1, 2. ¿Imamantataj maijan yaya mamacunaca preocuparincuna?

CADA huatami achca gentecunaca Diosman mingarishpa bautizarincuna. Huaquincunaca mosocuna, solteracunami can. Paicunata uchillamantapacha yaya mama Bibliata yachachishcamantami Jehovata sirvinata agllashcacuna (Salmo 1:1-3). Diosta sirvij yaya mamacunaca paicunapaj huahuacuna bautizarichunmi munancuna (3 Juan 4-ta ricui).

² Shinapish maijan jovencunaca bautizarishca qꞌuipaca: “¿Diospaj mandashcacunata cazushpaca allichu causasha?” nishpami dudai callarishcacuna. Shujtajcunacarin Diosta sirvinatami saquishcacuna. Éfeso llajtapi causaj huauqui panicunaca Diosmantami caruyashcacuna carca. Chaimantami Jesusca: ‘Cancunaca punta cꞌuyaitami saquishcanguichij’ nirca (Apocalipsis 2:4). Caita ricushpami maijan  yaya mamacunaca, “ñucanchij huahuacunapish bautizarishca qꞌuipaca Diosmanta caruyangacunachari” nishpa preocuparincuna. ¿Huahuacuna Diosmanta mana caruyashpa quishpirichunca yaya mamacunaca imatataj rurai tucun? (1 Pedro 2:2). Timoteomanta yachashun.

3. a) ¿Timoteoca ima horataj Jesusta catij tucurca? b) ¿Jesusmanta yachashpaca Timoteoca imatataj rurarca? c) ¿Pablo Timoteoman nishcamantaca imatataj yachanchij?

³ Pabloca huata 47-pimi punta cutin Listra llajtapi causaj huauqui panicunata visitarca. Chai punllacunami Timoteoca Jesús yachachishcacunamanta yachaj chayashca canga. Timoteoca chai punllacunaca mosorajmi cashca canga. Chashna cashpapish Jesusmanta yachashcataca pajtachishcami canga. Chaimantami ishqui huatacuna qꞌuipaca apóstol Pablohuan alli huillaicunata huillai callarirca. 16 huatacuna qꞌuipaca apóstol Pabloca shuj cartatami Timoteoman escribirca. Chaipica: ‘Can yachashcata crishca shinallataj alli catingui. Pi cantaca chashna alli yachachishcataca, canllataj yachanguimi. Canca huahuamantapachami Dios Quillcachishca sumaj shimicunataca yachangui. Chaicunami Cristo Jesusta crishpa quishpirichun, cantaca yachajta rurai tucun’ nircami (2 Timoteo 3:14, 15, QC, 1989). ¿Pablo Timoteoman nishcamantaca imatataj yachanchij? Puntapica jovencunaca ‘Dios Quillcachishca sumaj shimicunatami’ yachana can. Qꞌuipaca yachachishcatami jovencunallataj crina can. Chai huashaca Cristo Jesusta crishpa quishpiringapajca alli yachaitami charina can.

4. ¿Huahuacunata yachachingapajca ima ayudacunataj tiyan? (Página 15-pi tiyaj fotota ricui).

⁴ Yaya mamacunaca ‘Dios Quillcachishca sumaj shimicunata’ huahuacuna yachachunmi munan. Cai ‘Quillcachishca sumaj shimicunaca’ tucui Bibliami can. Huahuacuna uchillaraj cajpipish ñaupa punllacunapi Diosta sirvijcunamantami yachachi tucunguichij. Diospaj pueblopica huahuacunaman yachachingapajca videocuna, librocuna, folletocunapishmi tiyan. Bibliamanta alli yachachijpimi huahuacunaca Jehová Dioshuan alli apanacungacuna. ¿Canca ima shinataj cambaj huahuacunaman yachachicungui?

5. ¿Imamantataj Timoteoca Jesús Mesías cashcata crirca?

