1, 2. a) ¿Diosta mañanaca imamantataj shuj sumaj bendición can? b) ¿Dios munashca shina mañangapajca imamantataj Bibliapi yachana canchij?

JAHUA pacha lucerocunahuan cai pachahuan chꞌimbapurajpica cai pachaca uchilla ñutu allpa shinallami can. Diospaj ñaupajpica gentecunapish baldemanta shutushca yacu shinallami can (Salmo 115:15; Isaías 40:15). Shina cajpipish Bibliapica: “Mandaj Diosca, tucui paita mañajcunapajca cꞌuchullapimi. Tucui shunguhuan paita mañajcunapajca cꞌuchullapimi. Paita manchajcuna imata yuyarishcataca pajtachingami. Paicuna mañashcata uyangami. Paicunataca quishpichingami” ninmi (Salmo 145:18, 19). Ñucanchijca tucuita rurai tucuj Jehová Dioshuanmi alli amigo cai tucunchij. Shinallataj paica ñucanchij mañashcacunata uyanatami munan. Chaimantami Diosta mañanaca shuj sumaj bendición can.

² Ñucanchij mañashcacunata Dios uyachunca pai munashca shinami mañana canchij. Chaipajca Diosta ima shina mañana cashcatami Bibliapi ricushun.

3. ¿Diostaca imamantataj mañana canchij?

³ Jehová Diosca paita mañachun, paihuan parlachunmi munan. ¿Ima shinataj chaita yachanchij? Filipenses 4:6 y 7-ta liyishpami, Diosca paita mañachun canta invitacushcata intindingui. Paica can ima shina sintirishcata, cambaj problemacunata paiman parlachunmi munan.

4. ¿Diostaca imamantataj cutin cutin mañana canchij?

 ⁴ Por ejemplo, shuj amigohuan, ima shina sintirishcata, imata yuyashcata, imamanta preocuparishcata parlanacushpaca ishquindijmi alli amigos tucunchij. Chashnallatajmi Diosta cutin cutin mañashpaca paihuan alli amigo tucushun. Yaya Diospish pai ima shina sintirishcata, imata yuyashcata, shamuj punllapi imata ruragrishcataca Bibliapimi huillashca. Diosta mañacushpaca tucui can ima shina sintirishcatami paiman huillai tucungui (Santiago 4:8).

5. ¿Diosca imamantataj mana tucui mañashcacunata uyan?

⁵ Jehová Diosca mana tucui mañashcacunatachu uyan. Paica israelitacunataca: ‘Cancunapaj maquicunaca yahuarhuan jundamari. Cancuna achcata mañacujpipish, manataj uyanichu’ nircami (Isaías 1:15). Ñucanchijcuna imapipish mana cuidadota charishpaca mana allicunatami rurai tucunchij. Chashna  rurajpica Yayitu Diosca ñucanchij mañashcacunataca manataj uyangachu.

6. a) ¿Imamantataj Diospi tucui shunguhuan crina canchij? b) ¿Diospi crishcata ricuchingapajca imatataj rurana canchij?

⁶ Ñucanchij mañashcacunata Dios uyachunca paipimi tucui shunguhuan crina canchij (Marcos 11:24). Apóstol Pabloca: “Mana crishpaca, Dios munashcataca ima shina mana rurai tucuipajmi. Diospajman maijanpish cꞌuchuyangapajca pai tiyashcatapish crina, paita mashcajcunamanca ima illashcata cuj cashcatapishmi crinataj can” nircami (Hebreos 11:6). Diospi crinimi nishpallaca mana saquirinachu canchij. Chaipaj randica pai mandashcatami cazuna canchij (Santiago 2:26-ta liyipai).

7. a) ¿Diostaca imamantataj respetohuan, humildadhuan mañana canchij? b) ¿Ima shinataj Diosta tucui shunguhuan mañacushcataca ricuchishun?

⁷ Caipi yuyashun. Shuj mandajhuan o presidentehuan parlacushpaca respetohuanmi parlanchij ¿nachu? Jehová Diosca shuj mandajta yallimi tucui poderta charin. Chaimantami Diosta mañacushpaca respetohuan, humildadhuan mañana canchij (Génesis 17:1; Salmo 138:6). Imata mana pacashpami shungumanta Diostaca mañana canchij. Shinallataj mana chaillatataj cutin cutin repitishpa mañanachu canchij (Mateo 6:7, 8).

8. ¿Diosta mañashpapish imatataj rurana canchij?

⁸ Jehová Diosta mañashca qꞌuipaca ñucanchij mañashca shina imatapish rurangapajmi esforzarina canchij. Por ejemplo, minishtirishca cosascunata charingapajchari Diosta mañanchij. Shina mañashpapish Yaya Dios tucuita cuchunca mana shuyanachu canchij. Ashtahuanpish ura janaj tucushpami imapipish sinchita trabajana canchij (Mateo 6:11; 2 Tesalonicenses 3:10). Shinallataj ima mana allicunata saquingapajchari Diosta mañanchij.  Pero chaicunapi ama urmangapajmi cuidarina canchij (Colosenses 3:5). Cunanca gentecuna Diosta mañangapaj imalla tapuicunata rurashcata yachashun.

