Hechos 28:1-31
28 Chashna tucuicuna yacumanta alli llujshishpaca, Malta shuti islapi cashcatami yachaj chayarcanchij.
2 Chaipi causajcunapish ñucanchijtaca yallitaj llaquishpami chasquircacuna. Achcata tamyacushcamanta, chiri cashcamantapishmi paicunaca ninata japichishpa ñucanchijtaca alli chasquircacuna.
3 Pabloca maqui junda ramacunata tandashpami ninapi shitarca. Chashna shitajpimi shuj culebraca ninamanta llujshishpa Pablopaj maquita canishpa huarcurirca.
4 Chai islapi causajcuna Pablopaj maquipi culebra huarcurishcata ricushpaca caishuj chaishujmi: “Cai runaca huañuchij runami caj yuyachin. Mama cuchapi mana huañushca cajpipish, Cashcata Ruraj diosca* pai causashpa catichunca mana saquishcachu” nircacuna.
5 Shinapish Pablo paipaj maquita chaspirijpimi culebraca ninaman urmarca. Culebra canijpipish paica ima mana tucurcachu.
6 Chaipi caj runacunaca Pablo pꞌunguillichun, mana cashpaca ñapish pambaman urmashpa huañuchunmi shuyacurcacuna. Ashtahuanpish ña tiempo pasajpi, paicuna yuyacushca shina mana tucujpimi paicuna yuyashcata cambiashpa paica shuj diosmari ni callarircacuna.
7 Chai cꞌuchullapica, chai islata mandajmi achca allpacunata charirca. Paica Publio shutimi carca. Paimi ñucanchijtaca alli chasquirca. Shinallataj quimsa punllacunatami paipaj huasipi saquirircanchij.
8 Publiopaj yayaca fiebre ungüihuan, achca huijsa nanaihuanpishmi* camapi siricurca. Chaimi Pabloca pai maipi cashcaman yaicushpa Diosta mañashca qꞌuipaca paipaj jahuapi maquicunata churashpa alliyachirca.
9 Chashna alliyachishcata yachaj chayashpami chai islapi causaj shujtaj ungushcacunapish paicunata alliyachichun Pablota ricunaman rircacuna. Chaimi paicunatapish Pabloca alliyachirca.
10 Paicunaca pagui ningapajmi ñucanchijmanca achca regalocunata curcacuna. Ña barcopi rigrijpipish tucui imalla minishtishcacunatami curcacuna.
11 Quimsa quillacunata chai islapi cashca qꞌuipami shuj barcopi rircanchij. Chai barcopaj ñaupajpica “Zeuspaj Churicuna”* nishca adornocunatami churashca carca. Chai barcoca Alejandriamantami carca. Tucui tamya punllacunatami chai islapi saquirishca carca.
12 Siracusa llajtaman chayashpaca quimsa punllacunatami chaipi saquirircanchij.
13 Chaimanta rishpaca Regio llajtamanmi chayarcanchij. Cayandij punllaca ura ladomanta huaira jatarijpimi ishqui punllacunapi barcocuna shayarina Puteoli nishcaman chayarcanchij.
14 Chaipimi huauquicunahuan tuparcanchij. Paicunaca canchis punllacunata paicunahuan saquirichunmi rogarcacuna. Chai qꞌuipaca Roma llajtamanmi rircanchij.
15 Roma llajtapi caj huauquicunaca ñucanchij chaiman ricujtami yachaj chayarcacuna. Chaimantami Tres Tabernas* nishcapi tupanaman shamurcacuna, cutin maijancunacarin Apio shuti pueblo plazacamami shamurcacuna. Pablo chai huauquicunata ricushpaca Diosta pagui nishpami cushilla sintirirca.
16 Ña Roma llajtaman chayajpica Pablotaca shuj huasipi pailla causachunmi saquircacuna. Paita cuidachunpish shuj soldadotami chaipi churarcacuna.
