Apocalipsis 9:1-21
9 Quinto ángel paipaj trompetata tocajpica jahua pachamanta cai allpaman shuj estrella urmashcatami ricurcani. Chai estrellaca jatun jutcupaj llavetami chasquirca.
2 Chai estrellaca jatun jutcutami pascarca. Chashna pascajpimi jatun hornomanta cushni llujshij shina chai jutcumantaca cushni llujshirca. Chai jutcumanta cushni llujshijpimi intipish, huairapish amsayarca.
3 Cushnimantaca langostacunami allpaman llujshirca. Chai animalcunaca cai allpapi tiyaj escorpioncuna autoridadta charishca shinallatajmi autoridadta chasquircacuna.
4 Paicunataca allpapi tiyaj qꞌuihuatapish, shuj plantallatapish, shuj yurallatapish ama llaquichichunmi mandarca. Ashtahuanpish Diospaj sellota frentepi mana charij gentecunallata llaquichichunmi mandarca.
5 Langostacunataca gentecunata huañuchichunca mana saquircachu. Shinapish pichca quillacunata gentecunata llaquichichunmi saquirca. Maijan runata escorpión canishpa llaquichij shinami langostacunaca llaquichirca.
6 Chai punllacunapica gentecunaca huañunatami yuyangacuna. Shinapish ima shina mana huañui tucungacunachu. Huañunata munajpipish huañuica mana japingachu.
7 Chai langostacunaca macanacuipaj allichishca caballocuna shinami carca. Paicunapaj umapica oro corona shinatami churashca carca. Paicunapaj ñahuicunapish gentecunapaj ñahuicuna shinami carca.
8 Paicunapaj ajchapish huarmicunapaj ajcha shinami carca. Paicunapaj quirucunapish leonpaj quirucuna shinami carca.
9 Pechopi churarishca churanacunapish fierro churanacuna shinami carca. Paicunapaj alascunapish caballocuna carretacunata aisashpa macanacuiman ricuj shinami huajiacurca.
10 Ashtahuanpish escorpioncuna shina venenoyuj agujacunayuj chupacunatami charincuna. Paicunapaj chupacunapica pichca quillacunata gentecunata llaquichingapajmi autoridadta charincuna.
11 Paicunata mandajca jatun jutcuta cuidaj angelmi. Paica hebreo rimaipica Abadón* shutimi. Cutin griego rimaipica Apolión* shutimi.
12 Primer aij nishcaca ñami pasashca. ¡Ricui! Caicunapaj qꞌuipaca ishqui aij nishcacunami shamunga.
13 Sexto ángel paipaj trompetata tocajpica oro altarpi caj gachucunamanta shuj rimashcatami uyarcani. Chai altarca Diospaj ñaupajpimi can.
14 Chai rimashcami trompetata charicuj sexto angeltaca: “Éufrates jatun yacu cꞌuchupi huatashca caj chuscu angelcunata cachari” nirca.
15 Chaimi quimsapi chaupishca shuj parte gentecunata huañuchichun chuscu angelcunata cacharirca. Chai angelcunaca chai horapaj, chai punllapaj, chai quillapaj, chai huatapajmi allichishca carcacuna.
16 Ñucaca caballopi tiyarishca mashna soldadocuna cashcatami uyarcani. 200 millones soldadocunami carca.
17 Muscuipi shina ricushca caballocunapish, caballocuna jahuapi tiyacujcunapish cashnami carca: caballocuna jahuapi tiyacujcunaca paicunapaj pechopica nina shina pucanicuj, jacinto rumi shina azul, azufre shina quillu fierro churanatami churarishca carcacuna. Caballocunapaj umaca leoncunapaj uma shinami carca. Paicunapaj shimimantaca nina, cushni, azufremi llujshicurca.
18 Quimsapi chaupishca shuj parte gentecunaca cai quimsa llaquicunamantami huañurca: caballocunapaj shimimanta llujshij ninamanta, cushnimanta, azufremantami huañurcacuna.
19 Caballocunaca paicunapaj shimipipish, chupapipishmi autoridadta charincuna. Paicunapaj chupaca culebra shinami can, umatapishmi charin. Chai chupahuanmi gentecunataca llaquichincuna.
20 Shinapish chai llaquicunahuan mana huañuj shujtaj gentecunaca paicunapaj ruraicunamantaca mana arrepintirircacunachu. Paicunaca demoniocunata* adoranataca mana saquircacunachu. Shinallataj oromanta, cullquimanta, cobremanta, rumimanta, caspimanta rurashcalla mana ricui tucuj, mana uyai tucuj, mana puri tucuj dioscunata adoranatapish mana saquircacunachu.
21 Huañuchinamanta, brujianamanta, huainayanamanta,* shuhuanamantapish mana arrepintirircacunachu.
Notacuna
^ “Abadón” shutica tucuchishca nisha ninmi.
^ “Apolión” shutica tucuchij nisha ninmi.
^ O “supaicunata”.
^ Griego rimaipica: “pornéia” ninmi. “Huainayana” shimita huasha diccionariopi ricui.
