1. ¿Imataj shuj jatun bendición can?

CONGREGACIONPI huauqui panicunahuan Jehová Diosta sirvinaca shuj jatun bendicionmi can. Chaimantami tranquilo, cushilla sintirinchij. ¿Pero congregacionpica cada uno ima trabajotataj charinchij?

2. ¿Apóstol Pabloca pai quillcashca huaquin cartacunapica ima chꞌimbapuraitataj churarca?

² Apóstol Pablo quillcashca huaquin cartacunapica congregacioncunataca cuerpohuanmi chꞌimbapurarca. Shinallataj congregacionpi cajcunataca cuerpopaj miembrocunahuanmi chꞌimbapurarca. Pablo quillcashca chꞌimbapuraimantaca achcatami yachai tucunchij (Romanos 12:4-8; 1 Corintios 12:12-27; Efesios 4:16).

3. ¿Cai yachaipica ima quimsa yuyaicunamantataj yachashun?

³ Tucuicunami Diospajca valishca canchij. Chꞌican chꞌican llajtacunamanta cashpapish, estudiashca cashpapish, pobre o charij cashpapish tucuicunami congregacionpi cajcunataca sinchiyachi tucunchij. Cai yachaipimi Pablo parlashca chꞌimbapuraimanta quimsa yuyaicunata yachashun. Puntapica, congregacionpi imamanta cada uno valishca cashcatami yachashun. Ishquipica, congregacionpi imapi mana ayudaj cashcata shina sintirishpaca imata rurana cashcatami yachashun. Quimsapica, congregacionpi Dios ima mingashcacunata  pajtachishpa imamanta ocupados cana cashcatami ricushun.

4. Romanos 12:4, 5-pi nishca shimicunamantaca ¿imatataj yachai tucunchij?

⁴ Romanos 12:4, 5-pica apóstol Pabloca: “Shinallataj cuerpopica, achca miembrocunatami charinchij. Chashna cashpapish, mana tucui miembrocuna chaillatataj ruranata charinchu. Ñucanchijca achcacuna cashpapish, Cristopica shuj cuerpollami canchij. Chashna cashcamantami, caishuj chaishuj shuj cuerpopajlla miembrocuna canchij” nircami. Apóstol Pablo nishca shinaca congregacionpi chꞌican chꞌican mingashcacunata pajtachishpapish tucuicunami valishca canchij.

5. ¿Jehová Diosca ima sumaj regalotataj cushca?

⁵ Callaringapajca congregacionpi pushajcunamanta parlashun (1 Tesalonicenses 5:12; Hebreos 13:17). Congregacionta pushajcunataca Jehová Diospish Jesuspishmi shuj valishca regalota shina cushcacuna (Efesios 4:8, QC, 1989). Por ejemplo, Cuerpo Gobernante huauquicuna, paicunata ayudajcuna, Comité de Sucursalpi sirvij huauquicuna, superintendente de circuito huauquicuna, Bibliamanta yachana escuelacunapi yachachijcuna, congregacionta pushaj ancianocuna, siervos ministeriales huauquicunami can. Tucui cai huauquicunataca Jehová Diosmi paipaj espíritu santohuan huauqui panicunata cuidachun agllashca (1 Pedro 5:2, 3).

6. 1 Tesalonicenses 2:6 al 8-pi nishca shinaca ¿pushaj huauquicunaca imata rurangapajtaj esforzarincuna?

⁶ Congregacionta pushajcunataca chꞌican chꞌican mingashcacunata pajtachichunmi Jehová Diosca paipaj espíritu santohuan agllashca. Ñucanchijca chaquicunata, maquicunata, shujtaj partecunata charishcamantami beneficiarinchij. Chashnallatajmi congregacionpi pushajcuna tiyashcamantaca tucuicuna beneficiarinchij. Pushaj huauquicunaca paicunata jatunyachichunca mana munanchu. Chaipaj randica huauqui panicunata sinchiyachingapajmi esforzarincuna (1 Tesalonicenses 2:6-8-ta liyipai). Paicunaca paicunallapi yuyanapaj randica, shujtajcunapajmi allicunata rurancuna. Chaimantami Jehová Diostaca achcata agradicinchij.

