Jueces 3:1-31
3 Canaán llajtahuan mana macanacushca israelitacuna Diosta cazujta, mana cazujta ricungapajmi Jehová Diosca huaquin llajtacuna tiyashpa catichun saquirca.
2 Israelitacunapaj qꞌuipa shamuj churicuna macanacuna experienciata mana charishcamanta, paicuna macanacungapaj experienciata charichunmi cai llajtacuna tiyachun saquirca.
3 Filisteocunapaj pichca* mandajcunata, tucui cananeocunata, sidoniocunata, Líbano urcupi causaj heveocunatami tiyachun saquirca. Heveocunaca Baal-Hermón urcumantaca Lebó-Hamatcamami* causajcuna carca.
4 Jehová Diosca Moisesmanmi israelitacunapaj ñaupa yayacunaman mandashcacunata cuchun curca. Chai llajtacunaca mandashcacunata israelitacuna cazushcata, mana cazushcata ricuchichunmi sirvirca.
5 Chaimi israelitacunaca cananeocunapaj, hititacunapaj, amorreocunapaj, perizitacunapaj, heveocunapaj, jebuseocunapaj chaupipi causarcacuna.
6 Shinallataj israelitacunaca chai llajtacunapaj ushushicunatami paicunapaj huarmi cachun japircacuna. Paicunapaj propio ushushicunatapish paicunapaj churicunahuanmi cazarachircacuna. Chashnami paicunapaj dioscunata sirvi callarircacuna.
7 Israelitacunaca Jehová Diospaj ñaupajpica mana allicunatami rurarcacuna. Paicunaca paicunapaj Jehová Diostami cungarircacuna. Baal dioscunatapish, adorana postecunatapishmi* sirvircacuna.
8 Chaimantami Jehová Diosca israelitacunahuan yallitaj pꞌiñarishpa, paicunataca Mesopotamia* allpamanta rey Cusán-Risataimpaj maquipi entregarca.* Chaimi israelitacunaca Cusán-Risataim reytaca pusaj* huatacunata sirvircacuna.
9 Israelitacuna Jehová Diosta ayudachun rogarijpimi Jehová Diosca paicunata quishpichingapaj Quenazpaj churi Otnielta curca. Quenazca Calebpaj qꞌuipa huauquimi carca.
10 Jehová Dios Otnielman paipaj espíritu santota cujpimi paica israelitacunapaj juez tucurca. Otniel macanacunaman llujshishpaca Mesopotamiamanta* rey Cusán-Risataimtami misharca. Jehová Diosmi chai reytaca Otnielpaj maquipi entregarca.
11 Chai huashaca 40 huatacunatami chai llajtapi tranquilo causai tiyarca. Chai qꞌuipami Quenazpaj churi Otnielca huañurca.
12 Israelitacunaca cutinllatajmi Jehová Diospaj ñaupajpica mana allicunata rurai callarircacuna. Chaimi Jehová Diosca Moab llajtamanta rey Eglón paicunata mishachun saquirca. Israelitacunaca Jehová Diospaj ñaupajpica mana allicunatami ruracurcacuna.
13 Ashtahuanpish Diosca ammonitacunata, amalequitacunataca israelitacunapaj contra macanacuchunmi saquirca. Paicunaca palmera yuracuna tiyan llajtatapishmi mishashpa japircacuna.
14 Israelitacunaca Moab llajtamanta rey Eglontami 18 huatacunata sirvircacuna.
15 Chaimi israelitacunaca Jehová Diosta ayudachun rogarcacuna. Chashna rogarishpa mañajpimi Jehová Diosca benjaminitacunapuramanta Guerapaj churi Ehudta quishpichichun curca. Ehúd runaca lluqui maquihuanmi imatapish ashtahuan alli ruraj carca. Asha tiempo huashaca israelitacunaca Moab llajtamanta rey Eglonmanmi tributota pagachun Ehudta cacharcacuna.
16 Ehudca ishqui filoyuj shuj espadatami rurarca. Chai espadaca largomanca 44 centimetrocuna yallitami* midirca. Chai qꞌuipaca paica churana ucupi chumbillirishpami chai espadataca alli lado changa uripi aparca.
