Efesios 3:1-21
3 Ñucaca Cristo Jesusta catij cashcamanta, mana judiocuna cajpipish cancunata ayudashcamanta carcelpi caj Pablomi cani...
2 Dios yallitaj llaquij cashcata cancunaman ricuchishpa ayudangapajmi ñucaca shuj mayordomo shina agllashca cashcani. Chaitaca cancunaca allimi yachanguichij.
3 Diosmi ñucamanca pi mana yachai tucushcata muscuipi shina ricuchirca. Chaitami ñaupamanca cancunamanca ashata ña quillcarcani.
4 Caita liyishpaca Cristomanta pi mana yachai tucushcata ñuca alli intindishcatami cuentata cunguichij.
5 Diosca paipaj espíritu santohuanmi jucha illaj apostolcunaman, profetacunamanpish pi mana yachai tucushcata cunanca ricuchishca. Chaitaca ñaupa tiempo gentecunamanca mana ricuchircachu.
6 Pi mana yachai tucushcaca caimi: mana judiocunapish Cristo Jesushuan shuj shinalla cashcamantami Cristo japishca herenciata paicunapish japingacuna. Chashnami shuj solo grupo tucungacuna. Paicunaca alli huillaicunata chasquishcamantami Dios ñucanchijman cusha nishcacunallatataj japingacuna.
7 Diosmi yallitaj llaquij cashcamanta pi mana yachai tucushcata cancunaman intindichichun ñucataca agllarca. Paipaj podermantami chai regalota chasquircani.
8 Ñucaca tucui jucha illajcunamanta ashtahuan uchillami cani. Chashna cajpipish Cristo cushca bendicioncunamanta alli huillaicunata mana judiocunaman huillachun ñucata agllashpami Diosca yallitaj llaquij cashcata ricuchirca. Chai bendicioncunaca mana yupaipajmi.
9 Shinallataj tucuita ruraj Diosca pi mana yachai tucushcata pai ima shina pajtachicujta gentecuna ricuchunmi chashna rurarca. Pi mana yachai tucushcataca achca tiempotami paica pacallata charicurca.
10 Chashna rurashpami Diosca cunanca jahua pachapi caj gobiernocunaman, autoridadcunamanpish paipaj alli yachaita congregacionhuan ricuchinata munarca. Paipaj alli yachaitaca chꞌican chꞌican layami ricuchin.
11 Diosca pai imata rurasha nishcataca huiñaimanta yuyarishca shinallatajmi, ñucanchij Amito Cristo Jesushuan pajtachisha nishca.
12 Cristomantami ñucanchijca mana manchashpa parlai tucunchij. Shinallataj Cristopi feta charishcamantami Diosta mañangapajpish ñucanchijtaca ima mana jarcan.
13 Chaimantami cancunamanta ima llaquicunata ñuca apacujpica ama desanimarichun nishpa rogapani. Cai llaquicunaca cancunata jatunyachingapajmi can.
14 Chaimantami ñucaca Yaya Diospaj ñaupajpi cungurini.
15 Paimi tucui familiacuna jahua pachapipish, cai pachapipish tiyachun rurarca.
16 Paipaj espiritupaj poderhuan cancunapaj shunguta sinchiyachichunmi Diosta mañani. Paica jatun Diosmi can.
17 Feta charishcamanta cancunapaj shungupi Cristota charichun, shujtajcunaman cꞌuyaita ricuchinapish cancunapaj shungupi tiyachunmi Diosta mañani. Shinallataj cancunaca sapiyashca shina, cimiento jahuapi alli huasichishca shina sinchi cachunmi mañani.
18 Chashna cashpami cancunaca tucui jucha illajcunahuan mana llulla yachaicunataca anchota, largota, jahuata, ucujta alli intindi tucunguichij.
19 Shinallataj Cristopaj cꞌuyaitami rijsinguichij. Chai cꞌuyaica yachaitapish yallimi can. Chashnami Dios cushca tucui allicunata chasquinguichij.
20 Diosca paipaj poderhuanmi tucui ñucanchij mañashcatapish yalli, ñucanchij yuyashcatapish yalli rurai tucun. Diospaj podermi ñucanchijpi can.
21 Diosca congregacionmantapish, Cristo Jesusmantapish huiñai huiñaita jatunyachishca cachun. Chashna cachun*
Notacuna
^ O “Amén”.