7. ¿Misionerocunapish, precursorcunapish ima bendicioncunatataj charincuna?

⁷ Ñucanchij congregacionpica misionerocuna, precursores especialcuna, precursores regularcunachari tiyan. Muyundij Allpapica achca huauqui panicunami tiempo completota predicancuna. Chashnami achca gentecunataca Jesuspaj discipulocuna tucuchun ayudashcacuna. Cai huauqui panicuna ashalla cosascunata charijpipish Jehová Diosmi paicunataca achcata bendiciashca (Marcos 10:29, 30). Cai huauqui panicunata ñucanchij congregacionpi charishpaca cushillami sintirinchij.

8. ¿Imamantataj tucui publicadorcunaca Jehová Diospajca valishca can?

⁸ ¿Congregacionta pushajcuna, tiempo completopi sirvij huauquicunallachu congregacionpica valishca can? Mana. Cada publicadorcunami Jehová Diospajpish, congregacionpajpish valishca can (Romanos 10:15; 1 Corintios 3:6-9). ¿Imamantataj chashna ninchij? Tucui publicadorcunami predicashpa, yachachishpa gentecuna Jehová Diosta sirvichun ayudancuna. Caita ruranami tucuimanta yalli valishca can (Mateo 28:19, 20; 1 Timoteo 2:4). Publicadorcunaca bautizarishca cashpapish mana bautizarishca cashpapish Diospaj obrata punta lugarpi  churangapajmi esforzarincuna (Mateo 24:14).

9. ¿Imamantataj panicunataca valoranchij?

⁹ ¿Panicunamantapish imatataj ni tucunchij? Paicunaca cazadacuna cashpa, huahuayujcuna cashpa, viudacuna cashpa, solteracuna cashpapish Jehová Diosta sirvingapajmi esforzarincuna. Chaimantami Jehová Diosca paicunataca achcata valoran. Bibliapica, Diosta sirvij achca huarmicunamantami parlan. Paicunaca yachaj, sinchi feta charij, cushicuihuan Diosta sirvij, mana manchaj, mana mitsa, allicunata rurajcunami carca (Lucas 8:2, 3; Hechos 16:14, 15; Romanos 16:3, 6; Filipenses 4:3; Hebreos 11:11, 31, 35). Congregacioncunapipish achca panicunaca ñaupa tiempopi Diosta sirvij huarmicuna shinami alli cualidadcunata charincuna. Paicunahuan tandalla Jehová Diosta sirvishpami cushilla sintirinchij.

10. ¿Imamantataj mayorlla huauqui panicunataca valorana canchij?

¹⁰ Congregacionpi mayorlla huauqui panicuna tiyashcamantami shuj bendición can. Huaquincunaca Jehová Diostaca achca huatacunatami sirvishcacuna. Cutin maijancunaca cunanllachari Jehová Diosta rijsishcacuna. Huaquincunaca mayorlla cashcamanta, fuerzasta mana charishcamantachari congregacionpi, huillanapi mana tanto ayudai tucuncuna. Pero predicangapaj, shujtajcunata animangapaj, yachachingapajpishmi achcata esforzarincuna. Paicunapaj experienciamantaca achcatami yachai tucunchij. Paicunaca Jehová Diospajpish ñucanchijpajpish achca valishcami can (Proverbios 16:31).

11, 12. ¿Diosta sirvij jovencunapaj ejemplomantaca imatataj yachai tucunchij?

¹¹ Cunanca jovencunapipish yuyashun. Diablo cai pachata mandacushcamanta, pai pandachisha nishcamantami jovencunapajca Diosta sirvinaca sinchi can (1 Juan 5:19). Pero paicuna tandanacuipi comentajpi, huillanaman llujshijpi, paicunapaj crishcacunata difindijpica achcatami animarinchij. Jovencuna,  congregacionpica Diospajca achca valishcami canguichij (Salmo 8:2).

