Lucas 1:1-80
-
Teofiloman quillcashca shimicuna (1-4)
-
Ángel Gabrielca Bautizaj Juan huacharinatami huillarca (5-25)
-
Ángel Gabrielca Jesús huacharinatami huillarca (26-38)
-
Elisabetta María visitashcamanta (39-45)
-
Mariaca Jehová Diostami jatunyachirca (46-56)
-
Juan huacharishcamanta, paita shutichishcamantapish (57-66)
-
Zacarías huillashcamanta (67-80)
1 Achcacunami tucui imalla tucushcataca quillcashcacuna. Chaicunatami ñucanchijpish crinchij.
2 Imata ricushcata huillajcuna nishca shinallataj, Diospaj shimita huillajcuna nishca shinallatajmi paicunaca quillcashcacuna.
3 Ñucapish tucui imalla tucushcataca callarishpami alli tapushcani. Chaimantami alli nishca Teófilo, canmanpish tucuita callarishpa quillcasha nircani.
4 Canman imalla yachachishcacunaca, chashnataj cashcata alli yachachunmi quillcani.
5 Judea llajtata mandaj Herodes* mandacui punllacunapimi Zacarías shuti sacerdote causarca. Paica Abías shuti sacerdotecuna partemi carca. Paipaj huarmica Aaronpaj familiamanta shamuj Elisabet shutimi carca.
6 Ishquindijmi Diospaj ñaupajpica cashcata rurashpa causajcuna carca. Jehová* Diospaj mandashcacunatapish tucuitami pajtachijcuna carca.
7 Elisabetca huahuacunata mana chari tucurcachu. Chaimantami huahua illaj carcacuna. Ñami yuyajcunapish carca.
8 Chai punllacunapica Abías parte sacerdotecunami Diospaj huasipi sirvicurcacuna. Chaipimi Zacariaspajca sacerdote shina Diospaj ñaupajpi sirvina horas tucurca.
9 Ima shinami sacerdotecuna inciensota rupachina costumbreta charijcuna carca, shinallatajmi Zacariaspajpish Jehová* Diospaj huasiman yaicushpa inciensota rupachina horas tucurca.
10 Zacarías inciensota rupachicujpica canllapi caj gentecunaca tucuicunami Diosta mañacurcacuna.
11 Chashna rupachicujpimi Jehová* Diospaj angelca paipaj ñaupajpi ricurirca. Chai angelca altar alli ladopimi shayacurca.
12 Zacariasca chai angelta ricushpaca achcata mancharishpami imata ruranata mana yacharca.
13 Shina mancharijpimi chai angelca cashna nirca: “Zacarías, ama manchaichu. Can mañashcataca Diosca uyashcami. Cambaj huarmi Elisabetca shuj cꞌari huahuatami charigrin. Chai huahuataca Juan shutita shutichingui.
14 Pai huacharijpica yallitajmi cushicungui. Shujtajcunapish chashnallatajmi cushicungacuna.
15 Jehová* Diospaj ñaupajpipish jatun nishcami canga. Paica vinotapish, ima shujtaj jayaj tragotapish mana ubyangachu. Paimanca mamapaj huijsa ucupi cajpirajmi* Diosca espíritu santota cunga.
16 Paica, Israelpaj huahuacunamantaca achcacunatami Jehová* Diospajman tigrarichun ayudanga.
17 Ashtahuanpish Eliaspaj poderhuan, fuerzahuanmi paica Diosta ñaupashpa ringa. Yayacunapaj shungucunatapish huahuacunapaj shungucunata shinami ruranga. Mana cazujcunatapish cashcata rurajcuna shina yuyaisapa tucuchunmi ayudanga. Chashnami cai llajtaca Jehová* Diosta sirvingapaj allichirishca canga” nircami.
18 Ángel chashna nijpimi Zacariasca: “¿Ima shinataj can nishca pajtarinataca crishari? Ñucapish, ñuca huarmipish ñamari yuyajcuna canchij” nirca.
19 Chashna nijpimi angelca: “Ñucaca Gabriel shutimi cani. Diospaj ñaupajpimi sirvini. Cai alli huillaicunata huillachunmi Diosca ñucata cambajman cachashca.
20 Ñuca huillashcata mana crishcamantami, cai tucui pajtangacama upayashpa imata mana rimai tucungui. Ñuca huillashcaca, pajtana punllapitajmi pajtanga” nircami.
21 Zacarías chashna parlanacungacamaca canllapimi gentecunaca shuyacurcacuna. Diospaj huasi ucumanta mana utca llujshijpimi paicunaca sustarishca carcacuna.
22 Zacarías chaimanta llujshishpaca imata mana rimai tucushpami maquillahuan señasta rurashpa paicunahuan parlarca. Gentecunaca chaita ricushpami Diospaj huasi ucupi shuj jatun milagro tiyashcata intindircacuna.
