Israelitacunaca casi 40 huatacunatami chaquishca pambapi causarcacuna. Paicunaca achca jatun llajtacunatami ña dueñoyashca carca. Cunanca río Jordán ladopi saquirij Moab llajta pugrupimi causacurcacuna. Dios cusha nishca Allpaman yaicungapajca ashallami faltarca. Moabta mandaj Balacca paipaj llajtata israelitacuna quichunatami mancharca. Chaimantami Balaam runataca Moabman rishpa israelitacunata maldicichun cacharca.

Pero Jehová Diosca Balaamtaca: ‘Israelitacunataca ama maldicichu’ nircami. Chaimantami paica Moabman mana risha nirca. Chaimi mandaj Balacca cutin: ‘Can shamujpica imata mañashcatami cusha’ nirca. Chashna nijpipish Balaamca mana risha nircachu. Chaipimi Diosca Balaamtaca: “Rilla. Pero ñuca imata nishcallatami nina cangui” nirca.

Jehová Dios israelitacunataca ama maldicichun nijpipish Balaamca paipaj burrapi tiyarishpami Moab llajtaman maldicina yuyaihuan rirca. Chaipimi Diospaj angelca Balaam ricuj ñanpi quimsa cutin ricurirca. Balaamca chai angeltaca mana ricurcachu. Pero paipaj burraca ricurcami. Chaimantami ñanmanta llujshishpa burraca chagra chaupita rirca. Qꞌuipaca pata cꞌuchuta rishpami Balaampaj chaquita llapirca. Qꞌuipacarin chaupi ñanpimi siririrca. Chaimi Balaamca quimsa cutin burrataca caspihuan macarca.

Chai qꞌuipami Diosca burrataca rimachirca. Chaimi Balaampaj burraca: ‘¿Imamantataj ñucata macangui?’ nirca. Shina nijpimi Balaamca: “Canca muspa runata shinami ñucataca chanzata rurashcangui. ¡Shuj espadata charicushpaca cantaca huañuchimanmi!” nirca. Chaimi burraca: ‘¿Manachu cambaj tucui causaipi can tiyarina burra cashcani? ¿Cantaca ima hora chashna tratashcanichu?’ nirca.

Diosca Balaamtaca angelta ricuchunmi saquirca. Angelca: ‘Israelitacunata maldicichunca Diosca mana mandarcachu’ nircami. Chaimi Balaamca: ‘Juchatami rurashcani. Huasiman tigrashalla’ nirca.  Shinapish angelca: ‘Moabman rilla. Pero Dios nishcallatami ni tucungui’ nircami.

Balaamca ángel nishcataca mana uyasha nircachu. Israelitacunataca quimsa cutinmi maldicisha nirca. Pero Jehová Diosca maldicichun saquinapaj randica bendicioncunata nichunmi rimachirca. Qꞌuipaca israelitacunaca Moab llajtahuanmi macanacurcacuna. Chaipimi Balaamca huañurca. Pai callarimanta Diosta cazushca cashpaca allimi canman carca.