¹² Huaquinpica congregacionpi ima mingashcataca “mana pajtachi tucushunchu” nishpami yuyanchij. Chashna yuyashpaca ¿imatataj rurai tucunchij?

13, 14. ¿Huaquincunaca congregacionpica imamantataj imapaj mana valishca shina sintirincuna?

¹³ Apóstol Pablo quillcashca chꞌimbapuraimanta ashtahuan yachashun. Pabloca: “Chaquica: ‘Mana maqui cashcamantaca, mana cuerpopajchu cani’ ningachari. Chashna nishpapish ¿manachu cuerpopajllataj? Rinrinpish: ‘Mana ñahui cashcamantaca, mana cuerpopajchu cani’ ningachari. Chashna nishpapish ¿manachu cuerpopajllataj?” nircami (1 Corintios 12:15, 16). ¿Cai shimicunamantaca imatataj yachanchij?

¹⁴ Maijan huauquicunaca alli yachachijcuna, alli organizajcuna, congregacionta alli pushajcunami can. Paicuna ñucanchijta yalli cashcata yuyashpaca humildecuna cashcatami ricuchinchij (Filipenses 2:3). Pero ñucanchijca paicuna shina pajtachinataca mana pudishunchu nishpaca mana yuyanachu canchij. Paicunahuan chashna compararishpaca ñucanchijllatajmi desanimarishun. Pablo nishca shinaca paicunahuan chꞌimbapurashpaca congregacionpica imapaj mana valinichu nishpami yuyai callarishun. ¿Ama chashna yuyangapajca imataj ayudai tucun?

15. 1 Corintios 12:4 al 11-pi nishca shinaca ¿pi ñucanchijta ayudacujpitaj Dios mingashcataca pajtachi tucunchij?

¹⁵ Jesusta punta catijcunapi yuyashun. Paicunamanca chꞌican chꞌican ruraicunata pajtachichunmi Jehová Diosca paipaj espíritu santota curca (1 Corintios 12:4-11-ta liyipai). Shinapish tucuicunami Diospajca valishca carca. Cunan punllacunapica ñucanchijca paicuna shina milagrocunataca mana rurai tucunchijchu. Pero Dios ayudajpimi chꞌican chꞌican ruraicunata pajtachi tucunchij.  Chashna cashpapish Jehová Diospajca tucuicunami valishca canchij.

16. ¿Apóstol Pabloca ima consejotataj curca?

¹⁶ Shujtaj huauqui panicunahuan compararinapaj randica apóstol Pablo nishcata pajtachishunchij. Paica: “Chaimanta ima shina ruracushcataca, cada quiquin alli ricurichun. Chashna cashpami imamanta jatunyarina cajpica, mana shujtajpaj rurashcapi jatunyarishpa, quiquin rurashcapi jatunyaringa” nircami (Gálatas 6:4).

17. ¿Apóstol Pablopaj consejota pajtachishpaca ima shinataj beneficiarishun?

¹⁷ Apóstol Pablopaj ejemplota catishpaca ñucanchijpish alli ruraicunata rurai tucushcatami cuentata cushun. Por ejemplo, shuj pushaj huauquica congregacionpica manachari alajata yachachinata yachan. Pero huillanapica alli yachachijmi can. Mana cashpaca, shujtaj ancianocuna shinaca manachari alli organizanata yachan. Pero pai cꞌuyaj cashcamanta, Bibliahuan alli consejaj cashcamantachari huauqui panicunaca paitaca consejachun mañancuna. Shinallataj paitaca alli puzachij cashcatachari rijsincuna (Hebreos 13:2, 16). Congregacionpi imata mana rurai tucunichu nishpa yuyanapaj randica, imata rurai tucushcapimi yuyana canchij. Chashnami cushilla sintirishun. Shinallataj congregacionpi imata rurai tucuj huauqui panicunatapish mana envidiashunchu.

18. ¿Ima shinataj alli yachachijcuna cai tucunchij?

¹⁸ Congregacionpi ima mingashcata pajtachicushpapish alli pajtachingapajmi esforzarina canchij. Chashnami alli yachachijcuna tucushun. Jehová Diosca alli yachachijcuna cachunmi ñucanchijtaca yachachin. Por ejemplo, entre semana tandanacuipica alli yachachijcuna cachunmi ayudan. ¿Caicunataca allichu pajtachicunchij?

