Fariseocunaca shujtajcuna ricuchunllami allicunata rurajcuna carca. Paicunaca gentecuna uyachunllami rezocunata de memoria yachashpa callecunapi, sinagogacunapi unita shayarishpa repitijcuna carca. Pero Jesusca: ‘Fariseocuna shinaca ama mañanguichu. Paicuna chashna mañajpica Diosca mana uyanchu. Shujtajcuna ricuchunllaca mana mañanachu cangui. Ashtahuanpish Dioshuan parlacushcata yuyashpami mañana cangui. Chaimanta cutin cutin ama chaillatataj mañanguichu. Diosca can ima shina sintirishcata shungumanta huillachunmi munan’ nircami.

Jesusca: ‘Jahua pachapi caj ñucanchij Yaya, cambaj shutitaca alli nishca cachun. Cambaj Gobierno ña chayamuchun. Jahua pachapipish,  cai pachapipish can munashcata rurachun’ nishpami mañarca. Qꞌuipaca: ‘Cada punlla micunata cuhuai, juchacunatapish perdonahuai, imalla minishtishcacunatapish cuhuai nishpami mañana cangui’ nircami.

Jesusca: ‘Yaya Diosta mañanataca amataj saquinguichu. Allicunata mañashpa catingui. Yaya mamacunaca huahuacunamanca allicunatami cusha nincuna. Chaimanta, cambaj huahua tandata mañajpica mana rumita cunguimanchu. Pescadota mañajpipish mana culebrata cunguimanchu’ nircami.

Ashtahuan intindichingapajmi Jesusca: ‘Cambaj huahuamanca imatapish allitamari cunguichij. ¿Manachu cambaj Yayacarin espíritu santota mañajpica cungalla? Chaimanta Diostaca mañanallami cangui’ nishpa intindichirca. ¿Canca imacunatataj mañangui? ¿Jesús yachachishca shinachu Diosta mañangui?