Apocalipsis 18:1-24
18 Chai qꞌuipaca achca autoridadta charij shujtaj ángel jahua pachamanta uriyamucujtami ricurcani. Chai angelca pai achijnicushcahuanmi allpa pachata achijyachirca.
2 Paica sinchita caparishpami cashna nicurca: “¡Urmashcami! ¡Babilonia Jatun llajtaca urmashcami! Cai llajtaca demoniocuna* causanami tucushca. Chaipimi tucui mapa espiritucunapish, tucui pꞌiñashca jahuata volaj mapa animalcunapish miticuncuna.
3 Paipaj vinohuanmi tucui llajta gentecunata machachishca. Chai vinoca yallitaj huainayana* munaitami cun. Paihuanmi allpa pachapi mandajcunaca huainayarcacuna. Allpa pacha comerciantecunapish chai huarmipaj achca valishcacunahuanmi charijyarcacuna. Chashna valishcacunata charishcamantaca chai huarmica mana pingarinchu” nicurcami.
4 Shujtaj rimashca jahua pachamanta cashna nicujtami uyarcani: “Ñuca pueblolla pai rurashca juchapi mana chagrurisha nishpa, pai shinallataj mana llaquichishca casha nishpaca chaimanta llujshichij.
5 Chai huarmipaj juchacunaca ashtahuan ashtahuan mirarishpami jahua pachaman chayashca. Millaita rurashcamantami Diosca paitaca juzganga.
6 Pai rurashca shinallataj paiman tigrachichij. Pai imata rurashcamantaca ishqui cutinhuan tigrachichij. Ubyanata pai preparashca copallapitaj paipajpish ishqui cutinhuan preparaichij.
7 Chai huarmica paillatajmi jatunyarin. Achca charinacunatami charin. Chaicunata mirachinatapish mana pinganayachinchu. Paica llaquita apanataj, huacanatajmi can. Paipaj shungupica: ‘Ñucaca jatun tiyarinapi tiyacuj mandajmi cani, mana viudachu cani, mana nunca llaquilla cashachu’ nishpami catin.
8 Chaimantami shuj punllallapi paitaca llaquicuna japinga. Huañuipish, huacaipish, yaricaipishmi japinga. Shinallataj ninahuanmi paica tucui rupachishca canga. Paita juzgaj Jehová* Diosca poderyujmi.
9 Chai huarmihuan huainayashpa* causaj, paihuan achca charinacunata mana pingashpa mirachishpa causaj allpa pachapi mandajcunaca paita rupachishca cushnita ricushpami huacangacuna. Paimanta llaquirishpami pechopi huajtaringacuna.
10 Mandajcunaca chai huarmi shinallataj llaquichishca canata manchashpami carullaman shayashpa saquiringacuna. Paicunaca: ‘¡Llaquimari! ¡Llaquimari! ¡Babilonia, canca jatun llajtami carcangui. Poderyuj llajtami carcangui! ¡Diosca shuj horallapimari cantaca juzgashca!’ ningacunami.
11 Ashtahuanpish allpa pachamanta comerciantecunapish paicuna cꞌatunaman tucui apamushcata pi mana randijpimi chai huarmimantaca huacangacuna, llaquiringacuna.
12 Paicuna apamushca orota, cullquita, sumaj rumicunata, perlacunata, alli linota, morado telata, seda telata, pucanicuj telata, mishquijllata ashnacuj caspicunamanta imalla rurashcacunata, marfilmanta, sumaj caspicunamanta, cobremanta, fierromanta, marmolmanta imalla rurashcacunatapish pi mana randingachu.
13 Shinallataj paicuna apamushca canelata, India llajtamanta mishquijllata ashnacuj plantacunata, inciensota, perfumashca aceiteta, olibanota, vinota, aceite de olivata, alli harinata, trigota, vacacunata, ovejacunata, caballocunata, carretacunata, sirvij runacunata, shujtaj gentecunatapish ni pi mana randingachu.
14 Alli granocunapish ña mana cambajchu. Mishqui micunacunapish, sumaj charinacunapish cambajca ñami tucurishca. Chaicunaca huiñaipajmi chingarishca.
15 Chaicunata cꞌatuj comerciantecunaca chai huarmimantami charijyarcacuna. Paicunaca chai huarmi shinallataj llaquichishca canata manchashpami carullaman shayashpa saquiringacuna. Huacashpa, llaquirishpami
16 cashna ningacuna: ‘¡Llaquimari! ¡Jatun llajtahuan chashna tucushcata ricunaca llaquimari! ¡Paica alli linota, morado churanata, pucanicuj churanata churarishcami carca. Orohuan, sumaj rumicunahuan, perlacunahuanpish sumajta allichirishcami carca!
17 ¡Jatun charinacunaca shuj horallapimari chingarishca!’ ningacunami.
Barcota pushaj tucui capitancuna, barcopi tucui viajajcuna, barcota purichijcuna, mama cuchapi tucui trabajajcunapish carullapimi shayarishpa saquirircacuna.
18 Paita rupachishca cushnita ricushpami paicunaca: ‘¿Ima llajtataj cai jatun llajta shinaca cangari?’ nishpa caparircacuna.
19 Paicunapaj umapi ñutu allpata churarishpami huacashpa, llaquirishpa, caparishpaca: ‘¡Llaquimari! ¡Cai jatun llajtahuan ima tucushcata ricunaca llaquimari. Barcocunapaj tucui dueñocunaca paimantami charijyarcacuna! ¡Paica shuj horallapimari tucuchishca cashca!’ nircacunami.
20 ¡Jahua pachapi cajcunapish, jucha illajcunapish, apostolcunapish, profetacunapish ima tucushcamanta cancunaca cushicuichij! Chai huarmi cancunata imata rurashcamantami Diosca paitaca juzgashca” nicurcami.
21 Fuerzasapa shuj angelmi molino rumi shina jatun rumita marcashpa mama cuchaman cashna nishpa shitarca: “Babilonia jatun llajtaca chashnami rato urmachishca canga. Paica cutinca manataj ricuringachu.
22 Babilonia, canpica cantajcuna paicunapaj arpacunata tocashca, musicocuna tocashca, flautata tocashca, trompetata tocashcapish mana nunca uyaringachu. Canpica tucui laya oficiopi trabajaj artesanocunapish mana pi tiyangachu, molino rumipi cutashcapish ña mana ashtahuan uyaringachu.
23 Canpica ima lámpara cutinca manataj achijyachingachu. Novio rimashcapish o novia rimashcapish cutinca manataj uyaringachu. Cambaj comerciantecunaca cai allpa pachapica alli nishca runacunami carca. Canca brujiashpami tucui llajta gentecunata pandachishcangui.
24 Paimi profetacunata, jucha illajcunata, allpa pachapi tucui huañuchishcacunapaj yahuarmanta culpayuj carca” nircami.
Notacuna
^ O “supaicuna”.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “pornéia” ninmi. “Huainayana” shimita huasha diccionariopi ricui.
