Millai angelcunaca tiyanmi. Callaripica Diosmi angelcunata rurarca. Shinapish paicunallataj allita o mana allita agllachunmi rurarca. Adanta, Evata rurashca qꞌuipaca shuj jucha illaj angelmi mana allita ruranata agllarca. Chai angelca shujtajcunapish cai Allpapi pai laya cachunmi munarca. Chaimantami Adanpish Evapish Diosta ama cazuchun pandachirca (Génesis 3:1-7; Apocalipsis 12:9). Bibliapica chai ángel Diosta cazushpa jahua pachapi causacujpica imata ruraj cashcata, ima shuti cashcataca mana huillanchu. Pero Diosta mana cazushcamantami chai angeltaca Diablo Satanás nishpa shutichin. Diabloca “llullaj” nisha ninmi. Satanasca “jarcaj” nisha ninmi (Mateo 4:8-11).

Chai tiempomantami Diosta mana cazujcuna tiyai callarirca. Noepaj punllacunapica achca angelcunami jahua pachata saquishpa aichayuj, tulluyuj tucurcacuna. Paicunaca cai Allpaman shamushpami yallitaj millaita rurashpa, huainayashpa causarcacuna. Chashnami paicunaca Diospaj familia canata saquishpa Diospaj munaitapish ña mana rurarcacuna (Judas 6; Génesis 6:1-4; 1 Pedro 3:19, 20).

¿Chai millai angelcunahuanca imataj tucurca? Diosca cai Allpapi millaita tucuchingapajmi yacu juilluta cacharca. Chai millai angelcuna o supaicunaca aichayuj, tulluyuj cuerpota saquishpami cutin jahua pachaman tigrarcacuna. Shinapish Diosca ñaupa charishca puestocunata cutin japichunca mana saquircachu. Ashtahuanpish ‘huiñaita mana llujshipaj amsa prezupimi’ churarca. Bibliapica paicunaca Tartaropimi can ninmi (Judas 6; 2 Pedro 2:4, NM *). Supaicunaca Diablo paicunata mandachunmi saquishca. Chashnami Diabloca “supaicunata mandaj” tucushca. ‘Achij nicuj ángel shinapish tucushpa’ catin (Mateo 12:24; 2 Corintios 11:14).

Bibliapica Diosca jahua pachapi pai churashca mandanapi mandachunmi Jesusta agllashca ninmi. Chai mandanaca 1914 huatapimi callarirca. * Chai huatapimi Diablotapish, paita catij supaicunatapish cai Allpaman shitarca. Diabloca yallitaj pꞌiñarishca cashcamantami gentecunata pandachicun. Chaimantami gentecunaca yallitaj millaita rurashpa, huainayashpa causacujta ricunchij (Apocalipsis 12:9-12).

Ashtahuan millai ruraicuna miraricushcata ricushpami Diablotapish supaicunatapish Diosca ñalla tucuchigrishcata yachanchij. Paica ñallami cai Allpata shuj alhaja paraisota ruranga. Jesusmi huaranga huatacunata mandanga. Qꞌuipaca amsa prezupi caj supaicuna gentecunata asha tiempota pandachichunmi Diosca cacharichinga. Chai qꞌuipaca huiñaipajmi tucuchishca cangacuna (Mateo 25:41; Apocalipsis 20:1-3, 7-10).