Marcos 12:1-44
-
Huañuchij tarpujcunamanta chꞌimbapurai (1-12)
-
Diosmantapish, Cesarmantapish (13-17)
-
Huañushcacuna causarinamantami tapurcacuna (18-27)
-
Tucuimanta yalli ishqui mandashcacuna (28-34)
-
¿Cristoca Davidpaj churichu can? (35-37a)
-
“Mandashcacunata quillcajcunamanta cuidaringuichij” nishcamanta (37b-40)
-
Huajcha viuda huarmi ishqui uchilla cullquita churashcamanta (41-44)
12 Chai qꞌuipami Jesusca chꞌimbapuraicunata churashpa paicunamanca cashna nishpa yachachi callarirca: “Shuj chagrayuj runaca uvacunatami tarpurca. Chai tarpushca muyundijtami pircacunata shayachirca. Uvacunata sarungapajpish shuj jutcutami rurarca. Shinallataj shuj jatun torretami* shayachirca. Chai qꞌuipaca uva chagrata shujtaj tarpujcunaman arrendachishpami* caru llajtaman rirca.
2 Uvacunata cosechana punlla chayamujpimi chagrayuj runaca, pai japina cashcata japingapaj tarpuj runacunapajman paita sirvijta cacharca.
3 Ashtahuanpish paicunaca chai sirvij runataca japishpami macashpa, chushaj maquillata tigrachishpa cacharcacuna.
4 Chagrayuj runaca cutinmi shujtaj sirvij runata cacharca. Paitapish umapi huajtashpami pinganayajta rimashpa cacharcacuna.
5 Chai qꞌuipaca chagrayuj runaca shujtaj sirvij runatami cacharca, paitaca huañuchircacunami. Shujtajcunata cachajpipish, maijancunataca macarcacunami, caishujcunataca huañuchircacunami.
6 Ultimotaca chagrayuj runaca, ‘ñuca churitaca respetangacunami’ nishpami tarpuj runacunapajman paipaj cꞌuyashca churita cacharca.
7 Chai tarpuj runacunaca chagrayuj runapaj churita ricushpami paicunapura parlanacushpaca: ‘Paimari herenciataca japigrin. Jacuchij, paita huañuchishpa paipaj herenciata japishunchij’ nircacuna.
8 Chaimantami paita japishpa huañuchircacuna. Qꞌuipaca uva chagramanta llujshichishpami shitarcacuna.
9 ¿Uva chagrayuj runaca paicunataca imatashi ruranga? Pai shamushpaca chai tarpuj runacunata huañuchishpami uva chagrataca shujtaj tarpujcunaman cunga.
10 ¿Dios quillcachishcapi nishcataca manachu nunca liyishcanguichij? Chaipica: ‘Huasita rurajcuna mana nishpa shitashca rumillatajmi, pircacunata jahua esquinapi tandachij rumi* tucushca.
11 Chai rumica Jehová* Diosmantami shamushca. Ñucanchijpajpish sumajmi’ ninmi” nircami.
12 Jesuspaj contracunaca chai chꞌimbapuraita paicunapi yuyashpa parlacushcatami cuentata curcacuna. Chaimantami Jesusta japishun nircacuna. Shinapish gentecunata manchashpami chaimanta rircallacuna.
13 Chai qꞌuipami huaquin fariseocunapish, Herodesta* catijcunamanta huaquin runacunapish Jesús parlacushpa imapi pandarijta ricungapaj shamurcacuna.
14 Paicuna Jesuspajman chayashpaca: “Yachachij, canca llullacunataca mana ninguichu. Gentecunapaj ñaupajpipish alli ricurinataca mana mashcanguichu. Pitapish jahua ñahuillataca mana ricunguichu. Diosmantapish mana llullashpami yachachingui. Chaitaca ñucanchijca allimi yachanchij. Shinaca ¿Cesarman* impuestota* paganaca allichu canga o mana?