19. ¿Escuela para Evangelizadores del Reino nishcaman ringapajca imatataj rurana cangui?

¹⁹ ¿Escuela para Evangelizadores del Reino nishcaman rinata yuyashcanguichu? Tiempo completopi sirvij huauqui panicunaca 23 huatamanta hasta 65 huatacunata charishpaca ri tucuncunami. Pero huaquinpica: ‘Cai Escuelamanca mana ri tucushachu’ nishpami yuyai tucungui. Imamanta mana ri tucushcata yuyanapaj randica imamanta ri tucushcatami yuyana cangui. Qꞌuipaca Escuelaman ringapaj ima requisitocunata pajtachinatami ricuna cangui. Canllataj esforzarijpica Jehová Diosmi ayudanga.

20. Romanos 12:6 al 8-mantaca ¿imatataj yachanchij?

²⁰ Apóstol Pablo churashca chꞌimbapuraimantaca ¿imatataj ashtahuan yachai tucunchij? (Romanos 12:6-8 ta liyipai). Romanos 12:6-8-pi nishca shinaca congregacionpica cada unomi chꞌican chꞌican ruraicunata pajtachi tucunchij. Shinallataj congregacionpica ñucanchij ima rurai tucushcahuanmi shujtajcunataca animana canchij.

21, 22. ¿Huauqui Robertomanta, huauqui Felicemantaca imatataj yachanchij?

²¹ Roberto nishca huauquimanta yachashun. Paica congregacionta pushajmi can. Shujtaj llajtapi Diosta sirvishca huashami paitaca pai huacharishca llajtaman chaipi saquirij Betelpi sirvichun cacharcacuna. Ima mana allitaca mana rurashcanguichu nijpipish paica: “Achca quillacunatami imapaj mana valishca shina sintirircani. Chashna sintirishcamantami Betelmantapish rinata yuyarcani” ninmi. Pero cushilla sintiringapajca  ¿imatataj rurarca? Shuj pushaj huauquica cashna nishpami yuyachirca: “Shujtaj ladopi charishca asignacioncunaca cunanlla chasquishca asignacioncunata alli pajtachichunmi ayudan” nirca. Chaimi Robertoca mushuj asignacioncunata ima shina pajtachinapi yuyana cashcata cuentata curca.

²² Huauqui Felice Episcopomantapish yachashun. Paipish huaquin asignacioncunata saquishcamantami llaquilla sintirirca. Huauqui Feliceca paipaj huarmindijmi 1956 huatapica Escuela de Galaadmanta graduarircacuna. Chai huashaca Bolivia llajtapimi superintendente de circuito shina sirvirca. Pero 1964 huatapica shuj huahuatami charircacuna. Paica: “Ñucanchij munashca asignacionta saquinaca sinchimi carca. Casi shuj huatatami desanimarishca sintirircani. Pero Jehová Dios ayudashcamantami alli yaya cangapaj esforzarircani” ninmi. ¿Huaquinpica ñucanchijpish huauqui Roberto o huauqui Felice shinachu sintirinchij? Ñaupa charishca asignacioncunata ña mana charishpami llaquilla sintiri tucunchij. Ama llaquilla sintiringapajca cunan charishca asignacionta pajtachingapaj, huauqui panicunata ayudangapajmi esforzarina canchij. Shinallataj ñucanchij yachashcacunahuanpish shujtajcunata ayudashunchij. Chashnami cushilla sintirishun.

23. a) ¿Imata rurangapajtaj esforzarina canchij? b) ¿Catij yachaipica imatataj yachashun?

²³ Jehová Diosca tucuicuna congregacionpi valishca cashcata yachachunmi munan. Congregacionpi huauqui panicunata animangapaj esforzarishpaca cada uno valishca cashcatami intindishun. Pero huauqui panicunata valorashcataca ¿ima shinataj ricuchinchij? Catij yachaipimi cai tapuimantaca yachashun.