1, 2. ¿Cai yachaipica imallatataj yachashun?

HUAQUINPICA mana tucui vidapaj causanata yachashpa, problemacunata charishpaca desanimarishcami sintirinchij (Job 14:1). Ñaupa punllacunapipish Jehová Diosta sirvijcunaca chashnallatajmi llaquilla sintirircacuna. Huaquincunacarin huañunatami munarcacuna (1 Reyes 19:2-4; Job 3:1-3, 11; 7:15, 16). Pero paicunaca Jehová Diospimi confiarcacuna. Chaimantami paicunataca Diosca animarca, sinchiyachirca. Ashtahuanpish ñucanchijta animangapaj, yachachingapajmi paicunapaj causaimanta Bibliapi quillcachishca (Romanos 15:4).

² Cai yachaipimi Diosta sirvijcunaca llaquicunahuan cashpa desanimarishca cashcata ricushun. Por ejemplo, Jacobpaj churi Josemanta, viuda Noemimanta, paipaj nuera Rutmanta, salmo 73-ta quillcaj levitamanta y apóstol Pedromantami yachashun. ¿Paicunataca Jehová Diosca ima shinataj sinchiyachirca? ¿Paicunamantaca imatataj yachanchij? Cai tapuicunamanta yachashpami Mandaj Diosca shungupi llaquilla cajcunapaj cꞌuchullapi cashcata, espiritupi llaquilla cajcunata quishpichij cashcata yachashun (Salmo 34:18).

3, 4. ¿Josepaj causaica ima shinataj cambiarca?

³ 17 huatacunata José charijpimi Jehová Diosca paipaj familiamanta respetashca cana cashcata ishqui muscuipi ricuchirca (Génesis 37:5-10). Pero cai muscuicunata charishca qꞌuipallami paipaj causaica cambiarca. Paipaj huauquicunaca Joseta respetanapaj randica paitami cꞌaturcacuna. Chaimi Joseca Faraonta cuidaj soldadocunata mandaj Potifarpaj esclavo tucurca (Génesis  37:21-28). Joseca paipaj yayahuanmi cushilla causarca. Pero ñapishmi esclavo tucurca (Génesis 39:1).

⁴ Potifarpaj huarmipish Josetaca ‘ñucatami japirisha nin’ nishpami yangamanta juchachirca. Potifarca paipaj huarmita crishpami Josetaca carcelman cacharca. Paitaca carcelpipish cadenacunahuanmi churarca (Génesis 39:14-20; Salmo 105:17, 18). ¿Joseca paita yangamanta juchachijpica ima shinashi sintirishcanga? ¿Gentecunaca chaita uyashpaca Josepaj Diosmantaca imatashi yuyashcanga? Joseca cashna llaquicunahuan chꞌimbapuracushpaca de seguro desanimadomi sintirishcanga.

5. ¿Joseca ama desanimaringapajca imatataj rurarca?

⁵ Joseca carcelpi cashpa, esclavo cashpapish paipaj llaquicunata anchuchingapajca imata mana rurai tucurcachu. Pero ¿Joseca ama desanimaringapajca imatataj rurarca? Imata mana rurai tucushcapi yuyanapaj randica paiman mingashca trabajocunata alli pajtachingapajmi esforzarirca. Ashtahuancarin paipaj causaipica Jehová Diostami punta lugarpi churarca. Chaimantami Jehová Diosca tucui pai imata rurashcapish alli llujshichun ayudarca (Génesis 39:21-23).

6. ¿Ima shinashi José muscushcacunaca paita animashcanga?

⁶ Joseca huaquin huatacuna huashaman imata muscushcapimi yuyarishcanga. Chashna yuyarishpami familiahuan cutin tupanata, paipaj causaipish mejoranata yacharca. Caicunapi yuyashcamantami paica animarishca canga. Qꞌuipaca pai 37 huatacunata charijpimi pai muscushcacunaca tucui pajtari callarirca (Génesis 37:7, 9, 10; 42:6, 9).

7. 1 Pedro 5:10-pi nishca shinaca ¿llaquicunahuan chꞌimbapurachunca imataj ayudanga?

