Apocalipsis 4:2, 3-pica: ‘Jahua pachapica shuj jatun tiyarinata churashcata, chai jatun tiyarinapica shuj tiyacujtami ricurcani. Chaipica jaspe, puca rumicunaman rijchaj shinami Diosca tiyacurca. Chai tiyacunpaj jahuataca esmeralda rumiman rijchaj cuichimi carca’ ninmi.

Ezequiel 1:27, 28-pica: “Muyundijtami nina shina achij nicuj ricurirca. Ima shinami tamya punlla pˈuyu chaupipi cuichi ricurin, chai shinallatajmi chai achij nicujca ricurirca. Mandaj Diospaj sumaj cashcaman rijchajmi, muscuipi shina ricurirca” ninmi.

Apóstol Juanpish profeta Ezequielpish Jehová Dios shuj jatun tiyarinapi tiyacushcata, paipaj muyundijpipish shuj sumaj cuichi tiyashcatami muscuipi laya ricurcacuna. Paica sumaj achij nicuj rumicunaman rijchaj cashcatami ricurcacuna. Chashnami Jehová Diospish pai causacun ucupish sumaj cashcata, chaipica tranquilo, alli causai tiyashcatapish entendinchij.

Salmosta quillcaj runapish: “Mandaj Diosca jatunmari, tucuimanta yalli alabashca cana Diosmari. Tucui dioscunapaj jahuapi caj manchana Diosmari. Tucui shujtajcunapaj dioscunaca, maquihuan rurashca dioscunallamari. Ashtahuanpish Mandaj Diosca jahua pachata ruraj Diosmari. Paipaj ñaupajpica mandaj, sumaj achij nicujmi tiyan. Paipajlla huasipica tucuita rurai tucuj, achij nicujmi tiyan” nircami (Salmo 96:4-6).

Jehová Diosca tucuimanta yalli jatun Dios cashpapish paipajman cˈuchuyachunmi munan. Paica, ñucata mañaichij, ñucaca cancunata uyashami ninmi (Salmo 65:2). Jehová Diosca ñucanchijta cˈuyanmi, paica ñucanchijmanta sustarinmi. Chaimantami apóstol Juanca “Diosca cˈuyajmari” can nircami (1 Juan 4:8).

Jesusta catij ‘Estebanca jahua pachata huichilla ricushpaca jucha illaj espirituhuan junda cashcamantami Taita Diosca tucuita rurai tucuj sumaj cashcata, Jesuspish paipaj alli ladoman cajta ricushpa, cashna nirca: ¡Riquiyari! Jahua pacha pascarishcata, runa Aichayujpish Taita Diospaj alli ladopi cajtamari ricuni’ nircami (Hechos 7:55, 56).

Jesús huañushca qˈuipami Estebanca muscuipi laya Jesustaca ña jahua pachapi causarishpa, jatunyachishca cashcata ricurca. Chaimanta parlashpaca apóstol Pabloca: ‘Cristotaca huañushcacunapaj chaupimanta Jehová Dios causachishpami, jahua pacha paipaj alli ladoman tiyachishpa, chai poderyuj cashcataca ricuchirca. Poderyujcunapaj, mandanata charijcunapaj, poderhuan mandajcunapaj, tucui laya shutichishcacunapaj jahuapipishmi paica mandacun. Mana cunan punllacunallapichu, ashtahuanpish qˈuipa punllacunapipishmi mandanga’ nircami (Efesios 1:20, 21).

Bibliapica Jesús ña mandacushcatami huillan. Paica Jehová shinami ñucanchijtapish achcata cˈuyan ninmi. Jesús cai Allpapi cashpaca ungushcacunata alliyachirca, huañushcacunatapish causachircami. Shinallataj pai ñucanchijmanta huañushpami Jehová Diosta, ñucanchijtapish  achcata cˈuyashcata ricuchirca (Efesios 2:4, 5). Cunanca Jesusca Diospaj alli ladopimi can. Paica ñallami cazuj gentecunamanca achca bendicioncunata cunga.

Profeta Danielca: ‘Ñuca ricucujllapitajmi jatun tiyanacunata churarca. Chai tiyanapica, uni huatacunayuj Yuyajmi tiyarirca. Paica Jehová Diosmi carca. Paipajtaca huaranga huarangacunami ruracurca. Paipaj ñaupajpica yallitaj huaranga huarangacunami carca’ nishpami quillcarca (Daniel 7:9, 10).

Danielca muscuipi shina ricushpaca mana shujlla angeltachu ricurca, achca angelcunatami ricurca. Chaita ricunaca sumajmi cashca canga. Angelcunaca achca poderyuj, yuyaisapa, espíritu cuerpoyujmi can. Achca angelcunami tiyan. Paicunapuramantaca huaquincunaca serafincuna, shujtajcunaca querubincunami can. Bibliapica 250 yalli cutinmi angelcunamanta parlan.

Huaquin gentecunaca huañushcacunami angelcuna tucun nincunami. Pero chaica mana ciertochu can. Manaraj gentecuna tiyajpimi Diosca angelcunataca ña rurarca. Jehová Dios Allpata rurajpica angelcunaca achcatami cushicurcacuna (Job 38:4-7).

