Israelitacunaca cutinmi Jehová Diosta saquishpa yanga dioscunata adorai callarircacuna. Siete huatacunatami madianitacunaca israelitacunapaj animalcunata shuhuashpa, cosechacunata dañashpa llaquichircacuna. Chaimantami israelitacunaca urcucunapi, jutcucunapi miticurcacuna. Chaipimi Diostaca quishpichihuai nishpa mañarcacuna. Cutin Diosca shuj angeltami Gedeonpajman cacharca. Chai angelca: ‘Jehová Diosca cantaca sinchi macanacuj cachunmi agllashca’ nircami. Gedeonca: ‘¿Ima shinataj israelitacunataca quishpichishayari? Ñucaca imapajpish mana valijmari cani’ nircami.

Gedeonca Dios paita agllashcatami yachasha nirca. Chaipajca asha millmata japishpami pambapi churarca. Qꞌuipaca Jehová Diostaca: ‘Caya tutamantapaj shulla urmashpa cai millmata shutuchishca cajpi, cutin pamba chaquishca pacarijpica israelitacunata quishpichichun canllataj ñucata agllashcatami yachasha’ nircami. Cayandij punllapaj chai millmaca shutushcami carca. Cutin pambaca chaquishcami pacarirca. Gedeonca Diostaca caishuj punllapish millmaca chaquishca pacarichun cutin pambaca shutushca cachunmi mañarca. Pai mañashcaca shinami tucurca. Chaimi Gedeonca Dios paita agllashcata crirca. Chaimantami madianitacunahuan macanacungapaj soldadocunata tandachirca.

 Diosca Gedeontaca: ‘“Israelitacuna ganachunca ayudashami. Pero paicuna achca soldadocuna cashcamanta, paicunapaj fuerzashuan macanacuita ganashcata ama yuyachunca manchaj soldadocunata huasiman tigraichijlla” ni’ nircami. Chaimi 22.000 soldadocuna tigrashpa rircacuna. Cutin 10.000 soldadocunaca saquirircacunami. Qꞌuipaca Jehová Diosca: ‘Achcacunarajmi. Cunanca yacuman pushai. Chaipica yacuta maquihuan ubyacushpa contracunata chapajcunallahuan saquiri’ nircami. 300 soldadocunallami chapayuj yacuta ubyarcacuna. Diosca chai ashalla runacunami 135.000 madianita soldadocunataca ganangacuna nircami.

Chai tutallatajmi Jehová Diosca Gedeontaca madianitacunahuan macanacuna horasmi chayashca nirca. Chaimi Gedeonca trompetacunata, puñu ucupi ninata japichishca mechacunatapish runacunaman cushpaca: ‘Ñuca shinallataj ruranguichij’ nirca. Gedeonca trompetapi tocashpami puñuta pꞌaquirca. Chashnallataj ninata japichishca mechacunata caiman chaiman cuyuchishpami: ‘¡Jehová Diospaj, Gedeonpaj espadami!’ nishpa caparirca. 300 runacunaca Gedeón shinami rurarcacuna. Chaimi madianitacunaca yallitaj mancharishpa musparishpa tucui ladocunata callparcacuna. Shinallataj paicunapurapishmi macanacui callarircacuna. Chashnami Diosca cutinllataj contracunata ganachun israelitacunata ayudarca.