⁵ Huahuacunaman ñaupa punllacunapi Diosta sirvijcunamanta yachachinaca allimi can. Pero Diospi cringapajca paicunallatajmi Bibliapi nishcacuna cierto cashcata ricuna can. Timoteoca chaitami rurarca. Paica huahuamantapachami Diospaj Shimita yacharca. Pero tiempo qꞌuipaca paillataj intindishpami Jesús Mesías cashcata crirca. Chaimantami Timoteoca bautizarirca, apóstol Pablohuanpish Diosmanta huillanaman rirca.

6. ¿Huahuacuna Bibliapi nishcacuna cierto cashcata crichunca yaya mamacunaca ima shinataj ayudai tucun?

⁶ Huahuacunaca mana yaya mama Diospi crijpilla paicunapish Diospi cringachu. Chaimantami Diospi crichunca mana utca pꞌiñarishpa yachachina can. Bibliapi  nishcacuna cierto cashcata cringapajca huahuacunallatajmi ima alli cashca, ima mana alli cashcata intindina can (Hebreos 5:14-ta leyipai). Huahuacuna tapujpi alli contestangapajmi yaya mamacunaca esforzarina can.

7, 8. a) ¿Ima shinataj shuj yayaca paipaj ushushiman yachachin? b) ¿Imamantataj mana utca pꞌiñarishpa huahuacunaman yachachina canchij?

⁷ Huauqui Thomasca 11 huatacunayuj ushushitami charin. Paica: “Ñuca ushushica, ‘¿evolucionta utilizashpachu Diosca tucuita rurarca? ¿Ñucanchij llajtata pushajcuna ayudachunca imamantataj paicunaman mana votota cunchij?’ nishpami tapun” ninmi. Huauqui Thomasca mana chai rato jahua jahualla imatapish contestanchu. Ashtahuanpish alli yuyashpa contestangapajmi esforzarin.

⁸ Diosta sirvijcunaca mana utca pꞌiñarishpami imatapish rurana canchij. Thomaspish mana utca pꞌiñarishpami paipaj ushushitaca alhajata yachachin (Colosenses 3:12, QC, 1989). Paipaj ushushi Bibliapi nishcata crichunca Thomasca tapuicunata rurashpa paihuan cutin cutin parlanacushpami yachachin. Paica: “Ñucanchij ushushi intindicushcata o mana intindicushcatami yachasha ninchij. Chaimantami tapuicunata rurajpica cushilla sintirinchij. Mana tapujpica preocuparinchijmanmi” ninmi.

9. ¿Yaya mamacunaca ima shinataj huahuacunaman Bibliamanta yachachi tucun?

⁹ Huahuacunaca asha ashami Diospaj nishcacunata intindishpa catin. Chaimantami yaya mamacunaca pacienciahuan yachachina can (Efesios 3:18). Alli intindichunca jahualla shimicunapimi yachachina can. Chashnami uchillaraj cashpapish Diosmanta yachachijpica alli intindingacuna. Diospaj yachaicuna paicunapaj shunguman chayajpica escuelapipish shujtaj ladocunapipishmi Diosmanta huillai tucungacuna (1 Pedro 3:15). Por ejemplo, ¿gentecuna huañushpa ima tucushcataca cambaj huahuacunaca Bibliahuan yachachi tucuncunachu? ¿Bibliapi nishcacunataca paicunaca crinchu? * (Urapi tiyaj notata ricui). Huahuacuna Bibliapi nishcacunata tucui shunguhuan crichunca pacienciahuan yachachinami minishtirin. Huahuacuna Diosta cꞌuyajpica cushillami sintiringuichij (Deuteronomio 6:6, 7).

10. ¿Huahuacuna Diosta cꞌuyachunca yaya mamacunaca imatataj rurana can?