Angelcunaca Diospajta rurashpami ayudancuna. Cunan punllacunapica paicunaca alli huillaicunata huillachunmi ayudan (Mateo 24:14). Angelcuna alli huillaicunata huillangapaj ayudacushcataca apóstol Juan muscuipi shina ricushcamantami yachanchij. Apóstol Juanca: “Chai qˈuipaca, chaupi cielota shujtaj ángel volacujtami ricurcani. Paica allpapi causajcunamanca, tucui llajtacunaman, chˈican chˈican aillucunaman, chˈican chˈican rimaicunaman, tucui pueblocunamanpish huiñaipaj alli huillaita huillanapaj charicujtami ricurcani” nircami (Apocalipsis 14:6). Angelcunaca ñaupa tiempopi shinaca ña mana gentecunahuan parlancunachu. Pero paicunaca alli shunguta charij gentecunata tarichunmi Jehová Diosmanta huillajcunata ayudancuna.

Apocalipsis 12:7-9-pica: ‘Chai qˈuipaca, cielopica jatun macanacuimi tiyarca: Miguelmi (Jesús), paipaj angelcunandij, dragonhuan macanacucurca. Dragonpish, paipaj angelcunandijmi  macanacucurca. Macanacushpapish dragonca mana mishai tucurcachu. Chaimanta paicunaca cielopica, ña mana ashtahuan chayai tucurcachu. Chashnami chai jatun dragontaca, cielomantaca ña shitarca. Paica ñaupa rucu culebrami. Paica Diablo, Satanás shutipishmi. Paica, Allpa pachapi causajcunata umajmi. Paitami tucui paipaj millai angelcunandij allpa pachaman shitarca’ ninmi.

Jahua pachapica tranquilo causaica mana siempre tiyarcachu. Yaya Dios gentecunata rurashca qˈuipallami shuj angelca paita adorachun nishpa Diospaj contra tucurca. Chai angelca Satanasmi can. Satanás shutica “jarcaj” nisha ninmi. Qˈuipa huatacunapica shujtaj angelcunapishmi Satanaspaj lado tucurcacuna. Paicunataca supaicuna nishpami rijsinchij. Satanaspish paita catij millai supaicunapish Diostaca manataj cazusha nincunachu, achca gentecunatapish Diosmantami caruyachishcacuna.

Satanaspish supaicunapish millaicunami can. Paicunaca gentecunata pˈiñashcamantami llaquichishpa cushicuncuna. Cai Allpapi llaquicuna tiyashcamantaca paicunami culpata charincuna. Por ejemplo Satanasca Jobpaj animalcunata, paipaj servijcunatami huañuchirca. Qˈuipaca jatun acapanata cachashpami Jobpaj 10 huahuacunata huañuchirca. Ashtahuanpish Jobtaca chaqui plantamanta uma coronacamami shuj millai ungüihuan llaquichirca (Job 1:7-19; 2:7).

Diosca ñallami Diablota tucuchinga. Paica ashalla punllacunata causana cashcataca allimi yachan (Apocalipsis12:12). Caita yachashpaca ¿manachu cushilla sintirinchij?

Apocalipsis 5:9, 10-pica Jesusmanta parlashpami: “Tucui aillucunata, chˈican chˈican rimaicunata, pueblocunata, tucui llajtacunatapishmi cambaj yahuarhuan cutinllataj Diospajlla cachun randircangui. Chashnami ñucanchij Dios mandana llajta cachun, paipajta ruraj curacuna cachun ñucanchijtaca rurashcangui. Chaimantami cai pachataca mandashun nishpami cantarcacuna” ninmi.

Jesucristo shinami huaquin gentecunapish jahua pachapi causangapaj causaringacuna. Jesusca paita catijcunataca: ‘Cunanca cancuna causanata allichingapajmi rigrini. Qˈuipaca cancunapish ñuca maipimi cani, chaipimi cancunapish ñucahuan canguichij’ nircami (Juan 14:2, 3).

Jahua pachapi causarijcunaca Jesushuanmi jahua pachamanta cai Allpata mandangacuna. Shinallataj paicunami achca bendicioncunata cai Allpapi causajcunaman cungacuna. Chaimantami Jesusca paipaj catijcunaman ima shina mañanata yachachishpaca: “Jahua pachapi caj ñucanchij Yaya, cantaca jucha illaj cashcamanta tucuicuna alli nichun. Can mandana punlla shamuchun. Jahua pachapi shinallataj, cai pachapipish can munashca rurarichun” nircami (Mateo 6:9, 10, El Nuevo Testamento Quichua, Nueva Versión Internacional, 1999).

Apóstol Juanca: “Cielomanta cashna nishpa sinchita caparijtami uyarcani: Diospaj carpa huasica cunanca tucui gentecunahuanmi. Diosca paicunapaj ñahuicunamantaca, tucui huiquitami pˈichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” nircami (Apocalipsis 21:3, 4).

Juan muscuipi laya ricushcaca shamuj punllacunapi ima tucuna cashcatami ricuchin. Chaipica Jesuspish, jahua pachapi causagrijcunapish Satanasta mishashpami cai Allpata shuj paraisota ruragrishcata Juanca ricurca. Juan ricushcacuna pajtarijpica tucui llaquicunami tucuringa.

Mana tucui causarishca gentecunachu jahua pachaman ringacuna. Ashtahuanpish achca millón gentecunami cai Allpapi cushilla, sumajta causangapaj cutin causaringacuna (Lucas 23:43).