1. ¿Bibliata ima shina yachai callarishcataca imamantataj parlana canchij?

 HUAUQUI panicunahuan parlashpaca maipica paicunataca: “¿Ima shinataj Bibliamanta yachai callarircangui?” nishpami tapunchij. Huauqui panicuna Bibliamanta ima shina yachai callarishcata, Jehová Diosta ima shina rijsi callarishcata parlajpica paicunataca contentosmi uyanchij. Ñucanchijpish Bibliata ima shina rijsi callarishcatami parlanata munanchij (Romanos 1:11). Chashna huauqui panicunahuan parlanacushpaca testigo de Jehová cana valishca cashcatami yuyarinchij. Shinallataj Diosta cushichingapaj, paipaj bendicionta chasquingapaj esforzarina cashcatapishmi yuyarinchij (3 Juan 4).

2. ¿Cai yachaipica imatataj yachashun?

² Cai yachaipica Biblia yachachishcacunata imamanta valorana cashcata, shinallataj chaita valorashcata ima shina ricuchina cashcatami yachashun. Caicunata intindishpaca Jehová Dios Bibliata yachachishcamantami achcata agradicishun (Juan 6:44). Shujtajcunamanpish Bibliamanta yachachina munaitami charishun.

3. ¿Biblia yachachishcacunataca imamantataj valoranchij?

³ Bibliapaj yachachishcacunata rijsishcamantami Jehová Diostaca cꞌuyai callarircanchij. Chaimantami chai yachachishcacunataca  achcata valoranchij. Por ejemplo, Bibliapica cai pachatapish, jahua pachatapish Jehová Dios rurashcatami yacharcanchij. Shinallataj Jehová Dios cꞌuyaj, llaquij, allita ruraj, ñucanchijmanta preocuparij, pacienciata charij cashcatapishmi yachashcanchij (1 Pedro 5:7; Éxodo 34:6; Isaías 61:8). Ñucanchijcuna llaquicunata charijpica Jehová Diospish llaquillami sintirin. Chaimantami ñalla tucui llaquicunata tucuchinga (Jeremías 29:11). Caicunata yachashcamantami Jehová Diostaca achcata cꞌuyanchij.

4, 5. ¿Apóstol Pabloca imamantataj ñucanchij esperanzataca barcota charicuj fierrohuan chꞌimbapurarca?

⁴ Bibliapaj yachachishcacunaca cushilla causachunmi ayudan. Chaimantami cai yachachishcacunataca achcata valoranchij. Por ejemplo, Bibliapica shamuj punllacunapi alaja causai tiyagrishcatami yachashcanchij. Chashna alaja causanataca cushicushpami shuyacunchij. Caimanta parlashpaca apóstol Pabloca: “Cai shuyaica ñucanchij causaipajca barcota charicuj fierro shinami can” nircami (Hebreos 6:19). Yuyashun, barcota charij fierroca, barcota huaira ama aparichunmi sinchita charin. Chashnallatajmi Dios cusha nishcacunata shuyashpaca Diospi sinchita crishun, llaquicunatapish ahuantashun.

⁵ Apóstol Pabloca jahua pachaman rina esperanzata charijcunamanmi cai shimicunataca nirca. Pero apóstol Pablo nishcacunaca Paraíso Allpapi causana esperanzata charijcunapajpishmi can (Juan 3:16). Tucui ñucanchijcunaca huiñaita causana esperanzata charishcamantami cushilla causanchij.

6, 7. ¿Bibliamanta yachanaca Yvonnetaca ima shinataj ayudarca?

⁶ Yvonne shuti panipaj ejemplopi yuyashun. Paica Bibliamanta mana yachashcamantami uchillamantapacha huañunata mancharca. Shuj cutinca Yvonneca shuj libropica “shuj punllaca tucuicunami huañushun” nishcatami liyirca. Paica: “Chaita cutin cutin yuyashcamantami mana dormi pudircani. ‘Mana huañunapajllachu causana canchij. Ñucaca mana huañusha ninichu’ nishpami yuyaj carcani” ninmi.

⁷ Yvonne ña joven cashpaca Testigocunahuanmi Bibliamanta yachai callarirca. Paica: “Bibliapica Paraíso Allpapi huiñaita causagrishcatami yacharcani. Chaita yachashcamantami cunanca alli dormi tucuni, huañunatapish ña mana manchanichu” ninmi. Pani Yvonneca Biblia yachachishcacunataca achcatami valoran. Chaimantami shujtajcunamanpish Bibliamanta yachachinata munan (1 Timoteo 4:16).