¹⁰ Diostapish paipaj mandashcacunatapish huahuacuna shungupi charichunca yaya mamacunarajmi alli ejemplota cuna can. Quimsa ushushicunata charij Stephanie shuti panica: “Shuj cꞌuyaj, llaquij Dios tiyashcata crichunca ñucapish imamanta chaita crishcatami paicunaman parlani. Shinallataj Jehovata tucui shunguhuan cꞌuyashcata ricuchingapajmi esforzarini. Diosta ñucaraj mana cꞌuyashpaca  Diostaca cꞌuyanami canguichij mana ni tucuimanchu” ninmi.

11, 12. a) ¿Alli yachaita charij runaca ima shinataj can? b) ¿Alli yachaita charingapajca huahuacunaca imatataj rurana can?

¹¹ Ima shinami ña yachashcanchij Timoteoca Diospaj Shimitaca allimi rijsirca. Shinallataj chaipi mandashcacunataca tucui shunguhuanmi crirca. Pabloca: ‘Diospaj Quillcachishcacunami Cristo Jesusta crishpa quishpirichun, cantaca yachajta rurai tucun’ nircami. ¿Imamantataj Pabloca chaita nirca?

¹² Libro Perspicacia volumen 2-pica: “Alli yachaita charijcunaca alli yuyashpami ima problematapish allichincuna. Llaquicunapi ama urmangapajmi imata ruranata alli ricuncuna. Shinallataj imata rurasha nishpa chaitataj pajtachingapajmi esforzarincuna, shujtajcunapish chaillatataj rurachunmi ayudancuna” ninmi. Alli yachaita mana charijcunaca mana chaita rurancunachu. Bibliaca: “Huambracunapaj shungupica, rumi shungu canaca aichayashpa tiyanllami” ninmi (Proverbios 22:15). Mana achca huatacunata pajtachispallachu shuj huahuaca alli yachaj tucunga. Ashtahuanpish huahuacuna alli yachaj cangapajca Diosta alli rijsishpami pai mandashcacunata tucui shunguhuan cazuna can (Salmo 111:10-ta leyipai).

13. ¿Alli yachaita charishcataca huahuacunaca ima shinataj ricuchi tucun?

¹³ Mana alli munaicunapish escuelapi compañerocunapish ‘huaira urmachij shinami’ huahuacunata pandachi tucun. Shinapish huahuacunaca alli yachaita charishpaca pandachichunca mana saquingacunachu (Efesios 4:14, QC, 1989). Ashtahuanpish paicunaca ima alli cashcata, ima mana alli cashcatapish alli yuyashpami agllangacuna (Hebreos 5:14). Shinallataj yaya mama o shujtajcuna mana ricucujpipish alli yachaita charij huahuacunaca allita rurangapajmi esforzarincuna (Filipenses 2:12). Chashna alli yachaita charishpami huahuacunaca quishpiringacuna (Proverbios 24:14-ta leyipai). ¿Cambaj huahuacuna alli yachaita charichunca imatataj rurai tucungui? Cambaj rurashcahuan, rimashcahuanmi Dios mandashca shina causacushcata ricuchina cangui (Romanos 2:21-23). Chashnami huahuacunaca cambaj causaipi ima ashtahuan valishcata ricungacuna.

14, 15. a) ¿Manaraj bautizarishpaca imatataj jovencunaca yuyarina can? b) ¿Diosta sirvina alli cashcata huahuacuna intindichunca ima shinataj yaya mamacunaca ayudai tucun?

¹⁴ Yaya mamacunaca “caita ruranaca allimi o chaita ruranaca mana allichu” nishpallaca mana yachachinachu can. Ashtahuanpish “¿alli laya ricurijpipish imamantataj Bibliaca chaita ama rurachun nin? ¿Bibliapi mandashca shina ruranaca imamantataj alli can?” nishpami yachachina can (Isaías 48:17, 18).

