Jehová Diosca israelitacunata pushachunca juezcunatami churarca. Pero paicunaca shuj mandajta charisha nishpami Samueltaca, ‘shujtaj llajtacuna shinami ñucanchijpish shuj mandajta charisha ninchij’ nircacuna. Chaica Samuelpajca mana alli ricurircachu. Chaimantami Diosta mañarca. Diosca, ‘mana cantachu pꞌiñancuna, ñucatami pꞌiñancuna. Shuj mandajtaca cushami. Pero chai mandajca achca cosascunatami mañanga ningui’ nircami. Chashna nijpipish gentecunaca, ‘mana uyashpami, shuj mandajca tiyanatajmi can’ nircacuna.

Chaimantami Jehová Diosca Samueltaca, ‘Saúl shuti runami punta mandajca canga’ nirca. Saulca Ramá llajtapimi Samuelta visitarca. Chaipimi Samuelca paipaj umapi aceitehuan churashpa mandaj cachun agllashcata ricuchirca.

Qꞌuipaca Samuelca mushuj mandajta ricuchingapajmi israelitacunata tandachirca. Pero Saulca ni maipi mana ricurircachu. ¿Imamantashi? Paica jatun quipicuna huashapimi miticushca carca. Paita mashcashpa ña japishpaca israelitacunapaj chaupipimi shayachirca. Paica tucuicunamanta ashtahuan jatun, sumajmi carca. Chaipimi Samuelca, ‘Mandaj Dios agllashca mandajta ricuichij’ nirca. Chaimi gentecunaca achcata cushicushpami, ¡ñucanchij mandajmari! nishpa caparircacuna.

Callaripica Saulca Diostapish Samueltapish tucuipimi cazurca. Pero qꞌuipaca ña mana cazurcachu. Mandajcunaca sacrificiocunata mana rupachinachu carca. Shuj punllaca Samuelca Diosman sacrificiocunata cungapaj shuyangui nircami. Samuel mana utca shamujpimi Saulca paillataj sacrificiota rupachirca. ¿Samuelca imatataj nirca? ‘Jehová Diostami cazuna carcangui’ nirca. ¿Saulca Diosta tucuipi cazuna cashcataca intindishcachu canga?

Qꞌuipaca Saulca amalequitacunahuanmi macanacunaman rirca. Samuelca tucuita huañuchingui nircami. Saulca mandaj Agagtaca mana huañuchircachu. Chaimi Jehová Diosca Samueltaca, ‘Saulca ñucamanta caruyashcami, ña mana cazunchu’ nircami. Samuelca  achcata llaquirishpami Saultaca, ‘Mandaj Diosca shujtaj mandajtami agllagrin. Canca ña mana paita cazunguichu’ nircami. Samuel tigraricujpica paipaj churana puntapimi Saulca japirirca. Chaimi chai churanaca lliquirirca. Chaimantami Samuelca, ‘chashnami Jehová Diosca mandaj canamanta cantaca pꞌitinga’ nirca. Chaica Israel llajtata shujtaj mandaj tiyana cashcatami ricuchirca. Chai mandajca Diosta cꞌuyaj, cazuj runami cana carca.