Israelitacunaca cutinmi Diosta cungarishpa yanga dioscunata adorai callarircacuna. Amonitacuna llaquichijpica yanga dioscunaca mana cuidarcachu. Achca huatacunata llaquicunahuan causacushpami Diostaca, ‘juchallishcanchijmi. Ñucanchijta pꞌiñajcunamanta quishpichihuai’ nircacuna. Israelitacunaca yanga dioscunata ñutushpami cutin Jehovata adorarcacuna. Chaimantami Diosca paicunata llaquichishpa catichunca mana saquirca.

Israelitacunaca alli macanacuj Jefté runatami agllarca. Paimi amonitacunahuan macanacungapajca pushaj cana carca. Jefteca Jehová Diostaca, ‘amonitacunata mishachun ayudajpica ñucata tupanaman ñuca huasimanta punta llujshijtaca canmanmi cusha’ nircami. Jehová Diosca Jefté mañashcata uyashpami macanacuita mishachun ayudarca.

 Jefté huasiman tigramujpica punta llujshimujca paipaj shujlla ushushimi carca. Panderetata tocashpa bailashpami tuparca. ¿Jefteca imatashi rurarca? Pai nishcata yuyarishpami, ‘¡aij ñuca huahualla! Ñuca shunguca pꞌaquirinmari. Mandaj Diosman nishcataca maitataj pꞌaquishari. Siló llajtapi Diospaj carpa huasipi Diosta sirvichunmi cantaca cachana cani’ nirca. Paipaj ushushica, ‘ñuca yayitulla. Diosman imata cusha nishcataca pajtachilla. Ñuca amigacunahuan urcucunapi purigringapaj ishqui quillata cachahuai. Qꞌuipaca rishallami’ nircami. Jeftepaj ushushica Diospaj carpa huasipimi paipaj tucui causaipi Diosta tucui shunguhuan sirvirca. Paipaj amigacunaca cada huatami Silopi visitanaman rijcuna carca.