23 Diospaj huasipi sirvina punllacuna tucurijpimi Zacariasca paipaj huasiman rirca.
24 Asha punllacuna qꞌuipami paipaj huarmi Elisabetca chichu saquirishpa, pichca quillacunata mana maiman llujshishpa huasillapi carca. Paica:
25 “Gentecunapaj ñaupajpi ñuca ama ashtahuan pingailla causachunmi, Jehová* Diosca ñucata yuyarishpa caitaca rurashca” nircami.
26 Elisabet ña sujta quillacunata chichu cajpimi, Diosca ángel Gabrielta Galilea llajtapi saquirij Nazaret llajtaman cacharca.
27 Chaipica cꞌarihuan manaraj chayarishca solterata visitachunmi cacharca. Chai solterapaj shutica Mariami carca. Paica Davidpaj familiamanta José nishca runahuan cazarangapajmi ari ninacushca carca.
28 Mariapaj ñaupajpi chai ángel ricurishpaca: “Imanalla María. Jehová* Diosmi cantaca yallitaj cꞌuyashca. Chaimantami cantaca bendiciacun” nircami.
29 Chai ángel imalla nishcata uyashpami Mariaca mancharirca. Shinallataj imamanta chashna saludashcatami yuyai callarirca.
30 Shina yuyacujpimi angelca: “Ama manchaichu María. Canca Diospaj ñaupajpica alli nishcami cangui.
31 ¡Ricui! Canca chichu saquirishpami shuj cꞌari huahuata huachangui. Paitaca Jesús shutita shutichingui.
32 Paica jatun nishcami canga. Jatun Diospaj Churi nishcapishmi canga. Jehová* Diosmi paitaca ñaupa yaya* Davidta shina mandajta ruranga.
33 Paica Jacobpaj huahua huahuacunatami huiñaita mandanga. Paipaj Gobiernoca manataj tucuringachu” nirca.
34 Chashna nijpimi Mariaca chai angeltaca: “¿Ima shinataj shuj huahuataca charishari? Manaraj cusayuj canica” nirca.
35 Chaimi angelca cashna nirca: “Diospaj espíritu santomi* cambaj jahuaman shamunga, Jatun Diosmi paipaj poderhuan cantaca llandunga. Chaimantami huahuaca jucha illaj huacharinga. Diospaj Churi nishcapishmi canga.
36 ¡Ricui! Cambaj familia Elisabetpish mana huachaj nishca cashpapish, yuyaj cashpapish ñamari sujta quillacunata chichu.
37 Dios imalla nishcacunaca tucuimi pajtaringa”* nircami.
38 Chaimi Mariaca: “¡Ñucaca, Jehová* Diosta sirvijllami cani! Can nishca shina tucui imapish pajtarichunlla” nirca. Shina nijpica chai angelca chaimanta rircallami.
39 Asha punllacuna qꞌuipami Mariaca Judá llajta urcucunapi saquirij shuj llajtaman utcashpa rirca.
40 Zacariaspaj huasiman yaicushpaca Elisabettami saludarca.
41 María saludajta uyashpami Elisabetpaj huijsapi caj huahuaca cuyurirca. Chaimi Elisabetca espíritu santohuan junda cashpa
42 sinchita cashna nirca: “¡Canca tucui huarmicunamanta ashtahuan yalli bendiciashcami cangui. Cambaj huijsapi caj huahuapish bendiciashcami!
43 ¿Ñuca Amitopaj mama visitanaman shamuchunca ñucaca imataj caniyari?
44 Can saludajpimi ñapish ñuca huahuaca cushicushpa, ñuca huijsapi cuyurirca.
45 Jehová* Dios imalla nishcata crishcamanta cushicui. Pai imalla nishcataca pajtachingatajmi” nircami.
46 Chashna nijpimi Mariaca cashna nirca: “Ñucaca* Jehová* Diostami jatunyachini,
47 ñucata Quishpichij Diosmantami yallitaj ñuca shungupica cushicuni.
48 Paita sirvij huajchataca yuyarishcamari. ¡Cunanmantapachami tucui huahua huahuacunaca ñucataca cushicui ningacuna!
49 Poderta charij Diosca jatun allicunatami ñucapajca rurashca. Paipaj shutica jucha illajmi.
50 Paita manchajcunataca huiñai huiñaitami llaquin.
51 Paipaj maquihuanmi jatun ruraicunata rurashca. Shungupi jatun tucushcacunatapish caita chaitami paica cachashca.
52 Mandajcunataca paicunapaj jatun tiyarinacunamantami anchuchishca. Humildecunataca jatunyachishcami.
53 Yaricaihuan cajcunamanca allicunatami cushca. Ashtahuanpish charijcunataca chushaj maquillatami cachashca.
54 Paita sirvij Israelta ayudangapajmi shamushca. Chashna rurashpaca pai ari nishcatami yuyarishca.
55 Paica Abrahanman, Abrahanpaj huahua huahuacunamanpishmi huiñaita llaquisha nirca. Chaitami ñucanchij ñaupa yayacunaman huillarca” nircami.