⁷ ¿Josepaj causaimantaca imatataj yachanchij? Cai mundopica achca gentecunami Joseta shinallataj yangamanta juchachishpa maipica mana alli tratancuna. Huaquinpica huauqui panicunachari ñucanchijtapish llaquichingacuna. Pero Jehová Diosca jatun rumi shina, ñucanchij  miticunami can. Caita yuyaipi charishpaca paita sirvinataca mana saquishunchu (Salmo 62:6, 7; 1 Pedro 5:10-ta liyipai). José jovenraj cajpimi Jehová Diosca paiman muscuchirca. Caita ricushpami Jehová Diosca jovencunapi confiaj cashcata intindinchij. Cunan punllacunapish achca jovencunami José shinallataj Jehová Diospi confiancuna. Huaquin jovencunaca Jehová Diosta sirvinata mana saquishcamantami carcelpi cancuna (Salmo 110:3).

8. ¿Noemipish, Rutpish ima llaquicunahuantaj chꞌimbapurarcacuna?

⁸ Noemica Elimelechuanmi ishqui huahuacunata charirca. Paicunaca Judá llajtapimi causarcacuna. Pero, Judá llajtapi achca yaricai tiyashcamantami paicunaca Moab llajtapi causanaman rircacuna. Chai llajtapi causacushpami Elimelecca huañurca. Chaimi Noemica paipaj ishqui huahuacunallahuan saquirirca. Qꞌuipaca paipaj churicunaca shujca Ruthuan, caishujca Orfahuanmi cazararcacuna. 10 huatacuna qꞌuipaca Noemipaj churicunaca huahuacunata mana charishpami huañurcacuna (Rut 1:1-5). Chashna tucushcamantami cai quimsa huarmicunaca llaquilla sintirishcangacuna. Rutpish, Orfapish jovencuna cashcamantami cutin cazarai tucurcacuna. Pero Noemica ñami mayoryacurca. ¿Cunanca pitaj paitaca cuidanga? Noemica yallitaj llaquilla sintirishpaca: “Ñucataca ama Noemí nihuaichijchu. Ashtahuanpish Mara nihuaichij. Tucuita Rurai Tucuj Diosca, jatun llaquitamari rurahuarca” nircami. Noemica dimastij llaquilla sintirishcamantami Belenman tigranata decidirca. Rutpish paihuanmi rirca (Rut 1:7, 18-20).

9. Rut 1:16, 17, 22-pi nishca shinaca ¿Rutca ima shinataj Noemita animarca?

⁹ Noemica llaquicunahuan cai horasca pi paiman cꞌuyaita ricuchichunmi minishtirca. Rutmi paihuan saquirishpa, paita cꞌuyashcata ricuchirca (Rut 1:16, 17, 22-ta liyipai). Rutca Belenpimi cebadacunata chꞌalashpa Noemipajpish, paipajpish sinchita trabajarca. Chaimi Rut alli trabajaj cajtaca tucuicuna yachaj chayarcacuna (Rut 3:11; 4:15).

10. ¿Jehová Diosca huajchacunamanca ima shinataj cꞌuyaita ricuchirca?

¹⁰ Jehová Diosca shuj leytami israelitacunamanca curca. Chai leypica granota cozichai punllacunapica Noemi laya, Rut laya huajchacuna granocunata chꞌalachunmi ladocunaman saquirishcataca mana tucui cozichana carca (Levítico 19:9, 10). Chaimi Noemipish, Rutpish mana caridadta mañashpa micungapaj charircacuna.

11, 12. ¿Boazca Noemipish, Rutpish cushilla cachunca imatataj rurarca?

¹¹ Rutca shuj charij runapaj allpacunapimi chꞌalaj carca. Cai allpayuj runaca Boaz shutimi carca. Rut paipaj suegra Noemita achcata cꞌuyashcata ricushpami Boazca Ruthuan cazararca. Ruthuan cazarashpami Noemipaj familia japina herenciacunataca Boazca randirca (Rut 4:9-13). Asha tiempo qꞌuipaca Rutca Obed shuti huahuatami charirca. Paica rey Davidpaj abuelomi carca (Rut 4:17).

¹² Noemica paipaj nieto Obedta marcashpaca cushillami sintirishcanga. Jehová Diostapish shungumantami agradicishcanga. Pero, Noemipish Rutpish causarishpaca Obedpaj huahua huahuacunamanta paicuna shuyashca Mesías nishca Jesucristo shamushcata yachashpaca cushillami sintiringacuna.

