Goliatta huañuchishca qꞌuipaca Saulca paipaj soldadocunata mandachunmi Davidta churarca. Davidca achca macanacuicunata ganashcamantami rijsishca runa tucurca. Cada macanacuimanta tigramujpimi huarmicunaca: “Saulca mil gentecunatami huañuchishca, cutin Davidca diez mil gentecunatami huañuchishca” nishpa, cantashpa, bailashpa tupajcuna carca. Chaita nijta uyashpami Saulca Davidta envidiai callarishpa huañuchisha nirca.

Davidca arpataca allimi tocaj carca. Shuj punllaca Saúl uyachunmi arpata tocacurca. Chaipimi Saulca shuj lanzata Davidpajman shitarca. David utca cumurijpimi chai lanzaca pata quinripi clavarirca. Chai qꞌuipapish achca cutinmi Saulca Davidta huañuchisha nirca. Chaimantami Davidca shitashca pambacunapi miticunaman rirca.

Chaimi Saulca paipaj 3.000 soldadocunandij Davidta mashcanaman rirca. Mashcacushpaca  David paipaj runacunahuan miticushca jutcullamantajmi Saulca yaicurca. Chaipimi Davidhuan caj runacunaca allijlla paitaca: ‘Cunanmi Saulta huañuchi tucungui’ nircacuna. Davidca Saulpajman cꞌuchuyashpaca pi mana ricucujpimi paipaj jahua churana ashata pꞌitirca. Qꞌuipaca Davidca Jehová Dios agllashca reyta mana respetashcamantami achcata llaquirirca. Chaimi paipaj runacuna Saulta llaquichichunca mana saquirca. Saúl jutcumanta llujshijpica Davidca sinchita caparishpami: ‘Cantaca huañuchi tucushpapish mana huañuchircanichu’ nirca. ¿Saulca Davidta llaquichishpachu catishcanga?

Ari. Saulca ashtahuanmi Davidta llaquichishpa catirca. Shuj tutami Davidca paipaj sobrino Abisaindij pi mana ricucujpi Saulpaj carpa huasicunaman yaicurcacuna. Chaipimi Saulta cuidaj Abnerpish dormicurca. Chaita ricushpami Abisaica Davidtaca: ‘Cunanmari Saultaca huañuchi tucunchij. Huañuchichun saqui’ nirca. Pero Davidca: ‘Jehovami paitaca ricunga. Paipaj lanzata, paipaj yacu jarratapish apashpa jaculla’ nircami.

Qꞌuipaca Saulpaj carpa huasicuna cꞌuchulla urcumanmi Davidca huichiyarca. Chai jahuamantami paica: ‘¡Abner! ¿Imamantataj cambaj reytaca mana alli cuidashcanguiyari? ¿Paipaj lanzapish, jarra yacupish maipitaj canyari?’ nishpa caparirca. Saulca David caparicushcata uyashpami: ‘Ñucata huañuchi tucushpapish mana huañuchishcanguichu. Can israelitacunata catij rey cashcatami cunanca yachani’ nirca. Qꞌuipaca Saulca paipaj huasimanmi tigrarca. Shinapish Saulpaj mana tucui familiacunachu Davidta pꞌiñarca.