56 Mariaca quimsa quillacunatami Elisabethuan saquirirca. Chai qꞌuipaca paipaj huasiman tigrarcallami.
57 Elisabetca huachana punlla ña pajtajpica shuj cꞌari huahuatami huacharca.
58 Elisabetta Jehová* Dios jatunta llaquishcata yachaj chayashpaca vecinocunapish, familiacunapish achcatami cushicurcacuna.
59 Ña pusaj punllacuna tucujpimi huahuataca circuncisionta* ruranaman aparcacuna. Chaipimi yayata shinallataj Zacarías shutita shutichishun nircacuna.
60 Chashna nijpimi paipaj mamaca: “¡Mana! Paica Juan shutimi canga” nirca.
61 Shina nijpimi paicunaca: “Cambaj familiapica chai shutihuanca pi mana tiyanchu” nircacuna.
62 Chaimantami yayataca, “¿ima shutitataj huahuataca shutichichun ningui?” nishpa maquicunahuan señasta rurashpa tapurcacuna.
63 Chashna tapujpimi Zacariasca shuj uchilla tablata mañarca. Chai tablapica: “Paipaj shutica Juanmi” nishpami quillcarca. Chaimi tucuicuna mancharishca saquirircacuna.
64 Shina quillcajpimi Zacariaspaj cꞌalluca ñapish cacharirirca. Chashna cacharirijpimi rimai callarishpa paica Diosta alabarca.
65 Tucui vecinocunami chaita ricushpaca achcata mancharircacuna. Chashna tucushcataca tucui Judea llajta urcucunapimi parlai callarircacuna.
66 Chaita uyajcunaca paicunapaj shungupi huaquichishpami paicunapura: “¿Cai huahua huiñashpaca ima shinashi canga?” ninacurcacuna. Paicunaca Jehová* Diospaj poder chai huahuapi cashcatami ricurcacuna.
67 Chai huahuapaj yaya Zacariasmanca Diosmi paipaj espíritu santota curca. Chaimi Dios ima nishcata huillashpaca cashna nirca:
68 “Israel llajtapaj Jehová* Diosca jatunyachishca cachun. Paica llaquishpami paipaj llajtata cacharichishca.
69 Paita sirvij Davidpaj familiamantami poderta charij shuj quishpichijta* ñucanchijmanca cushca.
70 Caitaca ñaupa tiempo alli profetacunaman huillashca shinami ñucanchijman cushca.
71 Paica ñucanchijta pꞌiñajcunamanta, mana ricusha nijcunapaj maquimantami ñucanchijtaca quishpichisha nirca.
72 Paica ñaupa yayacunaman nishca shinami ñucanchijta llaquinga. Paipaj sumaj ari nishcatapish yuyaringami.
73 Ñucanchij ñaupa yaya Abrahanmanmi caitaca ari nirca.
74 Pꞌiñajcunamanta ñucanchijta quishpichishca huashami Diosca mana manchashpa paita adorachun saquinga.
75 Tucui ñucanchij causaipi paillata sirvingapaj, paipaj ñaupajpi allita rurangapajmi chashna rurashca.
76 Ñuca huahualla, canca Jatun Diospaj profeta nishcami cangui. Canca, Jehová* Diospaj ñancunata allichingapajmi paita ñaupashpa ringui,
77 quishpirina tiyashcatami paipaj llajtamanca huillangui. Diosca paicunapaj juchacunata perdonashpami quishpichinga.
78 Chashnami paica yallitaj llaquij cashcata ricuchinga. Diosca llaquishpami, inti llujshishpa achijyachij shina jahua pachamanta ñucanchijtaca achijyachinga,
79 amsapi tiyacujcunatapish, huañunalla amsapi cajcunatapish achijyachichunmi luzta cachanga. Chai luzca sumaj causaita charingapaj imata rurana cashcatami ricuchinga” nircami.
80 Chai huahua huiñashpaca Diospaj espíritu ayudajpimi sinchi tucurca. Israel llajtapi huillai callaringacamami paica chaquishca pambacunapi causarca.
Notacuna
^ Paica Jatun Herodes nishcami can. “Herodes” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “manaraj huacharijpimi”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “paipaj yaya” ninmi.
^ “Jehová” shutita huasha diccionariopi ricui.
^ “Espíritu santo” shimita huasha diccionariopi ricui.
^ O “Diospajca imapish mana sinchichu”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “Ñuca almaca”. “Alma” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Circuncisión” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “quishpichij gachuta” ninmi. Bibliapica shuj animalpaj gachumanta parlashpaca poderta, autoridadta charishcata ricuchingapajmi chashna nin.
^ “Jehová” shutita huasha diccionariopi ricui.