9. a) ¿Pitataj mañana canchij? b) ¿Juan 14:6-pi nishca shinaca pipaj shutipitaj mañana canchij?

⁹ ¿Pitataj mañana canchij? Jesusca paita catijcunamanca, “jahua pachapi caj ñucanchij Yaya” nishpa mañana canguichij nircami (Mateo 6:9). Chaimantami Jehová Diosllata mañana canchij. Shinallataj Jesusca: “Ñucamari ñan cani, mana llullapish, causaiyujpish cani. Yayapajmanca pi mana paillatajca chayai tucunchu” nircami (Juan 14:6). Caipi ricushca shinaca Diosta mañacushpaca Jesuspaj shutipimi mañana canchij. Yaya Dios, ñucanchij mañashcacunata uyachunca paipaj Churita cachashcatami crina canchij. Ña yachashca shinaca Jesusmi cai Allpaman shamushpa juchacunamanta, huañuimanta quishpichirca (Juan 3:16; Romanos 5:12). Chaimi Yaya Diospish Jesustaca Sacerdote, Juez cachun agllashca (Juan 5:22; Hebreos 6:20).

10. ¿Jehová Diostaca cungurishpachu mañana canchij? Imata intindishcata parlai.

¹⁰ ¿Diostaca cungurishpachu mañana canchij? Jehová Diosca cungurishpa, tiyarishpa o shayarishpa mañanguichij nishpaca mana ninchu. Bibliapica Yaya Diostaca respetohuanmi mañana can ninmi (1 Crónicas 17:16; Nehemías 8:6; Daniel 6:10; Marcos 11:25). Ima laya cashpapish Diostaca shungumantami mañana canchij. Shinallataj ima hora o maipi cashpapish, shimi ucullapi o alta vozpimi mañai tucunchij. Ñucanchij mañashcacunata pi mana uyajpipish Jehová Dios uyana cashcatami crina canchij (Nehemías 2:1-6).

11. ¿Diostaca imacunallamantataj mañana canchij?

 ¹¹ ¿Diostaca imacunallamantataj mañana canchij? Jehová Diospaj munai cajpica imatapish mañai tucunchijllami. Bibliapica: ‘Pai munashca shina imatapish mañajpica, paica uyashpa cunllami’ ninmi (1 Juan 5:14). Diosta mañacushpaca shuj amigohuan parlacushca shinami can. Chaimantami ñucanchij ima minishtishcacunata, ima shina sintirishcata, imata yuyashcatapish paiman parlana canchij (Salmo 62:8). Shinallataj allita rurangapajca paipaj espíritu santota cuchunmi mañana canchij (Lucas 11:13). Alli decidingapaj, problemacunata ahuantangapajca ayudahuai nishpami mañana canchij (Santiago 1:5). Ñucanchij juchacunatapish perdonahuai nishpami mañana canchij (Efesios 1:3, 7). Ñucanchij familiacunamantapish, huauqui panicunamantapishmi mañana canchij (Hechos 12:5; Colosenses 4:12).

12. ¿Ñucanchij mañaicunapica imataj ashtahuan importante cana can?

¹² ¿Ñucanchij mañaicunapica imataj ashtahuan importante cana can? Jehová Diospaj shutita jatunyachina, paipaj munai pajtarichun mañanami ashtahuan importante cana can. Ñucanchijpaj imallata rurashcamantami Yaya Diostaca pagui nina canchij (1 Crónicas 29:10-13). Jesuspish puntaca imata mañana cashcatami paita catijcunamanca yachachirca (Mateo 6:9-13-ta liyipai). Jesusca, Diospaj shutita jatunyachingapajmi puntaca mañana canguichij nircami. Chashna mañashpallami Diospaj shuti chuya, jucha illaj cashcata ricuchishun. Qꞌuipaca Diospaj gobierno shamuchun, cai Allpapi paipaj munai pajtarichunmi mañana canguichij nircami. Caicunamanta mañashca qꞌuipami ñucanchij minishtishca cosascunamantaca mañai tucunchij.

13. ¿Mashna tiempotataj Diosta mañana canchij?

¹³ ¿Mashna tiempotataj Diosta mañana canchij?  Bibliapica mashna tiempota mañanataca mana huillanchu. Diostaca achca tiempota o ashalla tiempotami mañai tucunchij. Por ejemplo, micugrishpaca ashalla tiempotami Diosta mañai tucunchij. Cutin Yaya Diosta pagui ningapaj, ima problemacunata paiman huillangapajca achca tiempotami mañai tucunchij (1 Samuel 1:12, 15). Pero Jesuspaj punllacunapi shina shujtajcuna ricuchunllaca mana dimastij tiempota mañashpa saquirinachu canchij (Lucas 20:46, 47). Chashna mañajcunataca  Jehová Diosca mana uyanchu. Paica shungumanta mañachunmi munan.