15 ¿Paganachu canchij o mana?” nircacunami. Ashtahuanpish millai yuyaihuan paicuna tapucushcata yachashpami Jesusca: “¿Imamantataj ñucataca pandachisha ninguichijyari? Shuj denario* cullquita ricungapaj apamuichij” nirca.
16 Chai cullquita apamujpimi Jesusca: “¿Cai cullquipica pipaj ñahuitaj, pipaj shutitaj quillcashca tiyacun?” nirca. Chaimi paicunaca: “Cesarpajmi” nircacuna.
17 Chashna nijpimi Jesusca: “Cesarman cuna cashcataca Cesarman cuichij. Diosman cuna cashcataca Diosman cuichij” nirca. Chaimi paicunaca mancharishca saquirircacuna.
18 Chai qꞌuipaca saduceocunami Jesuspajman shamurcacuna. Paicunaca huañushcacuna causarinataca mana crincunachu. Chaimantami cashna tapurcacuna:
19 “Yachachij, Moisesca: ‘Shuj cazado runa huahuacunata manaraj charishpa huañujpica, viuda huarmihuanca paipaj huauqui cazarashpa, huauquipaj cachun huahuacunata charichun’ nishpami quillcarca.
20 Ricungui, shuj familiapica canchis huauquicunami tiyarca. Punta huauqui cazarashpaca huahuacunata manaraj charishpami huañurca.
21 Qꞌuipa huauquipish chai viuda huarmihuan cazarashpaca huahuacunata manaraj charishpami huañurca. Cutin chaipaj qꞌuipa huauquipish chashnallatajmi tucurca.
22 Tucui canchis huauquicunami chai huarmihuan huahuata mana charishpa huañurcacuna. Chai huashaca huarmipishmi huañurca.
23 Huañushcacuna causarina punllapica, ¿maijanpaj huarmishi paica canga? Canchis huauquicunamari chai huarmihuanca cazararcacuna” nircacunami.
24 Shina nijpimi Jesusca cashna cutichirca: “Cancunaca Dios quillcachishcacunatapish, mashna poderta Dios charishcatapish mana yachanguichijchu. Chaimantami pandaricunguichij.
25 Huañushcacuna causarishpaca cꞌaricunapish, huarmicunapish mana cazarangacunachu. Ashtahuanpish paicunaca jahua pachapi caj angelcuna shinami cangacuna.
26 Shinapish ¿huañushcacuna causarinamantaca Moisés quillcashca libropica manachu liyishcanguichij? Diosca zarza yura* chaupimantaca: ‘Ñucami Abrahanpaj Dios, Isaacpaj Dios, Jacobpaj Dios cani’ nircami.
27 Paica huañushcacunapaj Diosca mana canchu. Ashtahuanpish causajcunapaj Diosmi can. Cancunaca yallitajmi pandaricunguichij” nircami.
28 Mandashcacunata quillcajcunapuramanta* shujmi paicuna parlanacucujta uyarca. Paica Jesús alli cutichijta ricushpami: “¿Tucui mandashcacunamantaca maijan mandashcataj ashtahuan yalli?” nishpa tapurca
29 Chashna tapujpimi Jesusca cashna cutichirca: “Tucui mandashcacunamanta yallica caimari: ‘Uyaichij, Israel gentecuna. Ñucanchij Jehová* Diosca shujlla Jehová* Diosmi.
30 Jehová* Diostaca cambaj tucui shunguhuan, cambaj tucui causaihuan,* cambaj tucui yuyaihuan, cambaj tucui fuerzahuan cꞌuyangui’.
31 Catij mandashcapish caimi: ‘Can quiquin cꞌuyarij shinallataj shujtajcunatapish cꞌuyangui’. Cai ishqui mandashcacunamanta ashtahuan yalli shujtaj mandashcaca mana tiyanchu” nircami.
32 Chaimi mandashcacunata quillcaj runaca: “Yachachij, canca mana llullashpami allita nishcangui: ‘Diosca shujllami. Pai shina Diosca mana tiyanchu’.
