Colosenses 2:1-23
2 Cancunatapish, Laodiceapi cajcunatapish, ñahui ñahui ñucata mana rijsij tucui caishujcunatapish ayudangapajmi sinchita esforzaricuni. Chaita yachachunmi munani.
2 Tucui cancunata cushichingapaj, shuj shinalla cꞌuyanacuchunmi chashna esforzaricuni. Chashnami Dios pacalla charicushcata alli yachashpa, alli intindishpa tucuicuna achcata charijcuna tucunguichij. Dios pacalla charicushcaca Cristomi.
3 Paipimi tucui valishca yachaipish, tucui sumaj yuyaipish alli pacashca tiyacun.
4 Sumaj rimaicunahuan cancunata pipish ama pandachichunmi chashna nini.
5 Cancunahuan mana chaipi cashpapish ñuca yuyaipica cancunahuanmi cani. Imatapish mana maipishcachun ruracushcata yachashpa, Cristopi cancuna sinchi feta charishcata uyashpapishmi cushicuni.
6 Chaimanta Amito Cristo Jesusta ima shinami chasquircanguichij. Chashnallataj paihuan shuj shinalla catichij.
7 Cancunaman yachachishca shinaca Jesuspi alli sapiyashca, alli shayachishca catichij. Cancunapaj fetapish sinchiyachichij, Diostapish pagui nichij.
8 Alli cuidarichij. Maijanpish cai pacha yachaicunahuan, yanga panda yuyaicunahuan trampata churaj shina cancunata urmachinman. Chaicunaca mana Cristo yachachishcacunachu. Ashtahuanpish runacunapaj costumbrecuna, cai pachapaj yuyaicunallami.
9 Dios ima shina cashcataca Cristomi tucuita ricuchin.
10 Paimantami cancunapish ima illajlla mana canguichij. Cristoca tucui gobiernocunapaj, autoridadcunapaj umami.
11 Cancunaca Cristopi feta charishcamantami circuncisionta rurachishca carcanguichij. Shinapish circuncisiontaca runacuna rurashca shinaca mana rurachishca canguichijchu. Ashtahuanpish cancunapaj juchayuj cuerpopaj munaita huashaman saquishpami circuncisionta rurachishcanguichij. Cai circuncisiontami Cristota catijcunaca rurachincuna.
12 Cancunaca Cristopaj bautismopimi pambashca carcanguichij. Shinallataj paihuan shuj shinalla cashcamanta, Diospaj poderpi feta charishcamantami cancunaca Cristohuan cutin causachishca cashcanguichij. Diosmi Cristotaca huañushcacunapaj chaupimanta causachirca.
13 Shinallataj cancunapaj juchacunamanta huañushca cajpipish, cancunapaj aichapi circuncisionta mana rurachishca cajpipish Diosmi Cristohuan tandalla cachun cancunamanca causaita curca. Diosca llaquishpami tucui ñucanchij juchacunata perdonarca.
14 Maquihuan quillcashca leytapish paica anchuchircami. Chai leyca achca mandashcacunatami charirca, ñucanchijpaj contrapishmi carca. Diosca llaquichina caspipi* Cristo huañushcamantami chai leytaca anchuchirca.
15 Chashnami gobiernocunatapish, autoridadcunatapish mishashpa libri lluchullata saquirca. Shinallataj paicunataca prezuta shina apashpami tucuicunapaj ñaupajpi ricuchirca.
16 Chaimanta cancunataca micunamantapish, ubyanamantapish, shuj fiestata ruranamantapish, llullu lunamantapish, sábado punllamantapish pi ama juzgachun.
17 Chaicunaca ima shamuna cashcata ricuchij llandullami can. Ashtahuanpish tucui caicunaca Cristopimi pajtarirca.
18 Gentecuna ricuchunlla humilde shina cajcunamanta, angelcunata adorajcunamantapish* cuidarichij. Paicunaca premiota ama japichunmi cancunata jarcasha ningacuna. Chai runacunaca paicuna imata ricushcallatami catincuna. Paicunapaj yanga yuyaicunallamantami jatun tucuncuna.
19 Chai runacunaca umahuanca mana shuj shinalla cancunachu. Umami cuerpo tucui imalla minishtishcata cun. Shinallataj mucucunahuan, angucunahuanmi cuerpotaca shuj shinallata ruran. Umami Diospaj podermanta cuerpotaca huiñachishpa catin.
20 Cancunaca cai pachapaj yuyaicunata mana catishpami Cristohuan huañurcanguichij. Shinaca ¿ima nishpataj cai pachapaj cajcuna shina causashpa caticunguichijyari? ¿Ima nishpataj mandashcacunatapish cazushpa caticunguichijyari?
21 “Ama japingui, ama probangui, ama tuparingui” nishcataca ¿ima nishpataj cazushpa caticunguichijyari?
22 Tucui caicunaca micujpi, ubyajpica chingarinllami. Cai mandashcacunaca runacuna yachachishcallami.
23 Cai mandashcacunaca alli yachaita cuj shinami can. Shinapish gentecuna paicunapaj mana alli munaicunata jarcarichunca mana ayudanchu. Cai gentecunaca paicuna yuyashca shinallami Diosta adoranata munancuna. Shujtajcuna ricuchunllami humilde tucuncuna. Chashna rurashpami paicunapaj cuerpota llaquichincuna.
Notacuna
^ “Llaquichina caspi” shimita huasha diccionariopi ricui.
^ O “angelcuna shina adorajcunamantapish”.
