Siriapaj rey Ben-Hadadca achca cutinmi israelitacunata llaquichisha nirca. Pero profeta Eliseoca Israelpaj rey miticuchunmi siempre huillaj carca. Chaimantami Ben-Hadadca Eliseota japisha nirca. Dotán llajtapi cashcata yachaj chayashpami paipaj soldadocunataca: ‘Chai runata japimugrichij’ nirca.

Sirio soldadocunaca tutami Dotanman chayarcacuna. Cayandij punllaca Eliseota sirvij runa llujshishpaca chai pueblo muyundijpi achca soldadocunatami ricurca. Chaimi achcata mancharishpa Eliseotaca: “¿Imatataj rurashunyari?” nishpa caparirca. Eliseoca: ‘Ñucanchijhuan cajcunamari paicunata ashtahuan yalli’ nircami. Chai ratomi Jehová Diosca Eliseota sirvij runamanca urcucunapi ninahuan yallitaj caballocunatapish, macanacuna carretacunatapish muyundijpi cashcata ricuchirca.

Siriocuna llaquichisha nishcamantami Eliseoca: “Cai gentecunataca ñahui mana ricujta rurapai” nishpa Diosta mañarca. Chaimi soldadocunaca ricucushpapish ñapish maipi cashcataca mana yacharcacuna. Eliseoca: ‘Cai puebloca mana cancuna mashcacushca pueblochu can. Ñucami cancuna mashcacushca runapajman pushasha’ nircami.  Paicunaca Samariaman chayangacamami Eliseota catishpa rircacuna. Chaipimi Israelpaj reyca causarca.

Siriocunaca maipi cashcatami qꞌuipaca cuentata curcacuna. Pero mana imata rurai tucurcacunachu. Israelpaj reyca Eliseotaca: ‘¿Paicunataca huañuchishachu?’ nircami. ¿Eliseota llaquichisha nij siriocunataca huañuchichun saquircachu? Mana. Chaipaj randica reytaca: ‘Ama huañuchichu. Ashtahuanpish micunata carashpa cachailla’ nircami. Chaimi reyca jatun micuita rurashpa paicunaman carashpa cacharcalla.