14. a) ¿Punllapica mashna cutintaj Diosta mañana canchij? b) ¿Jehová Diosca imata uyangapajtaj listo can?

¹⁴ ¿Punllapica mashna cutintaj Diosta mañana canchij? Jehová Diosca paita siempre mañachunmi munan. Bibliapica: “Diosta mañacuichij”, “Diostaca mañaracuichijlla” ninmi (Mateo 26:41; Romanos 12:12; 1 Tesalonicenses 5:17). Diosca ñucanchij mañashcacunata uyangapajca listomi can. Chaimantami ñucanchijta cꞌuyashcamanta, tucuita cushcamanta cada punlla pagui nina canchij. Shinallataj ñucanchijta yachachichun, animota cuchunmi mañana canchij. Diosta mañanata valorashpaca ima horaspish, maipi cashpapish mañanallami canchij.

15. ¿Diosta mañashpa ña tucuchingapajca imamantataj “chashna cachun” o amén nina canchij?

 ¹⁵ ¿Diosta mañashpa ña tucuchingapajca imamantataj “chashna cachun” o amén nina canchij? Amén o “chashna cachun” nishpaca shungumanta mañashcatami ricuchinchij (Salmo 41:13). Ashtahuancarin ñucanchijpaj ñaupajpi shuj huauqui o shuj pani mañajpica “chashna cachun” nishpaca paicuna mañashcahuan de acuerdo cashcatami ricuchinchij. “Chashna cachun” nishpaca sinchita o shimi ucullapi nina cashcatami Bibliapica yachachin (1 Crónicas 16:36; 1 Corintios 14:16).

16. ¿Diosca ñucanchij mañashcacunataca contestanchu? Imata intindishcata parlai.

¹⁶ ¿Diosca ñucanchij mañashcacunataca contestanchu? Ari. Bibliapica Diosca ñucanchij ‘mañashcacunata uyaj’, cutichij Diosmi can ninmi (Salmo 65:2; Isaías 30:19). Gentecuna shungumanta mañajpica Jehová Diosca contestanmi.

17. ¿Huaquinpica Jehová Diosca ima shinataj ñucanchij mañashcacunata contestan?

¹⁷ Jehová Diosca angelcunata, paita sirvijcunata cachashpami ñucanchij mañashcacunata contestan (Hebreos 1:13, 14). Achca gentecunami Bibliata alli intindingapaj Diosta mañashcacuna. Chai qꞌuipallami angelcuna ayudajpi testigo de Jehovacunaca paicunapajman chayashcacuna. Chashnami Diospaj ‘alli huillaicunata’ tucui cai Allpapi predicangapaj angelcuna ayudacushcata intindinchij (Apocalipsis 14:6-ta liyipai). Cutin huaquinpica problemacunamanta, imalla minishtishcacunamantami Diosta mañashcanchij. Chashna mañashca huashallami  congregacionmanta huauquicunapaj ayudata chasquishcanchij (Proverbios 12:25; Santiago 2:16).

18. ¿Jehová Diosca ñucanchij mañashcacunata contestangapajca imallatataj cushca?

¹⁸ Jehová Diosca ñucanchij mañashcacunata contestangapajca paipaj espíritu santota, Bibliatapishmi cushca. Shuj problemahuan cashpa Diosta mañajpica ñaupajman catingapajmi paipaj espíritu santota cushpa ayudan (2 Corintios 4:7). Shinallataj alli decisioncunata agllangapajca Diosca Bibliatami cushca. Bibliata liyishpami minishtirishca yuyaicunata yachanchij. Tandanacuicunapipish maijan huauqui o pani comentajpimi animota chasquinchij. Congregacionta pushaj huauquicunapish Bibliahuanmi ayudancuna (Gálatas 6:1).

19. ¿Ñucanchij mañashcacunata Jehová Dios mana utca contestajpica imamantataj mañashpa catina canchij?

¹⁹ Maipica Diosca ñucanchij mañashcata mana contestanchu nishpachari yuyanchij. Pero paica ñucanchij imallata minishtishcata, ima hora, ima shina contestanataca allimi yachan. Chaimantami Diosta mañashpa catina canchij. Chashnami paita tucui shunguhuan mañashcata, paipi feta charishcatapish ricuchishun (Lucas 11:5-10). Diosca ima mañashcataca huaquinpica mana yuyashcapimi contestan. Por ejemplo, huaquinpica jatun problematachari charinchij. Chai problemata anchuchihuai nishpachari Diosta mañanchij. Pero paica manachari chai problemataca anchuchin. Ashtahuanpish Diosca fuerzata cushpami chai problemata ahuantachun ayudan (Isaías 40:28, 29-ta liyipai).

20. ¿Diostaca imamantataj siempre mañana canchij?

²⁰ Diosta mañanaca shuj jatun bendicionmi can. Ñucanchij mañashcacunata pai uyaj cashcataca tucui shunguhuanmi crinchij (Salmo 145:18). Shungumanta mañashpaca Dioshuanmi alli apanacushun.