1. ¿Imamantataj parlai tucunchij?

 JEHOVÁ DIOSCA parlana regalotami cushca. Adanca Jehová Dios parlana regalota paiman cushcamantami Jehová Dioshuan parlai tucurca. Ashtahuancarin mushuj palabracunata yachashpami animalcunatapish shuticunata churarca (Génesis 2:19). Paipaj huarmi Evahuan parlashpacarin dimastij cushillami sintirishcanga (Génesis 2:22, 23).

2. ¿Ñaupa punllacunapipish, cunan punllacunapipish parlana regalotaca ima shinataj utilizashcacuna?

² Diabloca Jehová Dios cushca regalota mana alli utilizashpami Evata llullarca. Paipaj culpamantami tucuicuna juchayuj tucushcanchij (Génesis 3:1-4). Adanpish pai pandarishcamantami Jehová Diosta, Evata culparca (Génesis 3:12). Cainpish paipaj huauquita huañuchishca qꞌuipaca Jehová Diosmanmi llullarca (Génesis 4:9). Tiempo qꞌuipacarin Cainpaj huahua huahuacunamanta Lamec runaca pꞌiñaj, mana alli cashcatami paipaj nishcacunahuan ricuchirca (Génesis 4:23, 24). Cunan punllacunapish politicocunaca tucuicunapaj ñaupajpimi mana alli shimicunata nincuna. Casi la mayoría peliculacunapipish, escuelacunapipish, trabajocunapipish mana alli shimicunatami utilizancuna.

3. a) ¿Diosta sirvijcunaca imamantataj cuidarina canchij? b) ¿Cai yachaipica imatataj ricushun?

³ Gentecuna mana alli shimicunata nishcata o mapa shimicunata nishcataca casi siempremi uyanchij. Pero Diosta sirvijcunaca paicuna shina ama rimangapajmi cuidarina canchij. Ashtahuanpish ñucanchij shimicunahuan Jehová Diosta cushichingapajmi esforzarisha ninchij. Cai yachaipica huillacushpa,  tandanacuipi cashpa, pihuan parlacushpa ñucanchij nishcacunahuan Jehová Diosta ima shina alabanatami yachashun. Pero manaraj caita yachashpami, ñucanchij nishcacunata Jehová Dios imamanta uyacushcata yachashun.

4. Malaquías 3:16-pi nishca shinaca ¿imamantataj Jehová Diosca ñucanchij parlashcacunata uyasha nin?

⁴ (Malaquías 3:16-ta liyipai). Jehová Diosca paita mashnata cꞌuyashcata yachangapajmi ñucanchij parlashcacunata uyan. Jesusca: “Shungupi junda tiyashcatami shimica riman” nircami (Mateo 12:34). Chaimantami Malaquías 3:16-pi nishca shinaca Diosca paita manchajcuna parlanacushcacunata alli uyan. Paicuna huiñai causaita charichunpishmi paicunapaj shuticunataca paipaj libropi quillcan. Paicunaca paicuna ima nishcacunahuanmi Jehová Diosta shungumanta cꞌuyashcata ricuchincuna. Ñucanchijpish ñucanchij parlashcacunahuanmi Jehová Diosta mashnata cꞌuyashcata ricuchinchij.

5. ¿Jehová Dios ñucanchij adorashcata chasquichunca imatataj rurana canchij? (Página 5-pi tiyaj fotocunata ricui).

⁵ Jehová Dios ñucanchij adorashcata chasquichunca ñucanchij rimashcacunahuanmi paita jatunyachina canchij, shujtajcunatapish sinchiyachina canchij (Santiago 1:26). Diosta mana cꞌuyaj gentecunaca jatun tucushpa, pꞌiñarishpami shujtajcunata sinchita rimancuna (2 Timoteo 3:1-5). Cutin ñucanchijca ñucanchij rimashcacunahuanmi Jehová Diosta cushichisha ninchij. Pero caipi yuyashun. Maijanpish tandanacuicunallapi, predicanallapi shujtajcunata alli tratashpapish, paipaj familiacunata pꞌiñarishpa sinchita rimajpica ¿Jehová Diosca ima shinataj sintiringa? (1 Pedro 3:7).