8, 9. a) ¿Jesús parlashca runaca tarishca tesorota valorashcataca ima shinataj ricuchirca? b) ¿Diospaj Gobiernomanta yachachishcacunataca imamantataj valorangui?

⁸ Bibliapica Diospaj Gobiernomantami verdadta yachanchij. Cai yachachishcacunataca Jesusca shuj tesorohuanmi chꞌimbapurarca. Paica: “Jahua pacha Gobiernoca allpapi pacashca tiyacuj yallitaj valishca tesorocuna shinami. Chai valishca cosascunata shuj runa japishpaca, chaillapitajmi alli pacashpa saquin. Chai qꞌuipaca cushilla cashcamantami paipaj tucui charishcacunata cꞌatushpa chai allpataca randirca” nircami (Mateo 13:44, nota). Jesús parlashca runaca tesorotaca mana mashcacurcachu. Cai tesoroca chai runa charishca tucui cosascunamanta yallimi valirca. Cai tesoro valishca cashcamantami pai tucui charishcacunata cꞌatushpa chai allpata randirca.

⁹ Canpish Diospaj Gobiernomanta yachachishcacunataca achcatami valorangui. Cai tiempopica Jehová Diosta sirvina, Diospaj  Gobiernomanta alaja causai tiyanata yachanami tucuimanta yalli valishca can. Ñucanchijpajca Diospaj amigos cana, paita cushichinaca shuj jatun bendicionmi can. Chaimantami Diosta sirvingapajca sacrificiocunataca ruranchijlla (Colosenses 1:10).

10, 11. ¿Michaelca imamantataj paipaj causaipi huaquin cambiocunata rurarca?

¹⁰ Huaquin huauqui panicunaca Jehová Diosta cushichingapajmi huaquin cosascunata saquishcacuna. Huaquincunaca ashtahuan cullquita mashcanata, alli trabajotapishmi saquishcacuna. Shujtajcunaca Biblia yachachishcacunata pajtachingapajmi achca cambiocunata rurashcacuna. Huauqui Michaelpish chaitami rurarca. Paica joven cashpa Bibliata mana yachashcamantami alli peleangapaj karateta yacharca. Michaelca: “Alli peleanata yachangapajmi ñucaca siempre alli entrenaj carcani. Maipica ‘ñucataca pi mana mishangachu’ nishpami yuyaj carcani” ninmi. Pero Michaelca Bibliata estudiai callarishpaca Jehová Dios peleachun mana munashcatami intindirca (Salmo 11:5). Michaelca: “Ñucaman yachachij cusa huarmica ‘peleanatami saquina cangui’ ninapaj randica, Bibliata alli yachachingapajmi esforzarircacuna” ninmi.

¹¹ Michaelca Jehová Diosmanta ashtahuan yachashpaca paitaca ashtahuanmi cꞌuyai callarirca. Jehová Dios tucuicunata cꞌuyaj, alli trataj cashcata yachashpaca Michaelca pai shina canatami munarca. Pero chaipajca huaquin cambiocunatami rurana carca. Michaelca: “Ñucapajca karatepi peleanata saquinaca dimastij sinchimi carca. Pero Jehová Diosta cushichina tucuimanta yalli valishca cashcatami yacharcani. Paita sirvinata agllashcamanta mana arrepintirigrishcataca allimi intindircani” ninmi. Michaelca Biblia yachachishcacunata valorashcamantami sinchi cajpipish achca cambiocunata rurarca (Santiago 1:25).

12, 13. ¿Bibliata yachanaca Maylitaca ima shinataj ayudarca?

¹² Bibliapaj yachachishcacunaca amsapi achijyachij luz shinami can (Salmo 119:105; Efesios 5:8). Azerbaijan llajtamanta pani Maylipi yuyashun. Paipaj yayaca musulmanmi carca, paipaj mamaca judiami carca. Maylica panda crishcacunata charishcamantami amsapi shina puricurca. Pero Bibliamanta yachashpami amsamanta llujshirca. Paica: “Dios tiyashcataca mana dudarcanichu. Pero maipica ‘¿Diosca imapajtaj ñucanchijtaca rurarca? ¿Infiernopi sufrishpa catichunchu munan?’ nishpami tapurij carcani. Gentecunaca ‘Diosmi llaquicunata cachashpa castigacun’ nincunami. Chaita uyashpaca ñucaca ‘¿ciertochu Diosca ñucanchijta llaquichingapaj castigan?, ¿llaquicunata charijpica cushillachu sintiringa?’ nishpami tapurij carcani” ninmi.