 ¹⁵ Cambaj churi o ushushi bautizarisha nijpica bautizarishpa ima responsabilidadta charina cashcatami intindichina cangui. Por ejemplo, “¿imamantataj bautizarisha ningui? ¿Bautizarishpaca ima bendicioncunatataj charingui? ¿Jarcaicunata charishpapish imamantataj Diosta sirvina cangui?” nishpami tapui tucungui (Marcos 10:29, 30). Manaraj bautizarishpami chai tapuicunapi huahuacunaca alli yuyanaraj can. Diosta cazushpa cushilla causanata o mana cashpaca llaqui tucuna cashcatami huahuacunaman intindichina cangui. Chashnami Bibliapi nishcacunata cazuna alli cashcata yachangacuna (Deuteronomio 30:19, 20).

16. ¿Cambaj churi o ushushi Diosta sirvinata dudai callarijpica imatataj rurai tucungui?

¹⁶ ¿Bautizarishca qꞌuipa cambaj churi o ushushi Diosta sirvinata dudai callarijpica imatataj rurai tucungui? Por ejemplo, shuj jovenca cai mundopi tiyashca ruraicunata munashpachari: “¿Bibliapi tiyashca consejocunata cazushpaca allichu causasha?” nishpa yuyanga (Salmo 73:1-3, 12, 13). Chashna yuyajpica uchilla cajpipish o jatun cajpipish huahuacunahuanca mana pꞌiñarinachu cangui. Mana alli tratajpica ashtahuanchari desanimaringa. Ashtahuanpish  paicunata cꞌuyashcamanta ayudasha nishcatami ricuchina cangui.

17, 18. ¿Huahuacuna pandata yuyacujpica yaya mamacunaca ima shinataj ayudai tucun?

¹⁷ Shuj joven bautizarishpaca tucuita saquishpa cꞌuyaimanta Diosllata sirvinatami ari nin (Marcos 12:30-ta leyipai). Chai ari nishcataca Jehová Diosca achcatami valichin. Chaimantami huahuacunaca Diosman ari nishcataca pajtachinataj can (Eclesiastés 5:4, 5). Yaya mamacunaca huahuacuna ari nishcata pajtachichunmi cꞌuyaihuan yuyachina can. Chaita rurangapajca manaraj paicunahuan parlashpami publicacioncunapi huaquin consejocunata mashcana can. Chashna rurajpica paicunaca Diosta sirvina mana shuj pugllailla cashcatami ricungacuna. Shinallataj Diosman ari nishcata pajtachishpaca bendicioncunata charinatami intindingacuna.

¹⁸ Los jóvenes preguntan volumen 1 libropica tucuri paginacunapimi yaya mamacunapaj alli consejocuna tiyan. Chaipi nishca shinaca huahuacuna Diosta saquicushcataca yaya mamacunaca mana yuyanachu can. Ashtahuanpish huahuacuna imamanta dudai callarishcatami yachanaraj can. Por ejemplo, pailla sintirishcamanta o compañerocuna molestashcamantachari chashna yuyacunga. Chashnallataj congregacionpi shujtaj jovencuna laya Diosta mana sirvicunichu nishpachari chashna yuyacunga. Chai paginacunallapitajmi: ‘Huahuacuna chashna yuyacujpica Bibliapi nishcacunata ña mana crishcataca mana yuyanachu canguichij. Ashtahuanpish shujtaj problemacunata charishcamantachari chashna pandata yuyacungacuna’ ninmi. Caita nishca qꞌuipaca yaya mamacuna imata rurai tucushcatami huillan.

19. ¿Yaya mamacunaca ima shinataj huahuacuna quishpirichun ayudai tucun?

¹⁹ Yaya mamacunapajca huahuacunata Dios mandashca shina huiñachinaca shuj jatun responsabilidadmi can (Efesios 6:4, NM). Cai temapi yachashca shinaca Bibliapi nishcata yachachishca jahuapish yaya mamacunaca chai yachachishcacunata crichunmi ayudana can. Huahuacunaca Bibliapi mandashcacunata crishpaca bautizarishpami Diosta tucui shunguhuan sirvingacuna. Bibliapi sumaj yachaicunahuanpish, Diospaj espiritupaj ayudahuanpish huahuacuna quishpirichun ayudashpa catichij.