; 13:1).

10, 11. a) ¿Jesús huañushcata yuyarina tandanacuimanca picunallatataj invitana canchij? b) ¿Efesios 1:7-pi nishca shinaca imamantataj shujtajcunata invitana canchij?

¹⁰ Ñucanchij familiacunata, vecinocunata, compañerocunata Jesús huañushcata yuyarina tandanacuiman invitashpaca mana manchaj cashcatami ricuchinchij. Paicunata invitashpaca Jehová Diosta, Jesusta agradicishcatami ricuchishun. Ñucanchijca shujtajcuna Jesús paipaj causaita cushcamanta ima shina beneficiari tucushcata yachachunmi  munanchij (Efesios 1:7-ta liyipai; Apocalipsis 22:17).

¹¹ Jehová Diospish, Jesuspish cꞌuyaj cashcatami ricuchishca. Tandanacuicunaman rishpaca ñucanchijpish cꞌuyaj cashcatami ricuchishun.

12. a) ¿Jehová Diosta, Jesusta cꞌuyashpaca imatataj rurana canchij? b) 2 Corintios 5:14, 15-pi caj yuyaica ¿ima shinataj Jesuspaj ejemplota catichun ayudan?

¹² Jehová Diosta, Jesusta cꞌuyashpaca tandanacuicunamanmi rina canchij. Chaipimi paicuna ñucanchijmanta imallata rurashcata yachashun. Ñucanchij cꞌuyaipish ashtahuanmi sinchiyanga (Romanos 5:8). Jesús huañushcata yuyarina tandanacuimi Yaya Dios tucuicunata cꞌuyaj cashcata ricuchin. Shinapish maijancunaca Jesús paipaj causaita cushcataca manaraj valorashcata ricuchincunachu. Pero ñucanchijca Jesús paipaj causaita cushcata agradicishpami paipaj ejemplota catisha ninchij (2 Corintios 5:14, 15-ta liyipai). Jehová Diostaca Jesuspaj causaita cushcamantami shungumanta alabasha ninchij. Chaipajca tandanacuicunapimi comentariocunata tucui shungumanta cuna canchij.

13. ¿Jehová Diosta, Jesusta achcata cꞌuyashcataca ima shinataj ricuchinchij?

¹³ Jehová Diosta, Jesusta cꞌuyashpami tucui pudishcata rurasha ninchij. Por ejemplo, trabajopi cainashca qꞌuipa shaicushca cashcamantami tandanacuiman rinaca maipica sinchi can. Achca congregacioncunami chaupi semana tandanacuitaca chishi lado charincuna. Cutin caishuj tandanacuica sábado o domingo punllapimi can. Chai punllaca huaquincunapajca samana punllami can. Shinapish ¿shaicushca cashca jahua tandanacuiman rijpica Jehová Diosca ñucanchijta valorangachu? Ari. Paita cꞌuyashcamanta ashtahuan esfuerzota rurajpica Yaya Diosca ashtahuanmi ñucanchijtaca valoranga (Marcos 12:41-44).

14. ¿Jesusca ima ejemplotataj ñucanchijman saquirca?

¹⁴ Jesusca shuj alli ejemplotami ñucanchijman saquirca. Tucui punllacunami paillapi yuyanapaj randica shujtajcunamanta preocuparij carca. Chashnami shujtajcunata cꞌuyashcata ricuchirca. Por ejemplo, shaicushca, sustarishca cashpapish paipaj  catijcunahuanmi tandanacuj carca (Lucas 22:39-46). Mana imata japinata yuyashpami shujtajcunata ima shina ayudanata ricuj carca (Mateo 20:28). Ñucanchijpish Jehová Diosta, huauqui panicunata cꞌuyashpaca Jesús huañushcata yuyarina tandanacuiman, shinallataj cada semana tandanacuicunaman rinatami mana faltana canchij.

15. ¿Picunatataj ashtahuantajca ayudanata munanchij?

¹⁵ Ñucanchijca Jehová Diospaj pueblopi cashcamantami cushilla sintirinchij. Chaimantami shujtajcunatapish ñucanchijhuan tandanacuchun invitangapaj achca tiempota dedicanchij. Ashtahuantajca congregacionmanta caruyashcacunatami ayudanata munanchij (Gálatas 6:10). Paicunataca Jesús huañushcata yuyarina tandanacuiman shamuchun, shinallataj cada semana tandanacuicunaman shamuchun animashpami cꞌuyashcata ricuchinchij. Congregacionmanta caruyashcacuna tigrajpica Jehová Dios shina, Jesús shinami ñucanchijpish achcata cushicunchij (Mateo 18:14).

16. a) ¿Imapajtaj caishuj chaishuj animanacuna canchij? b) ¿Tandanacuicunapica ima shina canatataj yachanchij? c) ¿Juan 3:16 versota liyishpaca imatataj yuyarina canchij?

¹⁶ Cai semanacunapica tucuicunatami Jesús huañushcata yuyarina tandanacuiman invitashpa catina canchij. Cai tandanacuica viernes 19 de abril inti huashicushca qꞌuipami canga (“ Tucuicunata invitashunchij” nishca recuadrota ricui). Cai shina causaica ñallami tucuringa. Chaimantami caishuj chaishuj tandanacuicunaman ama faltangapaj animanacuna canchij. Tandanacuicunapimi humilde canata, mana manchaj canata, cꞌuyaj canata yachashun (1 Tesalonicenses 5:8-11). Shinallataj Jehová Diosta, Jesusta agradicishcatami ricuchishun (Juan 3:16-ta liyipai).