33 Diosta tucui shunguhuan, tucui yuyaihuan, tucui fuerzahuan cꞌuyana. Quiquinta shinallataj shujtajcunatapish cꞌuyanami rupachishca ofrendacunamanta, sacrificiocunamantapish ashtahuan yalli allica” nircami.
34 Chai runa alli yuyashpa cutichijta ricushpami Jesusca: “Diospaj Gobiernopi yaicungapajca mana carupichu cangui” nirca. Chashna nijpica pi imata mana ashtahuan tapui tucurcachu.
35 Shinapish Diospaj huasipi Jesús yachachicushpaca cashnami nirca: “¿Ima nishpataj mandashcacunata quillcajcunaca Cristoca Davidpaj churimi can nincuna?
36 Davidllatajmi Diospaj espíritu santo yuyaita cujpi cashna nirca: ‘Jehová* Diosca ñuca Amitotaca: “Canta pꞌiñajcunata cambaj chaqui ucupi churangacama ñuca alli ladopi tiyari” nircami’.
37 Davidllataj Amito nijpica, ¿ima shinataj Cristoca Davidpaj churi cangari?” nircami.
Achca gentecunami Jesús nishcataca cushicushpa uyacurcacuna.
38 Jesús yachachicushpaca cashnami nirca: “Mandashcacunata quillcajcunamanta cuidaringuichij. Paicunaca chaqui puntacama churanata churarishcami purinata munancuna. Plazacunapipish shujtajcuna saludachunmi munancuna.
39 Sinagogacunapipish* ashtahuan alli asientocunapimi tiyarinata munancuna. Shinallataj jatun micuicunapipish alli puestocunapimi tiyarinata munancuna.
40 Paicunaca viudacunapaj imalla charishcacunatapishmi* quichuncuna. Shinallataj shujtajcuna alli nichunllami* uniyashpa Diosta mañancuna. Chaimantami paicunaca shujtajcunata yalli llaquichishca cangacuna” nircami.
41 Jesusca Diospaj huasipi cashpaca, cullquita churana cajacuna chꞌimbapurapimi tiyarirca. Chaipi tiyacushpaca cullquita churana cajapi gentecuna cullquita churacujtami ricurca. Achcata charij gentecuna achca cullquita churacujtapishmi ricurca.
42 Shinallataj shuj huajcha viuda huarmi shamushpaca ishqui uchilla cullquitami* chai cajapi churarca.
43 Chaita ricushpami paita catijcunata cayashpa Jesusca cashna nirca: “Cancunamanca mana llullanichu. Cai huajcha viuda huarmimi cullquita churana cajapica shujtajcunamanta yalli churarca.
44 Tucuicunami sobrashcallata churarcacuna. Ashtahuanpish cai viuda huarmica huajcha cashpapish* pai causangapaj tucui charishcatamari churarca” nircami.
Notacuna
^ Torre jahuamantami shuhuacuna, animalcuna chagraman ama yaicuchun cuidajcuna carca.
^ O “partido saquishpami”.
^ O “caishuj rumicunamanta yalli importante rumi”.
^ “Jehová” shutita huasha diccionariopi ricui.
^ “Herodes” shimita huasha diccionariopi ricui.
^ “César” shimita huasha diccionariopi ricui.
^ Cai impuestotaca cada unomi pagajcuna carca.
^ “Denario” shimita huasha diccionariopi ricui.
^ Caipica shuj uchilla casha yuramantami parlacun.
^ “Mandashcacunata quillcaj” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “almahuan”. “Alma” shimita huasha diccionariopi ricui.
^ “Jehová” shutita huasha diccionariopi ricui.
^ O “Tandanacuna huasicunapipish”.
^ Griego rimaipica: “huasicunatapishmi” ninmi.
^ O “nij tucushpallami”.
^ Griego rimaipica: “ishqui leptones” ninmi. Ishqui leptontaca casi chunga minutocunata trabajashcamantami pagajcuna carca.
^ Griego rimaipica: “minishticushpapish” ninmi.
