Juan 7:1-52
7 Chai qꞌuipaca Jesusca Galileapimi huillashpa catirca.* Judiocuna paita huañuchingapaj mashcacushcamantami Judea llajtamanca mana risha nirca.
2 Judiocuna Chuglla huasicunata rurana fiestapish* ñami chayamucurca.
3 Chaimantami Jesuspaj huauquicunaca paitaca cashna nirca: “Caimanta llujshishpa Judeaman ri. Chaipi caj canta catijcunapish can imata ruracushcata ricuchun.
4 Maijanpish tucuicuna rijsichun munashpaca imatapish mana pacalla ruranchu. Chaimanta can ruracushcacunataca tucui gentecunapaj ñaupajpi ruragri” nircacuna.
5 Jesuspaj huauquicunaca paipi feta charishcataca mana ricuchijcunachu carca.
6 Chaimi Jesusca paicunamanca cashna nirca: “Ñucapaj agllashca punllaca manaraj chayamushcachu. Ashtahuanpish cancunapajca ima horapish allimi.
7 Cai pacha gentecunaca cancunataca imamanta mana pꞌiñai tucunchu. Ashtahuanpish ñucataca paicuna millaita ruracushcata huillashcamantami pꞌiñancuna.
8 Cancunaca chai fiestaman huichiyaichijlla. Ñucaca chai fiestamanca manaraj huichiyagrinichu. Ñucapaj agllashca punllaca manaraj chayamushcachu” nircami.
9 Paicunaman chashna nishpaca Jesusca Galileapimi saquirirca.
10 Shinapish paipaj huauquicuna fiestaman huichiyashca qꞌuipami Jesusca pi mana ricucujpi, pacalla chai fiestaman huichiyarca.
11 Chai fiestapimi judiocunaca Jesusta mashcai callarishpaca: “¿Maipishi chai runaca?” nircacuna.
12 Chaipi caj gentecunamantaca achcacunami shimi ucullapi Jesusmanta parlanacucurcacuna. Maijancunaca: “Paica alli runamari” nircurcacunami. Cutin shujtajcunaca: “Cai runaca mana allichu. Ashtahuanpish gentecunata pandachishpallamari puricun” nicurcacunami.
13 Chashnapish judiocunata manchashcamantami tucuicunapaj ñaupajpica Jesusmantaca ni pi mana parlasha nirca.
14 Fiesta punllacuna chaupiyacujpimi Jesusca Diospaj huasiman* rishpa, chaipi yachachi callarirca.
15 Jesús chashna yachachijpimi judiocunaca mancharircacuna. Chaimi paicunaca: “¿Cai runaca ima shinataj yachana huasicunaman* mana rishca cashpapish Dios quillcachishcacunataca achcata yachanyari?” nircacuna.
16 Shina nijpimi Jesusca cashna cutichirca: “Ñuca yachachishcacunaca mana ñucapajchu. Ashtahuanpish ñucata cachaj Diospajmi.
17 Maijanpish Diospaj munaita rurasha nijca, ñuca yachachishcacuna Diosmanta shamushcata o ñuca yuyaillamanta cashcatami yachanga.
18 Maijanpish paipaj yuyaillamanta yachachijca paita jatunyachichunmi mashcan. Ashtahuanpish paita cachajta jatunyachichun mashcajca mana llullashpami parlan, cashcatapishmi ruran.
19 Moisesmi cancunamanca Leyta curca ¿nachu? Shinapish cancunamantaca shujllapish chai Leytaca mana cazunguichijchu. ¿Imamantataj ñucataca huañuchishun nicunguichijyari?” nircami.
20 Chashna nijpimi gentecunaca: “¡Demoniotami* charingui! ¿Pitaj cantaca huañuchisha nicunyari?” nishpa cutichircacuna.
21 Chaimi Jesusca cashna cutichirca: “Shuj milagrotami rurarcani. Chaimantami tucui cancunaca mancharishca canguichij.
22 Caita yuyaichij: Moisesmi circuncisionta* rurana leytaca cancunaman curca. Chaimantami cancunaca sábado punllapi cꞌari huahuataca circuncisionta rurachinguichij. (Circuncisionta ruranaca mana Moisesmantachu shamun, ashtahuanpish cancunapaj ñaupa yayacunamantami shamun).
23 Cancunaca Moisesman cushca leyta mana pꞌaquisha nishpami sábado punllapi cꞌari huahuataca circuncisionta rurachinguichij. Shinaca ¿sábado punllapi shuj runata alliyachijpica imamantataj ñucahuanca yallitaj pꞌiñaringuichij?
24 Ñahuita ricushpallaca ama juzgaichijchu, chaipaj randica cashcata rurashpa juzgaichij” nircami.
25 Chashna nijta uyashpami Jerusalenpi causajcunamanta huaquincunaca cashna nircacuna: “Cai runatami mandajcunaca huañuchingapaj mashcacuncuna ¿nachu?
26 Ricuichij, paica tucuicunapaj ñaupajpimari parlacun. Maijanpish imata mana ninchu. ¿Ñucanchij llajtata mandajcunapish paica Cristo cashcatachu yuyancuna imashi?
27 Ñucanchijca cai runa maimanta cashcataca yachanchijmari. Ashtahuanpish Cristo shamujpica pai maimanta cashcataca pi mana yachangachu” nircacunami.
