Mana. Ashtahuanpish David nishcacunaca ciertomi carca.

Cai versopica Davidca Jehová Diostaca: “Quiquinpaj shutitaca huiñai huiñaitami alabasha” nircami (Salmo 145:1, 2). Caishuj versopipish Davidca: “Mandaj Dios, ñuca Taita Dioslla quiquintami alabasha. Ñuca tucui shunguhuanmi alabasha. Quiquinpaj shutitaca huiñaitami jatunyachisha” nircami (Salmo 86:12).

Davidca chashna nishpapish juchayuj cashcamanta shuj punlla huañuna cashcataca allimi yacharca (Génesis 3:3, 17-19; Salmo 51:4, 5). Paica Diosta sirvij Abrahampish, Isaacpish, Jacobpish ña huañushcataca allimi yacharca (Salmo 37:25; 39:4). Pero Salmo 145:2-pica Davidca “Diospaj shutitami huiñai huiñaita alabasha” nishpaca paipaj tucui causaipi Jehová Diosta alabanatami nirca (2 Samuel 7:12).

Maipica Davidca paipaj causaimanta, paipaj munaicunamantami quillcarca. Por ejemplo, Salmo 18, 51 y 52-pica chaitami ricui tucunchij. Davidca alli michij cashcamantami Salmo 23-pica Jehová Diospish shuj alli michij shina paipaj ovejitacunata cuidaj, alli pushaj cashcata quillcarca. Chai Salmopica Diospaj huasipi tucui punllacuna causasha nishcatapishmi quillcarca (Salmo 23:6).

Cai tucui quillcashcacunataca Jehová Diosllatajmi Davidta quillcachirca. Ashtahuancarin Davidca huaquin profeciacunamantami quillcarca. Por ejemplo, Salmo 110-pica Davidca Dios agllagrishca Mandaj Diospaj alli ladopi tiyarinata, achca poderta chasquinatapishmi parlarca. Chai poderta chasquishpaca chai Mandajca jahua pachapimi mandana carca, huiñaipaj sacerdotepishmi tucuna carca, Diospaj contracunatapishmi tucuchina carca. Dios agllashca Mandajca Jesucristomi carca. Jesucristoca Davidpaj huahua huahuacunamantami shamurca (Salmo 110:1-6). Jesucristollatajmi Salmo 110-pi tiyaj shimicuna paimanta parlashcata, chai shimicuna qꞌuipa punllacunapi paipi pajtarigrishcatapish parlarca (Mateo 22:41-45).

Caipi ricushca shinaca Jehová Diosca Davidtaca pai causashca tiempopi ima tucushcata, shamuj punllacunapipish ima tucunatami quillcachirca. ¿Caita yachashpaca Salmo 37:10, 11, 29-taca ima shinataj intindina canchij? Cai versocunapica ñaupa tiempopi Israel llajtapi alaja causai tiyashcatami yachachin. Ashtahuancarin shamuj punllacunapipish Paraíso allpapi alaja causai tiyagrishcatapishmi yachachin. Chaipimi Davidca causarishpa huiñaipaj Yayitu Diosta alabai tucunga. (“Ñucahuanmi Paraisopi cangui” nishca yachaipaj párrafo 8-ta ricui).

Shinashpaca Salmo 145:2-pipish, shujtaj versocunapipish Davidca paipaj tucui causaipi Yayitu Diosta alabasha nishcatami parlarca. Shamuj punllacunapicarin Jehová Dios paita causachijpica Davidca huiñaipajmi Jehová Diosta alabai tucunga.