Judas 1:1-25
1 Ñucaca Jesucristota sirvij, Santiagopaj huauqui Judasmi cani. Cancunaca Yaya Dios cꞌuyashpa agllashcacuna, Jesucristohuan cangapaj huaquichishcacunami canguichij. Cancunamanmi caita quillcani:
2 Dios cancunata ashtahuan cꞌuyachun, llaquichun, sumaj causaitapish cuchunmi mañani.
3 Cꞌuyashca huauquicuna, quishpichishca canamantami quillcasha nicurcani. Shinapish cunanca Dios yachachishcacunapi feta churashpa catichun animangapajmi quillcasha nini. Chai yachachishcacunataca jucha illajcunamanmi shuj cutinlla huiñaipaj Diosca curca.
4 Ñaupa punllacunapi profetacuna nishca shinaca, millai runacunami cancuna manaraj cuentata cujpi cancunapurapi yaicushca. Chai millai runacunaca Dios yallitaj llaquij cashcata yachashpapish, millai ruraicunataca mana pingashpami* ruranllacuna. Ñucanchijta randij Amito Jesucristotapish mana cazuncunachu. Chai millai runacunataca Diosmi juzganga.
5 Jehová* Diosca paipaj pueblotaca Egipto llajtamanta llujshichishpami quishpichirca. Shinapish qꞌuipaca paipi feta mana charijcunataca chingachircami. Cancuna caita alli yachajpipish yuyachinatami munani.
6 Huaquin angelcunaca Diospajta ruranatapish, jahua pachapi causanatapishmi saquircacuna. Paicunaca Diospaj jatun punllapi juzgashca cangapajmi, mana pꞌitirij cadenacunahuan huatashca shina yallitaj amsapi can.
7 Shinallataj Sodoma, Gomorra llajtacuna, chai cꞌuchulla llajtacunapi causajcunapish yallitaj huainayashpami* causarcacuna. Paicunaca aicha munaicunallapi yuyashpami mana rurana cashcata rurarcacuna. Chaimantami Diosca paicunataca ninahuan huiñaipaj tucuchirca. Ñucanchijpish paicuna shina ama tucungapajmi chashna quillcashca tiyacun.
8 Chashna tucushcata yachashpapish chai runacunaca mana allita rurana yuyailla, mapa ruraicunata rurashpallami causancuna. Shinallataj autoridadcunata mana cazushpa, Dios jatunyachishcacunatapish yangamanta cꞌamishpami purincuna.
9 Arcángel* Miguelca Moisespaj cuerpomantami Diablohuan pꞌiñanacucurca. Chashna jahuapish Miguelca Diablotaca mana juzganata yuyarcachu. Paitaca llaquichij shimicunahuanpish mana rimarcachu. Ashtahuanpish: “Jehová* Dios canta juzgachun” nircami.
10 Shinapish chai runacunaca manapish imata intindishpami yangamanta cꞌamishpa rimancuna. Cutin imata intindishpapish animalcuna shina yuyai illaj tucushpami millaita rurashpa catincuna.
11 ¡Aij chashna rurajcunalla! Paicunaca Caín rurashcatami* catircacuna. Imata japingaraicullami Balaam rurashcata catishpa pandarishcacuna. Coré runa shina cꞌariyashpa rimashcamantami huañungacuna.
12 Chai runacunaca huauqui panicunahuan shina cancunahuan micucushpapish yacu ucupi pacashca rumicuna shinami. Michijcuna cashpapish paicunallapi yuyashpami mana manchashpa micuncuna. Paicunaca yacu illaj pꞌuyuta caiman chaiman huaira apashca shinami. Pꞌucuna punllacuna cajpipish mana granoj yuracuna shinami. Sapimanta surcushca yuracuna shina libri huañushcacunami.
13 Chai runacunaca mama cucha pꞌiñarishpa mapa puscuta shitacuj shinami. Ima pingaita mana charincunachu. Maita rinata mana yachaj estrellacuna shinami tucushcacuna. Diosca paicunataca yallitaj amsapimi churashca. Chaipimi huiñaicama saquiringacuna.
14 Adanpaj huahua huahuacunamanta shamuj canchis huahuaca Enocmi carca. Paica chai runacunamantaca: “¡Ricuichij! Jehová* Diosca huaranga huaranga jucha illaj angelcunahuanmi shamunga.*
15 Paica tucuicunata juzgangapajmi shamunga. Shinallataj paita mana jatunyachishpa millaita rurajcunatami culpayuj cashcata ricuchinga. Chai millai runacunataca tucui laya millaita rurashcamanta, paita cꞌamishcamantami chashna ruranga” nircami.
16 Chai runacunaca quejarishpallami purincuna, imalla charishcacunahuanpish mana cushicuncunachu. Ashtahuanpish paicuna munashcallatami rurashpa causancuna. Jatun tucushpami imatapish rimarincuna. Imata japingaraicullami shujtajcunataca alabancuna.
17 Chaimanta cꞌuyashca huauquicuna, ñucanchij Amito Jesucristopaj apostolcuna ñaupaman imalla nishcata alli yuyarichij.
18 Paicunaca: “Tucuri punllacunapica asishpa chanzata ruraj runacunami tiyanga. Chai runacunaca paicunapaj millai munaicunata rurashpami causangacuna” nijcunami carca.
19 Chai runacunaca huauqui panicunata chꞌicanyachijcunami. Diospaj espirituta mana charishcamantami animalcuna shina imatapish rurancuna.
20 Shinapish cꞌuyashca huauquicuna, Diospi feta churashpa cancunallataj sinchiyarishpa catichij. Shinallataj espíritu santopaj ayudahuan Diosta mañaichij.
21 Chashnami Diospaj cꞌuyaimantaca manataj caruyanguichij. Ñucanchij Amito Jesucristo cancunata llaquishcata ricuchingacama shuyaichij. Chashna shuyashpami huiñai causaita chasquinguichij.
22 Ashtahuanpish caita chaita yuyajcunataca llaquishpa catichij.
23 Paicunataca ninamanta llujshichij shina quishpichichij. Cutin shujtajcunataca llaquishpa catichij. Shinapish paicunapaj juchahuan mapayashca ruraicunata pꞌiñaichij.* Chaicunata ama rurangapajpish cuidarichij.
24 Ñucanchij jatun Diosca juchapi ama urmachunmi cancunataca cuidai tucun. Shinallataj paipaj ñaupajpi chuya cachun, yallitaj cushilla cachunmi cancunataca ayudai tucun.
25 Ñucanchij Amito Jesucristomanta ñucanchijta Quishpichij shujlla Diosca alabashca cachun. Jatun canapish, poderyuj canapish, mandaj canapish ñaupapish, cunanpish, huiñai huiñaicamapish paipajlla cachun. Chashna cachun.*
Notacuna
^ Griego rimaipica: “asélgueia” ninmi. “Millai pinganayai ruraicuna” shimita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ O “Angelcunata mandaj”. “Arcángel” shimita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “Cainpaj ñantami” ninmi.
^ “Jehová” shutita huasha diccionariopi ricui.
^ Griego rimaipica: “shamurca” ninmi.
^ Griego rimaipica: “aicha mapayachishca churanatapish pꞌiñaichij” ninmi.
^ O “Amén”.
