Apóstol Juanca Patmos islapimi prezu carca. Chaipimi Jesusca 16 cutin imalla tucunata muscuicunapi shina ricuchirca. Chai muscuicunapica Diospaj shuti ima shina alli nishca canata, Jesús mandai callarinapaj imata ruranatami Juanca ricurca. Shinallataj cielopi shina cai allpapipish Diospaj munai ima shina pajtarinatapishmi ricurca.

Shuj muscuipica jatun tiyarinapi Jehová tiyacujtami Juanca ricurca. Paipaj muyundijpica 24 ancianocunami tiyacurcacuna. Paicunaca yuraj churanacunata churashca, oro coronacunata churashcami carca. Chai jatun tiyarinamantaca rayocunami llujshirca. Cꞌulun nishcacunapishmi uyarirca. Chai 24 ancianocunaca Jehovapaj ñaupajpi cungurishpami adorarcacuna. Qꞌuipaca achca gentecuna tucui pueblocunamanta, tucui laya rimaicunamanta Jehovata adoracujtami ricurca. Oveja o Jesusca paicunata michij cashcamantami causaita cuj yacuman pusharca. Chai qꞌuipaca 24 ancianocunahuan Jesús mandai callarijtami ricurca. Chai huashaca Jesusca Dragonhuan demoniocunahuanmi macanacurca. Jesusca  paicunata cielomanta cai allpaman shitashcatami Juanca ricurca. Chai Dragonca Diablomi can.

Qꞌuipaca Sión urcupi Ovejapish 144.000 agllashcacunapish shayacujtami Juanca ricurca. Shinallataj shuj ángel muyundij allpata volashpa, ‘Diosta manchaichij, jatunmari cangui nichij’ nijtami ricurca.

Chai qꞌuipaca Armagedón nishca macanacuitami ricurca. Chaipica Jesusca paipaj soldadocunandijmi Diablopaj ruraicunata tucuchirca. Tucuri muscuipica cielopipish allpapipish sumajta causacushcata, Diablopish paita catijcunapish chꞌingarishcatami ricurca. Shinallataj tucuicuna Diospaj shutita alli nishpa paillata adoracushcatapishmi ricurca.