17 Ehudca Moab llajtamanta rey Eglonpajman chayashpaca tributotami paiman curca. Chai mandajca yallitaj gordomi carca.
18 Ehudca tributota entregashca qꞌuipaca tributota paihuan apamuj gentecunataca minchacama nishpami cacharca.
19 Ehudca Guilgalpi tiyaj rurashca dioscunapajman* chayashca qꞌuipami reypajman tigrashpaca: “Ñuca mandaj, canlla yachana shuj huillaitami charini” nirca. Chaimi reyca: “¡Ñucanchijllata saquichij!” nirca. Chashna nijpimi tucui sirvijcunaca chaimanta rircacuna.
20 Reyca terrazapi tiyaj cuartopimi* pailla tiyacurca. Chaipimi Ehudca paipajman cꞌuchuyashpaca: “Cambajmi Diosmanta shuj huillaita charini” nirca. Rey chaita uyashpaca paipaj jatun tiyarinamantami shayarirca.
21 Ehudca lluqui lado maquihuan, alli lado changamanta espadata llujshichishpami Eglonpaj huijsapi satirca.
22 Chaimi tucui espada, espadapaj maqui japinandij huijsapi yaicurca. Reypaj huijsamanta Ehúd espadata mana llujshichijpimi huiraca espadata taparca. Reypaj huijsamantapish ismami llujshirca.
23 Ehudca terrazapi tiyaj cuartopaj pungucunata llavehuan huichcashpami corredorta miticushpa rirca.
24 Ehúd miticushpa llujshishca qꞌuipami reyta sirvijcunaca tigrashpa terrazapi tiyaj cuartopaj pungucuna llavehuan huichcashcata ricurcacuna. Chaimi paicunaca: “Reyca paipaj chirijlla cuartopimi bañota ruracunga” nircacuna.
25 Reyta sirvijcunaca terrazapi tiyaj cuartopaj pungucunata rey mana pascajta ricushpami paicunaca achca tiempota shuyashcamanta sustarircacuna. Chaimi paicunaca llaveta japishpa punguta pascarcacuna. ¡Punguta pascashpaca paicunapaj amo pambapi* huañushcatami japircacuna!
26 Paicuna imata ruranata yuyaringacamaca Ehudca miticushpami rirca. Paica rurashcalla dioscuna tiyashcata pasashpaca Seirá llajtamanmi alli, sano chayarca.
27 Chai llajtaman pai chayashpaca Efraín urcucunapimi gachuta tocachirca. Israelitacunaca paihuanmi chai urcucunamanta uriyarcacuna. Ehudca israelitacunapaj ñaupajtami rirca.
28 Chaimi Ehudca: “Jehová Diosca cancunapaj contra moabitacunataca cancunapaj maquipimi entregashca. Chaimanta ñucata catichij” nirca. Chashna nijpimi israelitacunaca Ehudta catishpa rircacuna. Moabitacuna miticushpa ama richunmi Jordán jatun yacuta chꞌimbana ñancunapi paicunaca shayarircacuna. Chashna shayarijpimi moabitacunaca mana chꞌimbai tucurcacuna.
29 Paicunaca chai punllapica mana manchaj, sinchi 10.000 moabitacunatami huañuchircacuna. Shujllapish mana miticushpa ri tucurcachu.
30 Chashnami chai punllapica israelitacunaca moabitacunata misharcacuna. Chaimantami 80 huatacunata chai llajtapica tranquilo causai tiyarca.
31 Ehudpaj qꞌuipaca Anatpaj churi Samgarmi juez carca. Samgar runaca 600 filisteocunataca huagracunata tujsina garrochahuanmi* huañuchirca. Chashnami paica israelitacunataca quishpichirca.
Notacuna
^ O “cinco”.
^ O “Hamatman yaicuncamami”.
^ “Adorana poste” shimita huasha diccionariopi ricui.
^ Hebreo rimaipica: “Aram-Naharaim” ninmi.
^ Hebreo rimaipica: “cꞌaturca” ninmi.
^ O “ocho”.
^ Hebreo rimaipica: “Arammanta” ninmi.
^ Hebreo rimaipica: “shuj codo” ninmi. Pero caipica shuj uchilla codomantami parlacuj yuyachin. Chaica casi 38 centimetrocunatami charin. Ayuda B14-ta ricui.
^ Caitaca “rumicunata llujshichina lugarcuna” nishpapishmi traducishcacuna.
^ Caica chiri cuartomi carca.
^ Hebreo rimaipica: “allpaman urmashca” ninmi.
^ “Tujsina garrocha” shimita huasha diccionariopi ricui.