6. ¿Kimberly paipaj compañeraman cꞌuyaihuan rimashcamantaca imataj tucurca?

⁶ Shujtajcunaman cꞌuyaihuan parlajpica, paicunaca ñucanchij Jehová Diosta sirvij cashcatami cuentata cungacuna (Malaquías 3:18). Kimberly shuti panipi yuyashun. b Shuj cutinca Kimberlyca escuelamanta paipaj  compañerahuanmi shuj tareata ruracurcacuna. Paipaj compañeraca Kimberly shujtajcunata mana huashalla rimaj cashcata, cꞌuyaj cashcata, mana alli shimicunatapish mana rimaj cashcatami cuentata curca. Cai compañeraca Kimberly imamanta chashna cashcatami yachasha nirca. Tiempohuancarin paica Bibliamantami estudiai callarirca. Ñucanchijpish shujtajcunahuan cꞌuyaihuan parlajpica paicunapish Bibliamantami yachasha ningacuna. Chaimi Jehová Diosca cushilla sintiringa.

7. ¿Ñucanchij rimashcacunahuan imatataj rurasha ninchij?

⁷ Jehová Diosta jatunyachingapaj, huauqui panicunahuan alli apanacungapajca cushichij shimicunatami parlasha ninchij. Chaimanta shujtajcunahuan cꞌuyaihuan parlangapaj, alli ejemplota cungapaj imacunallata ruranata ricushun.

8. ¿Huillanapica ima shinataj Jesuspaj ejemplota cati tucunchij?

⁸ Ñucanchijta mana alli rimajpipish cꞌuyaihuan, respetohuan parlashunchij. Jesús cai Allpapi cajpica paitaca contracunaca “yallitaj micuj, yallitaj ubyaj, Diablohuan caj, sábado punllatapish mana respetaj” nishpami yallitaj rimajcuna carca (Mateo 11:19; 26:65; Lucas 11:15; Juan 9:16). Jesusca paita rimajpipish mana chashnallataj cutichircachu. Ñucanchijtapish shujtajcuna pꞌiñarishpa mana alli rimajpica, Jesús shinallatajmi mana chashnallataj tratana canchij (1 Pedro 2:21-23). Maipica paicuna pꞌiñarishpa rimajpica paicunaman cꞌuyaita ricuchinaca sinchimi can (Santiago 3:2). ¿Cꞌuyaita ricuchingapajca imatataj rurai tucunchij?

9. ¿Ñucanchij predicacujpi gentecuna sinchita rimajpica imatataj rurana canchij?

⁹ Predicacujpi maijanpish pꞌiñarishpa mana alli rimajpica, paicuna rimashcallapi mana yuyashpa saquirinachu canchij. Sam shuti huauquica: “Gentecuna Jehová Diosmanta yachanata minishtishcapi, paicunapish cambiai tucushcapimi yuyani” ninmi. Maipica huasiyujcuna imamanta pꞌiñarishca cashcataca mana yachanchijchu. Pꞌiñarishca gentecunahuan tupashpaca pani Lucía shinallatajmi rurana canchij. Paica huasiyujcunaman cꞌuyaihuan, respetohuan, alli parlangapajca Jehová Diospaj ayudatami siempre mañan.

10. 1 Timoteo 4:13-pi nishca shinaca ¿imata rurangapajtaj esforzarina canchij?

¹⁰ Alli yachachijcuna cangapaj esforzarishunchij. Timoteoca alli predicajmi carca. Alli predicaj cashpapish ashtahuan alli predicangapajmi yachashpa catirca (1 Timoteo 4:13-ta liyipai). ¿Ñucanchijpish alli yachachijcuna  cangapajca imatataj rurana canchij? Por ejemplo, Alli yachachij nishca folletotami estudiai tucunchij. Shinallataj Tandanacuipi yachana pꞌangapimi “Alli yachachijcuna cashunchij” nishca parteta yachai tucunchij. Cai ayudacunata alli aprovechashpaca mana manchashpami alli predicashun.