28 Chaimantami Jesusca Diospaj huasipi yachachicushpaca sinchita rimashpa cashna nirca: “Cancunaca ñucata rijsinguichijmi, maimanta cashcatapish yachanguichijmi. Ñuca munaimantaca mana shamurcanichu. Ñucata cachajca tiyantajmi, cancunaca paitaca mana rijsinguichijchu.
29 Ñucaca paitaca rijsinimi. Paipaj shutipimi ñucaca shamushcani. Paimi ñucata cacharca” nircami.
30 Chaita nishcamantami ima shina Jesusta japinata munashpapish, paipaj punlla manaraj chayashcamanta paitaca ni pi mana japirca.*
31 Ashtahuanpish chaipi cajcunamanta achcacunami Jesuspi crircacuna. Chaimantami paicunaca: “Cai runaca achca milagrocunatamari ruracun. Cristo shamushpaca cai runatapish yalli milagrocunataca mana rurangachu ¿nachu?” nircacuna.
32 Gentecuna Jesusmanta chashna shimi ucullapi parlanacucujtami fariseocunaca uyarcacuna. Chaimantami fariseocunapish, sacerdotecunata mandajcunapish Jesusta japichun guardiacunata cacharcacuna.
33 Chaimi Jesusca gentecunamanca cashna nirca: “Ñucata cachajpajman manaraj rishpami asha tiempocama cancunahuan cagrini.
34 Cancunaca ñucata mashcashpapish mana japinguichijchu. Ñuca maipi cashcamanpish mana ri tucunguichijchu” nirca.
35 Chashna nijpimi judiocunaca paicunapura parlanacushpaca cashna nircacuna: “Cai runaca ñucanchij ama japichunca, ¿maimanshi risha nicun? ¿Griegocunapurapi causaj judiocunapajman rishpachu, griegocunata yachachinaman risha nicun?
36 ¿‘Cancunaca ñucata mashcashpapish mana japinguichijchu. Ñuca maipi cashcamanpish mana ri tucunguichijchu’ nishpaca paica imatashi nisha nirca?” nircacuna.
37 Fiesta tucuri jatun punllapimi Jesusca shayarishpa sinchita rimashpaca: “Maijanpish yacunaihuan cashpaca ñucapajman shamuchun. Ñucami yacuta ubyachun paimanca cusha.
38 Dios quillcachishcapi nishca shinaca, ñucapi feta churajpica ‘paipaj shungu ucumantaca causaita cuj yacuca llujshicungallami’” nirca.
39 Chashna nishpaca paipi feta charishcata ricuchijcuna Diospaj espirituta chasquina cashcatami Jesusca parlacurca. Jesús manaraj jatunyachishca cashcamantami paicunaca Diospaj espiritutaca manaraj chasquircacuna.
40 Chaita uyashpami chaipi cajcunamanta maijancunaca: “Caimari chai shamuna cashca Profetaca” nircacuna.
41 Shujtajcunaca: “Caimari Cristoca” nircacunami. Cutin caishujcunaca: “Cristoca mana Galileamanta shamungachu ¿nachu?
42 ¿Manachu Dios quillcachishcapica David causashca Belén uchilla pueblomanta, Davidpaj huahua huahuacunamantami Cristoca shamunga nin?” nircacunami.
43 Chashna ninacushpami Jesusmanta parlashpaca mana shuj yuyailla tucurcacuna.
44 Paicunapuramanta maijancuna Jesusta japishun nishpapish ni pi mana japircacunachu.*
45 Guardiacunaca sacerdotecunata mandajcunapajman, fariseocunapajmanmi tigramurcacuna. Chaipimi fariseocunaca: “¿Imamantataj paita japishpa mana pushamurcanguichij?” nishpa tapurcacuna.
46 Chashna tapujpimi guardiacunaca: “¡Cai runa shinaca nunca pi mana parlashcachu!” nircacuna.
47 Chashna nijpimi fariseocunaca: “¿Cancunatapishchu paica crichirca?
48 Ñucanchij llajtata pushajcunamanta, fariseocunamantaca maijanpish paipica mana crishcachu ¿nachu?
49 Shinapish Moisesman cushca leyta mana intindij cai gentecunataca Diosmi millanayachishca” nircacunami.
50 Chashna nijpimi Jesusta ñaupaman ricunaman rij Nicodemoca paicunapura cashpapish cashna nirca:
51 “Ñucanchij Leypi nishca shinaca shuj runata manaraj uyashpa, pai imata ruracushcata manaraj yachashpaca mana juzganallachu canchij ¿nachu?” nircami.
52 Caita uyashpami paicunaca: “¿Canpishchu Galileamanta cangui? Dios quillcachishcapi ricushpa alli yachaiyari, Galileamantaca shuj profetallapish mana shamuna cashcatami ricungui” nircacuna.*
Notacuna
^ O “purirca”.
^ “Chuglla huasicunata rurana fiesta” shimita huasha diccionariopi ricui.
^ “Diospaj huasi” shimita huasha diccionariopi ricui.
^ Cai yachana huasicunapica religionta pushajcunami yachachij carca.
^ O “Supaitami”.
^ “Circuncisión” shimita huasha diccionariopi ricui.
^ Griego rimaipica: “paipaj jahuapica ni pi shuj maquita mana churarcachu” ninmi.
^ Griego rimaipica: “paipaj jahuapica ni pi maquicunata mana churarcachu” ninmi.
^ Juan 7:53-versomanta Juan 8:11-versocamaca ñaupa valishca quillcashcacunapica mana tiyanchu.