13. ¿Noemimanta, Rutmantaca imatataj yachai tucunchij?

¹³ ¿Noemimanta, Rutmantaca imatataj yachanchij? Huaquinpica ima llaquicunahuan chꞌimbapurashpaca shungupimi dimastij llaquilla sintirinchij. Ima llaquicunahuan chꞌimbapuracushpaca ‘llaquicunaca mana nunca tucuringachu’ nishpachari yuyashun. Cashna llaquicunahuan chꞌimbapuracushpaca Jehová  Diospi tucui shunguhuan confiashunchij. Huauqui panicunamantapish amataj caruyashunchij. Noemipaj cusata, paipaj huahuacunataca Jehová Diosca mana causachircachu. Chashnallatajmi ñucanchij llaquicunatapish mana siempre anchuchinga. Pero, llaquicunata ahuantachunca ñucanchijtaca huauqui panicunahuanmi ayudanga (Proverbios 17:17).

14. ¿Levitaca imamantataj desanimarirca?

¹⁴ Salmo capítulo 73-ta quillcaj runaca shuj levitami carca. Levitacunaca Jehová Diosta adorana lugarpimi paita sirvina privilegiota charircacuna. Levitaca Diosta cashna sirvicushpapish charijcunata, jatun tucushcacunatami envidiai callarirca. Chaimantami paica desanimarirca. Paica paicuna laya mana alli cosascunata ruranataca mana yuyarcachu. Pero paicuna alli causaita charijta ricushpami paicuna laya causasha nirca (Salmo 73:2-9, 11-14). Chai gentecunaca charij cashcamanta, llaquicuna illaj, alajata causacushca shinami carcacuna. Caicunata ricushpami salmistaca: “Alli yuyarijpica, ñuca shungutaca yangallami chuyayachishcani. Ñuca maquicunata mana mapayachishcapish yangallami” nircami. Chashna yuyailla catishpaca Jehová Diosta sirvinatami saquinman carca.

15. Salmo 73:16 al 19, 22 al 25-pi nishca shinaca ¿levitaca imata intindishpataj desanimarinata saquirca?

¹⁵ (Salmo 73:16-19, 22-25-ta liyipai). Cai levitaca Diospaj huasiman yaicushpaca chaipi shujtaj israelitacuna Jehová Diosta adoracushcatami ricurca. Diospaj huasipi cashpami paica tranquilo sintirirca. Pai ima shina sintirishcata yuyangapajpishmi tiempota charirca. Shinallataj pai ima shina sintirishcataca Diosmanmi huillarca. Chaimi paipaj causaipi pandaricushcata, Jehová Diosmanta caruyacushcata intindirca. Paica mana allicuna, lluchcarinapi churashca cashcata, paicunataca cungaillapi Yaya Dios chingachinatami cuentata curca. Levitaca millaicuna ima tucunata intindishpami envidianata, desanimarinata saquirca. Chaita rurashcamantami paica tranquilo, cushilla sintirirca. Paica Jehová Diostaca: “Cai pachapipish, quiquinmanta chꞌican ima shujtajtaca mana charisha ninichu” nircami.

16. ¿Salmo 73-ta quillcaj levitamantaca imatataj yachanchij?

 ¹⁶ ¿Cai levitamantaca imatataj yachanchij? Mana alli gentecuna alli causaita charijta shina ricushpaca paicunataca mana envidianachu canchij. Paicuna cushilla canaca ashacamallami canga. Huiñai causaitapish paicunaca mana charingacunachu (Eclesiastés 8:12, 13). Mana alli gentecunata envidiashpaca ñucanchijllatajmi desanimarishun. Chashna desanimarishpaca Jehová Dioshuanpish alli apanacunatami saquishun. Ñucanchijpish levita shina sintirishpaca pai imata rurashcata rurashunchij. Diospaj consejocunata uyashunchij, ñucanchij huauqui panicunahuan pasangapaj tiempota surcushunchij. Tucuimanta yalli Jehová Diosta cꞌuyashpaca cushillami causashun. Shinallataj huiñai causaiman apaj ñanpimi purishpa catishun (1 Timoteo 6:19).

17. ¿Pedroca imamantataj desanimarirca?