11. ¿Alli yachachijcuna cangapajca huaquincunaca imatataj rurashcacuna?

¹¹ Alli yachachijcuna cangapajca huauqui panicuna ima shina yachachijtami ricuna canchij. Párrafo 9-pi parlashca huauqui Samca alli yachachij huauqui panicunapaj ejemplomantami achcata yachashca. Paica huauqui panicuna ima shina yachachijta ricushpami paipish chashnallataj yachachingapaj esforzarin. Talia shuti panipish conferenciata cuj huauquicuna ima shina chꞌican chꞌican temacunamanta yachachijta ricushpami, paipish ima shina shujtajcunaman predicanata yachashca.

12. ¿Huaquincunapajca imata ruranataj sinchi cashca?

¹² Tucuicunami tandanacuipica cantashpa, alli comentariocunata cushpa Jehová Diosta alabai tucunchij (Salmo 22:22). Huaquincunapajca comentariota cuna, cantanaca sinchimi cashca. Canpish chashna sintirishca cajpica huaquin huauqui panicuna ama manchashpa cantangapaj, comentangapaj imata rurashcata ricushun.

13. ¿Tandanacuicunapi cushilla cantangapajca imatataj rurana canchij?

¹³ Shungumanta cushicushpa cantashunchij. Tandanacuicunapi cantashpaca Jehová Diostami alabanchij. Sara shuti panipi yuyashun. Paica mana alli vozta charishpapish Jehová Diostami alabasha nin. Chaimantami Saraca tandanacuicunapaj prepararicushpaca cantocunata ima shina cantanata alli practican. Cantocunamanta imata yachai tucushcatapish allimi ricun. Paica: “Chashna alli prepararishpami ñuca voz mana alli cajpipish, cantocuna imata nisha nishcata alli intindishpaca cushicushpa cantani” ninmi. 

14. ¿Tandanacuicunapi comentangapaj manchaita charishpaca imatataj rurana canchij?

¹⁴ Tandanacuicunapi comentashunchij. Huaquin huauqui panicunapajca tandanacuicunapi comentanaca sinchimi cashca. Párrafo 11-pi parlashca pani Taliaca: “Shujtajcunapaj ñaupajpi comentashpaca achca manchaitami charini” ninmi. Pero chashna manchaita charishpapish paica comentashpami catin. Taliaca tandanacuicunapi comentangapajca allimi preparan. Paica parrafopaj callari comentariota cucushpaca respuestallata ashalla shimicunapi cungapajmi esforzarin. Paica: “Chashna ashalla shimicunapi comentanaca allimi can.  Tandanacuicunapi pushaj huauquicunaca chashna comentachunmi shuyan” ninmi.

15. ¿Comentagrishpaca imatataj yuyarina canchij?

¹⁵ Huaquin huauqui panicunaca manchaita mana charishpapish mana comentancunachu. Pani Julietca: “Ñuca comentariocunaca mana allichu can nishpami maipica mana comentasha nini” ninmi. ¿Canpish chashna sintirishcanguichu? Chashna sintirishpapish shungumanta comentashcata Jehová Dios valorashcatami yuyarina canchij. Jehová Diosca paita alabangapaj tucui pudishcata rurachunmi munan. c

16. ¿Shujtajcunahuan parlashpaca imata ama ningapajtaj cuidarina canchij?

