Tito 3:1-15
3 Huauquicunataca caita yuyachishpa cati. Gobiernocunatapish, autoridadcunatapish cazuchun, tucui laya alli ruraicunata shungumanta rurachun,
2 pitapish mana allita ama rimachun, shujtajcunahuan ama pꞌiñanacuchun, intindij cachun, tucui gentecunahuan siempre manso shungu cachun yuyachishpa cati.
3 Ñaupaca ñucanchijpish yuyai illajcuna, Diosta mana cazujcuna, gentecuna pandachishcami carcanchij. Chꞌican chꞌican munaicunapimi huatashca shina carcanchij. Cushicunallatami mashcaj carcanchij. Mana alli ruraicunata rurashpa, envidiashpami causaj carcanchij. Millai runacunami carcanchij. Caishuj chaishujmi pꞌiñanacuj carcanchij.
4 Ashtahuanpish ñucanchijta Quishpichij Diosca gentecunata llaquishcata, cꞌuyashcatami ricuchishca.
5 Paica chuyayachishpami ñucanchijtaca quishpichirca. Chashnami causaita curca. Shinallataj paipaj espíritu santohuan mushujyachishpami ñucanchijtaca quishpichirca (ñucanchij cashcata ruraj cashcamantaca mana quishpichircachu, ashtahuanpish pai yallitaj llaquij cashcamantami quishpichirca).
6 Ñucanchijta Quishpichij Jesucristomantami Diosca paipaj espiritutaca ñucanchijman achcata curca.
7 Pai cusha nishca huiñai causaita japinata shuyajcuna cachunmi chaita rurarca. Dios yallitaj llaquij cashcata ricuchishcamantami cai huiñai causaitaca chasqui tucunchij. Paipaj ñaupajpipish cashcata rurajcuna nishcami canchij.
8 Cai shimicunaca mana llullachu. Diospi crijcuna alli ruraicunata rurana yuyailla cachunmi, caicunamanta cutin cutin yuyachishpa catichun munani. Caicunaca yallitaj allimi can, gentecunatapishmi ayudan.
9 Shinapish canca yanga cꞌaminacuicunapi, ñaupa yayacunapaj shuticunata quillcanacunapi, rimanacuicunapi, Leymanta pꞌiñanacuicunapi ama chagruringui. Chaicunaca imapaj mana valinchu, imapi mana ayudanchu.
10 Maijan runapish llulla yachachishcacunata yachachi callarijpica paitaca sinchita consejai. Ishqui cutin paita consejashca qꞌuipa mana uyajpica paimanta caruyai.
11 Chai runa alli ñanmanta caruyashpa, juchata ruracujtapish yachanguimi. Paipaj ruraicunamantaca ñami juzgashca cashca.
12 Artemasta, Tiquicota cambajman cachajpica ima laya tucushpapish ñucata Nicópolis llajtapi ricunaman shamungui. Tamya punllacunapi chaipi saquirinatami yuyarishcani.
13 Viajepi ima ama illachunca Leyta alli yachachij Zenasman, Apolosmanpish paicuna tucui ima minishtishcata cungui.
14 Ñucanchij huauquicunapish ashtahuan minishticujcunata ayudangapaj alli ruraicunata rurashpa catinata yachachun. Chashnami paicunaca grano mana pꞌucuj shinaca mana cangacuna.
15 Tucui ñucahuan cajcunami canmanca saludocunata cachan. Ñucanchijta cꞌuyajcunata ñuca partemanta saludapai. Paicunapish Jesusta catijcunami can.
Diosca yallitaj llaquij cashcata tucui cancunaman ricuchichun.