¹³ Maylica ima cierto cashcata yachangapajmi Bibliata yachai callarirca. Bibliata yachashcamantami testigo de Jehová tucurca. Paica: “Bibliapi verdadta alli intindishcamantami cunanca cushilla, tranquila sintirini” ninmi. Ñucanchijpish Mayli shina amsamanta llujshishcamantami Jehová Diostaca achcata agradicinchij (1 Pedro 2:9).

14. ¿Bibliapi yachachishcacunata ashtahuan valorangapajca imatataj rurana canchij? (“ Shujtaj chꞌimbapuraicunamanta yachashun” nishca recuadrota ricui).

¹⁴ Caicamaca Bibliapaj yachachishcacuna barcota charicuj fierro shina cashcata, shuj tesoro shina cashcata, shuj achijyachij luz shina cashcatapishmi yachashcanchij. Seguromi canpish shujtaj ejemplocunata yuyaringui. Chai ejemplocunamanta yachashpaca  Biblia yachachishcacunatami ashtahuan valorashun.

15. ¿Bibliapi yachachishcacunata valorashcataca ima shinataj ricuchinchij?

¹⁵ Bibliapaj yachachishcacunata valorashcata ricuchingapajca Bibliatapish, publicacioncunatapishmi estudiana canchij. Achca huatacunata Bibliata yachashpapish ashtahuanmi yachashpa catina canchij. Inglés shimipi callari Huillaj revistapica: “Biblia yachachishcacunaca alaja sisacuna shinami can. Cutin panda crishcacunaca mana alli qꞌuihuacuna shinami can. Cai sisacunaca mana alli qꞌuihuacuna ucupimi can. Chaimantami cai sisacunata mashcangapajca esforzarina can. Chai shinallatajmi Bibliapaj yachachishcacunata yachashpa catingapajpish esforzarina canchij” nircami.

16. ¿Canca Bibliataca ima shinataj estudiangui?

¹⁶ Maipica Bibliata liyinata o estudianataca mana tanto munanchijchu. Pero Bibliamanta ashtahuan yachachunmi Jehová Diosca munan (Proverbios 2:4-6-ta liyipai). Bibliata alli estudiashpaca ñucanchijllatajmi beneficiarishun.  Corey shuti huauquica Bibliata estudiacushpaca cada versotami alli investigan. Paica: “Shuj versota liyishca huashaca chai versopi tiyaj notacunatami ricuni. Chai qꞌuipaca chai versopaj Bibliapi rucuchij shujtaj versocunatapishmi ricuni. Chashna alli investigashpaca ashtahuanmi yachani” ninmi. Ñucanchijpish huauqui Corey shina Bibliata alli estudiashpaca Bibliapaj yachachishcacunata valorashcatami ricuchishun (Salmo 1:1-3).

17. Santiago 1:25-pi nishca shinaca ¿Bibliata estudiashca huashaca imatataj rurana canchij?

¹⁷ Pero Bibliata estudiashpallaca mana saquirinachu canchij. Ashtahuanpish Biblia yachachishcacunataca ñucanchij causaipimi pajtachina canchij. Chashnami cushilla causashun (Santiago 1:25-ta liyipai). Shuj huauquica: “Biblia yachachishcacunata pajtachicushcata o mana pajtachicushcata yachangapajca allimi ricurana canchij. Chashnami imapi mejorana cashcata yachashun” ninmi. Apóstol Pablopish: “Shinaca mashnata sinchiyashca cashpapish chai ñanllapitaj allita rurashpa catishunchij” nircami (Filipenses 3:16).

18. ¿Mana llullapi catingapajca imamantataj esforzarina canchij?

¹⁸ Mana llullapi catishpaca cushillami causashun. Jehová Diostapish, huauqui panicunatapishmi cushichishun (Proverbios 27:11; 3 Juan 4). Chaimantami Biblia yachachishcacunata valorashpa, pajtachishpa catina canchij.