¹⁷ Pedroca imata rurangapajpish listomi carca. Pero huaquinpica imatapish manaraj alli yuyashpami imatapish ruraj o parlaj carca. Chaimantami pai pandarishcata cuentata cushpaca llaquilla sintirij carca. Por ejemplo, Jesusca paipaj apostolcunamanca pai ima shina llaquicunata chꞌimbapuranata, ima shina huañunatami parlarca. Chaimi Pedroca: ‘Amito, chai llaquitaca mana ricunguichu’ nishpami jarcarca (Mateo 16:21-23). Pero chashna nijpimi Jesusca corregirca. Achca gentecuna Jesusta japinaman shamujpica Pedroca, curacunata mandajpajta rurajtami, espadata llujchishcahuan alli lado rinrinta pꞌitirca (Juan 18:10, 11). Chaita rurajpimi Jesusca cutin paita corregirca. Ashtahuancarin Pedroca: ‘Shujtajcuna canta saquijpipish, ñucaca manataj saquishachu’ nishcami carca (Mateo 26:33). Pedroca paillapimi confiaj carca. Pero qꞌuipaca runacunata manchaj cashcatami ricuchirca. Pedroca quimsa cutinmi Jesustaca ‘mana rijsinichu’ nishpa negarca. Pedroca arrepintirishpami canllaman llujshishpaca achcata llaquirishpa huacarca (Mateo 26:69-75). Tal vez Pedroca Jesusca ñucataca mana perdonangachu nishpami yuyashcanga.

18. ¿Jesusca Pedro ama desanimarichunca ima shinataj ayudarca?

 ¹⁸ Pedroca pai pandarishcacuna desanimachichunca mana saquircachu. Pandarishpapish caishuj apostolcunahuanmi ñaupajman catirca (Juan 21:1-3; Hechos 1:15, 16). ¿Pedroca ama desanimaringapajca imatataj rurarca? Pedroca Jesús paimanta Diosta mañashcata, paitaca tigrashpa huauqui panicunata sinchiyachichun mandashcatami yuyarirca. Jesús Pedromanta mañashcatami Diosca cutichirca. Jesusca Pedrota animangapajmi tal vez paipaj ñaupajpi ricurishcanga (Lucas 22:32; 24:33, 34; 1 Corintios 15:5). Shinallataj apostolcuna tucui tuta mana imata pescashca huashami paicunapaj ñaupajpi ricurirca. Chaipimi Jesusca Pedro paita cꞌuyashcata ricuchichun saquirca. Shinallataj Pedrota perdonashcata ricuchingapajmi valishca trabajocunata mingarca (Juan 21:15-17).

19. a) Salmo 103:13, 14-pi nishca shinaca ¿Juchayujcuna cajpish Jehová Diosca ñucanchijtaca ima shinataj tratan? b) ¿Jehová Diospaj ejemplotaca ima shinataj catina canchij?

¹⁹ ¿Pedromantaca imatataj yachanchij? Jesusca Pedrotaca cꞌuyaihuanmi tratarca. Chashnami paica paipaj Yaya shina cashcata ricuchirca. Chaimanta imapi pandarishpaca Jehová Diosca manataj perdonangachu nishpaca ama yuyashunchij. Diabloca Diosca mana perdonanchu nishpa yuyachunmi munan. Pero Jehová Diosca ñucanchij juchayuj cajpipish cꞌuyaihuan allimi tratan. Chaimanta pi ñucanchijta mana alli tratajpipish Dios shinami cꞌuyaihuan perdonana canchij (Salmo 103:13, 14-ta liyipai).

20. ¿Catij yachaipica imatataj ricushun?

²⁰ Josepaj, Noemipaj, Rutpaj, levitapaj, Pedropaj causaimanta yachashpami Jehová Dios llaquilla cajcunapaj cꞌuchullapi cashcata intindinchij (Salmo 34:18). Llaquicunahuan cajpi, desanimado cajpica mai ratoca Diosca chai llaquicunataca mana anchuchinchu. Pero, Jehová Dios ñucanchijta ayudajllapimi ñucanchij fetaca sinchiyachishun (1 Pedro 1:6, 7). Catij yachaipimi pandarishcamanta, shujtaj cosascunamanta desanimarijpi Jehová Dios ima shina ayudanata yachashun.