Jehová Diosca gentecunamanca: ‘Achcata mirarishpa cai pachata mandanguichij’ nircami. Cai shimicunahuanmi Jehová Diosca gentecuna cai Allpata shuj Paraisota ruranata intindichirca (Génesis 1:28). Cai Allpapi para siempre causana esperanzata charijcunami cai mandashcataca pajtachina cancuna. Cunan punllacunapica cai Allpaca mana shuj Paraíso canchu. Edén huertallapish ña mana tiyanchu. Chaimantami Armagedón qꞌuipallaca cai tucui Allpata pꞌichashpa achcata trabajana canchij. Pero chai trabajota pajtachinaca dimastij sumajmi canga.

Israelitacunaca 70 huatacunatami Babilonia llajtapi causarcacuna. Chai tucui tiempomi paicunapaj llajta Jerusalenca shitashca cashcarca. Pero Jerusalenman tigrashpaca chai llajtata cutin alaja tucuchunmi allichina carcacuna. Isaías 51:3-pica Jehová Diosca: “Shitashca pambataca sumaj huertatami ruranga. Mana pꞌucuj allpataca Mandaj Diospaj huertatami ruranga” nircami (Isaías 51:3). Israelitacunaca Diospaj  ayudahuanmi paicunapaj llajtataca alajata rurarcacuna. Chai shinallatajmi ñucanchijpish Jehová Diospaj ayudahuanca cai tucui Allpataca shuj Paraisota rurashun. Pero ¿chaita pajtachingapajca cunanmantapacha ima shinataj allichiri tucunchij?

Por ejemplo, ñucanchij vecinocuna huasi canllacunata mana pꞌichajpipish ñucanchijcunaca ñucanchij huasita, huasi canllacunata pꞌichangapaj, ordenadota charingapajmi esforzarina canchij. Tandanacuna Huasitapish, Jatun Tandanacuna Huasitapish pꞌichangapaj, allichingapajmi ayudai tucunchij. Pudishpacarin Labores de Socorro nishcapi ayudanamanmi ri tucunchij. Cashna tapuri: “¿Shamuj punllacunapi cai Allpata allichishpa ayudangapajca imata ruranatataj yachai tucuni?”.

Jesusca Jairopaj ushushita causachincami “imallatapish micuchun cuichij” nirca (Marcos 5:42, 43). Cai doce añosta charij huahuata caranaca mana sinchichu cashcanga. Shinapish Jesusca shamuj punllacunamanta parlashpaca ‘pambana jutcupi cajcunaca tucuicunami Diospaj Churi rimashcata uyashpaca causaringacuna’ nircami (Juan 5:28, 29). Bibliapica caicunamanta mana tanto parlashpapish causarishcacunamanca micunata, maipi causanata, ima churanatami cuna canga. Chaipajca achca trabajomi minishtiringa. ¿Chaipi causarigrijcunata ayudangapajca cunamantapachachu allichiricungui?

Cambaj congregacionpi superintendente de circuito visitacujpica ¿imallatapish carangapaj invitanguichu? ¿Shuj huauqui betelmanta cambaj congregacionpi sirvinaman shamujpi o shuj superintendente shujtaj congregacioncunata visitanaman rijpica paicuna causachun huasita mashcashpa ayudanguichu? ¿Mana cashpaca can causan ladopi shuj jatun tandanacui tiyagrishcata uyashpaca allichingapaj o shamugrij huauqui panicunatapish alli chasquingapajchu allichiringui?

Hechos 24:15-pi nishcacunaca achca miles de millones gentecuna causarigrishcapimi yuyachin. Achca gentecunaca Yayitu Diosta rijsina oportunidadtaca mana charircacunachu. Pero causarishpaca chai oportunidadtami charingacuna. a Cutin Yayitu Diosta achca huatacunata sirvijcunaca causarigrijcunaman yachachina oportunidadtami charingacuna (Isaías 11:9). Pani Charlottemanta parlashun. Paica Europapi, Sudamericapi, Africapimi huillashca. Pani Charlotteca causarina punlla chayamuchunmi cushicuihuan shuyacun. Paica: “Causarigrijcunatami yachachinata munani. Ñaupa tiempopi causaj gentecunapimi yuyani. Paicuna Yayitu Diosta rijsishca cashpaca cushillami causanmancuna carca” ninmi.

Jesús manaraj huacharijpi ñaupa tiempopi Diosta alli sirvijcunamanpish yachachinaca allimi canga. Por ejemplo, profeta Danieltaca pai quillcashca profeciacuna ima shina pajtarishcatami yachachi tucushun. Mana cashpaca Ruttapish, Noemitapish paicunamanta Mesías shamushcata yachachinami dimastij importante canga. Chai tiempopica millai ruraicuna ña mana tiyagrishcamantacarin causarigrijcunaman yachachinaca sumaj, alajami canga.

¿Causarigrijcunaman yachachingapaj listo cashcataca ima shinataj ricuchingui? Cunanmantapachami canca alli yachachij tucungapaj, predicacionpipish participangapaj esforzarina cangui (Mateo 24:14). Pero mayorlla cashcamanta o ungushca cashcamanta o shujtaj jarcaicunamanta mana tanto predicai tucushpapish tucui pudishcahuanmi predicacionpi participana cangui. Chaita rurashpaca shamuj punllacunapaj preparado cashcatami ricuchingui.

¿Canca Paraíso Allpapi de verastajchu causanata munangui? ¿Cai Allpatapish shuj Paraisota ruranatachu munangui? ¿Causarigrijcunatapish alli atindinata, yachachinatachu munangui? Cunanmantapacha caicunata pajtachingapaj prepararishpaca listo cashcatami ricuchingui.