17 Shinapish quimsa punllacunata chaipi cashpami Pabloca tucuicuna alli nishca judiocunata cayarca. Ña tucuicuna tandanacujpimi paica cashna nirca: “Huauquicuna, ñucanchij llajtapaj contraca imata mana rurarcanichu. Ñucanchij ñaupa yayacunapaj costumbrecunapaj contrapish imata mana rurarcanichu. Chashnapish Jerusalenpica romanocuna prezupi churachunmi ñucataca entregarcacuna.
18 Ñucata tapushca qꞌuipami huañuchingapaj ima culpayuj mana cashcata ricushpa cacharichinata munarcacuna.
19 Shinapish judiocuna mana shuj yuyailla tucujpimi César* juzgachun mañarcani. Mana ñuca llajtata juchachingaraicuchu chashna mañarcani.
20 Chaimantami cancunata ricushpa, caimanta parlasha nircani. Israelitacuna shuyacushca runamantami cai cadenahuan huatashca cani” nirca.
21 Chashna nijpimi paicunaca cashna nircacuna: “Judea llajtamantaca ni pi mana canmantaca quillcashcacunachu. Shinallataj chaimanta shamuj huauquicunapish ima noticiata mana apamushcacunachu. Canmantapish ima mana allitaca ñucanchijmanca mana nishcacunachu.
22 Shinapish can imata yuyashcatami cambaj propio shimimanta uyashun ninchij. Tucui ladocunapimi cai mushuj religionmantaca mana allita nishpa rimacuncuna” nircacunami.
23 Shina nishpami paicunaca Pablohuan shuj punlla tandanacungapaj yuyarircacuna. Ña chai punlla chayajpica, Pablo causacushca huasimanca ashtahuan achca gentecunami tandanacurcacuna. Chaimi Pabloca tutamantamanta chishicama Diospaj Gobiernomanta tucuita alli huillarca. Paicunapish Jesuspi crichun munashpami Pabloca Moisesman cushca leymantapish, Profetacuna quillcashcacunamantapish yachachirca.
24 Pablo chashna nishcacunataca maijancunaca crircacunami. Cutin shujtajcunaca mana crircacunachu.
25 Paicunapura mana shuj yuyailla tucushpami ri callarircacuna. Chaimi Pabloca cashna nirca:
“Chashna cana cajpimari espíritu santoca cancunapaj ñaupa yayacunamanca profeta Isaiasman huillachishpa
26 cashna nirca: ‘Chai llajta gentecunapajman rishpa cashna ni: “Cancunaca uyashpapish imata mana intindinguichijchu. Ricushpapish imata mana ricunguichijchu.
27 Cai gentecunapaj shunguca rumi shina sinchimi tucushca. Paicunaca uyashpapish mana cazuncunachu. Imata mana ricungapajmi ñahuicunataca huichcancuna. Imata mana uyangapajmi rinrincunatapish taparincuna. Paicunapaj shungupica ñuca imata mañashcataca manataj intindincunachu. Paicunata jambichunpish ñucapajmanca mana tigramuncunachu”’ nircami.
28 Chaimanta caita uyaichij, gentecunata Dios ima shina quishpichina huillaica shujtaj llajta gentecunamanmi huillachishca cashca. Paicunaca chai huillaitaca uyangacunami” nircami.
29 *——
30 Pabloca pai alquilashca huasipimi ishqui huatacunata saquirirca. Paita visitanaman shamujcunataca tucuicunatami cꞌuyaihuan chasquij carca.
31 Paicunamanca Diospaj Gobiernomantami huillarca. Amito Jesucristomantapish mana manchashpami yachachirca. Pablo chashna rurachunca ni pi mana jarcarcachu.
Notacuna
^ Griego rimaipica: “Díkē” ninmi. Cai shimica cashcata rurashpa imatapish pajtachij huarmi diosmantami parlacuj yuyachin.
^ O “huijsa cacharirishcapishmi”.
^ Zeuspaj gemelo churicunaca Cástor, Pólux shuticunami carca.
^ Tres Tabernasca gentecuna samaringapaj, micungapaj pushtumi carca.
^ “César” shutita huasha diccionariopi ricui.
^ Cai versoca ñaupa quillcachishcacunapica mana ricurinchu. Huaquin Bibliacunapi ricurijpipish chai yuyaicunataca Diosca mana quillcachishcachu.
