MANARAJ 1914 huata chayajpica, tauca huatacunatami Bibliamanta yachacuj ashalla gentecunaca, 1914 huatapi jatun ruraicuna pajtarina cashcata huillacurcacuna. ¿Imataj carca? ¿Chai huataca imamantataj shuyacushca huata carca?

Lucas 21:24-pica Jesusca: “Jerusalenca mana israelcuna sarushcami canga. Paicuna sarushca cana punlla pajtangacamami, mana israelcuna mandanga” nircami. Jerusalenmi judiocunapaj capital carca. Chaipica rey Davidpaj huahua huahuacunami mandaj carca  (Salmo 48:1, 2). Jerusalenpi mandajcunaca mana shujtaj llajtata mandaj reycuna shinachu carca. Jerusalenpica ‘Mandaj Dios cushca mandanapimi tiyarijcuna’ carca. Jehová Dios agllashca mandacujcunami carca (1 Crónicas 29:23). Jerusalenca Jehová Dios mandacushcatami ricuchirca.

Shinashpaca, ¿ima horas, ima shinataj mana israelcunaca Diospaj Mandanata saruj shina llaquichi callarirca? Jesús manaraj shamujpi 607 huatapi babiloniocuna Jerusalenta llaquichijpimi chaica pajtarca. ‘Mandaj Dios cushca mandanapica’ pi mana mandacujpimi Davidpaj huahua huahuacunaca mandanata saquircacuna (2 Reyes 25:1-26). ¿Jerusalenca huiñaipajchu ‘sarushca’ o llaquichishca saquirina carca? Mana. Ezequiel libropica Jerusalenta mandaj último rey Sedequiasmanca: ‘Turbantetapish, coronatapish surcui. Mandanata japinapaj shamuna tiyacuj shamungacamallami chashna llaquicunaca tiyanga. Tucuitami paipaj maquipi churasha’ nishpami mandarca (Ezequiel 21:26, 27). Davidpaj ‘mandanata japinaman shamujca’ Jesusmi can (Lucas 1:32, 33). Shinashpaca, Jesús  Rey shina mandai callarijpimi, Jerusalenca ‘sarushca’ o llaquichishca canata saquirca.

¿Jesusca ima horastaj mandai callarina carca? Jesusca mana israelcunaca asha tiempota mandana cashcatami huillarca. Daniel capítulo 4-pimi chai tiempo mashna cashcata ricui tucunchij. Chai capitulopica Babiloniata mandaj rey Nabucodonosorpaj shuj muscuitami parlan. Nabucodonosorca shuj jatun yurata urmachicujtami muscurca. Cuchushca qˈuipaca tronco ama huiñachunca fierro cadenacunahuan, bronce cadenacunahuan “canchis huatacama” huatashca saquirijtami muscurca (Daniel 4:10-16).

Bibliapica llajtata mandajcunataca huaquinpica yuracunahuanmi chˈimbapuran (Ezequiel 17:22-24; 31:2-5). Shinashpaca cuchushca yuraca Diospaj mandanaca asha tiempota cuchushca shina saquirina cashcatami ricuchirca. Diospaj mandanapica Dios agllashca reycunami Jerusalenpi mandaj carca. Shinapish Jerusalenca ‘canchis huatacamami sarushca’ o llaquichishca saquirina carca. ¿Canchis huatacunaca mashna tiempotaj cana carca?

Apocalipsis 12:6, 14-pica ‘quimsa huata chaupitaca, 1.260 punllacuna’ ninmi. Shinashpaca Bibliapi ‘canchis huatacuna’ nishpaca, 2.520 punllacuna cashcatami ricuchin. Shinapish mana israelcunaca Jerusalentaca mana 2.520 punllacunallatachu llaquichirca. Cai profeciaca ashtahuan tiempo cashcatami entendichin. Números 14:34, Ezequiel 4:6 yachachishcata catishpaca: ‘cada punlla shuj huata’ cashcatami entendinchij. Shinashpaca, ‘canchis huatacunaca’ 2.520 huatacunami can.

2.520 huatacunaca babiloniocuna Jerusalenta llaquichishpa Davidpaj huahua huahuacuna mandanata anchuchijpimi callarirca. Chaica Jesús manaraj huacharijpi octubre 607 huatapi callarishpami octubre 1914 huatapi tucurirca. Chai huatapimi ‘mana israelcuna mandana’ tucurijpi Jehová Diosca Rey shina paipaj mandanapi mandachun Jesusta churarca (Salmo 2:1-6; Daniel 7:13, 14). *

 Jesús jahua pachapi Rey shina mandai callarijpica, cai pachapica macanacuicuna, achca yaricaicuna, allpa chujchuicuna, millai ungüicunami tiyanga nishpami Jesusca yachachirca (Lucas 21:11). Cai shimicuna pajtaricujta ricushpami, 1914 huatapi Jesús jahua pachapi mandai callarishcata, chai huatamanta tucuri punllacunapi causacushcatapish entendinchij (2 Timoteo 3:1-5).