¹⁶ Llaquichij shimicunahuan ama parlashunchij (Efesios 4:31). Diosta sirvijcunaca malas palabrascunataca mana ninachu canchij. Pero maipica mana yuyashcapimi ñucanchij shimicunahuan huauqui panicunata llaquichi tucunchijman. Por ejemplo, shujtaj razamanta, shujtaj culturamantaca mana allicunataca mana ninachu canchij. Ñucanchij shimicunahuan shujtajcunata ama mana alli sintichingapajpishmi cuidarina canchij. Shuj huauquica: “Maipica shujtajcunata asichingapajmi pugllashpa shujtajcunamanta mana alli parlashcani. Chaimi huaquincunaca mana alli sintirishcacuna. Ñuca huarmica paimanta, shujtajcunamanta mana chashna parlana cashcatami intindichishca. Chaimantami tiempohuanca chashna parlanata saquishcani” ninmi.

17. Efesios 4:29-pi nishca shinaca ¿ima shinataj shujtajcunata animai tucunchij?

¹⁷ Animaj shimicunahuan shujtajcunata cushichishunchij. Shujtajcunamanta quejarishpalla pasanapaj randica paicunatami felicitana canchij (Efesios 4:29-ta liyipai). Israelitacunaca minishtirishca cosascunata charishpapish quejarishpallami pasajcuna carca. Shuj cutinca 10 runacunalla quejarijpica, tucuicunami Moisesmantaca quejari callarircacuna (Números 13:31–14:4). Ñucanchijca paicuna shinaca mana casha ninchijchu. Ashtahuanpish shujtajcunata sinchiyachingapajmi paicunata felicitasha ninchij. Jeftepaj ushushipi yuyashunchij. Paica paipaj amigacuna paita animajpica cushillami Jehová Diosta sirvishpa catirca (Jueces 11:40). Párrafo 13-pi parlashca pani Saraca: “Shujtajcunata animashpaca Jehová Dios paicunata cꞌuyashcata, paicunapish Diospaj organizacionpi valishca cashcatami ricuchinchij” ninmi. Chaimanta shujtajcunata animangapaj esforzarishunchij.

18. a) Salmo 15:1, 2-pi nishca shinaca ¿imamantataj mana llullana canchij? b) ¿Verdadta ninaca imatataj nisha nin?

 ¹⁸ Ama llullashunchij. Jehová Diosca ñucanchijcuna llullachunca mana munanchu. Paica llullanataca pꞌiñanmi (Proverbios 6:16, 17). Gentecunaca maipica llullanllami. Mana cashpaca paicunaca mana tucuita verdadta huillashpami shujtajcunata umancuna. Pero ñucanchijca Jehová Dios yuyashca shina yuyashpami tucuipi verdadta nina canchij (Salmo 15:1, 2-ta liyipai).

19. ¿Imamantataj shujtajcunamanta mana allicunataca mana parlana canchij?

¹⁹ Shujtajcunamanta ama mana alli parlashunchij (Proverbios 25:23; 2 Tesalonicenses 3:11). Párrafo 15-pi parlashca pani Julietca: “Maijanpish shujtajcunamanta mana alli parlajpica ñucaca desanimarishpa, paipi confianatami saquini. Ñucamantapish mana alli parlacushcatami yuyani” ninmi. Pi shujtajcunamanta mana allicunata parlai callarijpica, shujtaj temamanta o animaj shimicunamantami parlana canchij (Colosenses 4:6). 

20. Salmo 19:14-pi nishca shinaca ¿imata rurangapajtaj listos cana canchij?

²⁰ Ima shinami yachashcanchij, parlanaca Dios cushca regalomi can. Paica animaj shimicunahuan parlachunmi munan. Pero cai mundopica casi la mayoría gentecunaca mana allicunallatami parlancuna. Cutin ñucanchijca predicacushpa, tandanacuipi cashpa, shujtajcunahuan parlashpaca Jehová Diosllatami ñucanchij animaj shimicunahuan jatunyachisha ninchij. Ñallami millai gentecuna mana tiyajpi Jehová Diosta ñucanchij nishcacunahuan alabanaca jahualla canga (Judas 15). Chaicamaca ñucanchij rimashcacuna Dios munashca shina cachun esforzarishpa catishunchij (Salmo 19:14).