Pascuata yuyarishca qꞌuipaca Jesuspish, paita catijcunapish Galileamanmi tigramucurcacuna. Samariapi caj Sicar pueblo cꞌuchullata pasacushpaca Jacobpaj pozo ladopimi shayarircacuna. Chaipimi Jesusca samarishpa saquirirca. Cutin paita catijcunaca micunata randinamanmi rircacuna.

Chai pozomanca Samariamanta huarmimi yacuta llujshichinaman chayarca. Paitami Jesusca: ‘Yacuta cuhuai’ nirca. Chaimi huarmica: ‘¿Ima nishpataj ñucahuan parlanguiyari? Judiocunaca Samaria gentecunahuanca mana apanacunchu’ nircami. Jesusca: ‘Ñuca pi cashcata yachashpaca, canmari yacuta cuhuai ninguiman. Ñucaca causaita cuj yacutami cusha’ nircami. Huarmica: ‘Yacuta imahuan llujshichinatapish mana charinguica’ nijpimi Jesusca: ‘Ñuca cushca yacuta ubyajca, manataj yacunachingachu’ nirca. Chaimi huarmica: ‘Shinashpaca chai yacuta ñucaman cuhuai’ nirca.

Qꞌuipaca Jesusca: ‘Cambaj cusata cayamugri’ nircami. Paica: ‘Mana cusayuj canica’ nircami. Chashna nijpimi Jesusca: ‘Canca pichca cusacunatami charishcangui. Cunan canhuan causacujca mana cambaj cusachu. Mana llullashcanguichu’ nirca. Cutin chai huarmica: ‘Canca profetami yuyachingui. Ñuca pueblopi causajcunaca: “Cai urcupimi Diosta adorana canchij” nincunami. Pero judiocunaca: “Jerusalenllapimi Diosta adorana canchij” ninguichijmi. Mesías shamushpami Diosta ima shina adorana cashcata tucuita huillanga’ nircami. Chaimi pimanpish mana huillashcata Jesusca: ‘Ñucami Mesías cani’ nirca.

Jesús chashna nijpimi chai huarmica paipaj llajtaman callpashpa rirca. Chayashpaca  samaritanocunamanca: ‘Jacuchij, ñucaca Mesiasta tarishcatami yuyani. Paica tucui ñuca causaitami yachan’ nircami. Chaimi paicunaca Jesús yachachishcacunata uyanaman rircacuna.

Samaritanocunaca Jesustaca paicunahuan saquirichunmi mañarcacuna. Chaipi ishqui punllata yachachishpa saquirijpimi achcacunaca Jesuspi crircacuna. Paicunaca samaritana huarmitaca: ‘Cai runata uyashpaca pai cai pachata quishpichij cashcatami cunantajca crinchij’ nircacunami.